بالنوسبة للسياسة التعليقات في المدونة

معلش والنبي يا شباب عشان مش كل شوية حد يبعت لي على الميل يقول لي: شيلي التعليق الفلاني شيلي التعليق العلاني..احنا خايفين عليكي
انا معتزة جدا بالاهتمام والمشاعر الطيبة دي بس، هي مدونتي مدونة مش حزب ولا حاجة، وجبهة تهييس وكل حاجة بس لها قوانين برضه انا اللي حاطاها:
نشر كافة التعليقات وعدم حذف اي تعليق الا:
1- تعليقات تحتوي على طائفية او عنصرية
2- تعليقات فيها خوض في اعراض ناس بريئة
3- تعليقات لمدونين بيدخلوا يشتموا بعض عندي لاني مش فاتحاها قهوة
بالنسبة لشخصي الضعيف انا مش باشيل اي تعليقات تمسني من قريب ولا من بعيد وده له علاقة بطبيعة شخصيتي، حضراتكوا انا من الناس القليلة اللي مش بتزعل من الشتيمة، تقدر تسميها تناحة، انعدام دم، اي حاجة بس انا ليا وجهة نظر
لو فكرت في الشتيمة ح تلاقيها شتيمة
شتيمة يعني شتيمة..طب لما الشتيمة شتيمة ايه اللي يضايق فيها؟
الواحد بيتضايق لما يبقى فيه حاجة ومكسوف منها ولما حد بيعايره بيها بيزعل لانه مش عايز يفتكرها مثلا
طيب الشخصيات اللي بتدخل تشتم الشتيمة دي يا اما كدب يا اما حقيقة
يعني مثلا ، مثلا عشان ما اخدش حياءكوا ح اضرب امثلة خفيفة
نوارة كلبة…طب يعني هو انا ظبطت نفسي باهوهو؟ ماهو انا انسان مش كلبة، طب ايه اللي يزعل؟
طيب نوارة قليلة الادب…آه انا قليلة الادب ومش متضايقة من نفسي اني قليلة الادب انا مبسوطة بنفسي كده، طب ايه اللي يزعل؟
فيه شتايم تانية بتبقى نابية قوي، طيب انا ايه اللي يزعلني؟ ماهو اللي بيقول الفاظ نابية هو انا اللي قلتها؟
فيه شتايم بتبقى اتهامات، طب برضه ايه اللي يزعل ما انا اولي معروف واخري معروف وما عنديش اسرار ولا حاجة اتكسف منها ولا استعر منها ولا دراع بيوجعني ولو فيه اتهام مش صحيح كل الناس ح تبقى عارفة انه مش صحيح، يعني لو دخل واحد وقال: نوارة اللي قتلت سوزان تميم..ايه اللي يزعلني انا؟
يعني فيما يخص الحاجات اللي انا عارفة انها مش فيا مش ح ازعل لاننا عارفة انها مش فيا، فيما يخص الحاجات اللي انا عارفة انها فيا، سر كده بيني وبينكوا اول مرة في حياتي اقوله، انا باحب نفسي، معلش يعني انا عارفة انها كلمة جامدة، بس انا معتزة بنفسي والحمد لله، ويمكن عشان كده انا باحب الناس كلها، لان مشاعرك تجاه نفسك بتاثر على مشاعرك تجاه الناس، وحتى الحاجات اللي ناس تانية ممكن تشوفها حاجة وحشة تصل الى انها ممكن تبقى شتيمة انا باحبها ومش متضايقة منها فيبقى ازعل ليه؟
وعليه فانا مش ح امسح التعليقات، سواء اللي بتشتمني، او اللي بتسفل على امة الله الفقيرة، او اي حاجة
انا بامسح التعليقات اللي فيها شتيمة لغيري لان المعتاد ان الناس بتزعل، لكن انا مش بازعل، عشان كده قلت اللي عايز يشتم يتفضل يشتمني
ثم انا يعني واحد مكلف ذات نفسيته وداخل مدونة واحدة رغاية زيي بوستاتها قد اللحاف وفي اليوم بتنزل عشرميت بوست ويا قلب امه قاعد يقراهم واحد واحد وكلف خاطره وعمل اكاونت على الجوجل عشان يدخل يشتمني،اقوم اكسر خاطره وامسح تعليقاته؟ لا بجد وربنا وربنا ما باهرج
انا فيه مدونين باستبضنهم مش بادخل عندهم خالص، وفيه مدونات كتير باحبها وباقراها كلها بس ماليش خلق اكتب تعليقات، ولما واحد بيكتب كلام فارغ بصراحة ما باهتمش اني اقراه اصلا عشان اعلق عليه
فده اهتمام بالغ مشكور عشان يشيل نفسه وييجي يعلق عندي ولو بالشتيمة لازم اكون شخصية محورية في حياته، او على الاقل المدونة هي مدونة مهمة بالنسبة له، طيب يعني مش كتر خيره؟
ده فيه معلقين تقريبا اترفدوا مش شغلهم عشان مشغولين يدخلوا عندي، حتى لو ح يشتم واضح اني باقوم بدور البطولة في حياته ولا رشدي اباظة
انا شاكرة جدا لكل الميلات اللي جات لي بتقول لي امسحي تعليقات فلان وعلان وناس اتصلت بيا في التليفون، على راسي وعيني معزتكوا ليا بس دي قوانين ما اقدرش اخل بيها
وبعدين انا لما سمعت كلامكوا وعملت مودريشن عشان انتوا دخلتوا تقولوا لي احنا متضايقين من بهيج ندمت بعد كده وقلت يا ريتني ما عملت كده، لحاجة في نفسي يعني، فانا قررت اني معلش امشي بدماغي شوية على الاقل في ادارة المدونة، اما في الاراء فاحنا بناخد وندي مع بعض وانا على اتم استعداد اني لو لقيت نفسي غلطانة في راي اني اتراجع عنه واشكر كل اللي يلفت نظري لغلطي قبل ما يحييني على راي عجبه
Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s


%d bloggers like this: