عسكر عسكر عسكر ليه احنا في سجن وللا ايه؟

انا مش عارفة ليه الهتاف ده بالذات بيخليني اعيط؟ انا مش باحب الهتاف قوي، الحقيقة انا باكرهه موت، بس الجملة دي بالذات بتوجعني قوي.


على فكرة انا عرفت اني لو اتحبست ماحدش ح يقف لي غير مركز هشام مبارك وخمستاشر واحد، ده اذا كملوا خمستاشر اصلا، انا لا في حزب ولا في جماعة ولا ليا شلة ولا صييحة في وكالات الانباء العالمية ولا سايبة لي حبيب يبقى مين ح يقف لي؟ اذا كان محمد عادل اللي المفروض كنت متوقعة ان الدنيا تبقى امم امم فوق بعض مافيش غير كام واحد ما حصلوش عشرين نفر هم اللي جم حاجة تكسف بجد، وطبعا اللي كاتب المذكرة مركز هشام مبارك، والمحامي اللي طلع المذكرة للنائب العام هو احمد الجيزاوي. امال انا بقى اللي مقطعة وش تلات اربع البشرية وجايبة مصارينهم تلاتة متر قدامهم؟

ياريت بقى ماحدش يتهم المصريين بالسلبية، لما واحد مختطف، مش معتقل، وعدد اللي عبروه تيت، ومركز هشام مبارك ابانا الذي في حقوق الانسان، يبقى الناس لها حق ما تعملش حاجة ولا تطالب بحقوقها ولا تتحرك وتعيش عمرها تتسول ابسط حقوقها وتوطي على رجلين الامن (اللي بنشكر حضوره بكثافة مما ادى الى نجاح التحرك ولفت نظر السيد النائب العام للكام واحد اللي جم) ويقولوا لهم نحب على رجليكوا اضرب الشلوت يا بيه براحتك بس بلاش في مكان عملية الزايدة

طيب يا اخي افرض مركز هشام مبارك ده كلهم جالهم برد، سافروا مارينا، لا وهم ايه اللي ح يسفرهم مارينا، سافروا جمسة او راس البر، افرض يعني وحد اتقبض عليه؟ يولع بجاز وسخ؟ ثم ان محمد مش مقبوض عليه ده مخطوف

لو مقبوض عليه تبقى شغلانة المحامين، لكن يتخطف؟ احنا فين هنا؟ انا عمالة افكر واكل في نفسي، اللي حصل له ده ممكن يحصل لاي حد فينا، الحمد لله ان العاشرة مساء جات ويارب يذيعوا التقرير

عموما اللي جم ربنا طرح فيهم البركة، لان احمد الجيزاوي فضل ملطوع على باب النائب العام ومش عارف يدخل لحد ما العيال طلعوا على السلم وقعدوا يهتفوا (بصرف النظر عن مشاعري الشخصية تجاه الهتاف واللي هي شبه مشاعري تجاه السبانخ) الا ان لولا كده ما كانش احمد عرف يدخل للنائب العام

واحنا واقفين برة مستنيين قابلت واحدة وشكلها كده كانت جاية تشتكي للنائب العام من داهية سودا، وفعلا طلعت نظرتي في محلها

الاستاذة حنان عرام المحامية جاية تشتكي النيابة العامة للسيد نائب العام، لانها اصبحت غير امينة على حقوق المواطن المصري انا مش ح اتكلم على كلامها

اسمعوها هنا

وهنا

وبعدين
احمد الجيزاوي خرج وقال لنا رقم البلاغ وان السيد النائب العام تعهد بانه يرد علينا في خلال اربعة وعشرين ساعة وطلب من المعتصمين انهم ينزلوا تحت

سبتهم عشان اجي انقل لكوا الفيديوهات وهم دلوقت قدام النيابة العامة ومش متعتعين قبل ما يعرفوا ايه اللي حصل لمحمد

اذا ما كانش عشان هو صاحبهم (وبالمناسبة هو مش صاحبي وما شفتوش في حياتي كلها غير يمكن مرة واحدة) يبقى عشان له اب وام واهل عايزين يعرفوا هو فين ولو كل دول مش مهمين يبقى احنا من حقنا نعرف احنا فين؟ احنا في مصر وللا في شيكاغو؟ اللي خطف محمد الامن وللا عصابات المافيا؟

Advertisements

Tags:

18 Responses to “عسكر عسكر عسكر ليه احنا في سجن وللا ايه؟”

  1. مواطن مصري Says:

    مين الي خطف احنا نجيب المفتش كروبو يحل مين الي يخطف الخارجين عن القانون ولا حماة القانون

    لولا المشروع و قرف الكلية كنت جيت

  2. appy Says:

    نواره انا طبعا مقدرش اجى انتى عارفه انا فى شغل مش بيرحم وموقفى حساس بس كنت متابعه بس سمعت حاجه هقولها لكى فى الميل
    اصحاب محمد كتير انا كمان مش شوفته غير مره او مرتين
    ونفسي اساعده ربنا معاه يا رب
    بس ليه برضه مش نفدم توقيعات تضامن معاهم زي ما عملنا قبل كده باسمائنا مع بتوع المحله وانتى عندك بيناتى لو عاوزاها تانى هكون اول واحده تبعته
    ربنا معاهم وبدعي لهم اما لو اتحبستى صدقينى هتلاقى كتير انتي محبوبه دا انا اقلب لكي الدنيا ومين قال انك مش محبوبه يا بنتى خلى اللى يطق يموت دول دماغهم تعبانه بس باكد لكي ان فيه كتير بيحبوكي

  3. amira Says:

    لفت انتباهي ساعة لما واحد سألك إنتو بتعملوا إيه هنا فجاوبتي عليه قلتيله أصل واحد مدون مختفي مش عارفين هو فين.. رد عليكي قالك واحد إيه؟ قلتيله واحد مدون.. واحد مدون… ماعلقش وأعتقد إنه غالباً مافهمش واتكسف يسأل …

    مش قصدي يعني إن الناس مش عارفة مين هما المدونين … بس قصدي إنه لحد دلوقتي دايرة المدونين والناس اللي متابعينهم حتى لو اتسعت وزاد عددها إلا إنها لسة محصورة جوة فئة معينة نسبتها مش كبيرة جوة الشعب المصري وبالتالي طبيعي إن التضامن معاهم لسة مش هيكون بالمستوى المطلوب

  4. مهندس مصري Says:

    يا بنتي إنتي بعد الشر لو إتحبستي كبيرك بانر يتعلق لك في المدونات و كام بوست حيتكتبوا و خلاص
    اما الوقفات الإحتجاجية حتبقى قليلة جداً
    انا حاسس ان الناس همدت خلاص

  5. مواطن مصري Says:

    http://www.masrawy.com/News/Egypt/Politics/2008/november/23/coptics.aspx

    إصابة 12 بينهم 4 من الشرطة وإحتراق سيارتين فى اشتباكات بين أقباط ومسلمين بالمطرية

  6. .......... Says:

    لدعم محمد عادل

    http://www.facebook.com/group.php?gid=99573985612

  7. شنكوتي Says:

    بصي حكاية محبوبه ولا لأ دي مش هي القضيه مش كل حد بنحبه هتلاقينا بنجري عليه
    عارفه ليه علشان الناس خلاص ياست الناس بتقولك وهو يعني اعتصامنا هيعمل ايه
    كل اللي هينوبنا عصايه على ظهرنا وجزمه ترفعنا في السما
    وننزل على جدور رقابينا
    الناس بقت منحوره في لقمة عيشها انتي جايز هتقوليلي ما هو لو ماتحركوش مش هنلاقي حتى لقمة العيش
    هاقولك مش هتقدري تقنعيهم
    احنا عارفه بقينا شبه ايه
    واحد رابط ميت عبد في جرار حديد وبيجري بيهم والأكل متعلق قدام عينيهم
    لا حد طايل يا كل ولا حاد عارف يفك
    وكل حبه واحد يقع من التعب
    تحت العجل التقيل يندك
    لا حد فاضي يلحقه ويحوش
    ولا حد واخد باله حتى انه دوره جاي
    لا هم هيفكوا قيدهم بايدهم يوم
    ولا حد هيفكهم
    وانا عن نفسي بقى مش جاي

    سلااااااااااااااااااااااااااام

    تحياتي لوالدك كتير انا اول مره اعرف من ابي ان باباكي هو الفاجومي الجميل
    امانه عليكي توصليله سلامي

  8. المرصد المصرى Says:

    يانوارة انتى انا قريب هيعلقوا ليكى حجر كبير ويرموكى فى النيل هدية للنيل واحد جالى فى الحلم وقالى كدة

    د احنا هنصوت بالقوى بس هما يخلصونا منك
    صباح الخير
    شوفتى الحاجة هنا منورة
    سلمى لنا عليها خليكى جدعه بقى

    صافي ناز كاظم ونظرية المؤامرة

    http://www.moheet.com/show_news.aspx?nid=193004&pg=8

    وهنا كمان

    http://dawar-anas.blogspot.com/

    وهنا

    http://almarsdalmasry.blogspot.com/

    وهنا

    http://hafar.blogspot.com/

    ايه احنا هنعمل ليكم وكالة انباء نوارة لوحدكم

    شوفى ندر على لاجيب لك عيش وحلاوة وفراخ وعصير

  9. حسن على Says:

    تستنكر نوارة-ومعها بعض السذج الاخرين-وجود جحافل الامن المركزى فى كل مكان,ولو كان لديها الحد الادنى من الحس الامنى لعرفت ان هذة الجحافل قد جائت لحماية الناس من قراصنة الصومال وذلك لقربنا الشديد من خليج عدن . ومتبقوش تتكلموا ف حاجة ماتعرفوش فيها

  10. mona morsi Says:

    نوارة
    بجد بحبك فى الله
    انتي و مامتك اوي
    و باعتلك على البلوج التانى بس شكلها ماوصلتكيش
    قلبى معاكى و صدقينى لو كنت فى مصر كنت جيت معاكوا
    انا دايما بقرأ البلوج بتاعك
    بجد بتكتبى كل اللى جوايا
    نفسى اقابلك لما اجى مصر ان شاء الله
    تحياتى ليكى و لمامتك الكاتبة العظيمة و لباباكى طبعاً
    ربنا يخليهملك و يطمن اهل محمد عليه يااااا رب

  11. esraa Says:

    بجد كان نفسي ابقي موجوده

    طب احنا ممكن نعمل ايه تاني غير كده

    هو لحد دلوقتي لسه مفيش حد يعرف عنه حاجه؟

  12. حسن على Says:

    نسيت ان اقول : على رأى اللواء بباوى “هوة مش فية اعداء للشرطة؟؟؟؟” بمعنى اخر مش يمكن قراصنة الصومال هما اللى خطفوة فعلا- مقابل فدية – على شان هما اعداء للشرطة؟؟؟؟؟؟؟؟؟؟؟

  13. founoon Says:

    مخطوف يعني ايه
    احنا فين هنا
    طب ما يعتقلوه عادي ماهم بيعتقلوا ناس طول النهار والليل جات على دا مثلا
    ما يقولوا لاهله هو فين
    دا ايه القرف دا
    ممكن يا نوارة تقوليلنا اي اخبار عنه
    لا حول ولا قوة الا بالله

    انا ماليش لا في اعتصامات ولا اضرابات ولا وقفات ولا اي حاجة من دي
    بس كلمة شرف لو بعد الشر عنك جرالك حاجة هبقى معاكي يا نوارة
    ومش انا بس
    ناس كتير فوق ما تتخيلي
    بعد الشر عنك اصلا

  14. founoon Says:

    ارجعي بلوج سبوت البتاع دا غلس اوي مش بالعاه

  15. عاشج نوارة Says:

    أنا حاجي أجف لك يا غالية
    بس لازم نتفج عل التسعيرة و اللي أوله شرط آخره إيه
    الجفا بخمسة و الشلوت بعشرة و المنفاخ بمية

    بس بعيد عن الهزار إنت تستاهلي الواحد يفديكي بعمره عل أجل إنت تساوي مية من عيتنتي

  16. مواطن مصري Says:

    نوارةةةةةةةةةةةةةةةة
    الحقي كليب الاعتداء على كنيسة بسسب اخواني سخن الناس و الامن يراجع
    الاخوان جماعة همجية

    شوفي الكليب

  17. مواطن مصري Says:

  18. ديوان انس Says:

    نوارة لماذا لم تظهرى بالفيديوها
    يارب تكبرى واشوفك
    صحفية محامية
    هو كان فية تعليقات هنا الصبح ولا انا غلطان هو اللعب هنا كمان

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s


%d bloggers like this: