Archive for the ‘أىىىىىىى’ Category

يا شباب ايدكوا معايا في التصييح

November 18, 2008
الارشيف بتاعي مش عايز يرجع ما رجعش منه غير 282 بوست
يا اخوانا ما تصيحوا معايا على جوجل انا مش باعرف اصيح لنفسي، دي حتى حاجة لوجه الله ماحدش ضامن بوستاته ولا جوجل شيلاله ايه؟
Advertisements

القضاء المصري يلغي القرار بمنع القوافل/ البدو مات منهم تلاتة

November 11, 2008


وصلني الخبر ده من ساهر جاد:

خبر عاجل :

حكم تاريخي أصدره مجلس الدولة صباح اليوم – 11 نوفمبر- بإلغاء القرار الإداري بمنع قوافل فك الحصار عن شعبنا الفلسطيني في غزة

تحية لقضاء مصر الشامخ ..وتحيه لكل الوطنين الشرفاء

وصلني الخبر ده على الجايكو من زهران:

مصرع 3 من البدو وإصابة 4 من الشرطة في مواجهات مستمرة بسيناء

احذروا التقليد عند التدوين

November 9, 2008



مهندس مصري كتر خيره دخل ساب لي لنك لواحد عامل مدونتين باسم شبه مدونتي واحدة
جبهة المهييسين الشعبية
وواحدة جبهة التهييس الشعبيي
دابل ي في الاخر
ياااااااااااااا ده انا ح اتنفخ كده على فكرة، انا ما كنتش عارفة اني علامة جودة والناس بتقلدها
يا كزوفي يا كزوفي، والله وشي احمر وانا باكتب
هي حاجة تغيظ بصراحة، تغيظ وتكسف بس خلوا بالكوا ده مش انا وانا ح احط برضه لنك عندي عشان ربنا يكرمه كده وناس كتير تدخل له
بس طبعا انا شاكرة ليه يعني انبهاره الى هذه الدرجة بالمدونة بتاعته
بس ياريت يغير الاسم وبرضه ابقى اعمل له لينكات واكيد لما يكتب حاجات ح يجيله ناس برضه
وبالرغم من انها فيها عدد من البوستات الا انه لسة عاملها حالا لان البروفايل في نوفمبر
بس يا اخ دي مش محبة دي مضايقة، انا ما احبش يتنسب لي حاجة مش بتاعتي وانت برضه من حقك يتنسب لك الحاجة بتاعتك مش كده؟

في كل الاحوال: ان عملت ما تخافش وان خفت ما تعمل

November 6, 2008
تحديث:
ماحدش بيحط ايده في جيبي ويقبضهم، بس انا اعتراضي على انهم بيدعوا انهم بيشتغلوا ببلاش، عشان كده انا مش باحترم غير واحد فيهم هو اللي بيقول انه بيعمل الشغل ده بفلوس، وعشان ما ابقاش ظلمتهم عندهم فرصة انهم يحترموا نفسهم زي الشخص ده ويقولوا بدل الفيلم الساقط اللي هم عاملينه، ولو ورونا نفسهم زي الجدعان كده زي الشخص اللي باقول عليه انا مستعدة اعتذر لهم
ماذا يفيد الانسان اذا ربح العالم وخسر نفسه

انا اقدر اتكلم بقى لاني وصلني المعلومات من جهات تانية غير المحلفين 🙂 بس انا برضه مش ح اقول اسامي وكل واحد بيبان
بقى هالله هالله ع الجد والجد هالله هالله عليه انا مش ح الزم الناس بمعتقداتي ومبادئي
انا واحدة معارضة لحكومتي، وعليه فانا مش ح اتعامل مع اي حكومة تانية في العالم واخد منها فلوس عشان اشتم حكومتي انشالله تبقى حكومة ابو بكر الصديق، فما بال حكومة امريكا بقى؟
فيه ناس مش بتتعامل مع حكومات وبتتعامل مع منظمات مجتمع مدني وبيعلنوا ويقولوا وكل حاجة على مية بيضا وانا شخصيا مش شايفة حاجة في التعامل مع الجمعيات الاهلية في اي حتة في العالم لكن بالنسبة لي انا وبشكل شخصي باستشعر الحرج، انا بقى واحدة معقدة معلش خدوني على قد عقلي، لكن ما عنديش مانع اتعامل مع ناس مصريين بتتعامل مع منظمات اهلية عالمية طالما انا ما اطلتش وبالبلدي كده طالما مش طالع لي اي مصلحة لا مادية ولا معنوية
انا عندي حساسية من الفلوس، لاني لو عشان اتبنى قضية اخد عليها فلوس
يبقى من باب اولى بقى ادافع عن الحكومة المصرية كوني بقى موظفة في الحكومة وكتر خيرهم ما رفدونيش من شغلي لحد دلوقت
لكن
لكن
لكن
انا لا الزم احد بالكلام ده، ولا بادعبس ورا حد، ولا باعاير حد، ولا باشرشح لحد واقول ياللي من واخد من ليبيا وياللي واخد من صدام وياللي واخد من سوريا وانا بروح خالتي واخدة من حملة اوباما فلوس قد كده ومن الادارة الامريكية اللي قبل كده فلوس وكمان ابقى كدابة وبنت كدابة ومش قايلة؟
ما باقولش ليه؟ ان قبضت ما تخافش وخفت ما تقبضش
انما اعمل مناضلة واستهبل، واروح اقول للامريكان ده انا مضطهدة ده انا مش باعرف امشي في الشارع ده انا ممنوعة اقعد على القهوة ده انا اتسجنت (وانا ما ابقاش اتسجنت ولا حاجة) ده انا بص الواوا؟ بوس الواوا…وعبي عبي شيل شيل، وفوق البيعة بجحة وباجسة وماشية اشرشرح للعالم واعايرهم؟ ليه؟
وايه لزوم النتانة عشان ابين اني مش معايا فلوس وانا عمالة اكوم فلوس على قلبي؟ طب على الاقل انبسط بيهم طاه…وللا هي وساخة هواية يعني؟
اللي يعمل كده يبقى ايه؟ حد عنده عقل وشرف وكرامة يرد عليا..اللي يعمل كده يبقى ايه؟
لا وانا راخرة بهبلي فاكرة ان كل اللي هم فيه ده وكل اللي بيعملوه وحصريا وبصريا وفصريا كل ده من غير فلوس
لا ما انا بالصلاة ع النبي متخلفة يعني
فيه ناس، هم مش ناس هو واحد بس، كل حاجة بيعملها بيقولها وبيقول انا باعمل الشغل ده بفلوس، وبيقول انا باتعامل مع الادارة الامريكية، وعشان كده بقى اللي يقول عليه متصهين واللي يقول عليه متأمرك، طب مش كتر خيره انه بيقول؟ مدام بيقول يبقى ماحدش له عنده حاجة هو حر
طيب والسادة بقى اللي عايشين في دور الزعماء وبيتمريسوا على شباب جزمة اصغر عيل فيهم برقبتهم وبيعملوا كل حاجة بفلوس وكمان معيشينا في دور انهم مضطهدين المناضلين وذئاب الجبل وكمان يزايدوا على الناس دول يبقوا ايه؟ انا باسأل سؤال واحد….دول يبقوا ايه حد يرد عليا
انا ظلمت اوباما على فكرة
انا كنت فاكرة ان الراجل ما عبرناش ولا سأل فينا، اتاري الراجل دافع فلوس لمركز ابن خلدون ولبعض المدونين عشان يروجوا له، فيه ناس بتروج له زي الناس العاقلة وفيه ناس اغبيا بقى: لو مش ح تحب اوباما ح يتلعن ابوك، بيحللوا القرشين يعني، طب مركز ابن خلدون اهو بيقول كتر خيره برضه، التانيين مش بيقولوا ليه؟
ما يقول انه واخد فلوس هو احنا ح ناخد منه ضرايب؟ بس من حقنا نعرف مين بياخد فلوس ومين شغال حاجة ببلاش كده وقاعد يتنطط من شغلانة لشغلانة عشان يعرف يعيش وطلعان تلاتينه في الحياة
والناس بقى هي اللي تحكم مين يعجبها ومين ما يعجبهاش
الله…مش يمكن يا اخي ناس تعجبها وتنضم لكوا وللا انتوا عايزين تاكلوها لوحدكوا؟
ثم هو فيه حد بياخد كل حاجة؟ بطولة وفلوس؟ ده انتوا حتى تتحسدوا
ايه كمية محجوب عبد الدايم اللي انفجروا في وشنا دول؟ وياريتهم سايبين الناس في حالهم…آه طبعا ح يسيبوا الناس في حالهم ازاي؟ ماهم واخدين مرتب عشان ما يسيبوش الناس في حالهم
كيف تعرف المدون القابض:
تلاقيه بيقول كلام غريب ويصر ويلح عليه ويعيد ويزيد فيه ولما تعارضه يطلع تلاتينك ويشهر بيك في المحافل الدولية ويعلن عليك الحرب الشعواء الشعوذاء الشعباناء لانك بتبوظ له شغله طبعا، ووراه مديرين بيفتشوا وراه ويقولوا له: ايه ده؟ انت مش عامل شغلك ليه؟ امال ده لسة بيتكلم وفيه ناس موافقة على كلامه ليه؟
وتلاقي الناس تقول: الله..هو ماله محروق قوي كده الموضوع مش مستاهل
وتلاقي نوارة الهابل بتقول: يا اخي يمكن عصبي شوية
تلاقيه زي اوباما كده، متلمع ومتأمع وطالع زي العفريت في كل خرابة وواخد صيت مش قد الشغل اللي بيعمله
وتلاقي الناس عمالة تقول: هو الواد ده ايه اللي وراه؟ طالع في كل خرابة ليه؟
وتلاقي نوارة الهابلة تقول لك: يا اخي ربنا يبارك له كويس انت حتحقد عليه؟
وحواليه حاجات كل الناس تقول عليها: مش ممكن الشغل ده من غير فلوس
وتلاقي نوارة الهابلة تقول لك: لا حرام ما تتهمش الناس هو انت معاك الوصل، لو اخد فلوس اكيد ح يقول يعني ح يكدب ليه؟
تلاقيه بيتفقد النت حتة حتة وركن ركن ويدور تحت الترابيزة واول ما يلاقي حد بيتكلم في الموضوع اللي هو متخصص فيه، او بالاحرى بيقبض عشانه، يظهر فجأتن ويستلمك ولا يكل ولا يمل مش قال رأيه ومشي، لا يلت ويعجن ويعجن ويلت ويفضل يشوف كل واحد بيقول ايه ويرد عليه
لو ربنا فاتح عليه ومديله شوية مخ اهو بيرد بالعقل، لما يتزنق (وغالبا بيتزنق) تلاقيه عمل لك ارهاب ويمشي يشهر بيك بقى ويحطك في دماغه ويعمل فيك مقالب مستترة ويدخل بكذا اكاونت، والله ما عشانك هو عشان سيادة المدير يفتكر انه اثر في كذا حد
وتلاقي الناس تقول: الله….الحكاية كده مش طبيعية
وتلاقي نوارة الهابل تقول: يا سيدي يمكن مدمن نت وهو بطبعه عامل زي الاوبة …مش شرط يعني يبقى موكل من حد عشان يعمل كده

انا بقى…غبية ليه؟ ليه غبية انا؟ غبية انا ليه؟ الحاجات دي كانت واضحة من الاول، ليه لازم بهبلي استنى لحد ما ناس يجيبولي ادلة واسانيد، لا وايه؟ غبية وحمقاء كمان، لما حد يقول لي: يا بنتي…يابنتي شغلي مخك ابوس ايدك…انبري دفاعا واقول له لاااااااا، مش معنى اني مختلفة مع فلان اني اشكك فيه وفي ذمته حرام عليك، الخلاف ما يخليناش نتهم الناس بدون دليل، طب ربنا رزعني بالادلة جتني خيبة، لا وشوفوا غباوتي عشان افرحكوا بيا، كل ماللي بيكلمني يقول لي: وفلان كان عامل كذا…اقول له: بفلوس دي؟ لما ضحكت عليا عيال صغيرة وبقيت اضحوكة الاطفال والشباب والكهول والشيوخ والعجل في بطن امه

آآآآآآآآآآآآه يا شماتة مالك مصطفى فيا….ياما حذرني وانا ما سمعتش كلامه
———
على فكرة انا بعت للنيويورك تايمز الجواب واهو نصه

Dear Sir,

I would like to inform you that your correspondent in Cairo , Ms. Mona el-Naggar, has contacted me on Thursday 30/10/2008 to take my opinion – as an Egyptian journalist and blogger – concerning the US elections and the nominee (president) Mr. Barak Obama.

Today I opened your site to read the article and I was taken aback by the distortion of my opinion.

As a matter of fact I explained my reservations on Barak Obama. I freely expressed my point of view counting on the credibility the American media widely known of, but unfortunately my words were utterly misrepresented.

My outlook which I expressed to Ms. Naggr came as follows: “The first state that jumps into my mind when you mention Barak Obama is “black skin, white mask”. It is the title of a Frantz Fanon‘s research, studying the psychology of what you call in America ‘Uncle Tom’, I believe that Obama copes with such a model. I think that Obama has been chosen to be CIA puppet, which executes the US capitalist imperialist policy in a sugar coated way. That is why he is a charismatic, handsome, smart, amiable and African American. I think such star makers succeeded in a way or another and you can find some Arabs finding excuses for Obama when his visit to Israel was an embodiment of submission and capitulation.”

This is a summery of my opinion which I gave to your reporter. Though it is harsh but either it is published as it is or not published at all. I am not sure if this is the mistake of the Ms. Naggar the correspondent or the writer of the essay Ethan Bronner.

What was published is the following:

“He has charisma, he’s good-looking, he’s very smart, he’s young and he knows how to make people like him, to the point that when he went to bow down to the Israelis, people here still made excuses for him,” said Nawara Negm, an Egyptian writer and blogger.

http://www.nytimes.com/2008/11/05/us/politics/05global.html?_r=2&pagewanted=2&sq=negm&st=cse&scp=2&oref=slogin

I expect you conserve the right to comment for your sources.

Thank you.

Nawara Negm

Egyptian journalist and blogger.

يعني ايه رسايلي مدمرة

November 2, 2008


الرسالة الاتية وصلتني من استاذ مدحت الزاهد:

نورا .. مساء الخير
الرسائل المرسلة منك تصل مدمرة ورسائلك تتعرض للاتلاف ، عدا عندما يكون النص فى ملحق مستقل وليس متن الرسالة .. وحرصا على استفادتنا اتمنى لو ارفقت النصوص فى ملاحق لان هناك هجمة منذ فترة على بريدك وبريد بعض الزملاء .. مع خالص التحية
مدحت الزاهد
—-
معناتو ايه الكلام ده؟ حد من اللي بيفهم يقول لي اعمل ايه؟


تهديد ناصر امين بالقتل

October 28, 2008
التفاصيل هنا
للي ما يعرفش ناصر امين هو محامي عماد الكبير اللي كسب القضية

يا لهوتي!!!!!

October 22, 2008
المقال ده منشور في الاهرام النهاردة:

تأملات سياسية
بقلم : جمــال زايــدة

بقدر ما يسعدني كصحفي أن أري صحيفة جديدة تصدر في مصر بقدر ما يسعدني أكثر أن تعلن الصحيفة بشفافية ونزاهة عن مصدر تمويلها في العدد الأول‏.‏

صدور صحيفة جديدة يعني بالدرجة الأولي إضافة جديدة لحرية الرأي والتعبير‏,‏ في الوقت نفسه الذي نرجو فيه ألا تكون حرية الرأي تلك مقصورة علي أصحاب المليارات الجدد الذين يصدرون الصحف اليوم في مصر‏.‏

صدرت صحيفة اليوم السابع‏..‏ مبروك‏..‏ ولكن أليس من حق الرأي العام أن يعلم من أصدرها؟ هذه هي أولي بديهيات الشفافية والنزاهة في العمل العام‏.‏

وقبل أن يسلط الصحفيون أقلامهم علي قضايا الفساد‏,‏ وعلي ما يفعله الوزراء في مصر ألا يستحق المصريون أن نقول لهم من وراء هذه الصحف؟

وأنا هنا لا أتحدث عن الشكل القانوني الظاهر للعيان‏,‏ اسم الشركة وأسماء المساهمين‏,‏ وإنما أتحدث عن أصحاب المصالح الحقيقيين‏,‏ فهل يجيب الأخ خالد صلاح رئيس تحرير صحيفة اليوم السابع عن السؤال الشائع في الوسط الصحفي وهو‏:‏ هل تقف أموال الملياردير الهارب ممدوح إسماعيل ـ صاحب الشركة التي أودت إحدي عباراتها بحياة أكثر من ألف من المصريين ماتوا غرقا نتيجة الإهمال في البحر الأحمر ـ خلف الصحيفة الجديدة؟ هل تختلط رائحة الموت برائحة حبر الكتابة؟

لقد تحدث معي رئيس تحرير اليوم السابع حول هذا الموضوع‏,‏ لكنه لم يقدم الإجابة الشافية ليس لي‏,‏ ولكن للقراء الذين يتطلعون إلي الصحفيين المصريين باعتبارهم ضمير الأمة‏!‏

!!!!!!!!!!!!!!!!!!!!!!!!!!!!!
!!!!!!!!!!!!!!!!!!!!!!!!!!!!
!!!!!!!!!!!!!!!!!!!!!!!!!!!!

لقد انطلقت صحف جديدة يقف وراءها أصحاب مصالح‏,‏ وأوشكنا أن نشهد لبننة الصحافة المصرية علي غرار صحف لبنان التي تكتب لمن يدفع‏,‏ سواء نظاما عربيا نفطيا أو جهاز مخابرات‏,‏ الغريب أن بعض الصحفيين نصبوا أنفسهم مدافعين عن الحق العام في حين تحوم الشبهات حول الأموال الهائلة التي يتلقونها من بعض رجال الأعمال وجهات أخري‏!‏ من إذن يدافع عن المصريين؟ من يدافع عن الموظفين؟ من يدافع عن الكادحين؟‏..‏ من يدافع عن الغلابة؟ ولماذا تمارس بعض الصحف الجديدة ـ التي لانعرف من يمولهاـ معاولها في الصحف القومية؟

وهل اكتشفنا مؤخرا أهمية صحف قومية ليس لها مالك قطاع خاص مثل الأهرام والأخبار والجمهورية ؟‏.‏

نحن في حاجة إلي أن نطالب أنفسنا بالمزيد من الشفافية والعلانية في المجال الصحفي قبل أن نطالب الدولة ومؤسساتها بتلك الشفافية‏..‏

نحن في حاجة إلي لحظة صدق ونزاهة وشرف إزاء قرائنا‏.

نادال اتهزم يا مينز

October 18, 2008
أيها الإخوة المهيسون، إنه ليوم حزين في تاريخ التهييس حيث ان الضربة جاءت إلى التهييس مزدوجة واتوكس وكل من نادال وفيدرير في يوم واحد
وانا وراجي منهارين على الكرسي يا مرسي، إذ ان راجي بيكره موري، وانا باكره سيمون لانه شبه اكتر واحد باكرهه في حياتي وفرنساوي ودمه تقيل وعينيه كلها شر…بينما نادال فيه اصل عربي على حسب ما راجي بيقول لي، كمان الواد فيدرير ده ابن ناس ومتربي وذوق والعيبة ما تطلعش منه
لكنني اؤكد لكم ان ولا سيمون ولا موري اخدوها بالساهل…لااااااااااا ده احنا جامدين قوي، دول تقريبا على اخر الماتشين كانوا بيطلعوا في الروح
ومعنى كده ان موري وسيمون ح يتقابلوا…اذن…آه يا سفلة…انا مش عارفة ازاي ح اتفرج؟ خصوصا ان الماتش ممكن يتذاع وانا في الشغل وكل ما احاول ازوغ شوية من الشغل واتابع الماتش الساعي ييجي يقعد جنبي ويبص قوي على البنات اللي واقفين وبعدين يقول لي: هي السنيورة دي شغلتها تلم الكيور؟
طب اعمل ايه انا دلوقت؟ يارب موري وسيمون هم الاتنين يتغلبوا
والسنيورة اللي بتلم الكيور هي اللي تكسب عشان محمود ما يزعلش

هه؟

October 6, 2008
انتوا عارفين تقولوا حاجة بعد العفو؟ الا انا دخلت الريدر اشوف العفو لقيت اشكرك، والمدونات اتملت مهابيش هبابيش هباشون هباشان ومخاليل وناس محتاجين عم مدبولي يلبسهم قميص الكتاف وماهماش معانا خالص وبرضه ما لقتش اي حاجة تبل ريقي
اللي مش مهبوش ولا مخلول جاله الازبهلال اللي جالي من العفو وفيه قال طيب..مبروك
فيه بقى طبعا مدونات المثقفين بتوع: طبعا قريتي كتاب الهمايون البحطيطي في سرابيل الزنسجار؟
اعتمادا على انك ح تحرج وتقول اه، او لو مش كداب ح تسكت
او لو بجح زيي ح تقول له: لا ايه الكتاب ده؟
يقوم فاتح عينيه باستغراب: ما قريتهوش؟ الهمايون البحطيطي في سرابيل الزنسجار….بتاع شفيقوف جلالين…
– لا والله لا قريته ولا سمعت بشفيقوف جلالين ده قبل كده
– لازم تقريه ده اهم كتاب في الزنسجار الهمايوني
طبعا ممكن فجأتن يظهر لك شوية دم في وشك وتهز راسك وتسكت لكن لما تبقى البعيد عديم الدم زيي تقول:
– ايه الزنسجار الهمايوني ده؟
في الحالة دي اصل ومعدن البيني ادم اللي قدامك بيبان
اذا كان يا قلب امه اهبل ح يبان على طول: وعاملالي فيها مثقفة وواخدة ثانوية عامة…
– لا حضرتك انا واخدة ثانوية عامة اكيد والشهادة عندي في البيت بس مش انا اللي مثقفة ده حضرتك حتى انت تعرف شفيقوف جلالين وبتقرا عن الزنسجار الهمايوني
واذا كان ابن لذين لئيم ح يعمل نفسه قال يعني بيكتم الضحكة عشان ما يكسفكش ويمثل التواضع وهو بيبتسم لك:
– ح ابقى اجيب لك كتاب لطيف كده عن اسس الزنسجار الهمايوني كتيب صغير وبعدين لما تخلصيه اديكي الهمايون البحطيطي في سرابيل الزنسجار
اهي المدونات زي ما هي مليانة مهيسين ومزبهلين من امثالي ومجانين وعصابيين وهيستيريين من امثال…..ناس تانية مليانة بقى الزنسجار الهمايوني ده
والنبي لو حد لقى كتاب كارميان محموديوف يبقى يباصيهولي، انا عايزة كتابه الاخير عن الهبشتة المجرصيطة.
ومافيش حرايق النهاردة، حاجة غريبة ليه؟ لعلهم بخير يعني مش بعادة، ربنا ما يقطع لهم حريقة
طيب تصبحوا على…خير ان شاء الله….يارب خير

أخخخخخ امي اتعلمت الكمبيوتر

September 26, 2008
والنت، وبقينا يا عم كمبيوترايزد قوي، وتكلمني عن ناس تقول لي: انا عملت لهم ديليت من حياتي
وتقول لي: انا كنت متضايقة النهاردة…عملت سيرش في دماغي عشان اعرف ايه اللي مضايقني بالظبط
ومش ناقص غير ادخل عليها الاقيها بتعمل شات بالمايك والكاميرا مع واحدة صاحبتها تبقى متعلمة الكمبيوتر جديد برضه
مش دي المشكلة، المشكلة انها حطت التهييس في الفيفرتس وكل شوية تدخل عندي. اممممممممم انا قلت لكوا اني ما كنتش باقريها المدونة والاقيها جاية تقول لي فيه ناس بتقول لي انك كتبت كذا. وبرضه اللي يسمع غير اللي يشوف
كل شوية داخلة على المدونة وجاية تتخانق معايا لان اللي على المدونة بيحطم يا عيني تصورها عني، انا عندها في البيت ملاك ينقصه الجناحين، وهادية وساكتة، لقيتها جاية بتقول لي: اتاريكي قاعدة خرسا طول النهار ما انت نازلة رغي على النت
اخر حاجة بقى لقيتها زعلانة قوي وبتقول لي: انت ايه اللي بتقوليه على المصريين ده؟ ده مش المصريين دول بتوع الرز في الطبق الغويط والمعلقة، دول الغجر بس…هو لازم الواحد يبقى غجري عشان يبقى مصري؟
وطبعا ده فتح ما بينا حوار بكيزة وزغلول المتكرر والمعتاد اللي مش باحب افتحه مع ماما عشان بينتهي زي مناقشات بكيزة وزغلول بالظبط: انت جربوعة حومارة…
وزغلول اللي هي انا تقعد تبرطم وتخاف بكيزة تسمعها
اييييييييييه
ايها الاخوة المواطنون اننا مع مدونتنا العزيزة المهيسة مقبلون على منحنى خطر وعلينا ان نتاكتف جميعا …عشان ما انطردش من البيت
—-
اه نسيت اسألكوا
هي ليلة القدر كانت واحد وعشرين وللا تلاتة وعشرين؟