Archive for the ‘الحرية لمن يحملون أرواحهم على أكفهم’ Category

اضطرارا: تعليقا على تدوينة راجي

November 10, 2008
انا كنت قفلت الكلام في الموضوع ده وبعدين راجي كتب فيه وانا شفت البوست بتاعه وشوفت التعليقات وواضح ان فيه لبس كتير ووجدت انه من واجبي توضيح اللبس عشان كده انا ح اعيد نشر تعليقي اللي سبته عند راجي هنا على المدونة لتوضيح الالتباسات:

اولا يا راجي انا متفقة تماما مع كل كلمة كتبتها

ثانيا فيه كام نقطة لازم يبقوا واضحين عشان فعلا كل حاجة بقت سايحة على بعضها
1- مافيش كلية بتخرج مدونين، اللي عنده حساب على مدونة زي اللي عنده حساب على ميل او على اليوتيوب او على جوجل او حتى عنده موبايل
2- التدوين في اساسه كان الغرض منه التعبير عن الذات جم شوية ناس مشكورين حولوا الخاص الى العام واستخدموا التدوين في مصر بالذات للتعبير عن وجهات النظر السياسية والتغطيات ونقل الحقائق للناس ولهم الاسبقية في كده ولا احد ينكر عليهم ده
3- المفروض ان المجموعة اللي ابتدت التدوين كفعل سياسي في مصر كانت بتقول احنا لجأنا للتدوين لان احنا عايزين نبقى احرار وغير مقيدين برأس المال اللي بيفرض شروطه على الصحفي القومي او الحزبي او حتى الصحافة المستقلة، التدوين “صحافة شعبية” وهم اصحاب التعبير ده يعني هو اختراعهم مش اختراعي، بمعنى انه من الشعب واليه، لا يهدف الى الربح او التكسب وعليه فهو تنطبق عليه من شروط النزاهة ما لا ينطبق على كل الصحف والقنوات الفضائية اللي لها حسابات بيتحكم فيها رأس المال والمصالح
4- بالفعل احرز هؤلاء المدونون نجاحات لفتت انتباه العالم كله ليهم، وكان اهم ما لفت انتباه العالم: العيال دول بيعملوا كده ليه؟ لا بياخدوا فلوس، ولا بيتربحوا، ولا حتى بياخدوا تقدير معنوي دول بيتهددوا وبيدخلوا السجون، ولا حتى مسنودين من احزاب…اذن العيال دي عيال مخلصة فعلا وليس لها اي اهداف غير معلنة
5- طبعا العيال دي خبطت في ناس كتير، واصبحت كل القوى السياسية عايزة تحتويهم او يبقى لها تمثيل ليها عندهم لقينا مثلا ان بعض الحركات السياسية بتحاول تمثل نفسها على المدونات، وح اضرب مثل بالاخوان، والحقيقة ان التدوين هو اللي غلب تنظيم الاخوان مش العكس، بمعنى ان لما شباب الاخوان دونوا لقوا نفسهم بيدخلوا في مناقشات وبتتفتح امامهم مجالات وابتدوا ينتقدوا الجماعة علانية وابتدت نفس الجماعة تغير شكلها، عملت نيو لوك جديد بيفسح المجال للعناصر الشابة انها تنتقد لدرجة ان انتقاد شباب الاخوان للجماعة بسبب احجامها عن المشاركة في اضراب 6 ابريل يمكن يكون احد الاسباب اللي دفعت الجماعة لانها تشارك في اضراب 4 مايو الفاشل
وحاول الحزب الوطني انه يدون وطبعا كانت مأساة اغريقية خلت الوطني يتراجع عن تجربته الفاشلة في التدوين

نيجي بقى لمنبع مصداقية المدون اللي بيستخدم مدونته بشكل سياسي ولنقل الحقائق
الا وهو انه مش بيشتغل مدون يعني مش بيشتغل عند حد
هو عنده شغلانة بياكل منها عيش، او اهله بيصرفوا عليه، وبيستخدم التدوين لله والوطن فعلا

لما يقبل هذا المدون المعونة الامريكية اللي بتقبلها الحكومة المصرية واللي بتقبلها بعض مؤسسات المجتمع المدني زي مثلا مركز ابن خلدون المدان من مؤسسات مجتمع مدني اخرى محترمة وبعض الصحف المستقلة اللي نشرت في صحيفتها انها قبلت معونة امريكية

يبقى ده اسمه ايه؟
لا يمكن باي حال من الاحوال ان تقترن المعونة الامريكية بالمصداقية والبراءة ابدا

عشان ايه؟ عشان هم بيدوا صدقات؟
الامريكان لاقيين فلوسهم في الارض وعشان كده بيدوا منح؟

المنح الدراسية التابعة للجامعة الامريكية بتبقى يا اما بفلوس كتير، يا اما ان طالب المنحة الدراسية بيقدم في مقابلها خدمة زي انه يدرس لغة عربية للاجانب

وبيبقى له اصلا صفة اكاديمية

ايه الصفة الاكاديمية او المهنية للمدون عشان ياخد المنحة دي؟

هل دفع فلوس؟
لا..الحقيقة هو اخد، مش ح ادخل في تفاصيل انا اعرفها عشان ما ندخلش في مهاترات، بس اي شكل من اشكال الانفاق المادي او العيني من المعونة الامريكية هو اسمه اخد من المعونة، انشالله حتى تمن تذكرة الطيران
طيب هل بيقدم خدمة؟

آآآآآآآآآه

ايه بقى؟ ايه الخدمة اللي بيقدمها؟ بيدرس عربي؟ ما اعتقدش

امال بيعمل ايه؟
ايه نوع الخدمة اللي المعونة الامريكية بتشترطها على المدونين عشان تديهم منح زي دي؟

امريكا عشان تدي معونة للدولة بتشترط خدمة مصالحها
وعشان تقدم معونة لبعض المجتمع المدني بتشترط التزامه ببرنامجها المعلن والواضح
نشر الديمقراطية (اللي هي الديمقراطية الامريكية بالضرورة) ومحاربة الارهاب (اللي هو احنا وش كده)

لما قدمت منحة لصحيفة مصرية والصحيفة نفسها لم تنكر انها اخدت فلوس
اشترطت المساهمة في تحسين صورة امريكا
وده العنوان الكبير وكان تحته برضه بنود معلنة والصحيفة اظن واضح للجميع انها التزمت بالبرنامج اللي كان محطوط لها

طيب المدونين اللي قبلوا اولا انهم يتخلوا عما يميزهم عن بقية وسائل الاعلام وهي المصداقية المطلقة
ياريت يبقوا على نفس مستوى الشفافية ويقولوا لنا ايه البرنامج اللي هم ملزمين بيه

بالبلدي ايه الخدمة اللي طلبت منهم يؤدوها عشان ياخدوا المنحة دي اللي عمرها ابدا ما طلعت الا في مقابل خدمة
حاجة كمان مهمة قوي، دي اسمها شحاتة

يعني اقل من العمالة بشوية

العميل ده واحد بيشتغل

لكن اللي بيشتغل مدون وبس ده لازم يفهم انه عاطل، دي مش شغلانة، ولا التدوين يصلح استثماره في البزنس، ولا المفروض يعمل فلوس
يعني مافيش حاجة اسمها رجل اعمال ومدون زي تاجر وترزي كده
والا بقى اللي عامل ميل كمان يستثمر الاكاونت بتاعه ويعمل بيه بزنس
ده اسمه ضحك على الدقون وشحاتة
اروح اقول للناس انا مدون مضطهد يقوموا يقولوا لي يا قلب امك يا ضنايا طب تعالى يا حبيبي ااكلك واشربك وافسحك واعلمك

كده يبقى الاخوة المدونين اللي سافروا كانوا لازم ياخدوا معاهم فوطة صفرا لزوم تلميع الازاز في الاشارات

وبعيدا عن حملة ايه يو سي فور اوباما اللي موجودة على موقع اوباما ذات نفسيته، وبعيدا عن عدم حياديه المؤسسات اللي زاروها الاخوة الافاضل في رحلتهم
انا ح افترض انهم محايدين

طب رايحين يحايدوا في ايه؟ اذا كانت دي انتخابات لا تخصنا

اتعودنا من التدوين انه ينقل ما وراء الكواليس لانه غير مدفوع الاجر وعليه فهو يختلف عن كل وسائل الاعلام الاخرى

لكن اذا كان ح يروح على حساب المعونة الامريكية فيبقى مراسل الاهرام اشرف منه لانه على الاقل مسافر بفلوس الاهرام
وح يبقى مش مسموح له ينقل ما وراء الكواليس عشان هو مضطر يعمل بلقمته

يبقى رايح يعمل ايه؟ ايه الزيادة اللي ح يزودها عن اي جرنال وللا قناة اعلامية؟ وانا ايه اللي يوديني للمدونات اذا كان عندي السي ان ان مدام الاتنين بيشتغلوا بفلوس اكيد مهنيا وفنيا وتقنيا السي ان ان ح تكسب

اخر حاجتين عايزة اوضحهم
الناس بتقول لي انت ليه اتكلمتي بالحدة دي، صحيح ما شتمتيش لكن كنت حادة ليه؟
عشان انا اتكلمت بالذوق اكتر من مرة
هنا
http://tahyyes.blogspot.com/2008/05/blog-post_22.html
وهنا
http://tahyyes.blogspot.com/2007/08/blog-post_29.html

ومش معقولة يطلع الاخوة في العروبة والدين والانسانية بيشتغلوا لوجه الله ايام ما ماكنش عندهم غير وجهه ولما لقوا وجه المعونة الامريكية غيروا قبلتهم، وبقوا ياخدوا على شغلهم اللي هو مش شغل، باكرر تاني، دي مش مهنة، مش مهنة، مش مهنة
اللي عايز يشتغل يدور له على شغلانة شريفة
مش ياخدوا مقابل على ولا شغلانة وكمان بالطريقة المهينة دي
وفوق البيعة يزايدوا علينا بالنضال! واللي عامل لي يساري، واللي عامل لي مضطهد، واللي عامل لي قومي، واللي عامل لي مناضل، كل ده بالفلوس الامريكاني؟ يا حلاوة
النقطة التانية
حاول البعض انه يستخدم اسلوب متدني اولا عشان يلفت انتباه السادة القراء ويشتتهم ويخليهم يفتكروا ان المسألة شخصية ما بيني وبين شخص معين، وعشان كده تنحى الست مدونين المعنيين، وطلقوا عليا مدون واحد عشان يبان انها خناقة شخصية والحقيقة انها مش خناقة شخصية ولا حاجة، وهم اول ناس عارفين كده، ولما ما نفعتش الخناقة الشخصية راحوا عيطوا لابوهم، ولما ما نفعتش قالوا لي انت عميا

البني ادم لما يبقى ما عندوش رد بيعمل كده عادة
طيب انا عميا
برضه ممكن اعرف ايه هو البرنامج اللي ملتزمين بيه؟

المفروض ان المدون ريس نفسه، لما يقبل معونة انشالله من زكاة المال يبقى مش ريس نفسه ولا حاجة
فما بال بيقبل فلوس من معونة امريكية
يا اخوانا اسمها معونة عايزين ايه اكتر من كده عشان نتأكد انها شحاتة

كل ماهو مطلوب الوضوح، عشان ما يتساواش اللي بيدون ببلاش واللي بيدون بمعونة

ياريت السادة المدونين يعملوا زي المدون التامن المحترم اللي بيقول انا باخد فلوس على شغلي عشان نبقى عارفين راسنا من رجلينا

واذا كان التدوين ح يتحول سبوبة، انا شخصيا عندي وسائل كتير لصنع سبابيب ومعطلاها عشان عايزة ابقى ريسة نفسي
قولوا لي حولناها بسبس ورأسمال
وابتدوا بقى اتعاملوا مع حقوق الملكية الفكرية اللي كنتوا بتشتموها واللي عامل لي يساري واشتراكي يقعد لي على جنب في اي حتة ناشفة، واللي عامل لي مناضل يتنيل على خيبته، واللي عمال يزايد وماسك لهم مسطرة: انت بتشتغل مع الامن..انت عميل لسوريا…انت بتاخد من ليبيا…انت بعت القضية ورحت اشتغلت عند فلان..انت بتعيش على قفا النسوان…انت اتحبست وخرجت في نفس اليوم…اكيد جندوك …لا اتوكسوا بقى
واحد كان بيقول لي: حرام عليكي يعني لما تعرفي ان ناس عندها مشكلة بطالة ورايحة تاخد فلوس لانها عايشة على السفريات تقومي تفضحيهم؟
ولما قلت له دي شحاتة ونصب قال لي لا حرام عليكي دي شحاتة بس مش نصب
!!!!!!!!!!
طيب كل واحد يسيب التاني في حاله، انا اعرف مدونين كلنا عارفينهم، اللي بيشتغل في قطاع عام وكل شوية يتنقل ويتحول للتحقيق ويتبهدل في المحلة ومش بيقبض مليم من حد وناس من اللي بتقبل اليو اس ايد بيلسنوا عليهم ويتريقوا عشان حاطين نمرة تليفونهم، واللي بيشتغل موظف في مؤسسة مجتمع مدني، واللي قبل ما يشتغل في المجتمع المدني كان بيتنطط وسط الناس عشان يبرمج لهم كمبيوترات ويعمل لهم سايتات ويكسب لقمته بالحلال مع انه ده بالذات الشخص اللي اقصده لو سافر في اي سفرية من دي، بامكانياته ومواهبه ونشاطه، ح يعبدوه في امريكا من دون الله، وناس سافرت واتغربت واتبهدلت ونزلت في عز رمضان في الحر في مواقع الشغل عشان تكسب بالحلال وغيرهم وغيرهم
وبيدونوا فعلا لله والوطن
يعني البني ادم لما بيعوز يبقى عنده كرامة بيعرف يبقى عنده كرامة
ملحوظة: انا مش باتكلم نيابة عن اي حد فيهم ولا اتكلمت مع حد فيهم في الموضوع ده ولا حد فيهم بالضرورة يكون موافق على كلامي عشان الناس ما تدخلش تقرفني انا في عيشتي وتطبق على قفايا مثل: للصاحب على صاحبه *** و**** وشهادة زور
بالذمة دول يتساووا باللي بياخد من المعونة الامريكاني؟ ده يبقى عدل؟
اي كلب ح يدخل يقل ادبه مش ح انزل تعليقاته، اللي عايز يتناقش بالادب يتفضل

هي دي كل سنة وانتوا طيبين بتاعة الامن؟

October 6, 2008
الامن النهاردة اعتقل 36 واحد من اتوبيس كان جاي في الفيوم الاسماء جبتها من عند يساري مصري:

قامت قوات الامن باعتقال ركاب حافلة كانت قادمة من الفيوم وتم وضع جميع الركاب في عربة ترحيلات

ووصل عدد معتقلين حافلة الفيوم مع عدد من نشطاء القاهرة الى 36 معتقل

والاسماء هي

1-سعد مفتاح بكري

2-رمضان عوض صابر

3-جمال عبدالتواب

4-عاتق جمعة سلام

5-محمود علواني

6-محمد شريف

7-علي عبدالله

8-محمود فوزي

9-محمد عماد سيد

10-بلال علاء فهمي

11-ابوبكر مشالي

12-احمد محمود محمد علي

13-صابر احمدي سعداوي

14-راضي محمود محمد

15-محمد خيري

16-محمد عادل

17-محمد حسن فايد

18-محمد جمال مصطفى

19-السيد صابر ربيع

20-خليفة عبيد محمد

21-محمد مرعي عبدالعزيز

22-احمد خلف احمد

23-عبدالستار سالم عبدالعاطي

24-محمد خليفة

25-محمد منصور

26-مصطفى محمود هلال

27-حسام احمد

28-محمود عبدالمحسن

———-
ولا عارفة هم راكبين الاتوبيس بيعملوا ايه ولا الامن اعتقلهم ليه، بس طنط محسنة توفيق بعتت لي رسالة بتقول لي انها كانت رايحة عشان تشارك في قافلة لكسر الحصار وقابلت ناس نصحوها بانها ترجع لان الدنيا واقفة وملبشة.
هي دي كل سنة وانتوا طيبين بتاعة الحكومة؟
يا سيدي وانتوا باللي ربنا يرضاه عليكم وعلينا

عاجل: احتجاز 3 نشطاء من الحملة الشعبية المصرية لفك الحصار عن غزة

October 5, 2008


من عند هشام مبارك:

منذ ساعتين من الان قام الامن عند كوبرى السلام باحتجاز ثلاثة من نشطاء الحملة الشعبية المصرية لفك الحصار عن غزة والثلاثة المحتجزين هم:

احمد فهيم عبد العزيز مهندس من المنصورة عضو حركة كفاية

ا/ صلاح تميم

ا/ حمادة بدير من حزب العمل

وهم محتجزين عند كشك الامن

ومن المعروف ان الحركة الشعبية كانت قد اعلنت عزمها على تحرك قافلتها لفك الحصار عن غزة غدا الثلاثاء 6 اكتوبر

تاني وتالت ولآخر أكتوبر…يساري اجدع ناس

October 4, 2008

أصل الحكاية ولد فارس ولا زيه
خد من بلال ندهته ومن النبي ضيه
ومن الحسين وقفته في محنته وزيه
قدم الشبابه فدا
والحق له عارفين

من عند يساري مصري أرجل ناس