Nawaranegm's Blog

عاجل عاجل عاجل

nawaranegm — Fri, 28 Nov 2008 12:48:04 +0000

فيه كتاب اسمه:

اعترافات قرصان اقتصادي: الاغتيال الاقتصادي للامم، بتاع جون بركنز، صادر عن دار الطناني للنشر الكتاب بيتباع في مكتبة مدبولي وتوزيع الاهرام

ونسخته الانجليزية اسمها:

Confessions of an Economic Hit

John Perkins

الكتاب ده اهميته في انه اعترافات واحد من داخل المؤسسة الرأسمالية الامريكية، وبيشرح بالتفصيل ازاي اقتصاديات العالم بتتخرب، وازاي احنا عالم تالت لحد دلوقت، ومين المستفيد، ودي اعترافاته هو شخصيا باللي هو عمله

ارجوكوا اقروه اتوسل اليكوا، قبل ما تتهموني بنظرية المؤامرة والامريكوفوبيا

وبيشرح تورط كل المؤسسات الامريكية بما فيها المجتمع المدني الامريكي، مهم جدا، وربنا يستر والراجل ما يتقتلش، الكتاب ده الافضل مبيعا السنة دي

بالنوسبة للبقر

nawaranegm — Fri, 28 Nov 2008 11:49:01 +0000

هو ليه اوباما هدد باكستان بانه ح يضربها من خلال الهند بعد كل الخدمات الجليلة اللي عملها برواز لامريكا بفرق توفيق الدقن بتاعه ده؟

وليه كبير منوفيا الكبرى اخد ميكروباظ حط فيه الجماعة وراحوا الهند يبوسوا الجدم ويبدوا الندم على غلطتهم في حج البقر؟

مع انهم ما غلطوش في حق البقر خالص، وللا راح يوريهم الشبه وللا ايه؟

اكيد اول ما نزل ارض المطار سجدوا له

وليه احمد عبد المعطي حجازي كتب مقال في الاهرام يقول اللي بيجمع بينا وبين الشعب الهندي كتير اهمها حب البقر فرض عليا افديه بروحي وعينيا؟

اه والله قال احنا الاتنين بنحب البقر ودي من الحاجات المهمة اللي بتجمع بينا

مع انه هو ذات نفسه بنفسه لنفسه اللي كان بيكتب يشتم في رعاة الغنم المنتمين للقرن السابع الميلادي! اه وربنا

طب يعني هي البقرة احسن من الخروف في ايه؟ وللا هو مش بيحب الضاني؟ هو فعلا تقيل، بس ممكن يشويه، ثم فيه معيز، ده النيفة دي لوز، ولبن المعيز مفيد قوي

ثم احنا مش بنحب البقر في مصر احنا بنحب الجاموس تحت زعامة البقرة الضاحكة…طعمتها لذيذة لافاشكيري

هو الاعلان ده راح فين؟

بالمختصر وعشان نجيب من الاخر

nawaranegm — Fri, 28 Nov 2008 05:16:41 +0000

بالنوسبة لاحداث عين شمس، وتبعاتها وتبعات اللي قبلها واللي قبل اللي قبلها، انا خلاص باكره المسلمين وباكره المسيحيين وباكره كل الناس دلوقت

باحب اليهود…ناس لطيفة وبتعمل سينما دمها خفيف وكل حاجة يحطوا ايدهم عليها ويقولوا دي بتاعتي زي العيل الغلس، حتى الاهرامات بيقولوا بتاعتي، وما يردوش بقى بعد كده، انت تقعد تتشال وتتحط وهم خلاص قالوا بتاعتي مرة وهي المرة، والغريبة ان كل الناس بتقتنع بكلامهم، حتى احنا، بينما اقوى معارضين لوجود اسرائيل يهود برضه، وماسكين اقتصاد العالم ويقتلوا الناس ويقولوا احنا مظلومين، لا وبرضه الناس مقتنعة انهم مظلومين، حتى احنا برضه، ويرهبوا الناس ويقولوا احنا بنحارب الارهابيين، ويجوعوا الناس ويقولوا احنا بنعمل لخير الانسانية، واحنا طيبين

شوف القدرة

واللي يفقع ان كل الناس مصدقين.

ناس لطيفة موت

انا باحبهم، دول حتى دمهم خفيف

الا كان فيه واحدة بتقول لي اللي هجموا على المسيحيين في عين شمس كانوا ماسكين طبلة وعمالين يقولوا بالروح بالدم نفديك يا اسلام

!!!!!!!!

اسلام الشاطر يعني؟ هم المسيحيين اللي انضربوا كالعادة دول كانوا زمالكاوية؟

عموما مش لازم يعني يبقى فيه سبب ان مسيحي مصري ينضرب…كفاية انه مش لابس الطاقية، مش لابس الطاقية ليه؟

قلتِ لهم ما قلتِ عن مسيرة الأشجار .. فاستضحكوا من وهمكِ الثرثار

nawaranegm — Thu, 27 Nov 2008 17:02:38 +0000

جئتُ إليك .. مثخناً بالطعنات والدماءْ

أزحف في معاطف القتلى، وفوق الجثث المكدّسة

منكسر السيف، مغبَّر الجبين والأعضاءْ.

أسأل يا زرقاءْ ..

عن فمكِ الياقوتِ عن، نبوءة العذراء

عن ساعدي المقطوع.. وهو ما يزال ممسكاً بالراية المنكَّسة

عن صور الأطفال في الخوذات.. ملقاةً على الصحراء

عن جاريَ الذي يَهُمُّ بارتشاف الماء..

فيثقب الرصاصُ رأسَه .. في لحظة الملامسة !

عن الفم المحشوِّ بالرمال والدماء !!

أسأل يا زرقاء ..

عن وقفتي العزلاء بين السيف .. والجدارْ !

عن صرخة المرأة بين السَّبي. والفرارْ ؟

كيف حملتُ العار..

ثم مشيتُ ؟ دون أن أقتل نفسي ؟ ! دون أن أنهار ؟ !

ودون أن يسقط لحمي .. من غبار التربة المدنسة ؟ !

تكلَّمي أيتها النبية المقدسة

تكلمي .. باللهِ .. باللعنةِ .. بالشيطانْ

لا تغمضي عينيكِ، فالجرذان ..

تلعقَ من دمي حساءَها .. ولا أردُّها !

تكلمي … لشدَّ ما أنا مُهان

لا اللَّيل يُخفي عورتي .. ولا الجدران !

ولا اختبائي في الصحيفة التي أشدُّها ..

ولا احتمائي في سحائب الدخان !

.. تقفز حولي طفلةٌ واسعةُ العينين .. عذبةُ المشاكسة

( – كان يَقُصُّ عنك يا صغيرتي .. ونحن في الخنادْق فنفتح الأزرار في ستراتنا .. ونسند البنادقْ وحين مات عَطَشاً في الصحراء المشمسة .. رطَّب باسمك الشفاه اليابسة .. وارتخت العينان !)

فأين أخفي وجهيَ المتَّهمَ المدان ؟

والضحكةُ الطروب : ضحكته..

والوجهُ .. والغمازتانْ ! ؟

أيتها النبية المقدسة ..

لا تسكتي .. فقد سَكَتُّ سَنَةً فَسَنَةً ..

لكي أنال فضلة الأمانْ

قيل ليَ اخرسْ ..

فخرستُ .. وعميت .. وائتممتُ بالخصيان !

ظللتُ في عبيد ( عبسِ ) أحرس القطعان

أجتزُّ صوفَها ..

أردُّ نوقها ..

أنام في حظائر النسيان

طعاميَ : الكسرةُ .. والماءُ .. وبعض الثمرات اليابسة .

وها أنا في ساعة الطعانْ

ساعةَ أن تخاذل الكماةُ .. والرماةُ .. والفرسانْ دُعيت للميدان !

أنا الذي ما ذقتُ لحمَ الضأن ..

أنا الذي لا حولَ لي أو شأن ..

أنا الذي أقصيت عن مجالس الفتيان ،

أدعى إلى الموت .. ولم أدع إلى المجالسة !!

تكلمي أيتها النبية المقدسة

تكلمي .. تكلمي ..

فها أنا على التراب سائلً دمي

وهو ظمئً .. يطلب المزيدا .

أسائل الصمتَ الذي يخنقني :

ما للجمال مشيُها وئيدا .. ؟!

أجندلاً يحملن أم حديدا .. ؟!

فمن تُرى يصدُقْني ؟

أسائل الركَّع والسجودا

أسائل الركَّع والسجودا :

ما للجمال مشيُها وئيدا .. ؟!

أيتها العَّرافة المقدسة ..

ماذا تفيد الكلمات البائسة ؟

قلتِ لهم ما قلتِ عن مسيرة الأشجار ..

فاستضحكوا من وهمكِ الثرثار !

وحين فُوجئوا بحدِّ السيف : قايضوا بنا ..

والتمسوا النجاةَ والفرار !

ونحن جرحى القلبِ ،

جرحى الروحِ والفم .

لم يبق إلا الموتُ ..

والحطامُ ..

والدمارْ ..

وصبيةٌ مشرّدون يعبرون آخرَ الأنهارْ

ونسوةٌ يسقن في سلاسل الأسرِ،

وفي ثياب العارْ

مطأطئات الرأس.. لا يملكن إلا الصرخات الناعسة !

ها أنت يا زرقاءْ

وحيدةٌ … عمياءْ !

وما تزال أغنياتُ الحبِّ .. والأضواءْ

والعرباتُ الفارهاتُ .. والأزياءْ !

فأين أخفي وجهيَ المُشَوَّها

كي لا أعكِّر الصفاء .. الأبله.. المموَّها.

في أعين الرجال والنساءْ !؟

وأنت يا زرقاء ..

وحيدة .. عمياء !

وحيدة .. عمياء

رد احمد ماهر على ما اشيع من انقسام داخل حركة ستة ابريل

nawaranegm — Thu, 27 Nov 2008 03:33:01 +0000

قبل ما انشر الرد، انا مش عايزة جليطة وتكبر وخنفان من توجهات سياسية وناشطين فشلوا في اللي نجح فيه مجموعة من الشباب وبدل ما الواحد يفرح بيهم يقوم يتنطط عليهم، ماحدش قال ان شباب ستة ابريل مسييسين ولا مفكرين ولا حد فيهم ماركس ولا حسن البنا ولا حد فيهم ادعى حاجة زي دي، بس هم شباب قرر يبقى ايجابي ويشارك انشالله حتى بتواجده عشان بلده تبقى احسن، والحقيقة انا سافرت معاهم في سراندو وشفت الاسلوب اللي بعض الناس اللي كانت موجودة بتتعامل معاهم بيه: انت يابني قاري ايه؟ انت يابني تصنيفك ايه؟ انت يابني ثقافتك ايه؟ وتسفيه وتغليس لحد ما مشيرة ردت على واحد فيهم وقالت له: انت ما تقعدش تجيبني في ندوات وترغي في ودني، انا عايزة اعمل حاجة، قول لي اعملي حاجة مفيدة وانا انزل من بيتي واروح اعملها

طيب ده سلوك المعارضة المصرية تجاه شباب قرر انه بدل ما يروح حفلة تامر حسني وللا يشرب بيرة في حفلة منير يعمل حاجة مفيدة للبلد، وعملوا نشاطات كتير يشكروا عليها، غير الاضراب بتاعهم اللي كان ناجح، ما اتأخروش في اي حاجة ولا في اي قضية

لما العيال دي يجيلهم دعوة من الخارجية الامريكية بوصفهم اهم وانشط واشطر..الخ، والله انا لو مكانهم وفي ظل التسفيه المتعمد والتربص الدائم المحيط بيا من المعارضة قبل الحكومة كنت ح اتلوح، خصوصا لما ابقى تلاتة وعشرين اربعة وعشرين سنة

لكن اللي حصل ان معظمهم ما اتلوحوش ولا حاجة، وقالوا احنا مش بنتعامل مع حكومات! يعني الكلام بتاع: انت يابني قاري ايه؟ وفاهم ايه؟ وتنظيمك ايه؟ وكادرك ايه؟ وكل القرف ده مالوش اي لازمة ولا له محل من الاعراب، ومش كل فاشل يستكبر ان غيره ينجح في حاجة، ولو المعارضة المصرية مخلصة فعلا المفروض تتعامل معاهم باحترام اكتر من كده وتعترف بان الحركة نجحت في اللي هم فشلوا فيه وتنسق معاهم، بدل ما تسيبهم لقمة للي يسوى واللي ما يسواش والنهاردة هم صبروا وجم على نفسهم وما انبهروش بالدعوة ماحدش عارف لما يفيض بيهم الكيل ح يعملوا ايه؟ انكت منهم وراح يشحت من الامريكان

وفي كلام احمد ماهر ابلغ رد:

مفيش اساسا انقسام ده كله حوار و عنوان مثير كعادة فاروق الجمل اللى بيحب يحور فى الكلام عموما مش هاطول عليكى يا نواره الحركه زى ما انتى قولتى مش حكر على حد الحركه اتكونت من الشباب اللى دعى لاضراب 6 ابريل و حب يكمل مش اللى قال انا حرمت و توبت و بطلت سياسه و حطينا مبادىء و اهداف و كمان لينا هيكل و مسئولين و حوارت كتير مش مكانها على النت اساسا و الجديد بقى يا نواره ان معظم الاعضاء الجداد دلوقتى ماشاركوش فى الدعوه للاضراب و فيه اعضاء ماعندهومش نت اساسا.. ولا كمبيوترتقوليلى ازاى .. اقولك هاحكيلك لما اشوفك .. اصل اكيد هاشوفك فى يوم من الايام المهم ان فيه ناس دعوا للاضراب.. و الجروب اتعمل و حصل اللى حصل فى 6 ابريل فيه ناس كملت فى فكرة تكوين حركه شبابيه مستقله تهدف للتغيير السلمى و ناس اتمسكت بالصدفه و خارجين عاملين فيها مناضلين بالاسم و ناس بطلوا و حرموا و تابوا و ناس مقتنعين بالفكره و مصممين على الانتشار و التوعيه المستمره وسط الناس فى الشارع بهدوووء .. و هدفها فى الاخر هو التغيير زى ما كلنا عايزين ووسائلهم متعدده و مبتكره بعضهم ليه بعض الخبره السياسيه من 2005 و بعضهم مدونين .. و الاغلبيه منهم هما اللى شاركوا لاول مره فى حياتهم فى حدث سياسى يوم 6 ابريل او فى الدعوه ليه يعنى اللى دعى للاضراب يشكر و زى الفل لكن عضو الحركه هو اللى كمل شغل بعدهاو عضو الحركه هو اللى بيفكر مع باقى اخواته و يناقش و ياخد دور و ينزل ينفذ مش اللى يقعد يتمنظر على الناس و يقول انا اتسجنت كام يوم فى اضراب 6 ابريل و هو اساسا بطيخه و اغلبية الاعضاء رفضوا المشاركه فى مؤتمر منظماه الخارجيه الامريكيه .. و زى ما هايفيدوا .. برضه هايستفادوا اغلبية الاعضاء اتناقشوا على الملأ و رفضوا يبقى اللى مصمم يروح مش تبع الحركه و اللى فرحان بالاضواء و امريكا و السبوبه يتحمل هو النتيجه يعنى هو يروح و يتظبط و احنا هنا نشيل مسئوليته ايه رايك؟؟

————

انتهى رد احمد ماهر

انا عايزة بس اقول حاجة، اللي يعارض حكومته يبقى عيب عليه يروح يتمسح وياخد دعم من حكومات تانية حتى لو حكومة الكونغو

واللي بيروح امريكا يستنجد بيها على مبارك يبقى ايه الفرق بينه وبين الجلبي واياد علاوي؟ وانا الحقيقة مش ح استجيب للارهاب الفكري اللي بيمارسه البعض لمجرد ان الواحد بيوصف الامور وبيسمي الاشياء بمسمياتها: دي اسمها خيانة، مالهاش اسم تاني، انت رايح تستجلب قوة خارجية، سواء بقى بالسلم وللا الحرب، على بلدك

حاجة كمان، مبارك بيتعامل مع الادارة الامريكية، والحقيقة هو له صفة وله عذر كمان انه يتعامل مع الادارة الامريكية، بس مبارك قاعد في الحكم اساسا بسبب الادارة الامريكية، ولو علاقة اي معارض باي شيء حكومي امريكي شبه علاقة مبارك تبقى الروس اتساوت في النقطة دي ونبتدي المقارنة بقى ما بينه وبين مبارك في اي حاجة تانية غير ان مبارك قاعد على قلب شعبه بغير رغبتهم بسبب دعم الادارة الامريكية، لان اللي رايح يقول لامريكا هاتيني بدل مبارك ما يصحش يعيب على مبارك تزوير الانتخابات وفرض نفسه على شعب مش عايزه لانه هو بيعمل نفس الحكاية، ولو المنافسة وصلت للنقطة دي بصراحة يبقى مبارك يكسب

على الاقل اخدنا عليه واخد علينا وعرفنا طبع بعض، وايه الاكل اللي بيحبه وايه الاكل اللي بيكرهه، وبينام الساعة كام الضهر

احنا مش ح نقعد نغير في وكلاء الادارة الامريكية هنا..هي مش غية يعني

ووالنبي بلاش الكلام بتاع سعد زغلول ومصطفى كامل ده عشان انا باتنقط، خللي عندنا كرامة بقى، واقع الامر ان مافيش احتلال امريكي في مصر، احنا ليه مصممين نتعامل مع امريكا على انها حكومة الانتداب؟ الناس نفسهم ما قالوش كده، ده ايه تلقيح الجتت ده؟

ولا انقسامات ولا نيلة اللي خايف على نفسه يوعى

nawaranegm — Wed, 26 Nov 2008 13:00:24 +0000

من غير تسفيه في حركة ستة ابريل لو سمحتوا، الحركة منقسمة على نفسها ما بين رافض لدعوة الخارجية الامريكية، وما بين قابل

ولا انقسامات ولا نيلة، اللي خايف من النجاسة يوعى ويروح يكون حاجة نضيفة بعيد عن النجاسة

وما تعملوش زي حزب الغد وتفرجوا عليكوا الناس، النضيف نضيف والنص نص نص والملوث ما نعرفهوش

حتى ممكن تسموها كده، واللي شبطان في الاسم يطفحه

اللي خايف على نفسه يوعى

هههههههههه احسن احسن

nawaranegm — Wed, 26 Nov 2008 12:26:23 +0000

احسن…احسن…احسن..عشان كلاوي، اللي هم عم مينا ومراقب مصري وطفاطيفو يبطلوا عبط

انا كنت فاكرة نفسي اعبط واحدة في الدنيا، بس دايما ربنا يوري الواحد ان القوي فيه الاقوى منه، قال ومصطفى داخل يقول لي دلوقت لما فاق: ايه ده؟ انا مش فاهم حاجة!

ها؟

قلنا كده وللا ما قلناش؟ قلنا الادارة الجديدة ح تطلع ميتين ابونا وللا ما قلناش؟

قلنا الادارة الامريكية باختلافاتها كلها مش ح تسمح لمعارضة حرة تتواجد في مصر من غير ما تحط ايدها عليها وتبلعها في كرشها وعشان كده بيدوا تمويل لاي كلب ماشي في الشارع وهم مش مستخسرين وللا ما قلناش؟

قلنا مش ح يسمحوا لحاجة تتكون من غير ما يعرفوا ابعادها وراسها ورجليها وللا ما قلناش؟

قلنا اللي بيسمح لنفسه انه يتبلع يبقى ايه؟ يبقى ايه؟

قلنا وللا ما قلناش

لالالالالالالالالالالالالالا مافيش داعي لنظرية المؤامرة

ح يموتونا يا كلاوي

ما تبقاش شكاك قوي كده

اممممممممممممم

nawaranegm — Wed, 26 Nov 2008 11:59:13 +0000

يوم الخميس 27/11 الساعة اتناشر رايحين للنائب العام تاني

nawaranegm — Wed, 26 Nov 2008 04:36:52 +0000

عشان محمد عادل، يوم الخميس الساعة اتناشر، ح نروح له تاني، انا مش فاهمة هو محمد عمل ايه عشان يتبهدل كده؟ انا ما شفتش عليه ولا عرفت عنه غير شوية رسايل جايكو متخلفة لا تعني اي شيء غير انه واحد بيفضفض عن مكنون نفسه بس بغضب شوية

بس اما يطلع…ح اعلقه من رموشه عشان يحرم ياخد راحته ويفضفض باللي مضايقه تاني على الجايكو

المفروض يكتم في قلبه لحد ما يطق

واللي فينا بيكتم في قلبه يبقى ما يجيش…اي حد فينا ممكن يبقى مكانه وما يلاقيش اللي يقف جنبه

هدية من الشعب الامريكي

nawaranegm — Mon, 24 Nov 2008 23:31:10 +0000

حاجة بقت تقرف…ايه النجاسة دي؟ الواحد حاسس ان البلد بقت كلها كنيف وكل الناس متعاصة بالقرف، عبيط اللي يتوضى في البلد دي…هو الشعب الامريكي مش ح يرحمنا من هداياه بقى؟ هي مش دي ضرايبه اللي بيشتغل ليل نهار عشان يدفعها؟ ما يعمل بيها لنفسه التأمين الصحي اللي عمالين يعيطوا عليه وكل واحد يترشح في الانتخابات يجري ريقهم عليه، ما يعمل بيها مدارس حكومي بدل تعليمهم المعاتيهي اللي واخد السيط ولا الغنا، ما يلموا بيها الهومليس اللي عندهم قبل ما يلموا المتسولين اللي عندنا، متسولينا احنا اولى بيهم، ما يعملوا بيها شاندوشتات حلاوة بالقشطة….انما مستلمينا بدين ام المعونة النجسة بتاعتهم لما لطخوا لنا البلد كلها بهداياهم البرازية لما خللوا البلد كلها متسولين وكمان اللي يعترض على التسول يبقى مجنون ومؤمن بنظرية المؤامرة

اععععععععععععععع