انا مش عارفة ارد ازاي على العشوائيات دي

خمسة في المية من الامريكان بروح امهم عندهم اكتئاب؟
يا جمالي يا سكمنس
اسم الله مخضوضين عشان خمسة في المية عندهم اكتئاب؟ طيب ارد ازاي على العشوائيات دي؟ دول ناس مبالغ فيهم فعلا
احنا عندنا ملايين من الرجالة سكان العشوائيات متلقحين على ضهورهم في العشش ما بيقوموش غير عشان يضربوا نسوانهم وياخدوا منهم فلوس يشربوا بيها بانجو ويحقنوا بيسة
مش عشان هم ولاد كلب بالطبيعة، عشان هم مكتئبين
عندنا ملايين من البشر مستنيين اي ست ترقع بالصوت في ميكروباص وللا اتوبيس عشان ينزلوا ضرب في الضحية ويفشوا غلهم…مش عشان جدعان، عشان مكتئبين
عندنا ملايين من الشباب بيمشوا في الشارع ما يعملوش حاجة غير يحكوا لا مؤاخذة نفسهم في اي شيء مؤنث في الشارع انشالله فرخة وللا حيطة مش عشان مكبوتين، عشان مكتئبين
عندنا ملايين من الستات بتجري ورا عيلها اللي عنده تلات سنين في الشارع عشان تعجنه وتنطط راسه زي كورة السلة مش عشان قاسية وقلبها حجر، عشان مكتئبات
ملايين من اللي سايقين العربيات يكسر عليك ولما تجيب الحق على نفسك وتقول له معلش ياسيدي انا اللي اسف يقول لك وانا اعمل ايه بأسفك يا …امك ويجري وراك في الشارع عشان يضايقك، مش عشان منحطين خلقة ربنا، عشان مكتئبين
الاف من الشباب اللي شايلين في شنطة عربيتهم كرابيج وعصي عشان في اول فرصة ينزلوا يكسروا اي ازاز عربية صاحبها مناخيره معووجة على الشمال، مش عشان امهم زلطتهم بلطجية، عشان مكتبين
وادي احنا اهو
زي الفل مالنا؟ ماله الاكتئاب؟ ده حتى مرض الفنانين والعظماء والمبدعين
وادي احنا عمالين نبدع اهو لما الابداع اشتكى، والامريكان نازلين دبح في مخاليق ربنا وكمان بروح امهم زعلانين ان خمسة في المية مكتئبين وهم عايشين عوالة على ثروات التعساء من امثالنا اللي مالهمش غير الشبشب الامريكاني المألوظ
واحنا كل يوم نصحى نلاقي الهرم في الغردقة ونهر النيل تحت السرير وهم كمان اللي مكتئبين
Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s


%d bloggers like this: