رد احمد ماهر على ما اشيع من انقسام داخل حركة ستة ابريل

قبل ما انشر الرد، انا مش عايزة جليطة وتكبر وخنفان من توجهات سياسية وناشطين فشلوا في اللي نجح فيه مجموعة من الشباب وبدل ما الواحد يفرح بيهم يقوم يتنطط عليهم، ماحدش قال ان شباب ستة ابريل مسييسين ولا مفكرين ولا حد فيهم ماركس ولا حسن البنا ولا حد فيهم ادعى حاجة زي دي، بس هم شباب قرر يبقى ايجابي ويشارك انشالله حتى بتواجده عشان بلده تبقى احسن، والحقيقة انا سافرت معاهم في سراندو وشفت الاسلوب اللي بعض الناس اللي كانت موجودة بتتعامل معاهم بيه: انت يابني قاري ايه؟ انت يابني تصنيفك ايه؟ انت يابني ثقافتك ايه؟ وتسفيه وتغليس لحد ما مشيرة ردت على واحد فيهم وقالت له: انت ما تقعدش تجيبني في ندوات وترغي في ودني، انا عايزة اعمل حاجة، قول لي اعملي حاجة مفيدة وانا انزل من بيتي واروح اعملها
طيب ده سلوك المعارضة المصرية تجاه شباب قرر انه بدل ما يروح حفلة تامر حسني وللا يشرب بيرة في حفلة منير يعمل حاجة مفيدة للبلد، وعملوا نشاطات كتير يشكروا عليها، غير الاضراب بتاعهم اللي كان ناجح، ما اتأخروش في اي حاجة ولا في اي قضية
لما العيال دي يجيلهم دعوة من الخارجية الامريكية بوصفهم اهم وانشط واشطر..الخ، والله انا لو مكانهم وفي ظل التسفيه المتعمد والتربص الدائم المحيط بيا من المعارضة قبل الحكومة كنت ح اتلوح، خصوصا لما ابقى تلاتة وعشرين اربعة وعشرين سنة
لكن اللي حصل ان معظمهم ما اتلوحوش ولا حاجة، وقالوا احنا مش بنتعامل مع حكومات! يعني الكلام بتاع: انت يابني قاري ايه؟ وفاهم ايه؟ وتنظيمك ايه؟ وكادرك ايه؟ وكل القرف ده مالوش اي لازمة ولا له محل من الاعراب، ومش كل فاشل يستكبر ان غيره ينجح في حاجة، ولو المعارضة المصرية مخلصة فعلا المفروض تتعامل معاهم باحترام اكتر من كده وتعترف بان الحركة نجحت في اللي هم فشلوا فيه وتنسق معاهم، بدل ما تسيبهم لقمة للي يسوى واللي ما يسواش والنهاردة هم صبروا وجم على نفسهم وما انبهروش بالدعوة ماحدش عارف لما يفيض بيهم الكيل ح يعملوا ايه؟ انكت منهم وراح يشحت من الامريكان
وفي كلام احمد ماهر ابلغ رد:
مفيش اساسا انقسام ده كله حوار و عنوان مثير كعادة فاروق الجمل اللى بيحب يحور فى الكلام عموما مش هاطول عليكى يا نواره الحركه زى ما انتى قولتى مش حكر على حد الحركه اتكونت من الشباب اللى دعى لاضراب 6 ابريل و حب يكمل مش اللى قال انا حرمت و توبت و بطلت سياسه و حطينا مبادىء و اهداف و كمان لينا هيكل و مسئولين و حوارت كتير مش مكانها على النت اساسا و الجديد بقى يا نواره ان معظم الاعضاء الجداد دلوقتى ماشاركوش فى الدعوه للاضراب و فيه اعضاء ماعندهومش نت اساسا.. ولا كمبيوترتقوليلى ازاى .. اقولك هاحكيلك لما اشوفك .. اصل اكيد هاشوفك فى يوم من الايام المهم ان فيه ناس دعوا للاضراب.. و الجروب اتعمل و حصل اللى حصل فى 6 ابريل فيه ناس كملت فى فكرة تكوين حركه شبابيه مستقله تهدف للتغيير السلمى و ناس اتمسكت بالصدفه و خارجين عاملين فيها مناضلين بالاسم و ناس بطلوا و حرموا و تابوا و ناس مقتنعين بالفكره و مصممين على الانتشار و التوعيه المستمره وسط الناس فى الشارع بهدوووء .. و هدفها فى الاخر هو التغيير زى ما كلنا عايزين ووسائلهم متعدده و مبتكره بعضهم ليه بعض الخبره السياسيه من 2005 و بعضهم مدونين .. و الاغلبيه منهم هما اللى شاركوا لاول مره فى حياتهم فى حدث سياسى يوم 6 ابريل او فى الدعوه ليه يعنى اللى دعى للاضراب يشكر و زى الفل لكن عضو الحركه هو اللى كمل شغل بعدهاو عضو الحركه هو اللى بيفكر مع باقى اخواته و يناقش و ياخد دور و ينزل ينفذ مش اللى يقعد يتمنظر على الناس و يقول انا اتسجنت كام يوم فى اضراب 6 ابريل و هو اساسا بطيخه و اغلبية الاعضاء رفضوا المشاركه فى مؤتمر منظماه الخارجيه الامريكيه .. و زى ما هايفيدوا .. برضه هايستفادوا اغلبية الاعضاء اتناقشوا على الملأ و رفضوا يبقى اللى مصمم يروح مش تبع الحركه و اللى فرحان بالاضواء و امريكا و السبوبه يتحمل هو النتيجه يعنى هو يروح و يتظبط و احنا هنا نشيل مسئوليته ايه رايك؟؟
————
انتهى رد احمد ماهر
انا عايزة بس اقول حاجة، اللي يعارض حكومته يبقى عيب عليه يروح يتمسح وياخد دعم من حكومات تانية حتى لو حكومة الكونغو
واللي بيروح امريكا يستنجد بيها على مبارك يبقى ايه الفرق بينه وبين الجلبي واياد علاوي؟ وانا الحقيقة مش ح استجيب للارهاب الفكري اللي بيمارسه البعض لمجرد ان الواحد بيوصف الامور وبيسمي الاشياء بمسمياتها: دي اسمها خيانة، مالهاش اسم تاني، انت رايح تستجلب قوة خارجية، سواء بقى بالسلم وللا الحرب، على بلدك
حاجة كمان، مبارك بيتعامل مع الادارة الامريكية، والحقيقة هو له صفة وله عذر كمان انه يتعامل مع الادارة الامريكية، بس مبارك قاعد في الحكم اساسا بسبب الادارة الامريكية، ولو علاقة اي معارض باي شيء حكومي امريكي شبه علاقة مبارك تبقى الروس اتساوت في النقطة دي ونبتدي المقارنة بقى ما بينه وبين مبارك في اي حاجة تانية غير ان مبارك قاعد على قلب شعبه بغير رغبتهم بسبب دعم الادارة الامريكية، لان اللي رايح يقول لامريكا هاتيني بدل مبارك ما يصحش يعيب على مبارك تزوير الانتخابات وفرض نفسه على شعب مش عايزه لانه هو بيعمل نفس الحكاية، ولو المنافسة وصلت للنقطة دي بصراحة يبقى مبارك يكسب
على الاقل اخدنا عليه واخد علينا وعرفنا طبع بعض، وايه الاكل اللي بيحبه وايه الاكل اللي بيكرهه، وبينام الساعة كام الضهر
احنا مش ح نقعد نغير في وكلاء الادارة الامريكية هنا..هي مش غية يعني
ووالنبي بلاش الكلام بتاع سعد زغلول ومصطفى كامل ده عشان انا باتنقط، خللي عندنا كرامة بقى، واقع الامر ان مافيش احتلال امريكي في مصر، احنا ليه مصممين نتعامل مع امريكا على انها حكومة الانتداب؟ الناس نفسهم ما قالوش كده، ده ايه تلقيح الجتت ده؟
Advertisements

Tags:

16 Responses to “رد احمد ماهر على ما اشيع من انقسام داخل حركة ستة ابريل”

  1. noha Says:

    bet ba3d ma makontesh ty2aki begad delwa2ty bamoot feki
    empola2 ( de bosa fe el hawa la selkiah ya3nee )

    rabina yehdi we ye3a2al we yefahem el aghbia

  2. حسن مدني Says:

    حقيقي حقيقي
    برافو عليكي يا نوارة
    وبرافو عليهم

    تحياتي

  3. اوجاع مصرية Says:

    هى المعارضة فى مصر هتفضل فى نزاع كدة على طول , ياجماعة بدل ما احنا قاعدين نراقب بعض وبنتمنى غلطة للتانى منجمع مع بعض ونعرى نظام مبارك احسن, فى راى ان حركة شباب 6 ابريل حركة انقى من حركات واحزاب تانية كتير على هم شباب لم يجمعهم الا حب هذا البلد والخوف علية من المستقبل ومن سياسة ايهود مبارك , وبعدين لحد دلوقتى مش عارفين نفهم ازاى امريكا بتتعامل معانا , زى ما عملت مع ايمن نور وكذبت علية وعشميتة ان هى وراة ضد مبارك هى فى الاساس لا عايزة تدعمة ولا حاجة هى بس عايزانا نقول ايمن نور امريكا بتدعمة ومعاة وناس تكذب وناس تقول ايوة ونفضل بقى كل قضيتنا فى المحروسة هو فلان شغال مع امريكا ولا لاق , نفس الموضوع عايزين يعملوة مع شباب 6 ابريل الخارجية تشكر وتمدح فيهم وتدعوهم على عشوة لذيذة اكيد طبعا برجر فى السفلرة واكيد الحركة هترفض وشوية هبل مننا يمسكوا بقى الموضوع لبانة واحد يقول هما اكيد شغلين معاهم من الباطن والتانى يرد لاق ياعم دا رفضوا الدعوة بتاعهم وغيرة وغيرة وغيرة…. يفضل يكلم وننسى بقى مبروك قصدى مبارك وتجويعة للشعب , وفى المقابل العم سام بعد ما ولعها بفضل بقى يتفرج علينا

  4. اوجاع مصرية Says:

    انا بشكرك يانوارة على رأيك الجرىء دة
    (تحياتى محمد مرعى (مركز افاق اشتراكية بالمحلة

  5. وجهة نظر Says:

    يا نوارة ده عبد الناصر بجلالة قدرة كان بيستعين بقوة عظمى اللي هي روسيا لأنه عارف انه مش هيقدر يصلح البلد لوحده
    اشمعنى بقى دي نسميها مشاركة و تعاون و هل روسيا كانت بتساعده لوجه الله و كانت ايه مصالحها

    و يا ترى ليه حسن نصر الله بيستعين بايران عشان يحرر بلاده من الاحتلال الاسرائيلي و مش بيعتمد على نفسه و هل ايران بتساعده لوجه الله ولا ليها مصلحة كمان

    طب لو كل الناس اللي شايفينهم أبطال بيعتمدوا على قوى من خارج بلادهم ليه أمريكا لأ

  6. nawaranegm Says:

    لا ياعمرو انت كده بتخرف نظمي فهمي رسمي، يا جماعة اللي عايز يسافر يتفسح وللا حتى يسافر يهاجر السياسة والحركات “النضالية” مش هي الوسيلة اللي تديله الجرين كارد، احنا مش ح نقعد نبرر لنفسنا ونليس عشان حاجة احنا عايزينها لازم يبقى عندنا ضمير، ومن حقنا يبقى عندنا طموحات بس لازم برضه نتحمل المسئولية واللي له طموح انه يسافر في اي حتة يبقى عنده شوية ضمير انه ما يستغلش بلده ويطلع ميتين ابوها وكمان عايز يعمل لنا مناضل واللي يكلمه يا اما يغلوش عليه يا اما يقول اي كلام وبرضه ما يردش يا اما يتكلم بالمنطق العجب اللي مش مترابط خالص خالص خالص ده يا عمرو، تعرف ايه عن المنطق؟
    يا جماعة ما تسافروا بعثة، مش شاطرين استلفوا فلوس التذكرة وروحوا بروكلين العربية واشتغلوا جارسونات لحد ما تشوفوا لكوا حد مصري هناك يظبط ورقكوا وبعدين اشتغلوا على تاكسي والله في تلات سنين لو قرصتوا على نفسكوا تعمل لكوا بتاع ميت الف دولار وشوفوا لكوا اي واحدة ترضى تتجوزكوا وتعيشوا معاها خمس سنين وتاخدوا الجنسية وبعد كده يبقى خلاص بقيت امريكان

    لما تروح وتتهرب من الحكومة لحد ما تظبط ورقك اشرف لك واكرم لك وانضف لك من انك تعمل لنا فيها مناضل وتطلع ميتينا احنا كلنا عشان انت نفسك تتفسح
    مش معقولة يعني بلد مثلا تحتل وللا مستقبلها يتدمر اكتر ماهو متدمر عشان كام عيل بيتفرجوا على افلام امريكاني ونفسهم يدخلوا جوة الفيلم

    دي وكسة ايه دي

  7. nemo1250 Says:

    فى إيه يا نوارة
    مرة مبارك أحسن من غيره
    ودلوقتى مبارك له عذر
    إنتى بقيتى بتجرى ناعم ولا إيه
    فكرتينى بشيرين … لغت حفلة البحرين عشان تغنى قدام مبارك

  8. nawaranegm Says:

    لا تعالى لي بقى من خلال الشنطة، مبارك قاعد على قلبنا بلا انتخابات، مش ح اقول لك الانتخابات مزورة مافيش انتخابات اساسا، فيه استفساء، والتلاتة اللي بيروحوا يصوتوا بتتزور اصواتهم
    صح؟
    طيب مبارك قاعد ليه؟ قاعد عشان هو احد اهم الحلفاء لامريكا وبيخدم مصالحها
    هل الراجل انكر؟ انكر؟ قال انا ثوري؟ قال انا محرر العبيد ومناضل؟
    ما قالش، صح؟
    طيب اساسا المعونة الامريكية دي كانت جزء من اتفاقية كامب ديفيد
    في مقابل ان مصر ح تنعزل عن دورها السياسي والاقتصادي في المنطقة امريكا ح تديها المعونة كتعويض حماية لاسرائيل
    ده جزء من الاتفاقية اللي بالمناسبة منصوص فيها انها تجب ما قبلها وتلغي ما بعدها اذا تعارض معها
    – راجع بنود كامب ديفيد –
    طيب بما ان الراجل لم يدع انه ثوري ولا محرر العبيد ولا المصريين يهموه في حاجة
    ده راجل موظف وبياكل عيش
    هو مضطر يقبل المعونة لانه ما يقدرش ما يقبلهاش

    لو ما قبلهاش يبقى لازم يوجد بدائل لدعم اقتصاده وتسليح جيشه، وحمايته في الكرسي بما انه مش حاطط امل ان الناس تحبه
    والناس مش بتحبه لانه بيخدم المصالح الامريكية في مصر

    والمصالح الامريكية في مصر يعني اقتصاديات السوق، يعني الانصياع الكامل لسياسة امريكا الخارجية والاقتصادية
    يترتب على ده ان الناس تجوع وما تلاقيش شغل ولا جواز وكل العيشة اللي احنا عايشينها دي

    واي حد ح ياخد قرار انه ينفذ مصالح امريكا في بلده ح يحصل له كده

    انظر كل حلفاء امريكا ماعدا اسرائيل

    هل ممكن مصر تبقى زي اسرائيل، في المشمش
    لان اسرائيل هي مصالح امريكا بعينها

    طيب في اطار ان حسني مبارك مش ثوري ومش زعيم شعبي والناس ما تهموش في حاجة لانه راجل موظف بياكل عيش

    المفروض انه موظف عندنا بس هو الحقيقة مش موظف عندنا هو موظف عند اللي مقعدينه

    في الاطار ده، تصرفات حسني مفهومة ومبررة، ومش عاجبانا
    مش عاجبانا لاننا عايزي رئيس يبقى موظف عندنا احنا بضرايبنا احنا يرعى مصالحنا احنا وييجي بانتخابنا احنا وحمايته الوحيدة هي حضننا احنا

    جميل؟
    لما المعارضين لسياسة حسني مبارك يتصرفوا زيه ويروحوا يقولوا لامريكا هاتينا بداله
    يترتب على ذلك انهم زيه بالظبط
    على اوسخ
    لانه كدابين
    يعني هم بيوعدوا انهم يخدموا مصالح امريكا في مصر، اللي هي بالضرورة ضد مصالح الشعب المصري، والله كنا نتمنى ان تتلاقى المصالح الامريكية مع مصالح المواطن المصري اللي عايز ياكل ويشتغل ويعيش في امان وسلام
    وفي نفس الوقت امريكا تبقى مبسوطة وسعيدة ونعيش في تبات ونبات ونخلف صبيان وبنات
    بس واقع الامر ان ده مش ح يحصل
    ومش ح يحصل مش لا سمح الله لاننا معترضين على مصلحة امريكا ولا بنكرهها ولا عايزين نقطع عيشها
    بس عشان هي امريكا اللي عايزة كده
    مش عايزة ندية في التعامل، عايزة جيش ضعيف عشان تحمي اسرائيل، عايزة كل عادم اقتصادياتها يتفرغ عندنا مما يودي بحياة المواطن المصري العادي اللي عايش حياته يفدي المواطن الامريكي ويتلقى عنه ضربات الرأسمالية بينما ينعم المواطن الامريكي بثمارها الشهية
    طيب لما ييجي معارض بنفس الطريقة اللي جه واستمر بيها حسني مبارك ده معناه ان ح يبقى الحال على ماهو عليه – في احسن التقديرات – مع تغيير الوجوه

    ويبقى حاجة واحدة، ان حسني مبارك كان نائب الرئيس ولقى نفسه في الموقف ده وما كانش يقدر يرفض للسادات طلب لان اللي بيرفض للسادات طلب يبقى راح ورا الشمس ومبارك مش الشاذلي، مبارك هو مبارك، موظف وبس، حتى مش مبتكر

    يعني اذا كانت المعارضة ح تتساوى بمبارك في خدمة المصالح الامريكية يبقى مبارك احسن
    لانه على الاقل مش نصاب ولا مدعي وبيجيب لنا الكلام على بلاطة: احنا مقبلين على ايام سودا

    طيب هل احنا غاويين وكلاء للادارة الامريكية؟ واذا كان خادم الادارة الامريكية موظف فده احسن لي من خادم نصاب وعامل لي فيها ثوري نوري كلامنجي هلاب الدين الشفطنجي وقاعد في الصف الاكلنجي شكلاطة وكراميللا

  9. nemo1250 Says:

    “في الاطار ده، تصرفات حسني مفهومة ومبررة”
    باردون يا نوارة .. يعنى لامؤاخذة بالـ ” الفرنصاوى” … مبررة بعنى إيه ولمين

    أنا دلوقتى اللى شابفة قدامى واحد بيخدم مصالح أمريكا .. وبيدمر مصالحى كلها وبيدوس عليا وعلى كرامتى بالجزمة القديمة
    يا ستى لو واحد تانى ان شالله يكون جاى مدعوم من إسرائيل بس حيحفظلى كرامتى كمواطن وحقى فى إنى أعيش فى بلد أحس إنها بتاعتى
    أكون فبها مواطن زيى زى أى حد من غير ما يكون معايا واسطة أهلا وسهلا بيه
    بلد يبقى من حقى أخش فيها شرطة وجيش ونيابة وخارجية بناءاً على كفائتى وقدراتى وما يكونش من شروطها إنى أكون مؤهل إجتماعيا يبقى يا مرحب
    أكون فى بلد بألاقى فيها شكوتى ليها صدى من غير ما أزعق وأفرج الناس عليها سواء بالإعلام أو ببرقيات استجداء لماما سوزان وبابا حسنى وأونكل جمال .. وربنا يستر وما يبقاش كمان تبعت برقية وعلبة شيكولاته كادبورى لابن علاء .. يبقى يا مراحب

    اللى يروح أمريكا يروح السند والهند وبلاد تركب الأفيال متهيألى مافيهاش مشكلة
    على الأقل يلاقى قوة يشيل بيها النظام الموجود دلوقتى اللى وصل لمرحلة انهم بيقولوا حيدونا ” صك ” فى البورصة .. وهو أصلا صك على قفانا وإحنا مافيش فى إيدينا حاجة غير إن إحنا نقول آمين
    وبعدين يا نوارة النظام الموجود فعلا ” مترستق ” .. ومستكنيس ومادد إيده ورجله وقلع شرابه ومعلقه قدامنا وبيقولنا اللى مش عاجباه الريحة يشرب من لابحر .. ليه
    لإن مفيش فعلا قوة موجودة على الساحة تهدده ولا تخوفه ولا تخليه يحترمنا
    الجيش والشرطة والقضاء والمجالس النيابية و الإعلام كلها فى إيده
    واللى أنا أعرفه … اللى حلال ليك .. تحرمه على غيرك ليه
    وخايف من إيه .. طالما إنت زى الفل
    معلش يا ريت تستحملينى شوية عشان أنا دماغى على قدى .. وفعلا باحترم دماغك وآرائك
    وده مش مسح جوخ والله

  10. nawaranegm Says:

    يعني يا نيمو انت بتقول كلام وترجع تناقض نفسك، انت بتقول نظام بيخدم مصالح امريكا وبيدوس عليا وعلى كرامتي بالجزمة
    صح؟
    قلت كده وللا ما قلتش

    وبعدين ترجع تقول نظام تاني يبقى مدعوم انشالله من اسرائيل بس يحفظ لي كرامتي
    !!!!!!!!!!!!!!!!
    كان على عيني يا حبة عيني
    احنا بنقرا في سورة عبس؟ ما انت عارف انه بيدوس عليك وعلى كرامتك بالجزمة عشان يخدم مصالح امريكا
    يبقى اي نظام تاني ح يخدم امريكا ح يحفظ لك كرامتك ازاي؟
    وازاي انت كمواطن كرامتك اداست لحد لما ما بقاش عندك ثقة في نفسك وفي كرامتك واستقلاليتك وشايف انك انت كمواطن ما تقدرش تطرح بديل، وانك خلاص بقيت تابع لامريكا واسرائيل كمان المهم تعيش؟
    وبتتكلم عن الكرامة؟
    كرامة ايه؟ اذا كنت انت مش قادر تثق في نفسك وتحترم نفسك عايز غيرك يحترمك ليه؟ ماسك عليه صور؟
    انا مش باتكلم عليك كشخص انا باتكلم بوصفي وصفك مواطنين مصريين
    اذا المواطن المصري ايمانه باستقلالية بلده، اللي مفروض ناس ماتوا عشانها، منعدم وشايف ان اي بديل لازم ييجي عن طريق امريكا
    بذمة النبي يا شيخ، بدينك وايمانك، ده نموذج لمواطن حد في الدنيا يحترمه وللا اي سلطة في الدنيا ح تيجي ح تحفظ له كرامة؟ منين يا فرج، اذا كان هو اصلا ما عندوش كرامة، وما عندوش اي اعتقاد في نفسه انه يقدر يجيب هو نظام نابع منه او بيمثله، وكل امله في الحياة انه يعيش وياكل كما تأكل الانعام، يبقى ده يستاهل ايه غير الدق بالجزم؟ قول لي انت لو قدامك واحد ذليل كده ح تعمل فيه ايه غير انك تذله؟ هو بيعمل دماغ ذل، تحرمه منها ليه؟
    وبعدين ما انا قلت لك كنا نتمنى نعيش احنا وامريكا في تبات ونبات ونخلف صبيان وبنات
    اقرا الكتاب اللي انا اشرت اليه اللي اسمه اعترافات قرصان اقتصادي وانت تعرف ان احتمالية ان ييجي نظام مدعوم من امريكا ويحفظ لنا كرامتنا تساوي في النسبة احتمالية ان القرد يبقى عالم كيمياء وهيفاء وهبي يطلع لها دقن وشنب وتربي سكسوكة وان ابليس يبقى من خيرة عباد الله الصالحين
    مش ممكن
    مش عشان انا سيئة الظن، بس عشان امريكا ماشية بسيستم
    السيستم بيقول ان دول العالم التالت هي الكنيف اللي امريكا بتعمل فيه زي الناس، وعشان كده لازم تفضل عالم تالت، وعشان تفضل عالم تالت لازم يبقى لها مواصفات اساسية مش ح تتغير، اهمها ان المواطن ما يبقاش عنده كرامة ولا ايمان في نفسه
    بس هم عندهم سيستم وبيطبقوه
    احنا بقى بنساعدهم فيه ليه؟ طب حتى نغلس عليهم شوية، واهو يكفينا شرف المحاولة، مدام ضربونا على عينا وهي خسرانة خسرانة

  11. nemo1250 Says:

    إنتى تقريبا قريتى أول سطر وكتبتى ردك
    عموما ممكن ترجعى تقرى اللى انا كتبته تانى وانتى تفهمى يعنى ايه يحافظلى على كرامتى
    وبعدين من جهة فاقد الثقة .. لا مش فاقد الثقة ولا أنا ذليل .. كمواطن يعنى … وبرضه كشخص
    لكن يا نوارة … إحتمالية وجود تغيير شعبى … فى حالة المعارضة الموجودة .. يبقى نفس احتمالية غن إبليس يطلع يحج السنة دى … أو إن القرد ياخد نوبل فى الأدب … أو إن هايفة تربى دوجلاس
    مصالح أمريكا يا نوارة عمرها ماكان معناها انى عشان أخش قسم أعمل محضر عشان آخد حقى لازم يبقى بواسطة
    وقيسى على كده
    إنما بقى لو أنا عايش فى حلم التغيير الداخلى .. وده غيار الغيار الداخلى اللى بيتكون من فانلة ولامؤاخذة عبك طبعا … وحاسس غنى أقدر أغير النظام بمطوتين وقزازة مولوتوف وعلبتين اسبراى وأقوم ساحب شخرة .. يبقى انا عامل دماغ عبط إكسترا … وأمريكا اللى بره وأمريكا اللى جوا ليها حق تدينى على قفايا وهى واقعة على روحها من الضحك على .. وساعتها تفكر فى التغيير ليه أساسا .. ‘ذا كان اللى بيفكروا بيفكروا تفكير أراجوزات … يبقى المسرحية دى يفضوها برضه … والى جوا يسيب الحكم ليه …. إذا كان اللى بييكلمه عايش فى الغيبوبة
    بالنسبة للكتاب أنا للأسف مفيش غمكانية إنى أجيبه دلوقتى بس ان شاء الله فى أقرب فرصة حأبقى اجيبه ةأقراه …. بس برضه مصالح أمريكا ملهاش أى علاقة بالتوحش فى استخدام السلطة والنفوذ الموجود دلوقتى
    بالحق … نسيتى تقوليلى مين على الساحة عنده القدرة على إحداث تغيير
    لو لقيتى ما تنسيش تسمعينى زغروطة

  12. nemo1250 Says:

    1 –
    “في الاطار ده، تصرفات حسني مفهومة ومبررة”
    مبررة بعنى إيه ولمين

    2 –
    إنتى مش قلتى لموا عزالكو وتعالوا هنا .. أمال إنتى حاطه بوستات هناك ليه

  13. nawaranegm Says:

    اولا انا باكتب هنا وهناك استوحياطا
    ثانيا انا قريت التعليق بتاعك كلمة كلمة
    ثالثا مش ح نعرف نتفاهم غير لما تقرا الكتاب، عشان تعرف ساعتها ان مصالح امريكا لها علاقة وثيقة بانك تدخل القسم تعمل محضر فتلبس انت تهمة وتنضرب على قفاك
    فيه حتة في الكتاب البنت اللي دربت الراجل على انه يبقى مستشار اقتصادي، او قرصان اقتصادي، بتقول له ان فيه دول لازم يفضل المواطن فيها ذليل وفقير وما عندوش امل في اي حاجة بعيدا عننا، ودايما تبقى عينيه معلقة بينا، ودي شروط المعونة الامريكية
    والله العظيم لو انا اللي كتبت الكلام ده، وللا اي واحد عربي كتب الكلام ده كنا اتشتمنا على السبحة واتقال علينا مجانين ومخاليل ومهابيش وقومجية واسلامجية وافكارنا عفا عليها الزمن
    الحمد لله ان اللي كتب الكلام ده امريكاني، والحمد لله انه مش ناعوم تشومسكي ولا حاجة، ده واحد رأسمالي
    طب ايه رايك في ان الايرانيين كانوا بيخرجوا في اعتصامات مليونية ومات منهم عشرات الالاف عشان يغيروا الشاه
    وعرفوا يغيروه، وعلى حد تعبير جون بركنز ان الثورة دي كانت صفعة للمصالح الامريكية؟ هم احسن مننا في ايه عشان هم يعرفوا يغيروا من نفسهم واحنا لا؟
    ده احنا مصر
    وللا نسينا احنا مين؟
    وحياة النبي يا شيخ تتصرف تجيب الكتاب من تحت قطاقيط الارض على راي شويكار، اذا ما عرفتش تجيب النسخة العربي هات النسخة الانجليزي، والحق اقراه قبل ما الراجل يتقتل

  14. nawaranegm Says:

    نسيت اقول لك، لما تقرا الكتاب ح تندهش من كم الدقة والتركيز، بداية من ميكي ماوس لحد الابحاث اللي بيقولوا عليها علمية
    طب والله العظيم حاجة الهية كانت بتخليني اشك في الحاجات دي وكانوا بيقولوا عليا مجنونة
    لازم واحد امريكاني يقول كده عشان يصدقوا

  15. nemo1250 Says:

    حاضر … إدينى فرصة أقرأ الكتاب الأول

  16. nemo1250 Says:

    بالحق إنتى شفتى الصورة دى

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s


%d bloggers like this: