Archive for the ‘أنا’ Category

احذروا التقليد عند التدوين

November 9, 2008



مهندس مصري كتر خيره دخل ساب لي لنك لواحد عامل مدونتين باسم شبه مدونتي واحدة
جبهة المهييسين الشعبية
وواحدة جبهة التهييس الشعبيي
دابل ي في الاخر
ياااااااااااااا ده انا ح اتنفخ كده على فكرة، انا ما كنتش عارفة اني علامة جودة والناس بتقلدها
يا كزوفي يا كزوفي، والله وشي احمر وانا باكتب
هي حاجة تغيظ بصراحة، تغيظ وتكسف بس خلوا بالكوا ده مش انا وانا ح احط برضه لنك عندي عشان ربنا يكرمه كده وناس كتير تدخل له
بس طبعا انا شاكرة ليه يعني انبهاره الى هذه الدرجة بالمدونة بتاعته
بس ياريت يغير الاسم وبرضه ابقى اعمل له لينكات واكيد لما يكتب حاجات ح يجيله ناس برضه
وبالرغم من انها فيها عدد من البوستات الا انه لسة عاملها حالا لان البروفايل في نوفمبر
بس يا اخ دي مش محبة دي مضايقة، انا ما احبش يتنسب لي حاجة مش بتاعتي وانت برضه من حقك يتنسب لك الحاجة بتاعتك مش كده؟

جاتلي هدية حلوة قوي :)

November 7, 2008

ناصر بعت لي هدية حلوة قوي اسعدتني قوس
متشكرة قوي 🙂 لا ومنقي احلى صورة اتصورتها في حياتي مع احلى بني ادم في احلى موقف مريت بيه من ساعة ما اتولدت

هي الصحافة الامريكاني بتفبرك كمان؟

November 6, 2008
من كام يوم اتصلت بيا صحفية بتشتغل في النيويورك تايمز واخدت مني في التليفون كلمتين عن اوباما
اظن انتوا عارفين يعني انا ح اقول ايه عن اوباما، اصلا اول كلمة قلتها لها: اوباما جلد اسود اقنعة بيضاء. وخلاص نسيت الموضوع وبعدين لقت واد امريكاني باعت لي ع الفيس بوك يقول لي ممكن نتعرف انا شفت كلامك في النيويورك تايمز! انا قلت بقى الراجل يعني متفق معايا فكريا وللا حاجة رحت النيويورك تايمز اشوف نزلوا ايه لقيتهم منزلين الكلام ده

“He has charisma, he’s good-looking, he’s very smart, he’s young and he knows how to make people like him, to the point that when he went to bow down to the Israelis, people here still made excuses for him,” said Nawara Negm, an Egyptian writer and blogger.

هممممممم، حبيبي يا حنين…دول ناقص يكتبوا: وقالت ان اجمل اماني حياتها انها تاخد بوسة من اوباما، لو سمحت يا ريس اديها بوسة احسن تموت ناقصة عمر
اتاري الراجل باعت لي ممكن نتعرف
طب تصدقوا بقى اني اكتشفت اني عندي عقدة الخواجة، الواحد برضه لزمن يواجه نفسه بعقده عشان يفكها، انا كنت فاكرة ان النيويورك تايمز دي ما تعملش الحاجات دهين ابدا. عموما الواحد كل يوم بيكتشف نفسه.
—————-
ثانية واحدة، انا مش قادرة امسك لساني واللي يزعل يزعل، اولا اللي عايز يقول لي حاجة بعد كده ما يقوليش ما تقوليهاش لحد وما يحلفنيش ولو مش عايز حد يعرفها ما يبقاش يقولها لي اصلا بقى انا مخلوقة عشان اقول ومتضايقة قوي اني مش عارفة اتكلم….ما راخرة حمارة…احلف ليه انا؟
المهم انا بس عندي كلمتين بيمغصوا في نفسيتهي وقلبيتي لزمن اقولهم:
الناس الواطية الرمة المعفنة الجربانة الشباشب البجحة اللي النصابة الافاقة المزيفة الجاهلة الغبية السطحية اللي اخدت فلوس من حملة اوباما
اتفووووووووو اتفوووووووووووووووووووووووووووووووووووو جتكوا القرف
هو انتوا ناقصين سخطة؟ ربنا ح يسخطكوا اكتر من كده ايه؟ وانا والله مستغربة من الناس اللي اتعرض عليها فلوس من حملة اوباما ورفضت ومش عايزة تتكلم، هو احنا كمان ح يبقى لنا كواليس؟
ماشي ماشي…عموما كل واحد عارف نفسه، واللي فوق الشبهات معروف واللي تحت الشبهات برضه معروف، انا اللي غبية، غبية، غبية، والله ياما الواد مالك مصطفى حذرني وقال لي خللي بالك من كلامك انت بتندفعي في الدفاع عن ناس انت مش عارفة ابعادهم..جتني نيلة..جتني خيبة انا متخلللللللللللففففففففففففففة
كل حاجة باينة انا اللي غبية، ماكنتش محتاجة تليفون اخر الليل اللي نكد عليا…على وشك يبان يا نداغ اللبان
ولا يتبجح ويفتح عينه غير القذرين الواطين
طب كان لزومه ايه من الاول، لما الواحد نفسه قصير ومش قادر يستحمل وعايز فلوس ما كان يخليه في نفسه بلا سياسة بلا تدوين بلا قذارة، واللي ياخد فلوس من حملة اوباما الانتخابية ياخد فلوس من اي حد
اععععععععععععععععععععععععععععععععععععععععععععععععععععععععع
بس ارجع واقول الحمد لله برضه، اهو واحد شال عبء بلاوي من عليه بدل فيلم كلنا ايد واحدة يا بهجت الساقط اللي انا كنت عايشة فيه
لا وواضح ان اللي واخد، واخد كام سنت لان العفانة باينة، وللا العفانة دي جزء من الخطة؟
محروقة: دول كلمتين بافك بيهم عن نفسي والا ح اطق، اشكال عليها بجاحة يا اخي، ودي مدونتي على فكرة وانا حرة اقول فيها اللي انا عايزاه، ماحدش يعلق على الموضوع ده ولا يسألني: هاه؟ ماه؟ باه؟ طاه؟ ايه؟ هيه؟ ميه؟
مش ح اقول حاجة ولا ح اتناقش في حاجة عشان بصراحة ما عنديش صحة اصوم تلات ايام
انا بس باتفك معاكوا…اعتبروني مجنونة وباخرف
مافيش حاجة حصلت

خطة النسناس الشعبوي للتعليم الابتدائي

November 3, 2008
انا تصنيفي النسناس الشعبوي، لمزيد من التفاصين انقر هنا

كان السيد جمال مبارك قال اللي عنده بديل يقدمه، وماما قالت لي ما انتوا بتشتموهم عشان كده هم متعصبين ما تكلموهم بالراحة، طيب ح نكلمهم بالراحة، انا باسمع كلام ماما

انا وضعت خطة للتعليم الاساسي
اولا: انتوا بتصحوا العيال بدري كده ليه؟ يصحى الساعة خمسة الصبح؟ ده ربنا مش فارض عليه صلاة، ربنا اللي هو ربنا مش مكلفه بحاجة، ما يصحى متأخر شوية سبعة تمانية، ويدخل الفصل عشرة الصبح ح يجرا ايه؟

ثانيا: ليه المناهج بتاعتهم ما يحطهاش واحد بتاع قصص اطفال؟ وتبقى بالرسومات الحلوة والملونة؟ وليه ما يبقاش معاها شريط وللا سي دي عليه اغاني راقصة فيها الدرس؟
زي احمد حلمي لما كان بيحفظ البنت الصغيرة في مطب صناعي:
اتنين في اتنين باربعة
اتنين في اتنين باربعة
لولولولولوليييييييي
انا مش باخرف على فكرة، ابن خلدون في المقدمة قال كل تلميذ له مدخل في فهم الدرس فيه اللي بيحفظ باعمل له الدرس على شكل قصيدة، فيه اللي بيفهم بالرسم بارسم له، فيه اللي بيفهم بالعلاقات باعملها له قصة شيقة. ده ابن خلدون من 600 سنة، كان بيكلف نفسه ويشوف كل عيل بيفهم بانهي طريقة عشان يفهمه.

ثالثا: الواجب يبقى انه يحفظ الشرايط اللي فيها الاغاني، ولما يكبر شوية والدرس يتعقد يبقوا يعملوه فيلم قصير كوميدي عشان العيال بيحبوا الضحك، ما تروحوش تعملوا له الفيلم رخم، يعملوه كارتون كوميدي

رابعا: يبقى تسميع الواجب انه يسمع الاغنية او يمثل هو وصحابه الفيلم تاني يوم

خامسا: الامتحان ما يبقاش خضة وتسييب ركب بالطريقة دي، يبقى كأنه مسابقة ويتقسم على مراحل بعدد الاسئلة وكل مرحلة بعدها يقعد يلعب ويغني ويدوله شيكولاتة
هو ده مش طفل ومن حقه ينبسط؟ ما الدنيا شيلاله بلاوي كتير لما يكبر

وبالطريقة دي ماحدش ح يسقط ابدا، وماحدش مش ح يعمل الواجب وعليه فيبقى المدرس مش مضطر يطلع تلاتين العيال لحد ما يموتهم

هفت عليا فجأتن

October 28, 2008

نادال شأمظ جولبيس وللا لا؟

October 14, 2008
انا ما كملتش الماتش لاني كنت كان داير وانا في الشغل ومش عارفة اركز في الماتش، بس نادال عمل نفس الحركة اللي بيعملها كل مرة….يريح ع الاخر لحد ما اللي قدامه يفرد كل عضلاته ويتعب وبعدين ياخده على حجره بقى..عمل كده في المجموعة الاولى…كمل على كده وللا لا؟
انا باحب جولبيس ياريت ما يكونش اتشأمظ قوي

عيد ميلاد طنط وداد

October 9, 2008

النهاردة عيد ميلاد طنط وداد متري الله يرحمها، كل سنة وانت طيبة يا طنط، وحشتيني

عدت يا يوم مولدي

October 8, 2008
وتميت خمسة وتلاتين سنة بالتمام والكمال وانا كده اتاخدت على خوانة عشان كنت عاملة حسابي اموت وانا عندي 30 سنة يبقى مين ح يدفع لي فرق الخمس سنين الزيادة دول؟
لما تميت خمسة وعشرين سنة كنت حاسة اني عجوزة ولما تميت خمستاشر سنة كنت حاسة اني مودموازيل كبيرة ولما تميت 35 سنة حاسة اني عيلة هي الناس بتكبر تعقل وللا تتهبل؟
على اي حال مش عايزين نطول يعني في الليلة في المسرع كده عشان ننجز بس

ده اخر تاج حد يمررهولي :)

October 6, 2008
انا مش باحب التاج بس عشان خاطر مهندس مصري ح اجاب على التاج ده ودي اخر مرة تحصل مفهوم؟
🙂
بدأت التدوين امتى ودخلت العالم ده ازاي؟

انا كنت مشتركة في مجموعات بريدية وكنت بابعت بارائي وكدهون وبعدين مالك مصطفى بعت لي وقال لي ما تعملي مدونة المجموعات البريدية بتبقى تحت رحمة صاحب المجموعة ويا اما يمرر الرسالة يا اما لا وبعدين تعدادها قليل التدوين ح يفتح قصادك ابواب كتير وناس كتير ح تدخل تعلق وتاخدي وتدي في الكلام ورأيك ح يوصل لعدد اكبر وابتديت فعلا المدونة من ديسمبر 2006

ايه كان انطباعك في البداية؟

هو انا اصلا اتعرفت على المدونات لما محمد الشرقاوي كلمني وحكى لي على موضوع التحرش الجنسي اللي حصل في العيد والشرقاوي اداني لينكات للمدونات عشان اقرا التفاصيل واشوف الصور وهو بيكلمني قلت له ده انا رايحة دلوقت في العاشرة مساء عشان اتكلم عن مسلسلات رمضان واتكلمت يوميها في العاشرة مساء عن اللي شفته على المدونات واللي حكاهولي الشرقاوي وبعدها حصل هجوم شديد على المدونين وانهم بيشوهوا سمعة مصر وتقريبا كرم جبر كتب مقال يقول فيه اني بامشي ورا المدونات اللي اصحابها مش معروفين هم مين ولا مين اللي زاققهم وكده، فلقيت نفسي اتزقيت في معركة عشان ادافع عن المدونات على صفحات الوفد اللي باكتب فيه وجرنال الحلوة اللي كنت باكتب فيه وقتها ودخلت اكتر في المدونات وكنت الحقيقة مستغربة قوي ان الناس تدخل تشتم بعض كده عادي وواحد يدخل في بوست يقول لصاحب المدونة: يابن ويابن يلعن ويلعن…وبعدها يدخل على بوست تاني، هو هو ذات نفس الصخص، يقول لنفس ذات المدون: تسلم ايدك على البوست ده
الحقيقة انا كنت خايفة اعمل مدونة لما مالك قال لي وقلت له الناس ح تدخل تشتم بقى فقال لي وايه يعني هي الشتيمة بتلزق وعموما اعملي مودريشن، والحقيقة كان الاستقبال حافل، اول تعليق جالي على المدونة بعنوان واحد عايز….. طبعا اتخضيت يعني من الاستقبال الرائع ده وكلمت الشرقاوي ومالك قعدوا يضحكوا وقالوا لي لو عايزة تمسحيه امسحيه بس احنا رأينا تخليه
!!!!!
مش عارفة ليه؟
🙂

مين اكتر حد بتهتم بتعليقه على البوست الجديد؟
كل الناس، بجد والله، واقعد اقرا كل تعليق واحد واحد باهتمام خصوصا اللي لسة داخلين جديد المدونة، طبعا فيه ناس من رواد المدونة بابقى مهتمة انهم يشوفوا التدوينات الجديدة، بس بشكل عام اي حد بيتعب نفسه ويدخل مدونتي ويقرا بوستاتي الطويلة والكتير دي اشيله على راسي حتى لو شتمني مش كتر خيره انه ضيع وقته وقعد يقرا البوست؟

إيه اهم حاجة اتعلمتها من عالم التدوين؟

والله حاجات كتير، بس اهم حاجة في التدوين التفاعل مع الناس، مفيد جدا وانا كتير باتعلم وباستفيد من كل اللي بيدخلوا عندي ده غير اني باستفيد من كل المدونات اللي بادخلها حتى اللي باختلف معاها

ايه اكتر حاجة كرهتها؟

ههههههههههههههههه المجانين، بس والله حتى دول مسليين

حاسس ان التدوين له تأثير؟

اه طبعا، وتأثير كبير والله، الناس بقت اقل خوف، يعني الناس لسة عليهم شوية صحيح، بس على الاقل بطلوا يخافوا يتكلموا، مش قصدي على المدونين بس، بس نفس الجرأة اللي في التدوين ادت شجاعة للناس انهم يتكلموا في الشارع، وكفاية اني اكتر من مرة اشوف مواطن عادي بيتخانق مع ظابط ويقول له: انت مش من حقك تتعامل معايا كده. لو المدونين ما عملوش غير كده يبقى كتر خيرهم على كده قوي. وحاجات كتير اظهرت تأثير التدوين على المجتمع، مش بس على اللي بيدخلوا النت، فيه ناس حتى ما بتفكش الخط واتأثروا بالجو العام اللي خلقته المدونات

تهدي التاج لمين؟

ما اهديهوش لحد اللي ما ارضاهوش على نفسي ما ارضاهوش على غيري
🙂

انا هابلة

September 18, 2008
تصدقوا انا هابلة؟ مخ اللمبي على جسم رياض المنفلوطي
اللي بالي بالك بقى
لما باسمع اغنية وطنية باعيط زي الهابلة، لدرجة اني لما باسمع يبقى انت اكيد اكيد في مصر باعيط، وباعيط لما باسمع الى رحاب يثرب بتاعة فيلم الشيماء، وباعيط والطيارة طايرة من مطار مصر، وباعيط لما باشوف مصر من فوق وانا راجعة، وباعيط واحنا بنعمل لاندينج وباسقف زي العبيطة، وباعيط لما باسمع اغنية حلوة بلادي السمرا بلادي الحرة بلادي السمرا بلادي، وباعيط لما باسمع قرار تأميم قناة السويس وباعيط لما باسمع الاغنية دي

اخدتها من مدونة كويتية اتربت في اسكندرية وكاتبة بوست عن مصر وقعدت اعيط وانا باقرا البوست بتاعها
فيه معلق كويتي كاتب لها: انا ما اعرف انت وعالية شنو حبكم لمصر؟ من زينها؟
الترجمة: انا مش عارف انت وعالية بتحبوا مصر ليه؟ من حلاوتها؟
راحت رادة عليه: مصر التي في خاطري وفي فمي/ احبها من كل روحي ودمي…
مصر يا حلاتها
يا حلاة ناسها وخفة دمهم

حتى المترو بزحمته وعفسته حلو
حتى الشوارع الملوثة حلوة
حتى راعي التاكسي اللي يحن على راسك سوالفه حلوة

مكتباتها
جناينها
نيلها
الشعراء، الفن، الاغاني، الافلام، المسلسلات
النكت والأمثال الشعبية
حتى النصب ع السواح
والشعبطة في الباصات
والتكاسي اللي توصل مشوارين وثلاثة مع بعض
حلوة

ما راح أخلص….
—-
انا شفت ردها ده رحت معيطة تالت عيطت جامد قوي طول ما انا باقرا ردها اعيط اعيط اعيط وانا بانقله اهو عمالة اعيط لما مش شايفة قدامي الحروف خالص لما الليلة كلها بقت عياط
انا الظاهر باحب مصر وللا ايه؟ مش باقول لكوا هابلة؟