Archive for the ‘انتوا خليتوا فينا عقل’ Category

نكنس السلم وللا نرمم الاساس؟

November 7, 2008
دلوقت لما يبقى السلم وسخ والاساس مخوخ، نعمل ايه الاول؟ مش عارفة
السلم بيتكنس من القمة والاساس بيترمم من القاعدة
طب نبتدي منين الاول؟
انا باسأل بجد، السلم وسخ قوي قوي وجايب دبان وريحة وحشة واساسا فيه مية ناشعة بتنقط وبتخوخ الاساس زيادة ومن كتر وساخته حابسنا جوة الاود بس المشكلة ان الاساس بيرقص بينا
تيجي تقول رمموا الاساس يقولوا لنا هو احنا عارفين ننزل على السلم من وساخته عشان نوصل للاساس؟ نيجي نكنس السلم العمارة كلها تتهز
نعمل ايه؟ حد عارف؟

خللي السلاح لا مؤاخذة صاحي

October 26, 2008
هي بقت كده؟
عمرو الراجل المؤدب كتب عن اعلان عن عقار شبه الفياجرا بس ارخص يعني
، هو ما رضيش يفصل قوي في شرح الاعلان، هو كل اللي قاله: يصح كده غنوة كانت بتتغنى في حرب الاستنزاف تبقى خلفية لاعلان عن عقار جنسي للرجال؟
قوم انا بهبلي سألته ده على انهي قناة يا عمرو
وياريتني ما سألت، انا ما نسيت ان عمرو مؤدب، وانه ح يتكسف يحكي كل اللي في الاعلان
اولا الاعلان بيبتدي بخرطوم لا مؤاخذة مية، وبينتقل الى لا مؤاخذة صباع لا مؤاخذة موز ثم ينتقل الى لامؤاخذة كوباية لا مؤاخذة طويلة بتاعة العصير دي، وعلى الخلفية موسيقى خللي السلاح صاحي
الحقيقة انا اسقط في يدي خصوصا اني كنت باتفرج على الاعلان مع ام زينب اللي انطلقت معلقة: وده طبعا بعد النكسة. فاخذتني الحمية الوطنية، وكنت لسة متأثرة بالشحنة اللي اخدتها من بوست عمرو، وذلك في اثناء الاعلان، يعني قبل ما اشوف الموز والكوباية: اه تصوري يا ام زينب دي غنوة كانت بتتذاع ايام حرب الاستنزاف شوفي بيستهزأوا بتاريخنا ازاي؟
فأجابت ام زينب بحكمتها المعهودة، والاعلان كان يستمر وينتشر: ماهو كله استنزاف….
في الواقع ام زينب ما تعرفش عن تاريخ مصر ولا تاريخ الاغنية ولا حتى تاريخ اخوها حسين حاجة، بس هي استشفت من سياق الاعلان ان اكيد الاغنية دي بعد النكسة
وفي الواقع انا وام زينب كنا في تمن هدومنا لما زينب سألتنا ببراءة: انا مش فاهمة الاعلان ده عن ايه؟ هو الاعلان ده عن الموز وللا عن عصير وللا عن تليفون وايه علاقته بالراجل اللي بيرش الجنينة وايه الاغنية دي؟ مش دي اغنية وطنية؟ ايه ده؟ ده دوا؟ هم الناس اللي في الاعلان دول عيانين؟ هو الدوا ده بتاع ايه؟
طيب انا ح اتجاوز الفقه الوطني والمختص بيه عمرو، واسأل سؤال جوهري له علاقة بالواقع والحياة اليومية للمواطن العادي اللي بيسعى وراء رغيف الخبز وهو سؤال ليس له ادنى صلة بالمثل والقيم
من العدو الغدار الى الاخوة الثوار افيدونا:
ارد على زينب اقول لها ايه؟

هو كان فيه خطة لرفع سعر الطاقة تاني؟

October 16, 2008
دلوقت انا عايزة افهم، مش سعر البترول نقص في كل حتة في العالم بسبب الازمة الاقتصادية؟ والدولار بينزل بسبب الازمة الاقتصادية؟ وكل حاجة بتنزل بسبب الازمة الاقتصادية؟
احنا بقى البنزين عندنا ما نزلش ليه؟ وليه في كل حتة في العالم العملات بترتفع قصاد الدولار واحنا الوحيدين اللي الدولار بيرتفع قصاد عملتنا؟ هي مسألة مبدأ يعني؟ هو احنا مرات امريكا وبنبيع صيغتنا عشان نساعدها؟
اه انا نسيت ان رشيد قال ان مصر مش ح تتأثر بالازمة الاقتصادية، امال احنا ناس صعايدة والكلام ده ما يهزش شناباتنا
امال ايه الكلام ده؟
لا وبيقول لك كان فيه خطة لرفع اسعار الطاقة من ورانا وما عرفناش الا لما قالوا ح يأجلوها!
يا لهويييييييييييييييييييييييييييييييييييييييييييي

جوزة الاتنين

September 8, 2008
هي الانسة المرحومة شوزان تميم كانت بتتجوز بسرعة كام راجل في الثانية؟
يعني متجوزة معتوق وللا ملاكم وللا متجوزة هشام طلعت عرفك؟ وكل دول كانوا في شفطة واحدة وللا ماشية بنظام الترمات؟
الله يرحمها وكل حاجة يعني، بس بسم الله ما شاء الله عليها عندها قوة نفسية للجواز ده كله؟ وهل كانت في الجواز بتتهبب زينا كده تغسل وتمسح وتطبخ وتمشي تلملم وراه الهدوم المرمية وفتافيت الاكل وهي لسة ماسحة وتعيد على حماتها قبل امها في كل الاعياد بما فيم 23 يوليو وتستحمل رغي سلفتها وشخير جوزها وايديها تبوش من المواعين اللي ما بتخلصش؟
تفتكر دي لو كانت بيتعمل فيها اللي بيتعمل فينا كانت اتجرأت تتجوز تلاتة على بق واحد كده؟