امراض الطبقة المتوسطة لا تمثل الشعب المصري

عاجل:
مدونتي مش بتنزل البوستات الجديدة ولما اعمل سيف للبوست يقول لي
form errors
الفورم ايرورز دي تيجي منين؟ المهم اني لما باعمل ايديت بيتعمل ايديت، كمان مدونة شهروزة اتوقفت وكمان وقفوا لها حساب الايميل بتاعها
لا بقى
كده محتاجين تصييح جامد يا شباب، اكتبوا على مدوناتكوا لجوجل جوابات لان كده شهروزة الاول وبعدين انا بعدها بتاني يوم، والموضوع مش موضوع شكاوى بقى معلش، جوجل مليانة حاجات خارجة عن القانون بما فيها جنس الاطفال المحرم دوليا واللي بينزله على الكمبيوتر بتاعه بيتحبس

الطبقة المتوسطة تحترم نفسيتها بقى وتتلم، هم اصلا 15 في المية وماسكين كل حاجة ونازلين عمايل زي الناس في دماغنا

انا مستاءة جدا من حلقة العاشرة مساء النهاردة
الموضوع وما فيه ان مجلس الوزرا عمل استطلاع رأي على عينة من المصريين وطلعت النتيجة كالآتي:
هل انت سعيد في حياتك؟
الحمد لله (80%)
طب راضي عن وضعك الاقتصادي؟
بصراحة لا (75%)
هل انت فخور انك مصري؟
اه طبعا فخور قوي اني مصري (80%)
مستعد لو قامت حرب تموت عشان مصر؟
طبعا (80%)
تحب تشتغل في القطاع العام وللا الخاص؟
الخاص
تحب نظام الخصخصة وللا القطاع العام؟
العام
طيب انا شايفة النتائج دي منطقية جدا والمفروض ان اي حد مصري بينزل الشارع وبيركب مواصلات وبيتكلم مع سواقين التاكسي (ومش لازم يشتغل في العشوائيات يعني) يبقى فاهم الكلام ده جاي منين
نفسي اعرف بقى ايه وجه السخرية والتريقة من الاستاذة منى الشاذلي والدكتور الرخاوي والاستاذ ايمن الصياد على المصريين
ومرة يتهموهم انهم فشارين وكدابين، ومرة يقولوا الكلام متناقض، ومعقولة يعني المصريين فخورين بمصريتهم اكتر من الالمان امال بيرموا نفسهم في البحر ليه؟
طيب هم بيرموا نفسهم في البحر وبيحبوا مصر، وهم هربانين من الفقر مش هربانين من مصر، واللي هم ما استكملوهوش في وصلة السخرية من المصريين ان فيه احصائية بتقول ان المصريين اقل الجنسيات المهاجرة تخلي عن جنسيتهم الاصلية، وانهم ما بيعملوش كده غير في الدول اللي بتجبرهم على انهم يبقى عندهم جنسية واحدة وبيبقى اختيارهم الاول انهم يرجعوا ولو ما ينفعش يرجعوا بيضطروا يتنازلوا عن الجنسية المصرية، ولما استطلعوا رأي موظفين السفارات قالوا المصريين اللي بتخلوا عن جنسيتهم بييجوا السفارة وهم بيعيطوا، ولما بيقطع الباسبور على الشط لما بيوصل ايطاليا مش بيقطع جنسيته المصرية ده بيقطع اي وسيلة ترجعه تاني للفقر، زي ما تقول كده بيرمي بلاه على البلد اللي رايحها
واللي كمان هم مش واخدين بالهم منه، ان المصريين مش بيهاجروا الى ابد الابدين، دايما بيرجعوا، ودايما بيبقوا مهتمين ان لما ربنا يفتح عليهم في الغربة يبقى عندهم بيت هنا في مصر، ولازم يبقى بيت ملك
انا اتضايقت جدا وعيطت
كون ان الطبقة المتوسطة ساخطة ومش بتحب مصر ومخنوقة منها ومحتقرة الشعب المصري وكل واحد شايف نفسه خسارة في البلد، دي امراضهم هم ياريت ماحدش يسقطها على الشعب المصري لانهم مش بيمثلوا الشعب المصري، دول حتى ليل نهار يقولوا احنا بنضمحل…ياللا في داهية
انا اشتغلت فترة في العشوائيات، والناس فعلا دي اجاباتها: الحمد لله احنا احسن من غيرنا كتير….يوووه ده الدنيا ياما فيها بلاوي ده احنا في نعمة…بس لابد من كل بد تركبوا لنا عداد النور….وتساعدونا عشان جوزي بيعمل غسيل كلوي ومش معايا تمن الدوا…لو ينفع الواد اخويا يسافر في اي حتة يجيب قرشين….بس بلاش الخليج عشان مش بيحبوا مصر….مصر ح تلعب النهاردة مع الكاميرون…مصر ام الدنيا
طب اقول لكوا حاجة
في الاول خالص مالص، زمااااااان اول ما اشتغلت هناك، ايام ما كان اسطبل عنتر ده ادغال، اهالي اسطبل عنتر ما كانوش بيرضوا يتصوروا (دلوقت اقتنعوا بجدوى التصوير ومش كلهم برضه، فيه لسة بيزعقوا لنا لو صورناهم) عارفين ليه ما كانوش بيرضوا يتصوروا؟:
انتوا عايزين تصوروا عفانتنا عشان تشوهوا سمعة مصر؟ مصر فيها حتت حلوة كتير…مش كل المصريين زينا…امشوا من هنا يا ولاد الكلب يا اسرائيليين
انا عايزة افهم ايه العجيب في ان المصريين بيقولوا احنا مستعدين نموت عشان مصر لو حرب قامت؟
اولا المصريين ما عندهمش اي مانع يموتوا لاتفه السبب، واللي مش مصدق يشوف الناس بتعدي الشارع ازاي، دول ناقص يحبوا على رجل اللي سايق عشان يموتهم، ونسبة الخوف من الموت عندنا طول عمرها قليلة، ثم بقى انا بالاقي كتير قوي، خصوصا من اللي الغلابة، نفسهم ومنى عينهم ان يحصل حرب! نوع من انواع الاكسايتمنت يعني، الحقيقة مافيش غير الطبقة المتوسطة هي اللي بتخاف من الحرب، واللي فوقيها طبعا، اللي فوقيها انا مش باعتبرهم مصريين اصلا، المهم، اللي خايف من الحرب خايف عشان عنده حاجة يخسرها، لكن اللي انا اشغلت معاهم (خصوصا العيال بتوع الاحداث) حاسين ان الحرب دي بقى ح تبقى لعبتهم، وفرصتهم الوحيدة عشان يبقوا ابطال والبلد كلها تتوقع في عرضهم، عاملين زي اللي امه بتضطهده وبتطلع عينه وبتفضل اخوه عليه، ونفسه ومنى عينه انها تعيا عشان يتبرع لها بكليته ويموت عشانها بس عشان تعرف قيمته وتحبه زي ما هو بيحبها
وهم محقين فعلا
مين اللي مشي على الالغام بالالاف وصد بجسمه فوهات المدافع في حرب تلاتة وسبعين؟ مش العساكر الفلاحين والصعايدة الغلابة؟
اما بخصوص انه عايز يشتغل في القطاع الخاص لكن عايز كل حاجة تبقى تبع القطاع العام
فده مفهوم، هو دلوقت حالا عايز يشتغل في القطاع الخاص عشان فلوسه اكتر، لكن يتمنى ان كل حاجة تبقى تبع القطاع العام لاني سبق وقلت لكوا المصريين شيوعيين بالسليقة، الثقافة الابوية بتخليهم عايزين كل حاجة تبقى في ايد الدولة عشان يبقى فيه عدالة
الحقيقة انا مش شايفة غرائبية في نتائج الاستطلاع، ولا شايفة تناقض اذا اتكلمنا عن السياق المصري وتصارع الشخصية المصرية وموروثها مع الواقع المفروض عليها، ايه ده؟ انا باقول ايه؟ ايه الجملة الاخرانية دي؟ المهم انتوا فاهميني يعني احنا عشرة
ولا شايفة اي داعي للتريقة على المصريين والسخرية منهم واتهامهم بالكدب وانهم هم اللي المشكلة فيهم مش المستطلعين
الحقيقة المشكلة مش فيهم ولا في المستطلعين، المشكلة في النظام اللي بيحطهم في صراع ما بين القيم اللي هم مؤمنين بيها وما بين الظروف الصعبة المفروضة عليهم
وايوة المصريين لسة بيحبوا مصر، ولسة فخورين بيها لدرجة انهم ساعات يستعروا من نفسهم عليها، يعني شايفين ان مصر مقامها اكبر منهم، وكتير بيعملوا زي اللي مش بيرضوا يتصوروا عشان مستعفنين نفسهم ومحرجين لمصر منهم، ودي تركيبة ما يفهمهاش اللي قاعد معزول عن الناس
والرضا بقضاء الله حاجة وزنقة الفلوس وصعوبة المعيشة حاجة تانية
وقرفهم من العيشة حاجة وحبهم لمصر واستعدادهم انهم يموتوا عشانها حاجة تانية
هم اصل المتحدثين تعليم خواجاتي شوية، عندهم التصور الخواجاتي بتاع ان الوطن هو اللي بيدي الواحد حقوق وبيوفر له حياة كريمة
واحنا من امتى في مصر كان عندنا التصور ده عن الوطن؟ اذا كنا لما بنهاجر بنعمل فول وطعمية وبنوسخ الاماكن اللي احنا عايشين فيها عشان تبقى شبه مصر، ونعمل قهاوي ونعمل تجمعات مصرية ونتخانق نفس الخناقات وننزل في الشارع نحتفل بفوزنا بكاس افريقيا، مش كل من هاجر بقى ما عندوش انتماء
ولا زهق من البلد ولا ده معناه ان ما يتمناش يموت عشانها
والناس لما بتقول مصر هي امي، هم حاسين انها امهم بجد، حتى لو ام رخمة وبترنهم علقة بالحزام، ويتخانقوا معاها ويطفشوا ويروحوا يباتوا عند واحد صاحبهم، بس امهم، حد ح يكره امه؟
انا مش طالبة منهم ينزلوا العشوائيات (مع مراعاة انهم يلبسوا لبس بسيط شوية عشان يحسسوا الناس انهم منهم) انا بس عايزاهم مرة كل ست شهور يركبوا المواصلات وللا حتى ياخدوا تاكسي عشان ما يبقوش قاعدين كده مندهشين من اختراع العجلة ومش دريانين بجوانيات اهلهم
ولما هم اللي ما يفهموش

ولما هم اللي ينعزلوا
يطلعوا ان الشعب هو اللي وحش وهو اللي كداب وهو اللي مش معقولة ابدا يبقى عنده انتماء واكيد نصاب
ويقعدونا قدامهم ساعة يبستفوا فينا هم ومتصلينهم اللي لاوئين ضبتهم
اما عاجيب والله
وتحية للدكتور ماجد عثمان
اه، نسيت اقول حاجة، الناس قالت احنا مستعدين نموت عشان مصر، تقوم الاستاذة منى في اخر الحلقة تقول، ياريت نقول الحقيقة عشان استطلاعات الرأي دي بتفيدنا يعني لما حد يقول لك مستعد تموت في حرب قول اللي جوة نفسك
يعني كأنه تحريض للمصريين على انهم ما يموتوش عشان بلدهم وتسفيه للناس واللي يقول انا اموت عشان بلدي يبقى كداب
امممممممممما عجااااااااااااايييييييييييييبببببببببببببببب فعلااااااااااااااا

Advertisements

38 Responses to “امراض الطبقة المتوسطة لا تمثل الشعب المصري”

  1. مواطن مصري Says:

    نوارة هو انا لية كل ما اركب مع سواق تاكي اسئلة بتحب الحكومة بيقولي اة و بحب الريس انما حالة يصعب ع الكافر احكيلو في بلاوي البلد يقولي بس الريس جدع ؟ اة و الله اكثر من كذا سواقققق

    و على راي الي كتب
    مصر دي مش امي مصر مرات ابويا
    و بخصوص الحرب
    لو قامت حرب ضد حسني مبارك هل هتحاربي
    لصالح حسني انا لو الحرب ضد حسني يولع حسني و مش هشارك في الحرب
    انا من الناس الي عاوزة تسافر اة و مسافرش لية لو ملقتش فرصة شغل هنا اسافر برة اشتغل
    قطاع عام هو اساسا لسة فية قطاع عام
    ؟؟؟؟؟

    الانتماء في مصر
    انا اقولك بما اني من طبقة الوسطى الحمد الله عايشة كويس مش فقراء يعني انما معانا فلوس بس و مش معنى معانا فلوس يبقى نسكت و مندافعش عن الفقراء في مصر دي توضيحا
    المهم
    انا ناس معايا في الكلية الانتماء معدم فية ناس هتموت و عاوزة تسافر اسرائيل تشتغل و ناس عاوزة تروح كندا او امريكا

    المصرين عموما يا نوارة حتى لو عندهم بلاوي الدنيا بيقولو الحمد الله و مش بيحبو يتكلمو عن مشاكلهم
    ولا انا غلطان

  2. TAFATEFO Says:

    هو طبعاً منى مستفزه في الحوارات دي .. وطبيعة الحلقه كانت باينه من المقدمه انها استهزائيه

    كل المصريين متدينين (90% على الأقل) ومستعدين يضحوا بنفسهم من أجل أوطانهم باعتباره واجب ديني ووطني

    وبرضه المصريين الحمد لله برغم كل حاجه يفخروا بمصريتهم .. ولو واحد اتنطط عليهم يدوله بالقديمه حتى لو هيروحوا في داهيه .. في مصر وفي أي مكان في الدنيا

    أنا اعتراضي بس على اللي أحرى الاستبيان .. وانها هيئه حكوميه

    وعلى 84% سعداء .. لأن السؤال مش كده .. وان السعاده 84% دي مش موجوده في القبور

  3. TAFATEFO Says:

    وأكبر دليل الخبر ده .. اقريه وقوليلي ازاي يبقى في 10% سعداء .. والخبر صحيح والجانب الإسرائيلي محق 100%

    في جمله في وسط الخبر بتقول
    يُذكر هنا أن سلطات القاهرة لا تطبق غالبا القرارات القضائية.

  4. SALEM ELKOTAMYسالم القطامي Says:

    سوزان باراك تؤكد ان التحرش الجنسي ليس ممنوعاً في مصر،بل هو البديل لعدم إمكانية الزواج الشرعي بسبب الأزمة الإقتصادية المزمنة منذ ثلاث عقود!!وتقر بإنها إقترحت على قوادين الحكم هذا الحل المستورد من بلد أمها،وقد وافقوا بالإجماع،وهنأوها بأفكارها العبقرية،ورشحوها لجائزة التحرش الدولية،وطلبوا من القرني الأكبر تعديل الحديث النبوي ليناسب الإرادة السوزانية الملكية،ويصبح النص السوزاني كالآتي:يامعشر الشباب من إستطاع منكم البائة فليتزوج ،ومن لم يستطع فعليه بالتحرش أو الإغتصاب فإن فيهما تفريغ للبيدو!!وقد وافق على الفور ثالوث عزازيل الكهانوتي وهم الحاخام الأحقر،وفضيلة مفني الديار،وسعادة وزير الأرداف!
    قانون السوزنة والخسخسة،من الخسة، هو آخر مافي جعبة الحاوي،لإخراس أفواه المعترضين على جريمة التوريط أو التوريث،فهل سنبلع الطُعم،أم سنعف نفوسنا ونقلب السحر على الوارث والمورّث،الأيام بيننا!سالم القطامي
    !!سالم القطامي

  5. TAFATEFO Says:

    آسف نسيت لنك الخبر

    http://www.aljazeera.net/NR/exeres/05AA7905-699C-434E-BBD5-889261FDE973.htm

  6. جبهة التهييس الشعبية Says:

    مواطن
    ماهو عشان انت من الطبقة المتوسطة بتقول الكلام ده

    يا مصطفى
    هم نفس المستطلعين مافهموش اجابة الناس على سؤال: هل انت سعيد؟
    اي حد ح تقول له في مصر هل انت سعيد ح يقول الحمد لله..فضل من ربنا
    مش ح يبرطم لانه يخاف يقول كلام يغضب ربنا
    فكل ما واحد يقول لهم الحمد لله يفتكروا انه سعيد ويحطوه في خانة السعداء
    هو فيه مصري مش ح يقول الحمد لله؟
    ده اكتر ذكر منتشر في البلد

    سالم
    مين بقى سوزان باراك دي؟

  7. TAFATEFO Says:

    ماشي يا ست الكل

    بس ده يبقى اسمه ان الجهه التي أجرت الاستظلاع كدابه .. أنا مش بلوم المصريين .. أنا بلوم الجهه

    هي المسؤوله عن دقة النتائج .. مش المستطلع رأيهم

    انتي فاكره الاستظلاع بتاع ثقة اشعوب العالم في رؤساءهم .. احنا عندنا ناس متخصصين كدب وتزوير

  8. جبهة التهييس الشعبية Says:

    ممكن يبقوا كدابين
    واغلب الظن انهم مش فاهمين زي اللي قعدوا ساعة يقولوا: احنا مش فاهمين احنا مش فاهمين ويتريقوا علينا ويطلعونا ان احنا الغلطانين
    معاك حق في النقطة دي ان اللي يستطلع لازم يكون عنده الحد الادنى من الاتصال السابق بالناس ما يبقاش قاعد كده دلوعة امه وفجأة ينزل وسط الناس يسألهم ولما يقولوا له الحمد لله يقول اهم مبسوطين اهم

  9. TAFATEFO Says:

    أول مره أشوفك مفترضه حسن النيه كده
    !!!!!!!!!!!!!!!!!!!!!!!!!!!!!!!!!

  10. TAFATEFO Says:

    اللي قعدوا ساعه يتريقوا .. دول موجهين

    مخطرش في بالهم ان الاستظلاع مزور وان الجهه الحكوميه مزوراه .. مش المصريين اللي كدابين

    دي سفاله وقلة أدب ناس مشافتش التربيه

  11. مواطن مصري Says:

    طيب نوارة هل انتي فخورة بمصريتك؟
    هل انتي مستعدة للحرب سواء من اجل الحكومة او لا؟
    هل انتي سعيدة؟
    هل انتي يعني من جهة المال مرتاحة او الفلوس بتقعد معاكي؟
    يعني انتي مفكرتيش او مش بتتمني تسافري برة مصر؟

    اية رائيك المدونات تعمل استفتاء للمصرين ؟ سواء على النت او ارض الوقع

  12. airprince Says:

    الحقي يا نوارة
    حريق جديد بمدينة المنصورة بدءا من صباح اليوم و ما زال مستمر لحد دلوقتي الساعة 3 الفجر,فشل في الاطفاء من حوالي 25 عربة مطافي من الدقهلية و دمياط و الغربية والقوات المسلحة, تم اخلاء المنازل المجاورة بعد انهيار المبنى المجاور للحريق, المبنى عبارة عن مخزن للعب الاطفال من خمسةادوار.

  13. Islam Says:

    السلام عليكم ورحمة الله وبركاته
    أنا متابع من زمان أوى بس ما بحبش أعلق بس عشان أنا فى الغربة وأعتبر نفسى وأهلى من الطبقة البسيطة فحسيت أن عايز أرد
    وأنا فى مصروكواحد من الناس العادية ركبت كل مواصلات الحكومة من الأتوبيس لقطر الدرجة التالتة العادية اللى ساعات كنت بقف فيه تلات ساعات لما أكون راجع من الجامعةمن القاهرة لى الأسكندرية
    بقالى فى الولايات المتحدة سنتين ومش بحبها ومش ححبها على الرغم إن الحمد لله كل شىء كويس خلصت الماجيستير وشغال فى مجالى هنا والحياة سهلةبس حاسس إن مش سعيد وكل يوم بتابع أخبار مصر حوالى ثلاث ساعات كل يوم وبقول إمتى ربنا يكرم وأرجع وبحن لكل حاجة فيها الشوارع والحوارى الل عشت فيها و الناس البسيطة اللى عشت وسطهم بحزن مع كل خبر سىء وبفرح مع الناس على أى حاجة كويسة أنا النهاردة طيرت من الفرحة لما عرفت خبر وقف تصدير الغاز رغم إنى كان عندى إكتئاب إمبارح أنا وصحابى هنا بنفتكر أيام الجامعة وعربيات الفول والكبدة ونفسنا نرجع لها صحيح فيه ناس هنا مش عايزة ترجع مصر بس عارفة الناس ديه فى أى فرصة بينزلوا مصر أجازة (:
    أنا أسف على التطويل ده يمكن أول وأخر تعليق ليه بس هى مشاعر تجاه وطن وبقالى مدة نفسى أقولها زى اللى بيحب ومش عارف يتكلم (:
    الوطن مش بس شوارع ومبانى الوطن ناس وذكريات جميلة صعب تلاقيها فى حتة تانية وحاجات كتير أوى ينفع نتكلم عليها ف كتب الوطن ده مصر ومش حيكون حاجة تانية علشان المصريين موجوديين بس فى مصر
    البلد دى غالية أوى أوى بس هى فى غمه بس أكيد الفجر حيطلع ويطرد كل الخفافيش وتفضل مصر والمصريين الطيبين

  14. الشريف / جمال طة Says:

    بنت يانــــــواره

    انتى تقصدى الطبقة المتوسطه اللى فى القبور ولا الطبقة المتوسطه اللى أصبحت فى الحضيض ولا الطبقة المتوسه اللى انداست تحت الأقدام ولا فى طبقة متوسه ظهرت من القاع وانا لالأعلم عنها برجاء الافادة
    وانتى كنتى زى القمر مع ماما برنامج علمتنى الحياه ربنا يحفظك لها وبخليها لك ويخليكى لينا أدينا بفضفض معاكى بعد أن أصبحتى أم الولايا من الرجال والشباب والنساء مع الاعتذار اذا كنت نسيت احد ممن هم فى رعايتك وشايله همهم

  15. الشريف / جمال طة Says:

    نــــــــــوارة

    بالعند فيكى وفى كل المعلقين أيــــوه أنا بحب الحكومة ياناكرين الجميل باجحدين المعروف الحكومة لم تترك شيئا الا وعملته لكم وعلى سبيل المثال لا الحصر

    الجوع والتجويع ووفرته لكم العرى والتعرى وقلعتكم هدومكم التشريد وشردتكم ومساعدتكم على الموت ووفرت لكم المراكب والسفن الذل والأزلال ووفرته لكم بره وجوه وألأمراض وجابتها لكم لغاية عندكم منها الفشل الكلوى والسرطان مثلا ووفرت لكم الزبائن والمشتريين منكم الكلاوى والعيش وجابة لكم علف الحيوانات وضحكت على الحيوانات بره وأكلتها أكل البنى أدمين المصريين انتم بقى عايزين ايه تانى الحكومة تقطع نفسها ولا عايزنها كمان توفر لكم الترب والمدافن وتعفيكم من رسوم الدفن اتقوا الله فى حكومتكم بدل ماتيجى لكم حكومة تعيد لكم آداميتكم وانسانيتكم وطلع عين أبوكم وتعيد لكم كرامتكم ( حافظوا على النعمة قبل ماتسيبكم الحكومه وترجعوا تتحسروا عليها وعلى اللى عملته من أجلكم يطهر والله أعلم مع احترامى لكم أنتم مش وش نقمه أه بقول مش وش نقمه

  16. الشريف / جمال طة Says:

    نـــــــــــواره

    بالعند فيكم الحمد لله الحمدلله الحمدلله بس مش عارف علي ايه على العموم الحمد لمن لايستحق الحمد مبارك عليه وعجبى مش جهنم ياغبيث انت وهى وهووبلا ياولاد نلعب عسكر وحراميه ولا أقول لكم بلاش العسكر

  17. الشريف / جمال طة Says:

    نــــــــوارة

    احمدى ربنا انتى وشوية المدونين بتوعك بقيتوا من الطبقة الدايخه الدايخه اللى مش لاقينها لا فى أمريكا ولا أوروبا ولا حتى عند شوية البدو

  18. الشريف / جمال طة Says:

    نــــــــــوارة

    يلا يابنت انتى وهو وهى روحوا شوفلكم لعبه العبوها غير لعبة جعان وشحات ودايخ ومش لاقى آكل ( وبلاش كدب وقلة أدب مش لاقى أتجوز ولا لاقيه عريس ومافيش حد معنس فى البلد فى الشباب ولافى البنات الشقق ماليه البلد انتم عايزين الشقه تيجى لغاية عندكم تقول لكم وانبى اتجوزا واسكنوافيى وخلفوا صبيان وبنات واكلوا واشربوا واتهنوا فيى ايه الكسل والتنبله اللى فيها ديه وانتم بتبتروا على النعمه

  19. جبهة التهييس الشعبية Says:

    طفاطيفو
    انا مفترضة حسن النية عشان دول موظفين
    وعشان نتائج الاستطلاع فعلا واقعية ودي اجابات الناس هم مش عارفين يحللوا لنقص كفائتهم وانعزالهم عن الناس
    الدكتور ماجد عثمان اللي هو من مجلس الوزرا كان بيحلل صح اكتر من التانيين مع انه هو من مجلس الوزرا ومن جهة حكومية وقال سؤال هل انت سعيد ده سؤال استهلالي ولازم الناس في مصر بتجاوب الحمد لله
    المشكلة مش في النتائج يا مصطفى النتائج صح
    المشكلة في كيفية تحليل النتائج

    مواطن
    طبعا فخورة بمصريتي
    وطبعا اتمنى اموت عشان بلدي
    حكومة ايه دي اللي بتتكلم عليها يا مواطن
    هي الناس لما ماتت في تلاتة وسبعين وفي سبعة وستين ماتت عشان الحكومة وللا عشان بلدها؟
    هي الناس اللي مشيت على الالغام باختيارها وكان عددهم بالالاف عشان يفتحوا طريق الدبابات لاننا ما كانش عندنا كاسحات الغام كانوا بيموتوا عشان الحكومة؟ كان دخلهم كام؟ وعيشتهم شكلها ايه؟
    ما انا قلت لك يا مواطن، طبعا الطبقة المتوسطة سيئة جدا وانانية وما يهمهاش غير نفسها وكل اللي شاغلها انها ما تنزلش وبس وخايفة على نفسها مش على اي حاجة تانية
    وما احبش اسافر ولا اسيب بلدي ولا ثانية
    ده انا لما باسافر يومين يا راجل وانا راجعة في الطيارة واول ما اشوف مصر من فوق اقعد اصقف واعيط
    بالنسبة للسعادة، الحمد لله، انا احسن من غيري كتير ايه اللي يخليني ما ابقاش سعيدة؟
    قال اسافر قال؟ اسافر اروح فين انا ماليش حتة غير هنا

    اسلااااااااام

    قطعت جهيزة قول كل خطيب
    ربنا يرجعكوا لينا بالسلامة

  20. جبهة التهييس الشعبية Says:

    airprince
    ههههههههههه تاني
    لا عادي الحرايق دي بقت عثل

    الشريف/ جمال طه
    هههههههههههههه

  21. جبهة التهييس الشعبية Says:

    نسيت اقول لك يا مواطن:
    مال السعادة ومال الفلوس؟ الفلوس مهمة عشان المعيشة بس مش بتعمل سعادة

  22. Tota Says:

    السلام عليكم جميعا..
    للاساتذة المعترضين على نتائج الاستطلاع احب اعرفكم انى مصرية وكنت فى الغربة لمدة خمس سنين وكنا عايشين زى ما بنقول فى هنا وسعادة وعندنا الفلوس وكل حاجة نتمناها .. بس عمرى ما حبيت غير بلدى ولما رجعنا من الغربة اتغيرت ظروفنا ومابقيناش زى الاول الفلوس راحت واهلنا ظلمونا والحال اختلف بس لو سألونى تحبى ترجعى للغربة اقول لأ بالتلاتة.. لأ الف مرة .. انا باحب البلد دى بكل مشاكلها وفقرها وغباوة ناسها ساعات وزحمتها ودوشتها .. انا باعشق بلدى وترابها ولو مش لاقية اعيش برضه مش هاسيبها .. ولو اى دولة فكرت تعتدى عليها هاحارب رغم انى بنت بس هاحارب مين ماكان رئيسها وحكومتها .. مصر بلدى مش بلد الحكومة ..
    يا جماعة المصريين ظروفهم صعبة بس مافقدوش انتماؤهم هم بس تعبانيين وتايهين ومحتاجين امل علشان يمشوا وراه بس وقت الجد الحب والايمان والوطنية موجودين جواهم..
    احترامى وتقديرى للجميع

  23. كلاكيت تانى وتانى Says:

    حقيقى تحليلك اكثر من رائع يا نوارة ولية مستغربين ان المصريين سعداء همة دايما مبيربطوش بين السعادة والفلوس انا كنت هتجنن امبارح ومتغاظة من منى وضيوفها جداااا المصريين فعلا من اكتر الشعوب اللى عندهم قناعة ورضا لأن دة بيوافق تدينهم الفطرى اللى لسة موجود فالطبقة الفقيرة والمتوسطة وكلمة الحمد لله مبتفارقش لسانهم المصريين مبيقدروش يفرقوا بين السعادة اللى صانعى الاستبيان عملوها والرضا اللى هو شئ اصيل فوجدانهم
    ام السيد اللى كنت بكتب احيانا يومياتها سيدة فقيرة لحد العوز ولما سألتها انتى سعيدة قالتلى اة الحمد لله ابنى بخير ولقمتى بجيبها يمكن مش زى غيرى بس انا راضية وربنا يعوضنا فالاخرة وكانت بتكلمنى وهى مبتسمة ودايما الست دى بتضحك برغم صعوبة ظروف حياتهاوبات العيش والمشاكل الشخصية لو سألونا انتوا سعدا انا شخصيا هقول اة لأن السعادة فى الرضا والشعور بالانجاز والقدرة على تحمل المصاعب بشجاعة وثقة فى ان الخير حتما سيأتى
    دى سعادة المصريين
    لأول مرة اشعر انى اشمئز من اسلوب منى الشاذلى برغم حبى لها
    ورسالة ربما لن تصل اليها
    مكنش لا مستوى تفكيرك ولا عقليتك ولا ثقتنا نحن مشاهدينك لك تجعلك تخطئين هذا الخطأ الفادح
    عزيزتى نوارة
    انا مش فاهمة اصلا لية مصرة تتخضى من نفسك لما بتكتبى باللغة الفصحى يابنتى ثقافتك عالية ودة مجرد مخزون طبيعى وراثى
    تحياتى

  24. جبهة التهييس الشعبية Says:

    توتا

    اه يا توتا..ليه كده بقى؟ هههههههههه دايما المصريين يقولوا على نفسهم فقريين، هو بصي فيه روح معينة بنتعود عليها ولما بنسافر مش بنلاقيها، حتى في المدن اللي شبه القاهرة شوية
    يعني المصريين لما بيروحوا امريكا بيحبوا نيويورك اكتر مدينة عشان شبه القاهرة، طيب يا عم انت رايح تغير وللا رايح تدور على مصر؟
    :))
    لما بيسافروا اي دولة عربية اكتر بلد بينبسطوا فيها سوريا عشان شبه مصر بس على مغسولة
    طيب ماهو اصرار المصريين في الغربة على انهم يدوروا على اماكن شبه اماكنهم ويعملوا مجتمعات شبه مجتمعاتهم دليل على انهم فخورين بمصريتهم
    الحقايق بالافعال مش بالكلام
    المفروض اللي عمل الاستطلاع ده لما ييجي يحلله يحلل سلوك المصريين بشكل كلي وما يقولش ما هم بيسافروا، كأن اللي سافر ده خاين للوطن، وكلامهم كان فيه تجريح للمهاجرين واللي هاجر هاجر عشان غصب عنه ومضطر ولو عليه ما يسيبش البلد
    وده مش كلام انشاء يشوفوا سلوك المصريين في الغربة وازاي بيخلقوا بيئة شبه مصر ودي حاجة في الغربة بيتميز بيها المصريين والسوريين واللبنانيين بس وشوية الهنود بس مش قوي زي المصريين والسوريين واللبنانيين
    غير كده من الجنسيات لما بيهاجروا بيندمجوا
    طب ما ده دليل على ان الهجرة مش بسبب كره الوطن

    كلاكيت
    لا بصي يا كلاكيت مفهوم المصريين عن السعادة غريب جدا
    الناس كلها بتفهم السعادة ان الواحد يحس بالتحقق وان معظم اماله وطموحاته يا اما حققها يا اما في طريقه انه يحققها يا اما فيه امل انه يحققها وانه يحس بقيمة نفسه ويشوف نفسه زي ما يتمناها
    لكن المصريين السعادة بالنسبة لهم قائمة على كلمة “مش” يعني تسألي واحدة انت مبسوطة مع جوزك تقول لك: الحمد لله، مش بيضربني، مش بيشتمني، مش بخيل
    انت سعيد في حياتك؟ الحمد لله، مش عيان، مش باشحت، مش نايم في الشارع
    وكأن الطبيعي في الحياة انها تدي البني ادم اسوأ حاجة ولو اسوأ حاجة مش موجودة يبقى الحمد لله انا سعيد
    ومرة واحدة كانت بتتناقش مع واحدة عايز تطلق قالت لها: بصي يا بنتي الراجل مدام ما بيئذيش يبقى راجل كويس
    :))

  25. lastcrazyboys Says:

    مش عارف ليه أول مرة احس انك انفعالية زيادة حبتين المرة دي ..ومش عايز أقول متحاملة شويتين كمان..ما طول عمرك بتلتمسي الجانب الحلو في كل حاجة ..!!
    مشفتش التقسيم الطبقي ده قبل كده في كلامك ..وهقولك التحامل جي منين ..
    تنكري ان في ناس مش في الطبقة المتوسطة..لا في العليا وعندهم ولاء وانتماء للوطن ..وبيبذلوا اللي يقدروا عليه وزيادة ..وغالبا مبيحبوش يكون ده في العلن
    وبعدين مش معنى اني أحب مصر إني أبقى اشتراكي ..وبتاع شعارات ..أو مش لاقي اللضا..التاريخ علمنا ان الانتماء ملوش “ايدلوجية ” معينة
    هبسط الأمور أكتر ..ممكن أكون رأسمالي ..ولو حطوني في منصب هشجع الرأسمالية المشروطة بمصالح الوطن..العيب هنا لو انا سخرت الأيدلوجية لمصلحتي الشخصية ..
    ممكن تكون توجهاتي خاطئة ..زي ما دايما بقول عالتجربة الناصرية ..انه رغم عيوبها يحسب لها انها كانت خالصة في حب مصر ..
    أنا بكــره الشيوعية عمى ..وشايف ان الاشتراكية هم وغم ..واللي بيكرهني فيها ان معظم اللي قابلتهم أقصى أمنياتهم ان اللي حواليه ينادوه : يا مناضل ..لأن يا “رفيق” دي تتقال للي مش بيدي بجد
    لكن بحترم وبشدة أصحاب التوجه اللي بجد شايفين ان مصلحة البلد في النظام ده..رغم اختلافنا ..وخناقنا المتواصل ..
    يعني ممكن يكون كل واحــد فينا ليه وجهة نظر معينة ..وكل واحد فينا من طبقة مختلفة ..وممكن كمان أفكارنا تحلينا نمسك في “تلابيب” بعض ..لكن المهم ان كللللللللللل ده يكون :

    في حـــــب مصــــــــــر

  26. medo Says:

    يا اخت نوارة أنا عاوز ابعت ليكي الفيديو ده علشان تنشري معاناة أهل المنصورة من شوية عيال محدش قادر عليهم
    العيال دي بيعملوا تفحيط بالسيارات بتاعتهم في مكان معين في مدينة المنصورة عند كلية الأداب , و بيمثوا خطر على المارة و تعطيل كبير لحركة المرور , و أي شخص بيحاول يوقفهم بيضربوه و يهددوه بمناصب ابائهم , احيانا كثيرة السيارات دي لا يكون لها نمر ,
    سائق تاكسي بيحكيلي انه حاول يحتك بيهم مرة ضربوه و اخزوه على القسم لأن واحد منهم ابوه مستشار
    يا ريت السيد المحافظ يتدخل لحل المشكلة دي
    يا ريت تنشري الفديو ده لأن مدونتك مشهورة
    الفيديو ده مش انا اللي رافعه على اليوتيوب دا واحد من العيال دي , لو فيه حل و ينفع تسجليه من اليوتيوب قبل ما تنشريه ؟

  27. المنصورة Says:

    الفيديو انا نشرته على البوست ده

    http://important-gedan.blogspot.com

  28. TAFATEFO Says:

    @ medo

    أنا عندي ليك لحل .. وتكلفته 5 جنيه ولا حاجه في اليوم .. وحل مجرب

    روح لأي بتاع طعميه (استرخاص) وقوله هتشتري منه الزيت اللي يفضل في آخر اليوم (طبعا بعشرين جنيه تشتري زيت سكلي ولا صابون سائل بس لو عايز تسترخص براحتك) وفي الميدان ده وقت المغرب .. رش الزيت .. وسيب مكان للناس تتحرك فيه .. أسبوع بس وهيزهقوا

    وان عدتم عدنا

  29. Founoon Says:

    هي الطبقة المتوسطة اللي هما مين بالظبط ؟

    اصل انا عمالة اسمع ان الطبقة المتوسطة بتندثر وبتختفي مع اني شايفة العكس بالظبط

    الناس كلها بقت طبقة متوسطة

    اذا كانت الحكومة بتعتبر كل واحد دخله اليومي ابصر جنيه ونص يبقى مش فقير

    الطبقة المتوسطة بقت كتير اوي وبقى جواها هي شخصيا طبقات كتييييييييير اوي

    انا فعلا نفسي افهم مين الطبقة المتوسطة بالظبط اللي هما مين يعني ؟!!

  30. esraa Says:

    اه والله عجايب

    نقاصينهم احنا هم كمان

  31. TAFATEFO Says:

    نواره الأرشيف عندك بقى البوست مكرر 3 مرات !!!

  32. مهندس مصري Says:

    طبعاً إسلام قال كل اللي كنت عايز اقوله
    انا واحشني شوارع بلدي
    المكان اللي اتربيت فيه و عشت فيه
    أهلي و اصحابي
    كل ذكرياتي في مصر بتنده عليا
    و ما رمناش على المر غير اللي امر منه
    طيب تصدقي بإيه باقرأ البوست بتاعك ده لمديري الفلبيني و باترجمهوله إنجليزي فقالي
    المصريين ليهم تجمع كبير في مانيلا عاصمة الفلبين
    و ليهم مطاعمهم و قهاويهم
    حتى في الفلبين

  33. حـنــّا السكران Says:

    أنا كنت عايز أسأل نفس السؤال اللي سألته كلاكيت .. هو انت ليه بتتخضي من نفسك لما بتكتبي بالفصحى ؟ معقولة ؟ لو حدّ غيرك مش متمكّن كنا قلنا ماشي .. بس انت و لا سيبويه يا بنتي اسم الله عليكِ و حواليكِ .. و من عين الحاسد يحميكِ..
    ـ بتسمحيلي أحيّي الأستاذ إسلام و صديقتي توتا العفروتة ؟ تعليقاتهم أثّرت بيّ كتير .. كأنهم كتبوا من قلبي .. هو ده المواطن الحقيقي ,, اللي بيحمل وطنه في قلبه وين ما راح .. بفقره .. بغناه .. بتعبه ..بحزنه ..الوطن بيبقى هو الوطن .. الحاجة اللي ما بتنرسم و لا بتنكتب و لا بتنوصف ..ما بتسمعي فيروز شو بتقول :

    بفقرك بحبّك

    و بـعزّك بحبّك

    و إذا نحنا تفرّقنا

    بيجمّعنا حبّك

    و حبّة من ترابك بكنوز الدني

    بحبّك يا لبنان .. يا وطني

  34. جبهة التهييس الشعبية Says:

    المدونة مش بتعمل بابليش للبوستات
    ولما اجي اسيف البوست تعمل كده
    Post was not saved due to form errors

  35. Nemo Says:

    أنا متغرب بره مصر

    1 – بحب بلدى جدا وبتوحشنى جدا .. واللى بيوحشنى هو اهلى وناسى وذكرياتى
    2 – كاره حكومة بلدى جدا والوضع المأسواى اللى إحنا بقينا فيه وفضايحنا اللى بجلاجل … زى الى بيتعمل فى الغزاوية
    3 – لو حصلت حرب مش ححارب … وبأكرر موش حأحارب
    4 – لو دخلت إسرائيل على مصر حأقول أهلا وسهلا .. وبعد ما يشيلوا اللى قاعدين على الكراسى يبقى لينا كلام تانى
    5 – لو جاتلى الفرصة إنى آخد جنسية تانية حأخدها.. لكن مش حأتنازل عن إنى مصرى … لو الأمر حكم حأضطر إنى أتنازل عنها
    6 – إحساسى بالسعادة … أنا يأشعر بالسعادة الغامرة أول أسبوعين من الأجازة … وبعد كده عينى بتفتح تانى على كل حاجة سواء حلوة ولا وحشة … وكل ما بانزل مصر بألاقيها فى النازل والنازل قوى …. على كل المستويات … وخصوصا فى أخلاقيات الناس وطباعهاوالتوحش واستخدام النفوذ والسلطات

    انتى زعلانة من إيه يا نوارة مش فاهم … فى ناس كتير قوى بنسبة مهولة عاوزة تسافر أى حتة ان شالله اسرائيل
    الناس كرهت الظروف اللى هى فيها والعجز وقلة الحيلة وده شيء منطقى جدا إنه ينعكس على مشاعرهم وانتمائهم

  36. الشريف / جمال طة Says:

    نـــــــــــوارة

    سرقونى الحراميه 000000 وبس خلاص

    gamal51.blogspot.com

  37. لولا Says:

    نــوارة

    قريت البوست ده 20 مرة إمبارح

    وقريته اليوم تانى

    وقريت كل التعليقات

    وحتى الأن مش قادرة أفهم .. أيه مشكلتك بالظبط ؟؟؟

    مين إللى منرفزك اللى عملوا الإستطلاع ولا الناس إللى جاوبت ولا إللى علقوا ع الإستطلاع ف البرنامج؟؟؟

    مين الطبقه المتوسطة إللى بتتكلمي عنها ؟؟

    مواصفاتها ” الطبقيه ” إيه ؟؟

    ممكن تردي عليا لو سمحتى

    عارفه أن الحج جوجل قارفك بس زحلقيه شويه كده وردي عليا لما تلقي وقت

    ودمتم

  38. Free Zone Says:

    قد يكون ردي عن أي إتهام للشعب المصري هو البوست الذي يعد الفصل الأول من ملف الطريق إلى قلب نظام الحكم في مصر والذي لم أكمل البحث فيه منذ شهر مايو والذي قررت لأكمله أن أتخذ قرار عودتي النهائية إلى مصر ومازال البحث جاري وهذا هو عنوان المدونة إذا شئت

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s


%d bloggers like this: