Archive for the ‘احا’ Category

بالمختصر وعشان نجيب من الاخر

November 28, 2008
بالنوسبة لاحداث عين شمس، وتبعاتها وتبعات اللي قبلها واللي قبل اللي قبلها، انا خلاص باكره المسلمين وباكره المسيحيين وباكره كل الناس دلوقت
باحب اليهود…ناس لطيفة وبتعمل سينما دمها خفيف وكل حاجة يحطوا ايدهم عليها ويقولوا دي بتاعتي زي العيل الغلس، حتى الاهرامات بيقولوا بتاعتي، وما يردوش بقى بعد كده، انت تقعد تتشال وتتحط وهم خلاص قالوا بتاعتي مرة وهي المرة، والغريبة ان كل الناس بتقتنع بكلامهم، حتى احنا، بينما اقوى معارضين لوجود اسرائيل يهود برضه، وماسكين اقتصاد العالم ويقتلوا الناس ويقولوا احنا مظلومين، لا وبرضه الناس مقتنعة انهم مظلومين، حتى احنا برضه، ويرهبوا الناس ويقولوا احنا بنحارب الارهابيين، ويجوعوا الناس ويقولوا احنا بنعمل لخير الانسانية، واحنا طيبين
شوف القدرة
واللي يفقع ان كل الناس مصدقين.
ناس لطيفة موت
انا باحبهم، دول حتى دمهم خفيف
الا كان فيه واحدة بتقول لي اللي هجموا على المسيحيين في عين شمس كانوا ماسكين طبلة وعمالين يقولوا بالروح بالدم نفديك يا اسلام
!!!!!!!!
اسلام الشاطر يعني؟ هم المسيحيين اللي انضربوا كالعادة دول كانوا زمالكاوية؟
عموما مش لازم يعني يبقى فيه سبب ان مسيحي مصري ينضرب…كفاية انه مش لابس الطاقية، مش لابس الطاقية ليه؟
Advertisements

ولا انقسامات ولا نيلة اللي خايف على نفسه يوعى

November 26, 2008
من غير تسفيه في حركة ستة ابريل لو سمحتوا، الحركة منقسمة على نفسها ما بين رافض لدعوة الخارجية الامريكية، وما بين قابل
ولا انقسامات ولا نيلة، اللي خايف من النجاسة يوعى ويروح يكون حاجة نضيفة بعيد عن النجاسة
وما تعملوش زي حزب الغد وتفرجوا عليكوا الناس، النضيف نضيف والنص نص نص والملوث ما نعرفهوش
حتى ممكن تسموها كده، واللي شبطان في الاسم يطفحه
اللي خايف على نفسه يوعى

هههههههههه احسن احسن

November 26, 2008
انا كنت فاكرة نفسي اعبط واحدة في الدنيا، بس دايما ربنا يوري الواحد ان القوي فيه الاقوى منه، قال ومصطفى داخل يقول لي دلوقت لما فاق: ايه ده؟ انا مش فاهم حاجة!
ها؟
قلنا كده وللا ما قلناش؟ قلنا الادارة الجديدة ح تطلع ميتين ابونا وللا ما قلناش؟
قلنا الادارة الامريكية باختلافاتها كلها مش ح تسمح لمعارضة حرة تتواجد في مصر من غير ما تحط ايدها عليها وتبلعها في كرشها وعشان كده بيدوا تمويل لاي كلب ماشي في الشارع وهم مش مستخسرين وللا ما قلناش؟
قلنا مش ح يسمحوا لحاجة تتكون من غير ما يعرفوا ابعادها وراسها ورجليها وللا ما قلناش؟
قلنا اللي بيسمح لنفسه انه يتبلع يبقى ايه؟ يبقى ايه؟
قلنا وللا ما قلناش
لالالالالالالالالالالالالالا مافيش داعي لنظرية المؤامرة
ح يموتونا يا كلاوي
ما تبقاش شكاك قوي كده

اختفاء مدونة حبشتكنات فلسفية

November 22, 2008

مدونة حبشتكنات فلسفية اختفت، دي رابع مدونة تختفي من جوجل وتالت مدونة في ظرف اسبوع

فيه ايه على البلوج سبوت، على فكرة انا بعت لهم رسالة بوصفي مالكة لدومين دوت اورج وهم ما ردوش عليا وعمالة ابعت لهم جوابات ومش بيردوا ولا كأني باطاردهم عشان يتجوزوني

ايه القرف ده

احنا لازم نعمل حملة على جوجل

———-

على فكرة انا اللاب توب بتاعي اتحرق

اللاب توب بتاعي ما بيفتحش

November 20, 2008

ودلوقت باكتب من جهاز تاني
صاحب العقل يديني عقله بقى
ملحوحة: انا دماغي هي الاقدم في صناعة الجزم
بمعنى: اخر بوست ح اكتبه هو قبل موتي بثانية انشالله ادور على اجهزة مصر كلها

يا فضيحتي؟ بتشرب خمرة يا سعادة التقي الورعووووو؟

November 17, 2008

هي حصلت خمرة على الملأ؟ ما شاء الله يا استاذ، بكرة تشرب سجاير وتتفرج على ام بي سي ماكس اللي بتقطع الشتايم، وح يتجلد كام جلدة عليها دي؟
وبعد كل المسخرة دي بيحاور في الادياك؟



ليه كده؟ ليه عايزين تموتوني ناقصة عمر؟

November 14, 2008


مين المتآمر اللي دخل ساب لي لنك الخبر ده؟ ليه كده؟ عايز تموتني حل لي الفرامل، اشتري فرفر وفرغه في دماغي وبعدين حطه في ايدي كأني انا اللي انتحرت، خليني باعدي الشارع وتعالى بسرعة افعصني تحت العربية، سمني، ارميني من الشباك، اخنقني، ولع فيا
لكن ليه التعذيب؟ ليه؟ ح تستفيد ايه لما تموتني كمدا؟
علي الدين هلال بيقول علينا متسولين عشان مستنيين الدعم من الحكومة، طيب احنا مش مستنيين الدعم من الحكومة يا حكومة متسولين بحق وحقيق
يعني عايشين عوالة على قفانا والضرايب تقليبك اولا، وعاملين زي الشاروقة ما بتشبعوش ابدا والضرايب بتروح فين الله اعلم
بتاخدوا معونة من امريكا يا شحااااااااااتيييييييييييييين عشان تخدموا مصالحها يا متسولين ولو على حساب كرامتنا ومصلحة بلدنا، ضاربين على دخل قناة السويس ودخل كل مواردنا وكأننا صحراء جرداء لا زرع فيها ولا ماء ولا غاز طبيعي ولا بترول ولا اماكن سياحية،
كل ده واحنا ساكتين وكاتمين في قلبنا واخرتها احنا اللي طلعنا متسولين الله يحرق دمك على المسا حسبي الله ونعم الوكيل، والله العظيم جسمي كله بيتنفض من الغيظ،
بس احنا نستاهل، احنا نستاهل…ياللا اقلع الجزمة وادينا بيها، كل قوتي يا عبد الهادي، عشان احنا سايبينكوا عايشين عوالة على قفانا زي البلطجي بتاع الرقاصة…لا فشر، ده زي البلطجي بعد ما انضرب من بلطجي تاني واتشل وهي بتصرف عليه عشان اصلها، ياريتكوا بلطجية على الاقل البلطجي بيحمي الرقاصة من الحرامية والرجالة الناقصة، انما انتوا بتحموا الحرامية والرجالة الناقصة مننا وبتسلكوا لهم
عمولات وبتاخدوا، اعانات وبتبلعوا، موارد في بطنكوا، ضرايب وناقص تحطوا لنا عداد على مناخيرنا عشان تحسبوا على كل نفس اتناشر ونص في المية ضريبة مبيعات، ده انتوا بتاخدوا ضرايب على الزبالة يا….لا وتقولوا لنا ان البيبي بتاع الناس هو اللي وقع الجبل، طب ايه؟ هل دي توطئة عشان تاخدوا ضرايب على البيبي كمان؟ بس قسموها بقى، ماهو هو ده الفكر الجديد:
بول عادي: 5% ضريبة تش
براز عادي: 10.5% طريبة بم
بول بلهارسيا: 11.8% ضريبة يالهوي
براز امساكي: 2.3% ضريبة مزع
براز اسهالي: 15% ضريبة هرررررررررر
ايه قرفان؟ طب اقرا علي الدين هلال عشان تعرف ان كلام ورد وياسمين
وفي الاخر بقينا احنا اللي متسولين؟ كلم الحكومة تدهيك واللي فيها تجيبه فيك

طب واستقلال الشعب عن الحكومة ده ما يشملش قانون الطوارئ يا حلو الملامح …يا ..يا بو الرمش سارح…يا…يا اقرع وفاتن…آه….وكلامك مناتن…آآآآه
حماية ايه اللي عايزنها منكوا؟ هو انتوا بتعرفوا تحموا نفسكوا من غير قانون طوارئ وقميص واقي للرصاص مغطي كل حتة مش ناقص غير يبقى برقبة وزعبوط مغربي؟ وقابب من البدلة باينه معمول من فولاذ وللا ايه
ده الراجل راح مؤتمر الحزب الوطني وسط الناس بتوعة، وحواليه جيش من الحرس وعمالين يزقوا في الناس كأنهم ماشيين في هارلم
حماية الدولة ايه ودعمها ايه؟ فين فلوسنا؟ فلوسنا فين اللي بتاخدوها وتدبوها في جيوب رجال الاعمال وتاخدوا عمولة؟ هم الكام جربوع اللي ما كانوش لاقيين ياكلوا وفجأة بقوا مليارديرات دول جابوا فلوسهم منين؟ بتتخنوا قططكوا من جيبنا وكمان احنا المتسولين
احنا عايزين منكوا حاجة؟ احنا عايزينكوا تسيبونا في حالنا
قال ماما وبابا وانور وجدي….طب هش يا اسماعيل يس من هنا

المطالبة بالحق حاجة والسفالة والحقارة حاجة تانية

November 13, 2008
دي اسمها سفالة وحقارة وانحطاط ووضاعة ودونية وقذارة
وده فوق انه مش ح يحصل انبي تتوكسوا، يعني لما الاسرائيليين موتوا لنا تلاتة منهم طفلة طلع لنا ابو الغيظ يقول: الكلام عن طرد السفير الاسرائيلي ده كلام فارغ
وناس كتير قالوا الكلام الفارغ ده
مدام قاعد لكوا سفير اسرائيلي بيموت لكوا الناس على الحدود يبقى دي اسمها حقارة
فيه وسائل كتيرة ناخد بيها حقنا، وتاني، فتاة القطيف اللي كان معتدى عليها ما كانتش مصرية، القضاء السعودي هو كده، ولازم يتغير اصلا في طريقته دي، وهم ظالمين اللي عندهم قبل ما يظلمونا، عادي دولة عربية وبتظلم
فبلاش قلة ادب وحقارة وناس قذرة والله اعلم بيها تصطاد في المية العكرة، وانا مش عارفة المهبوش اللي باعت لي الجروب ده متخيل اني ح اعمل ايه غير اني اسب له؟ وعايزني اعمل جوين كمان، بجاحة

ينعل ابو الامراض النفسية والشخصيات السيكوباتية

November 13, 2008
هو انا مكتوب على وشي نرحب بالمرضى النفسيين؟
وده ايه ده بقى ان شاء الله؟وايه العته الرسمي ده؟
على فكرة انا عادي ممكن اغير اسم المدونة واعمله: عنبر سي لطفي رقم 33

احذروا التقليد عند التدوين

November 9, 2008



مهندس مصري كتر خيره دخل ساب لي لنك لواحد عامل مدونتين باسم شبه مدونتي واحدة
جبهة المهييسين الشعبية
وواحدة جبهة التهييس الشعبيي
دابل ي في الاخر
ياااااااااااااا ده انا ح اتنفخ كده على فكرة، انا ما كنتش عارفة اني علامة جودة والناس بتقلدها
يا كزوفي يا كزوفي، والله وشي احمر وانا باكتب
هي حاجة تغيظ بصراحة، تغيظ وتكسف بس خلوا بالكوا ده مش انا وانا ح احط برضه لنك عندي عشان ربنا يكرمه كده وناس كتير تدخل له
بس طبعا انا شاكرة ليه يعني انبهاره الى هذه الدرجة بالمدونة بتاعته
بس ياريت يغير الاسم وبرضه ابقى اعمل له لينكات واكيد لما يكتب حاجات ح يجيله ناس برضه
وبالرغم من انها فيها عدد من البوستات الا انه لسة عاملها حالا لان البروفايل في نوفمبر
بس يا اخ دي مش محبة دي مضايقة، انا ما احبش يتنسب لي حاجة مش بتاعتي وانت برضه من حقك يتنسب لك الحاجة بتاعتك مش كده؟