Archive for the ‘افففففف بقى’ Category

امراض الطبقة المتوسطة لا تمثل الشعب المصري

November 18, 2008
عاجل:
مدونتي مش بتنزل البوستات الجديدة ولما اعمل سيف للبوست يقول لي
form errors
الفورم ايرورز دي تيجي منين؟ المهم اني لما باعمل ايديت بيتعمل ايديت، كمان مدونة شهروزة اتوقفت وكمان وقفوا لها حساب الايميل بتاعها
لا بقى
كده محتاجين تصييح جامد يا شباب، اكتبوا على مدوناتكوا لجوجل جوابات لان كده شهروزة الاول وبعدين انا بعدها بتاني يوم، والموضوع مش موضوع شكاوى بقى معلش، جوجل مليانة حاجات خارجة عن القانون بما فيها جنس الاطفال المحرم دوليا واللي بينزله على الكمبيوتر بتاعه بيتحبس

الطبقة المتوسطة تحترم نفسيتها بقى وتتلم، هم اصلا 15 في المية وماسكين كل حاجة ونازلين عمايل زي الناس في دماغنا

انا مستاءة جدا من حلقة العاشرة مساء النهاردة
الموضوع وما فيه ان مجلس الوزرا عمل استطلاع رأي على عينة من المصريين وطلعت النتيجة كالآتي:
هل انت سعيد في حياتك؟
الحمد لله (80%)
طب راضي عن وضعك الاقتصادي؟
بصراحة لا (75%)
هل انت فخور انك مصري؟
اه طبعا فخور قوي اني مصري (80%)
مستعد لو قامت حرب تموت عشان مصر؟
طبعا (80%)
تحب تشتغل في القطاع العام وللا الخاص؟
الخاص
تحب نظام الخصخصة وللا القطاع العام؟
العام
طيب انا شايفة النتائج دي منطقية جدا والمفروض ان اي حد مصري بينزل الشارع وبيركب مواصلات وبيتكلم مع سواقين التاكسي (ومش لازم يشتغل في العشوائيات يعني) يبقى فاهم الكلام ده جاي منين
نفسي اعرف بقى ايه وجه السخرية والتريقة من الاستاذة منى الشاذلي والدكتور الرخاوي والاستاذ ايمن الصياد على المصريين
ومرة يتهموهم انهم فشارين وكدابين، ومرة يقولوا الكلام متناقض، ومعقولة يعني المصريين فخورين بمصريتهم اكتر من الالمان امال بيرموا نفسهم في البحر ليه؟
طيب هم بيرموا نفسهم في البحر وبيحبوا مصر، وهم هربانين من الفقر مش هربانين من مصر، واللي هم ما استكملوهوش في وصلة السخرية من المصريين ان فيه احصائية بتقول ان المصريين اقل الجنسيات المهاجرة تخلي عن جنسيتهم الاصلية، وانهم ما بيعملوش كده غير في الدول اللي بتجبرهم على انهم يبقى عندهم جنسية واحدة وبيبقى اختيارهم الاول انهم يرجعوا ولو ما ينفعش يرجعوا بيضطروا يتنازلوا عن الجنسية المصرية، ولما استطلعوا رأي موظفين السفارات قالوا المصريين اللي بتخلوا عن جنسيتهم بييجوا السفارة وهم بيعيطوا، ولما بيقطع الباسبور على الشط لما بيوصل ايطاليا مش بيقطع جنسيته المصرية ده بيقطع اي وسيلة ترجعه تاني للفقر، زي ما تقول كده بيرمي بلاه على البلد اللي رايحها
واللي كمان هم مش واخدين بالهم منه، ان المصريين مش بيهاجروا الى ابد الابدين، دايما بيرجعوا، ودايما بيبقوا مهتمين ان لما ربنا يفتح عليهم في الغربة يبقى عندهم بيت هنا في مصر، ولازم يبقى بيت ملك
انا اتضايقت جدا وعيطت
كون ان الطبقة المتوسطة ساخطة ومش بتحب مصر ومخنوقة منها ومحتقرة الشعب المصري وكل واحد شايف نفسه خسارة في البلد، دي امراضهم هم ياريت ماحدش يسقطها على الشعب المصري لانهم مش بيمثلوا الشعب المصري، دول حتى ليل نهار يقولوا احنا بنضمحل…ياللا في داهية
انا اشتغلت فترة في العشوائيات، والناس فعلا دي اجاباتها: الحمد لله احنا احسن من غيرنا كتير….يوووه ده الدنيا ياما فيها بلاوي ده احنا في نعمة…بس لابد من كل بد تركبوا لنا عداد النور….وتساعدونا عشان جوزي بيعمل غسيل كلوي ومش معايا تمن الدوا…لو ينفع الواد اخويا يسافر في اي حتة يجيب قرشين….بس بلاش الخليج عشان مش بيحبوا مصر….مصر ح تلعب النهاردة مع الكاميرون…مصر ام الدنيا
طب اقول لكوا حاجة
في الاول خالص مالص، زمااااااان اول ما اشتغلت هناك، ايام ما كان اسطبل عنتر ده ادغال، اهالي اسطبل عنتر ما كانوش بيرضوا يتصوروا (دلوقت اقتنعوا بجدوى التصوير ومش كلهم برضه، فيه لسة بيزعقوا لنا لو صورناهم) عارفين ليه ما كانوش بيرضوا يتصوروا؟:
انتوا عايزين تصوروا عفانتنا عشان تشوهوا سمعة مصر؟ مصر فيها حتت حلوة كتير…مش كل المصريين زينا…امشوا من هنا يا ولاد الكلب يا اسرائيليين
انا عايزة افهم ايه العجيب في ان المصريين بيقولوا احنا مستعدين نموت عشان مصر لو حرب قامت؟
اولا المصريين ما عندهمش اي مانع يموتوا لاتفه السبب، واللي مش مصدق يشوف الناس بتعدي الشارع ازاي، دول ناقص يحبوا على رجل اللي سايق عشان يموتهم، ونسبة الخوف من الموت عندنا طول عمرها قليلة، ثم بقى انا بالاقي كتير قوي، خصوصا من اللي الغلابة، نفسهم ومنى عينهم ان يحصل حرب! نوع من انواع الاكسايتمنت يعني، الحقيقة مافيش غير الطبقة المتوسطة هي اللي بتخاف من الحرب، واللي فوقيها طبعا، اللي فوقيها انا مش باعتبرهم مصريين اصلا، المهم، اللي خايف من الحرب خايف عشان عنده حاجة يخسرها، لكن اللي انا اشغلت معاهم (خصوصا العيال بتوع الاحداث) حاسين ان الحرب دي بقى ح تبقى لعبتهم، وفرصتهم الوحيدة عشان يبقوا ابطال والبلد كلها تتوقع في عرضهم، عاملين زي اللي امه بتضطهده وبتطلع عينه وبتفضل اخوه عليه، ونفسه ومنى عينه انها تعيا عشان يتبرع لها بكليته ويموت عشانها بس عشان تعرف قيمته وتحبه زي ما هو بيحبها
وهم محقين فعلا
مين اللي مشي على الالغام بالالاف وصد بجسمه فوهات المدافع في حرب تلاتة وسبعين؟ مش العساكر الفلاحين والصعايدة الغلابة؟
اما بخصوص انه عايز يشتغل في القطاع الخاص لكن عايز كل حاجة تبقى تبع القطاع العام
فده مفهوم، هو دلوقت حالا عايز يشتغل في القطاع الخاص عشان فلوسه اكتر، لكن يتمنى ان كل حاجة تبقى تبع القطاع العام لاني سبق وقلت لكوا المصريين شيوعيين بالسليقة، الثقافة الابوية بتخليهم عايزين كل حاجة تبقى في ايد الدولة عشان يبقى فيه عدالة
الحقيقة انا مش شايفة غرائبية في نتائج الاستطلاع، ولا شايفة تناقض اذا اتكلمنا عن السياق المصري وتصارع الشخصية المصرية وموروثها مع الواقع المفروض عليها، ايه ده؟ انا باقول ايه؟ ايه الجملة الاخرانية دي؟ المهم انتوا فاهميني يعني احنا عشرة
ولا شايفة اي داعي للتريقة على المصريين والسخرية منهم واتهامهم بالكدب وانهم هم اللي المشكلة فيهم مش المستطلعين
الحقيقة المشكلة مش فيهم ولا في المستطلعين، المشكلة في النظام اللي بيحطهم في صراع ما بين القيم اللي هم مؤمنين بيها وما بين الظروف الصعبة المفروضة عليهم
وايوة المصريين لسة بيحبوا مصر، ولسة فخورين بيها لدرجة انهم ساعات يستعروا من نفسهم عليها، يعني شايفين ان مصر مقامها اكبر منهم، وكتير بيعملوا زي اللي مش بيرضوا يتصوروا عشان مستعفنين نفسهم ومحرجين لمصر منهم، ودي تركيبة ما يفهمهاش اللي قاعد معزول عن الناس
والرضا بقضاء الله حاجة وزنقة الفلوس وصعوبة المعيشة حاجة تانية
وقرفهم من العيشة حاجة وحبهم لمصر واستعدادهم انهم يموتوا عشانها حاجة تانية
هم اصل المتحدثين تعليم خواجاتي شوية، عندهم التصور الخواجاتي بتاع ان الوطن هو اللي بيدي الواحد حقوق وبيوفر له حياة كريمة
واحنا من امتى في مصر كان عندنا التصور ده عن الوطن؟ اذا كنا لما بنهاجر بنعمل فول وطعمية وبنوسخ الاماكن اللي احنا عايشين فيها عشان تبقى شبه مصر، ونعمل قهاوي ونعمل تجمعات مصرية ونتخانق نفس الخناقات وننزل في الشارع نحتفل بفوزنا بكاس افريقيا، مش كل من هاجر بقى ما عندوش انتماء
ولا زهق من البلد ولا ده معناه ان ما يتمناش يموت عشانها
والناس لما بتقول مصر هي امي، هم حاسين انها امهم بجد، حتى لو ام رخمة وبترنهم علقة بالحزام، ويتخانقوا معاها ويطفشوا ويروحوا يباتوا عند واحد صاحبهم، بس امهم، حد ح يكره امه؟
انا مش طالبة منهم ينزلوا العشوائيات (مع مراعاة انهم يلبسوا لبس بسيط شوية عشان يحسسوا الناس انهم منهم) انا بس عايزاهم مرة كل ست شهور يركبوا المواصلات وللا حتى ياخدوا تاكسي عشان ما يبقوش قاعدين كده مندهشين من اختراع العجلة ومش دريانين بجوانيات اهلهم
ولما هم اللي ما يفهموش

ولما هم اللي ينعزلوا
يطلعوا ان الشعب هو اللي وحش وهو اللي كداب وهو اللي مش معقولة ابدا يبقى عنده انتماء واكيد نصاب
ويقعدونا قدامهم ساعة يبستفوا فينا هم ومتصلينهم اللي لاوئين ضبتهم
اما عاجيب والله
وتحية للدكتور ماجد عثمان
اه، نسيت اقول حاجة، الناس قالت احنا مستعدين نموت عشان مصر، تقوم الاستاذة منى في اخر الحلقة تقول، ياريت نقول الحقيقة عشان استطلاعات الرأي دي بتفيدنا يعني لما حد يقول لك مستعد تموت في حرب قول اللي جوة نفسك
يعني كأنه تحريض للمصريين على انهم ما يموتوش عشان بلدهم وتسفيه للناس واللي يقول انا اموت عشان بلدي يبقى كداب
امممممممممما عجااااااااااااايييييييييييييبببببببببببببببب فعلااااااااااااااا

Advertisements

على فكرة ما ينفعش كده، مرات الدكتور عايزة تبوس رجلين الملك

November 12, 2008
متمردة كتبت على الجايكو الرسالة دي:

جماعه الحقوا زوجة الطبيب المصري بتعرض تقبيل قدم الملك عبدالله عشان يعفو عن زوجها بجد أنا حاسه اني هتشل

على فكرة ما ينفعش كده، قسما بالله العظيم ما ينفع، مش حكاية انه ما ينفعش بس اننا سنة 2008 واحد يتجلد 1500 جلدة ومش ناقص غير يحطوا له حجر على صدره ويدلقوا مية جنبه ويقولوا له: عد الى دينك ابائك…اذكر الهتنا بخير واذكر اله محمد بشر
ومش بس ما ينفعش السفارة تعمل ودن من طين وودن من عجين بالطريقة دي وما تعملش اي قيمة لمواطن، طبيب، طبيب، يعني الطبيب ده شغلته يشفي الناس ويحافظ على صحتهم وارواحهم يتعمل فيه كده ازاي؟
الاوسخ من كده، انه ما ينفعش يوصل الامر بالمواطن انه يفكر في انه يبوس رجلين الناس، اصلا اصلا ما ينفعش الفكرة تتبادر لذهنها اساسا
يعني ايه تبوس رجله يعني؟ جات لها منين الفكرة دي؟ انا افهم ان اللي ييجي في بالها، طب حددوا اقامته، طب نرجع وخدوا تعهد انه يتسجن في مصر، طب نبيع كل اللي حيلتنا ونمضي لكوا على شيكات كمان ونسددها طول عمرنا، طب نسفرها تتعالج على حسابنا، واحنا مستعدين نلم من بعض ونسفر الولية تتعالج على حسابنا، معلش ما احنا عمار دايما ونصرف على اي حد حتى اللي عندهم بترول، انما ايه تبوس رجله؟
مين اللي عمل فينا كده، هي ايه الحكاية بقى؟ هو ليه احنا ما عندناش كرامة؟ انا مش بالوم على مرات الراجل، انا بالوم على اللي وصلنا اننا ما بقاش عندنا كرامة حتى في اللا وعي بتاعنا، مالنا فيه ايه؟ ايه ثقافة التسول دي اللي سيطرت علينا لدرجة ان اللي يجيب سيرة الكرامة يبقى عجبة ومجنون وبيخرف وبيقول كلام فارغ؟ انا الموضوع ده مزعلني، مزعلني قوي، انا قعدت اتكلم مع واحدة صاحبتي في الموضوع ده وقعدت اعيط، تلات اربع مشاكلنا ح تتحل لو عندنا كرامة
ماحدش يقول لي الحكومة مش عاملة لنا كرامة، ايوة صح، الحكومة المصرية مش عاملة لنا كرامة، بس فين احساسنا احنا بكرامتنا؟ ازاي عرفوا يتغلغلوا جوانا لدرجة ان التسول في كل حاجة بقى امر مقبول ومعقول وممكن مناقشته، ووصل انه تخطى كونه مسألة خلافية الى انه بقى من المسلمات واللي يناقش حاجة زي دي يبقى هو اللي غريب، وانا متأكدة ان ناس ح تدخل وتقول لي ليه كده ارحميها دي ست غلبانة ومش عارفة تعمل ايه؟ انا والله العظيم حاسة بيها ومش بالوم عليها انا عايزة افهم بس سيكولوجيتها، ايه اللي يخلي الفكرة دي تيجي على بالها اصلا؟
على فكرة كرامة البني ادم مش انه يتنطط على الناس، الكرامة ان الواحد يحس ان كلنا زي بعض ومافيش حد احسن من حد، وعليه زي ما انا مش احسن منك ، انت كمان مش احسن مني عشان ابوس رجلك، حتى لو كنت ملك، حتى لو قدرت لي على حاجة ربنا فوقك وحسبي الله
اففففففففففف، اشمعنى البنت السعودية اللي اغتصبت وكانت ح تتجلد ما عرضتش انها تبوس رجلين القاضي؟ ما نشتكي في الامم المتحدة
يا بتوع حقوق الانسان، ابعتوا للامم المتحدة، وللا هو عشان مصري مالوش وزن
خلي عندنا كرامة بقى الكرامة حلوة زي الصين ماهي حلوة كده

هو هاني سرور ايه؟

November 8, 2008

تحديث:
على فكرة طفاطيفو المفروض يلم من كل واحد بيتفرج على الفيديو جنيه

هو هاني سرور صادق وللا ممثل شاطر؟

غير ان طريقته في الكلام مؤثرة، بيقول نقطة مهمة سانده فيها كل الاطباء اللي اتصلو، حد دكتور يقول لي، الدكاترة اللي اتصلوا بيقولوا الكلام اللي حيدر بغدادي قاله مش علمي وبيخرف(ملحوظة: حيدر بغدادي ده نائب عن منطقة منشية ناصر ومصر القديمة…ايون هو بتاع الدويقة اللي الدوايقة كانوا بيدعوا عليه)، الدكاترة يفيدونا، الكلام ده صحيح؟
هو هاني سرور عضو في الحزب الوطني ومجلس الشعب وبصراحة ده ما ينفعش يبقى واحد في الحكومة ويبقى رجل اعمال، دي قصة تانية، والحزن الوثني بيطلع تلاتين رجال الاعمال اللي بيدخلوا في عجلته عشان بس يحرموا
بصرف النظر عن رأيي في رجال الاعمال، بس يمكن هم فاكرين ان دي وسيلة لحماية البزنس بتاعهم عشان ما يجيش عين وللا جيم يبرشط على البزنس بتاعه، اهو عمال يطلع تلاتينهم اهو، واظن هم عارفين مين اللي بيعمل فيهم كده، سبحان الله ذنب ناس يخلصه ناس، المظلوم منهم والظالم، حتى المظلوم في قضاياه هو ظالم عشان في مجلس الشعب، او على الاقل ظالم عشان قابل يستفيد من التسهيلات اللي الحكومة بتعملها لهم، ايه الحكومة دي؟
ايه اللي بيعملوه في الناس ده؟ حرام عليهم، سواء هاني سرور مدان وللا بريء وسواء هشام طلعت مدان وللا مدان
ومش ح نتكلم عن مندوح سماعين عشان ده اللي ع الحجر، له يوم، هم دول يعني مش بني ادمين زينا كانوا عايشين عيشتنا؟ يطمعوهم ويسيبوا لهم الحبل ع الغارب لحد ما يشنقم نفسهم بيه على راي زكي رستم في فيلم نهر الحب؟ او هم يشنقوهم بيه؟ ده اسمه كلام؟ دي معاملة انسانية للبني ادمين؟
عرفتوا ليه انا باكره الراسمالية وحاسة انها لازم يعاقب عليها القانون والدين والانسانية؟ عشان هي بتخلق مناخ عام بيخلي الناس تتقيم من خلال الفلوس اللي معاهم، وتخليهم يجروا جري الوحوش وبعدين يطيروا يطيروا يطيروا وبعدين يروحوا واقعين على جدور رقبتهم. طبيعة البني ادم يحب انه يكون انسان محترم في مجتمعه، والرأسمالية بتخلي البني ادم محترم بس عشان معاه فلوس، او مظاهر فلوس، عشان كده تلاقي واحد في العشوائيات ومعاه موبايل وسارق وصلة دش، وما بقتش احلامه انه يعلم ولاده ولا يتعالج ولا يعيش بكرامة، احلامة انه يلحس التراب ويتذل بس عشان يكسب فلوس، لانه لما ح يكسب فلوس ح يبقى محترم، فلوس كتير كتير قوي، كل ما زادت كل ما بقى محترم اكتر، وبتبقى مصاحبة لمناخ الليبرالية اللي بتخلي ناس كتير تقول: سو واط؟ على كل حاجة، مساحة الاخلاقية بتضيق، عشان كده ناس مثلا تدافع عن ساويرس انه بيتعامل مع اسرائيل، وايه يعني؟ ماهو بنزنس، المهم انه مش حرامي مش فاسد مش بيستغل نفوذ! واللا اخلاقية والخيانة والتقرين كمان ممكن يبقوا وجهة نظر
ويضحكوا على الناس ويقولوا لهم انتوا بتنتجوا وانتوا بتنموا اقتصاد البلد، وهو يبقى متهياله – زي هاني سرور كده – انه ينفع يبقى مليادرير ومناضل وصاحب سلطة….ويصلح بوابير جاز.
وبعد ما احلامه كلها اتحققت بقى طالع في التلفزيون بورق عشان يبرأ نفسه من جناية
ليه كده؟ بلاش عشان الفقرا، يولعوا بجاز، ماهم ح يروحوا الجنة يعني ح ياخدوا دنيا واخرة؟ بس ليه البني ادمين يتعمل فيهم كده ويتلعب بيهم وباحلامهم ومفاهيمهم واخلاقهم بس عشان يبقى معاه فلوس؟
هاني سرور ده طبيب، وبيقول على نفسه عالم وكذا واحد قال عليه كده، عالم وتبقى شغلته يكسب فلوس كتير ويبقى في مجلس الشعب؟
لا حول ولا قوة الا بالله
ياللا، ربنا يفك ضيقته اذا كان مظلوم، وحقه بقى يرجع موظف في الحكومة تاني، وللا ياخد منحة من الدولة ويتفرغ للبحث العلمي وتبقى صناعة زي دي شغلانة الدولة وتحت رقابة الدولة مش اي حد كده سوا كويس وللا وحش تبقى ارواحنا في ايده، ان فاتك الميري اتمرغ في ترابه، واذا كان مش مظلوم يبقى ربنا يقيم عليه حكمه وياخد جزاءه.
وتاني مرة بقى كل واحد يحترم نفسيته، ينعل ابو الفلوس الكتير على ابو الاحلام اللي مبنية على اوهام، عشان تريح نفسك احب اقول لك ان الفلوس مش بتولد فلوس، بس الفلوس بتجيب فلوس، بتجيبها من جيوب ناس تانية
افتح محفظتك وبص في الفلوس اللي فيها، ايوة، افتكر بقى ان الفلوس دي معاك عشان فيه غيرك مش معاه الفلوس دي، وما تحاولش بقى تزود عدد الناس اللي انت واخد منهم فلوس، كفاية الناس اللي انت فعلا واكل اكلهم وواخد فلوسهم
اتبطوا بقى، يا رب كل البنوك اللي في الكون تتحرق، والفلوس تتلغي ونرجع لنظام المقايضة تاني، يجرا ايه لو كل الناس تعيش لا اغنيا ولا فقرا ويبقى كل واحد عايش محترم عشان هو بيعمل حاجة محترمة مش عشان عنده رصيد محترم؟
هههههههههههههه ماكنتش اتخيل ان ح ييجي يوم الاغنيا يصعبوا عليا
انا ورايا شغل وعمالة استهبل احاول اقوم اخلصه بقى

ايه موضوع الحوارات ده بقى؟

November 8, 2008
انا اتخنقت من حوار الاديان والحوار الدولي والحوار المتوسطي، ده المصريين لما يحبوا يعبروا عن المتاهات والتراهات يقولوا: لا بص ما تدخلنيش في حوارات بقى
بالعربي كده عشان بص ما ندخلش في حوارات…بالعربي كده عشان بص انا مش ناقص متاهات
طب والله العظيم المصريين دول عباقرة، دي اغنية سياسية من الطراز الاول
بالعربي كده احنا ناس جعانين بالعربي، ومضروبين لما طالع تلاتين واربعين، الفلوس اللي ح تتصرف على الحوارات بالانجليزي يصرفوها على ان كل بيني ادم يكفي التاني خيره شره
عشان بالعربي كده احنا مش ناقصين متاهات
ده انا قلبي في ايديا..ومافيش غالي..ولسة ما اتخلقش..يابني انت ما اتخلقش..اللي ح يلعب بقلبي
اصحاااااااااااااااااا
فووووووووووووووووووووق
الناس جعانة، مش عشان ربنا خلقهم كده جعانين، مش عشان ربنا خلقهم ونسيهم
ليهم رزق ربنا كاتبه وناس تانية عمالة تسطو عليه وتعبيه في كرشها وبعدين ترجع تقول لنا نتحاور ويسرقوا الناس ويقلبوا العالم رغي رغي رغي لما اكلوا دماغنا لا ويقولوا لنا ماهو انتوا اصلكوا جعانين ومضروبين بالعربي، لو كلمتوهم بالانجليزي ح يحسوا بيكوا
هو اللي مرمي مقتول في الشارع وللا بيدور في الزبالة على اكل محتاج ترجمة؟
فكوا عنا

اوباما: المخلص متعدد الجنسيات

November 5, 2008
ايه اللي الناس عاملاه ده؟ ده ولا نجاح فيلم تايتنك، ما ما يهمنيش فرح اوروبا
ولا تفاؤل العراقيين اللي ح يلبسوا في حيطة ولا اسرائيل اللي بتقول عاتشي في المعاتشي وكذلك في الزمالك كلهم في جيبنا يعني، عشان هم كلهم في جيبهم فعلا، ولا طبعا تهنئة مبارك لانه كده كده كان ح يهني ويبارك هو يقدر يعمل حاجة تانية؟ ولا يا عيني الامريكان الغلابة اللي خلاص حياتهم بقت عبارة عن فيلم هوليودي عايشين فيه ومصدقينه وهم اساسا ناس موجهة بالاعلام وتقنية صناعة النجم
ولا عايزة حد يسأل: الواد اللي جاي من ولا حتة ده فجأتن ظهر واتلمع على اساس ايه؟ ومين اللي ورا تلميعه؟
انا منبعجة من الهطل الشعبي.
الليبراليين فرحانين بدعوى انه ليبرالي
الحقوقيين فرحانين عشان ح يدافع عن حقوق المرأة والمثليين في امريكا! مع انهم هم مصريين يعني مثليين امريكا ما يخصوهمش في حاجة
الرأسماليين حاسين ان ده المنجد اللي ح ينشلهم من وقعتهم (ويمكن دول الوحيدين اللي لهم حق يفرحوا – البورصة ارتفعت اول ما هو كسب)
العروبيين فرحانين عشان ده افرو امريكان داق الذل والعنصرية والانضطهاد واكيد ح يحس بينا! اساسا هو ما عبرناش في حملته الاستنخابية، ومارس علينا كل انواع العنصرية. ده في الحملة بس امال لما يبقى رئيس ح يعمل ايه؟
ثم انه اعلن دعمه الكامل لكيان عنصري كانوا بيكلموه من مناخيرهم عشان هو اسود وكان قابل وبيلحس جزمهم….مش كل ضحية للعنصرية يبقى مش عنصري
الاختين الحلوين هناء وشرين اللي هم اللي اليسار والاخوان: الاخوة كرامازوف اللي شبه بعض في كل حاجة وبيكرهوا بعض في كل حاجة مع انهم كل واحد فيهم لما بيبص للتاني بقرف بيبقى باصص في المراية
وصلت بينهم درجة التشابه الى انهم عندهم نفس الخيالات والضلالات اللي صورت لهم
بالنسبة لليسار: ان اوباما يساري! عشان ح يعمل تأمين صحي (للامريكان مش لينا…احنا مالنا؟)
وبالنسبة للاخوان: ان اوباما مسلم! عشان اسمه باراك حسين اوباما (مش بس هو مش مسلم، ده ابوه كان ملحد….ثم ماحسني مبارك مسلم)
فيه في الدنيا حاجة اسمها رئيس امريكي يساري؟ ده انتخب عشان ينقذ الرأسمالية
وامريكا هي قلعة الرأسمالية والامبريالية: مافيش رأسمالية وامبريالية يبقى مافيش امريكا
ان شاء الله لما يبقى فيه اخواني ملحد وشيوعي رأسمالي ح يبقى فيه رئيس امريكي مسلم يساري
فيه في الدنيا حاجة اسمها رئيس امريكي مسلم؟ ده انتخب عشان صلى على حائط المبكى واستخدم كل البذاءات العنصرية ضد المسلمين لدرجة ان ماكين دافع عنه وقال: لا ده مش مسلم ده راجل محترم
ما نخللي عندنا كرامة بقى
كولن باول نفسه قال يا ناس عيب ايه حكاية مسلم مسلم هي مسلم دي شتيمة؟ مع انها ما طلعتش من اوباما، ما طلعش منه غير ان مسلم شيتمة وجرب بينفيه عن نفسه وكل عقده فكها علينا
ما نخللي عندنا كرامة بقى
ده زار الدنيا كلها وما عبرناش احنا ولا اهتم بينا ولا حتى قال لنا ازيكوا؟ ولما جاب سيرتنا قال على فكرة احنا ح نسحب التمويل من الدول المتخلفة
ما نخللي عندنا كرامة بقى
يعني ايه ح ينسحب من العراق؟ طب الحرب على العراق حرب غير مشروعة، ح يعتذر؟ ح يعتذر عن الجريمة اللي عملتها بلده؟ ولاد تيت الكلب اجمعوا على قتل الناس ودلوقت بعد ما الدنيا اتعكت بيقولوا ح نمشي…امشي بس ح تعتذر؟
ما تخللي عندك كرامة…خللي عندك كرامة انت ارتكب في حقك جريمة وابسط حقوقك ان المجرم يعتذر لو كان ناوي على التغيير، فكرة الاعتذار ما خطرتش على بال حد ليه؟ وكأننا عادي نبقى عبيد ويوم ما السيد يقول خلاص ح ابطل اجلدك كفاية اللي اخدته يبقى كتر خيره ونبوس على ايده وما يخطرش في بالنا انه مجرم قعد يجلد فينا سنين
مين ح يعوض العراقيين عن ثرواتهم اللي نهبت؟ مين ح يعوض العراقيين عن المليون ونص اللي ماتوا؟ مين ح يتعذر للعراقيين عن الاحتلال والتسبب في حرب اهلية؟
خللي عندنا كرامة بقى ده احنا بقينا حاجة مقيئة فعلا
لو انت مش بتحترم نفسك ماحدش ح يحترمك…ح تبقى واطي وح تعيش واطي وتموت واطي يا واطي
ما نخللي عندنا كرامة بقى
قرضاي لم يجرؤ انه يطلب انسحاب القوات الامريكية من افغانستان المحتلة، كل اللي قاله: لو سمحتوا بطلوا تضربوا المدنيين، وما تدوروش على الارهابيين في القرى لانهم مش هناك!
ما نخللي عندنا كرامة بقى
انا شفت مصريين كتير قوي منضمين لحملة اوباما على النت
خللي عندك كرامة
خللي عندك كرامة
فين انتخاباتك يا عديم الكرامة؟
ناس من اللي انضمت للحملة ما عندهاش ادنى استعداد ان يبقى فيه انتخابات عندنا لبعدين ناس مش عاجبينهم ييجوا
خللي عندك كرامة انتوا عارفين احنا عاملين زي ايه؟
البنات تسد ودانها
عارف الراجل اللي الصراحة راحة يا روحي، وفي نفس الوقت مش عايز ياخد حتى دوا عشان قرفان من مراته وقاعد قدام فيلم اسمه ايه وعمال يشجع؟
اهو احنا عاملين كده
انت ما بتعرفش….خللي عندك كرامة…انت ما بتعرفش، يا تاخد الدوا يا تعملها بجميلة وتتبتل
خللي عندنا كرامة بقى….اختشي على دمك بقى
في اول خطبة ليه قال: الى الذين يريدون تدمير العالم، نحن سنهزمكم
خللي عندك كرامة ده طالع بيهددك
حس
حس على دمك يا باي على الجلود السميكة
اوباما مش مارتن لوثر كينج ولا مالكوم اكس، اوباما خادم المنزل
اوباما مش زعيم ولا مخلص ولا منقذ اوباما ماشي على خطة محطوطة له هو ما يقدرش يخرج عنها والا يتقتل
ماحدش سأل نفسه ايه ماكين ده؟ جايبين له منافس نظره ضعيف وما بيسمعش وبيتهته واهبل وعجوز ومش قادر يمشي
حد سأل نفسه هي دي منافسة؟
اسود ايه وابيض ايه ويساري ايه ومسلم ايه؟ ايه الهطل ده؟ ايه القرف ده؟ ممثل للاقليات؟
طب ما نبيل لوقا بباوي بيدخل الانتخابات وبينجح، كده يبقى اسمه تمثيل مسيحي؟
حد عنده مخ في ام الليلة دي وللا كله مأخوذ بالنظرات الآسرة والابتسامة الساحرة
انبي تعوض عليا عوض الصابرين يا رب

فيه بني ادم عنده كرامة يرضى حد يكلمه كده؟

November 2, 2008
ده لو جوزنا اللي بيصرف علينا وعلى عيالنا وبيأكلنا ويشربنا وح نبات في الشارع من غيره كنا اطلقنا

فما بال احنا اللي بنصرف عليه
الفيديو من عند طفاطيفو طبعا

يا سيد جمال مبارك ابوس ايدك ما ينفعش كده

November 2, 2008
يعني انت بجد نجحت في انك تنكد عليا اول ما صحيت ع الصبح وانا ماليش مزاج اتنكد. ولا ليا مزاج اكرهك على فكرة انا مش باكره الناس بسهولة، لازم يبذلوا مجهود مضاعف عشان اكرههم.
يا سيد جمال انت طلعت تكدب علينا عيني عينك وتقول ان الشعب وافق على التعديلات الدستورية وتقول انكم اوجدتوا فرص عمل بينما الشباب متلقحين على القهاوي، ده مهندسين الاتصالات متلحقين على القهاوي يا بتوع القرية الذكية، امال اللي خريج تجارة بيعمل ايه؟ وللا اللي مش معاه شهادة عليا اصلا، وتقول انك عايز دولة ترفع ايدها عن المواطن، وطبعا ترفع ايدها عن المواطن يعني ترفع ايدها عن خدمته، لكن تفضل حاكماه بقانون الطوارئ وتفضل واقفة له بمصفحات الامن المركزي عند جامعة القاهرة وعين شمس بحيث ان العيل اللي عنده تمنتاشر سنة لما يخرج من المدرسة ويروح الجامعة اول حاجة يشوفها تبقى مصفحة الامن المركزي. عايز دولة ترفع ايدها عن المواطن بمعنى انها لا تعلمه ولا تعالجه وان لما واحدة يتم التحرش بيها وترقع بالصوت ما تلاقيش عسكري يقول لها مالك يا انسة، لكن مجرد ما محمد عبد القدوس ياخد الميكروفون بتاعه ويقف لوحده على سلم النقابة نلاقي الشارع ادرز قدامه بمئات من عناصر الامن.
وتقول لنا في وشنا احنا الحزب الداعم للقطاع الخاص وللاستثمار الاجنبي. وتضحك علينا وتقول لنا: العدالة الاجتماعية دي شعارات….مافيش غير فكر جديد! طيب يعني انت بتستغبانا ليه؟ هي فكر جديد ده مش شعار؟ العدالة الاجتماعية وعرفناها، ايه الفكر الجديد دي؟ معناتو ايه الحديت الماصخ دهون
ماشي يا سيد جمال…مافيهاش حاجة اما تكدب علينا عادي ما احنا كل اللي حكمونا كدابين ده سلو بلدنا
اكدب براحتك وما تخليش في نفسيتك حاجة
بس بتشخط فينا ليه؟
يا استاذ جمال مش ح ينفع كده لو سمحت، اذا كنت انت قدرنا الميتافيزيقي يبقى ارجوك حاول تغير معاملتك معانا
ما تزعلقناش احنا ما نحبش حد يزعق لنا: سوبوكو (يقصد سيبوكوا) من الشعارات والآديولوجيات (الايديولوجيات يعني) ما تقوليش رأسمالي واشتراكي قول لي اوفر فرص عمل ازاي؟ احنا اوجدنا فرص عمل
طيب انت تقدر تقول نفس الجملة بتون اوطى شوية، من غير زعيق، احنا بنسمع على فكرة، وافرد وشك وما تكلمناش من طرف مناخيرك وتبص لنا بقرف
حاول تبقى ابسط من كده وما تقعدش حاطط رجلك في وش وزراء في سن والدك، احنا مش بنحبهم بس المنظر ده مؤذي لينا، خدنا على عقلنا يا سيدي احنا ناس هايفة والحاجات دي بتفرق معانا، انت بتكلم صحابك كده؟ وبيستحملوك يعني؟ طيب احنا ما نستحملش حد يكلمنا كده انا وانا في بيتنا متنكدة قوي من الزعيق ده وحاسة اني عايزة اعيط
يا سيدي احنا شعب بيكره الجليطة وقلة الذوق، ده اضراب 4 مايو فشل عشان التوقيت كان فيه جليطة…وقول لابوك كده عشان ما يفتكرش يعني انه ضحك علينا بالتلاتين في المية، ده ذوقنا احنا بس
ما تشوف ابوك عمل ايه امبارح على رأي مصطفى فرح طهور ابن العمدة
بلاش ياسيدي مش عايز تعيش في جلباب ابيك….مش انت بتحب الخواجات موت موت موت؟
ما تشوف اوباما يا اخي، اقول لك، قلده، اوباما ده ابن ستين كلب، ومنسحق، وعنده استلاب عقائدي، ومريض، وذليل، ولا يمثل الافرو امريكان باي حال من الاحوال، واوسخ من كوندوليزا، وعنصري ضد نفسه وضد اهله ومتنصل منهم ولاعق احذية الفكر الابيض وفعلا فعلا جلد اسود اقنعة بيضاء، هو اصلا الموديل اللي اتكتب عشانه الكتاب ده، المفروض في الطبعة الجديدة ينزلوا صورته ويقولوا: كالمبين بالشكل.
ومع ذلك، نصاب، عرف يضحك ع الناس ويخلي ناس كتير تحبه ويخيل عليهم الشويتين بتوعه مش بس من الناس العادية ومن النخبة كمان واقنعهم النصاب الكداب المسنود من السي اي ايه انه مناضل
ده مرة واحد دخل وساب لي لنك لفيديو لاوباما وهو بيرقص وبيقول لي: بقى جمال يرقص كده؟
طب ما ترقص يا اخي…ما ترقص
بلاش ترقص …اضحك في وشنااااااااااااااااااااااااااااااا..مكشر في وشنا ليه؟
بلاش تضحك…وطي صوتك…وطي صوتك ما تعليش صوتك علينا
انا ما استحملش المعاملة دي وانا فلاحة، ما بالك بقى و75 في المية من المواطنين صعايدة، شخطتين زي دول ويبجوا بطنك بجيج واحنا مش عايزين قلق في القعدة بقى لو سمحت، الراجل اياه لما شخط فينا وخبط على الترابيزة ما سلمش في ظرف كام يوم كان الصعايدة اتلموا عليه وعملوه مصفى، وماكانش بسبب الاعتقالات، ما الناس ياما اعتقلت واكتر من كده، بس فعلا السبب الوحيد انه طلع يزعق لنا ويشتمنا
احنا وقتها كان فينا حيل نستحمل حاجة زي دي، دلوقت احنا مش عايزين توتر من فضلك، ده الدنيا لما بتمطر مصر بتتحول لمنطقة كوارث، سيبنا بقى نعيش في حالنا ماحدش عايز منك حاجة ولا حد من الناس البسيطة في نيته انه يعوق مسيرتك في ام التقدم، بس لا تتحرش بالناس وتضايقهم وتهينهم، اذا ما كنتش عارف تتكلم بذوق معانا ما تطلعش خالص
اذا كنت مصمم انك تكبس على نفسنا وتخلف ابوك واحنا مش في ايدنا اننا حتى نضمن انتخابات مش مزورة ومصمم تركب رجال الاعمال على قفانا، ومصمم ما تاخدش منهم ضرايب، ومصمم تجوعنا، ومصمم تكدب علينا كدب مش محبوك وتستغبانا واحنا انبه منك ومن الخواجات اللي انت مبهور بيهم لدرجة الانصعاق كهربائيا
اذا لم يكن من ذلك كله بد، يبقى لو سمحت خليك حبوب ومتواضع واضحك في وشنا
كل حاجة مقدور عليها ما احنا ياما استحملنا انت ح تيجي ايه في اللي شفناه قبلك؟ الا قلبة الوش واللوية
يا اخي لاقينا ولا تعلمنا وتعالجنا وتأكلنا
لاقينا احنا
وغدي رجال الاعمال بتوعك
—-
تحديث عاجل:
وطلعت ما بتكلمش صحابك زي ما بتكلمنا
يعني يا استاذ جمال بتعرف تبقى لطيف وتحترم اللي قدامك لما تحب اهو، حضرتك في الجلسة الاولى كنت قاعد مع الحرس القديم حاطط رجلك في وشهم بعد ما شخطت فينا في الخطبة، ثم اشفعتهما بمؤتمر صحفي مسحت فيه البلاط بالصحفيين
الجلسة التانية قاعد مع صحابك بقى، غالي ورشيد ومحي الدين ومدير البنك المركزي، ولامم رجلك قدامهم، وعمال تتلاطف معاهم، وهم كمان اللي بيشخطوا فيك وبيكلموك بندية وقاعد قدامهم زي التلميذ ووش تاني غير اللي بتديهولنا
الله
ده انت قاصد بقى؟ جليطة مع سبق الاصراري والترصدا مع الشعب الجربوع؟ يعني ده انا كنت فاكراك مدلع ودي طريقتك في التعامل مع الناس كلها، طلعت بتتعامل معانا احنا بالذات بقرف، ده انت جايلنا احنا بقى
طيب يا سيد مدام قرفان منا شيل ده من ده يرتاح ده عن ده
قلت لك
قلت لك
احنا ماحدش يكلمنا كده…تااااااااااني باقول لك اهو: العيل في الصعيد اللي عنده تلات سنين، بيبقى مش لاقي اكل والدبان على وشه ومش لابس ملابس داخلية وجلابيته مقطعة، وامه ما تقدرش تزعق له، وابوه بيعامله على انه راجل زيه، في الفلاحين بقى لو ام الواد ضربته تنضرب هي على طول من ابوه، انا مش باقول لك صح ولا غلط انا باقول لك واقع
لقد اعذر من انذر..انا مش خايفة عليك انا خايفة على بلدي..ماحدش ح يستحملك كده لو بقيت رئيسنا
وبعدين انت بتهزأ الصحفيين ليه؟ ايه المؤتمر الصحفي المقرف ده وهم مالهم ما عندهمش دم كده؟ لو عندهم كرامة كانوا سابوا لك المؤتمر ومشيوا
بس لو فيه صحفيين ما عندهمش كرامة…الفقرا عندهم كرامة
وكمان طالع مع صحابك تكيدنا عشان توصل لنا ان الناس مقامات يا جرابيع؟

عندي مبقوقة في السريع كده

October 30, 2008

تحديث:
ينفع كده يعني؟ نسيب كل حاجة ونفضل نقول للبنية ياللي ابوكي وياللي جدك..
البنت بتقول ان جدها لابوها اللي هو فلسطيني مات في مصر قبل سنة 1948 وابوها فلسطيني ومامتها مصريةوباسبورها مصري…ده من زمان يعني وهم هنا
ايه القذارة دي؟ بجد ايه القذارة دي؟ يعني عشان واحدة اخدت حقها يتعمل عليها الباللو ده كله؟
حاجة مقيئة فعلا
———–
ن
هى رشدي من عرب تمانية واربعين وعشان كده قرقرت المحامية بتاعتها انها تستأنف لصالح اللي اتحرش بيها حيث انها تحمل الجنسية الاوسرائيلية وعليه فان شدها من صدرها ده عمل وطني عظيم ويجب علينا اننا كلنا كمواطنين شرفاء ضد التطبيع اننا نشدها من صدرها ونجرجرها منه واحنا بنهتف: البيت لنا القدس لنا. لانه صدر اسرائيلي غاصب وكل الصدور الاسرائيلية صدور عسكرية ليس بينهم صدر مدني
الاول: المحامية ما تعرفش جنسية موكلتها من الاول؟ ما شافتش بطاقتها ولا باسبورها حتى؟ امال دافعت عنها ازاي؟ ولما نهى مخبية حقيقتها المخزية النكراء ايه اللي عرف المحامية دلوقت؟
الثاني: عرب تمانية واربعين دول جربة؟ مش كتر خيرهم انهم ما سابوش بلدهم؟
الثالث: لو هي حفيدة بيجن ده يبرر انه يتم التحرش بيها؟ والله دخول الاسرائيليين مصر اللي سامحة بيه الدولة مش احنا اما جريمة التحرش فهي تضر بالمتحرش بقدر ما تضر بالمتحرش به
الرابع: اعلانات السياحة اللي قارفينا بيها ومطلعين لنا في الاخر شوية خواجات يزعقوا لنا حد عارف هم جنسيتهم ايه؟ حد عارف دينهم ايه؟ حد عارف عقيدتهم السياسة مع الصهيونية وللا ضدها؟
الخامس: والامريكان بيدفعوا ضرايب بتروح لاسرائيل وبيسلحوا اسرائيل واللي بيتبرع لاسرائيل بيعفى من الضرايب…طب هلبت ليه في مراكز لحروق المرأة بتاخد فلوس من امريكا؟
السادس: احنا لينا عين نتكلم عن الفلسطينيين؟ انا لو مكانهم اعمل مظاهرة تفافة على الحدود لحد ما منسوب النيل يرتفع من تفافتهم علينا
الخلاصة: انا ما اديش عقلي لغيري

لو احنا دبان رشونا وخلصونا

October 29, 2008
هذا المقال الرائع نقلا عن موقع العربية نت:
النساء في الحرم، ضيفات غير مرغوب فيهن

مرام عبد الرحمن مكاوي

يكفي أن تذكر اسمها لمسلم في مكان ما من هذا العالم حتى يرفع يديه إلى السماء ويقول: ” أوعدنا يا رب”! فزيارة مكة لغير أهلها حلم وغاية ومقصد، فكيف تكون مكانتها إذن لدى أهلها وجيرانها، حيث يختلط في حبها حب الدين والأهل والأوطان.

لم أكن أعرف حين كنت طفلة أزور الحرم في مكة وأصلي في الصحن الشريف مقابلة للكعبة أنه سيأتي يوم تصبح صلاتي لأي فرض هناك “كامرأة” حلماً أو بقايا حلم.. لم يكن يدور في بال الطفلة التي كنتها، أنني حين أكبر سأشعر في هذا المكان الحبيب بأنني شخص غير مرغوب فيه، يتم “هشه” من هذه البقعة أو تلك، لا لذنب إلا أن الله قدر عليّ وكنت أنثى، والنساء مكانهن في الخلف، في الفائض من المكان، مما تنازل عنه الرجال بطيب خاطر.

من يزر المسجد الحرام هذه الأيام فسيسر كثيراً، فالطقس لطيف، والازدحام ليس كبيراً، والخدمات ممتازة، ولكن ومع هذه الأجواء الجميلة فلا بد من منغصات، تزداد عاما بعد عام، وخاصة للزائرات.

يبدأ الأمر من الكعبة المشرفة – حماها الله – فما إن تقترب أي امرأة منها حتى يصاب المشرفون هناك بنوع من الحساسية، فيبدأ التضييق، وينهال سيل النصائح متناسين أنه حين تنصح أحداً بشكل علني وبأسلوب فظ فإن النصيحة تتحول إلى إهانة. تصدر الأوامر من شباب أكاد أجزم أنهم دون الثلاثين: “يا حاجة استري وجهك”، ويتناسى شيخنا الصغير أن في الإسلام مذاهب عديدة تبيح كشف الوجه، وبعضها مدارس فقهية معتبرة لأهل السنة والجماعة، والخلاف في المسألة قديم بين كبار الصحابة والتابعين، وكشف الوجه من البديهيات للمعتمرات، ثم أليس الأولى أن يغض هو بصره؟

وعلى الرغم من أن الإخوة الرجال يحظون بشرف التعلق بأستار الكعبة وتقبيل الحجر الأسود وسط حسرة نسائية، فإنهم أيضاً يلتصقون ويحتضنون الكعبة الشريفة ولا ينهاهم أحد، ولكن ما إن تقترب بعض النسوة (على استحياء) ويحاولن فعل ذلك في رقعة صغيرة من واجهة واحدة مقابل ثلاثة ونصف للرجال، حتى تأتيهم الصرخة المرعبة: ” يا حاجة.. بدعة.. لا يجوز.. ولا ينبغي.. ولم يرد فيه شيء..الحجر الأسود هو الذي تقبيله سنة (وكأن ذلك متاح لهن وهن يرفضن!)”.

(ايوة وبيقرفونا عند باب الملتزم كل اللي متعلقين فيه رجالة)

طبعاً الحديث موجه للجميع مع أنني لا أظن أن الزائرة الأفريقية أو أختها الباكستانية أو رفيقتهما التركية يفهمن كلمة “لا ينبغي” أو “الأحوط” أو “لم يرد”، فليته أراح حباله الصوتية، ولم يعكر تلك المناجاة بين المرأة وربها وقد تبللت عيناها بالدموع. حتى عامل النظافة الآسيوي في الحرم يتكلم مع الزوار والمعتمرين حين يريدهم أن يفسحوا المكان ليقوم بالتنظيف بشكل أكثر لطفاً واحتراماً. وقد لوحظ أن النصائح المجانية هذه تكاد تختفي حين يكون ثمة رجل سعودي مرافق للمرأة!

وإذا تركنا هذه البقعة المباركة التي طاف فيها الأنبياء، وانتقلنا إلى الصحن الشريف ذاته خارج المطاف، فسنجد أنه غير مسموح للمرأة أن تصلي أي صلاة مكتوبة مع الإمام في هذا الموضع، حتى لو كان خالياً، ولا يوجد زحام مع الرجال ولا يحزنون! وكم هو مؤلم أن تشاهد عجوزاً وقد انحنى ظهرها وهي تغادر مكانها بصعوبة لتصعد الدرجات ثم لتمشي بخطى ضعيفة باحثة عن مكان تصلي لربها، وهي المعفاة أصلاً من الصلاة واقفة.

وحتى بعد أن تترك الصحن وتدخل إلى المسجد فإن عليها أن تبحث عن الأماكن المخصصة للنساء وهي قليلة ومسورة بالحواجز بحيث تكاد تحجب رؤية الكعبة، وهي لمحدوديتها ممتلئة عن آخرها، فتحس المرأة بالاختناق وتصلي الكثير من النساء اللاتي تضيق بهن هذه الأماكن خارجها دون سجاد، في حين أنك عندما تمر على أماكن الرجال تجدها شبه خالية، وتجدهم يتنعمون بالتمدد والاستلقاء في بحبوحة من المكان.

وإذا كان الانتقال من مكان إلى آخر أمراً يمكن احتماله للشابات، فإن الحال ليس كذلك مع النساء الأكبر سناً. كم كان محزناً لي أن أحس بتعب أمي ونحن نبحث عن مكان مناسب للصلاة المكتوبة فلا نجد، وقتها فكرت بأن الذين يضعون هذه التنظيمات لاشك أيتام! لا يوجد إنسان لديه أم يحبها وتحبه يقبل أن تصيبها كل هذه المشقة في مكان لا تذهب فيه للتسوق أو للترويح عن النفس أو لشرب شاي الضحى، وإنما لتناجي ربها وتسأله أن يوفقها في حياتها. أهينة لدى هؤلاء دعوات الأمهات؟
ما الذي حصل خلال السنوات الأخيرة لتشعر المرأة بأنها زائر غير مرغوب فيه في هذا المكان؟ صدقاً لم أستطع طوال المدة التي زرت فيها الحرم من التخلص من هذا الشعور المزعج والجارح أيضاً. ألم تكن النساء منذ فجر الإسلام وحتى زمن طفولتي في الثمانينات وأوائل التسعينات يزرن المسجد الحرام والمسجد النبوي شرفهما الله، من دون مشكلات ومن دون تمييز وتفرقة مقيتة ليس لها أصل ولا سند شرعي؟ بل إن ضررها أكثر من نفعها، ولكم أن تتخيلوا ماذا ستشعر مسلمة أوروبية أو أمريكية حديثة عهد بالإسلام حين تمر بهذه التجربة التي لم نتحملها نحن اللاتي نشأنا وتربينا ودرسنا في هذه البلاد.
(ينعل ابو التفكير في الخواجات، الجملة الاخيرة دي هي اللي غاظتني في كل المقال، يعني هو احنا مش بني ادمين؟ لازم يعني نجيب لهم سيرة الخواجات عشان يحسوا على دمهم واللي بيطنش على الراجل السعودي اكيد بيطنش على الست الخواجاية برضه)
هل تذكرون صديقتي (إيفا) التي كتبت عنها قبل ثلاثة أسابيع؟ ترى ماذا لو أسلمت واصطحبتها معي إلى مكة ثم سألتني: لماذا يعاملوننا هكذا؟
وقبل أن يتبرع أحد ويقول إن صلاة المرأة في بيتها أفضل وبالتالي فليس من حقها المطالبة بأكثر مما مُنحت، نرد عليه بأن هذا الأمر ليس من شأن أحد، أن تختار المرأة أين تصلي فهذا راجع لها (وهي تعرف هذا الحديث الشريف)، وإنما ينبغي أن تهيأ لها السبل للزيارة وللصلاة، وخاصة في مكة، لأن المرأة لا تستطيع أن تطوف أو تعتمر أو تحج في بيتها، ولأن أجر الصلاة في أحد المساجد الثلاثة لا يعادله شيء، والإسلام يحثنا على زيارتها، فعموم حديث (شد الرحال) يشمل المرأة كما الرجل.
(في اخر عمرة رحتها منعوا الستات من الصلاة خلف مقام ابراهيم: يعني تريدين الريال يشوفونك وانت تصلين؟ وكأنهم مثلا ح يشوفوني وانا باستحمى)
ومنذ مدة طويلة ونحن نسمع ونقرأ ونشاهد تذمر الكثير من المسلمات حول العالم، خاصة المتعلمات من الأوضاع الحالية، وهؤلاء يقمن بكتابة رسائل وتكوين مجموعات إلكترونية بهدف تغيير هذا الواقع، ومع ازدياد عدد هؤلاء خاصة من المسلمات في الغرب، الذين تعلمن الدين مجرداً من عادات الزمان والمكان فأدركن حقوقهن، فسترتفع الأصوات أكثر، فلماذا لا نأخذ زمام المبادرة بأنفسنا ونصلح الخلل؟

لقد كتبت كل من الدكتورة هتون الفاسي والأستاذة نورة الخريجي وغيرهن عن هذه القضية، وكتبت عنها شخصياً في هذه الصفحة أكثر من مرة خلال السنوات الخمس الماضية، وهأنا أجد نفسي مضطرة للكتابة عنها من جديد، لأننا لا نملك إلا القلم نشكو به بثنا إلى المسؤولين بعد أن رفعنا أكفنا بالدعاء لله تعالى، موقنات بأنه لن يضيع حق وراءه مطالب.

*نقلا عن جريدة “الوطن” السعودية

———–

انتهى المقال، والحقيقة هي قالت اللي بيحصل بادب شديد، لما ابقى لازقة في الكعبة والاقي واحد بيضربني بالشمسية ويقول لي طواف يا حاجة وجنبي راجل سايبه، لدرجة اني اتعلقت بباب الملتزم فواحد سوداني افتكر ان الاصول ان الستات تبعد عن المكان فقال لي: حرام يا حاجة

وكل سنة بيبقى اسخم من اللي قبلها، سنة 2000 صليت في حجر اسماعيل، سنة 2004 قالوا لنا صلاة الستات في حجر اسماعيل حرام!

والناس اللي بتحرم على الناس العبادة دي مش خايفة من ربنا

ده غير المهازل والمسخرة اللي بتحصل لنا في مسجد الرسول، لو كلاب دخلوا مسجد الرسول ح يتعاملوا احسن من كده، وعاملين لنا اربع ساعات في طول اليوم ساعة الصبح وتلات ساعات بعد صلاة الضهر، واصلا حاطينا في مكان مش هو الروضة، الرسول قال ما بين قبري ومنبري روضة من رياض الجنة، وهم حاطينا في ضهر القبر عند منزل السيدة فاطمة وبعيد قوي عن المنبر وفارشين لنا سجادة خضرا ويقولوا لنا دي الروضة؟ حد ينصب على الناس في الصلاة؟ ولما اناقش المطوعين يقولوا: يعني هو ربنا في الحتة اللي قدام ومش في الحتة اللي ورا؟

لا ربنا في كل حتة، وفي بيتنا كمان، انا بقى دافعة فلوس ونازلة من بيتنا وراكبة طيارة عشان كل ما اروح حتة اتهش زي الدبانة؟

وعلى رأيهم، ربنا في كل حتة، وح يسمعنا من اي مكان

وحسبنا الله ونعم الوكيل فيهم

احنا زهقنا بقى بلغ السيل الزبى العيشة كده بقت تقرف قوي على فكرة منين ما نروح حتى العبادة يحرمونا منها وربنا ح يسمع منا ومش ح يسمع منهم عشان احنا مظلومين وهم ظلمة وكدابين كمان وبيحرموا ما احل الله وبيحرموا على الناس العبادة وبيعاقبونا على ان ربنا هو اللي خلقنا ستات

احنا ذنبنا ايه؟ لو معترضين على قضاء الله يبقوا يقفوا عند باب الملتزم زي ماهم واقفين كده ويقولوا له: انت ليه خلقت ستات

حاجة بقت تقرفففففففففففففففففففف

لا في مصر عايزينا ولا في غير مصر، ولا في اي حتة في الدنيا حتى في بيت ربنا؟

نروح فين بقى؟

ربنا ينتقم من كل ظالم، وينتقم من كل واحد اتسبب في اني اتفرس في العمرة وانا رايحة اريح اعصابي وينتقم من كل اللي يمنعنى عن بيت ربنا وروضة الرسول وينتقم من كل اللي يخليني ماشية في الشارع خايفة من تحرش او من عنف وينتقم من كل اللي يخلي الستات تعري نفسها غصب عنها عشان تعرف تعيش او تغطي نفسها غصب عنها عشان ما تنضربش، او يخلينا نعمل اي حاجة غصب عنا ويكسر نفسنا ويذلنا عشان خيبته هو التقيلة ومخه الفاضي

ما تيسيبونا في حالنا وشوفوا خيبتكوا ووكستكوا بقى حاطين الستات في مخكوا ليه؟ هو مافيش في الدنيا غيرنا؟

منى زكي كيك ومدحت العدل اجدع ناس

October 25, 2008
انا لو مكان المخرج والمؤلف اطين عيشة منى زكي دي؟ هي مالها تخرج عن النص وتستهبل وتفتي من دماغها؟
الاوبريت انا ما حضرتوش من الاول بس لقيت ماما بتنادي عليا وبتقول لي تعالي ده اوبريت غريب قوي الاول كنت متضايقة منهم وبعدين لقيتهم جايبين فرعون مصر وهو عمال يقول الشعب هو اللي له الفضل ولما واحدة تملقته زعق لها وقال لها الفضل للشعب فقلت تيجي تشوفي
المهم الاوبريت بيتكلم عن معارك مصر
طبعا وبما اننا بنحتفل ببونابارت فعدى على بونابارت بجملة سريعة انه حبيب الخونة!
المهم كل فقرة في الاوبريت فيها معنى معين عايز يوصله بذكاء شديد جدا، وكل فقرة بتحمل معنى ان الاولوية للشعب والحكم للشعب والجيش يبقى من الشعب

وراح داخل على ثورة 52 واتكلم عن العدالة الاجتماعية وعن الزراعة والصناعة وبرضه طول الاوبريت ما بيمجدش الزعيم بالعكس
ملحوظة سريعة: الجمهور من الجيش وكان بيصقف في مواضع ذات مغزى مما يطمئن الواحد وما حدش يغلط في الجيش انا باحبه
😦
ملحوسة تانية ماما سوزان كان متضايقة قوي قوي قويييييييييييييييي
وفيه حتت الناس كانت بتصقف فيها وهي كانت مش بتصقف وبتتلوي
المهم برضه لما اتكلم عن نصر 73 اتكلم عن ضغط الجبهة الداخلية وعن مظاهرات الطلبة وعن سنة الحسم وجاب السادات وهو بيقول الضباب هو السبب في تأجيل المعركة راح الجيش مصقف جامد قوي
🙂
وحسني ضحك…بس الشهادة لله برررررضه سوزان اتلوت مش عارفة ليه؟
المهم والاوبريت ماشي زي الفل وحاجة ميت فل وسبعتاشر وانا كنت مبسوطة بصراحة لدرجة ان ماما قالت لي دي عاملة زي مسرحية هاملت لما اعادوا تمثيل واحد بيقتل اخوه قدام الملك
واذ بينا نفوجأ بالست منى هانم زكي بتخرج عن النص وهي بتكلم كريم عبد العزيز بتقول له: انت كافحت كتير (المفروض ان كريم ده رمز للمواطن المصري)
وراحت ملفوتة وقالت: ومصر عمار بيك ياريس وبجد الكلام ده مش مكتوب بس والله مصر عمار بيك يا ريس
انت مالك انت يا ست منى ايش دخلك في اللي ما تفهميش فيه؟ انت واحدة شغلتك يحفظوكي كلمتين وتقوليهم وبس
نكدت عليا
والله انا لو من مدحت العدل ما اشغلها معايا تاني ابدا واسود عيشتها على العملة السودا دي
المهم بقى بقية الحوار اللي كاتبهولها مدحت العدل بيقول فيه احنا انتصرنا بس لسة عايزين حاجات كتير
وبيختم الاوبريت بـ: عايزين حريات اكتر مش هامش حريات، عايزين التعليم يبقى حق لكل الناس مش للاغنيا بس، عايزين نزرع اللي بناكله عيب علينا نستورد قمحنا (ملحوظة الغنوة فيها عيب علينا) عايزين واحد مننا يحس بمشاكلنا! وانتوا كمان يا رجال الاعمال شوفوا طلعت حرب عمل ايه للناس وزي ما البلد دي ادتكوا لها حقوق عليكوا
!!!!!!!!!!!!
وش كده
وفجأة حسني اتقلب…كان قاعد بيضحك ومبسوط لحد الكلمتين دول ما اتقالوا، طبعا هو المغزى وصل لماما سوزان اسرع مما وصل لحسني لانكوا عارفين يعني كل واحد على قد فهمه، هو كان قاعد في الاول حيران مش عارف يزعل وللا يفرح، سوزان زعلانة زعلانة حيث انها اسرع منه شوية، بس الشوية اللي في الاخر دول كان صعب يتجاوز عنهم
طيب ليه يا زفتة الطين تبوظي الطبخة على شوية ملح…اهو الناس سابوا كل حاجة ومسكوا في القرف اللي طرشتيه من بقك ومن دماغك انت مالك تتكلمي من دماغك
والنبي انا نفسي مدحت العدل يرفع عليها قضية