Archive for the ‘حاكم ظالم وشعب مظلوم’ Category

اختطاف محمد عادل

November 22, 2008

محمد عادل صاحب مدونة ميت اختطف يوم الخميس ومش عارفين هو فين لحد دلوقت، ده الخبر اللي شفته على الجايكو، اخدت اجازة يوم عشان اكل عيشي ارجع الاقي الواد مخطوف، منين فين امتى، ماحدش يسألني ح اعرف واقول لكوا

Advertisements

سفيه الجحش والولية المجنونة على الفضائية المصرية

November 1, 2008
قال وسفيه الجحش عايز يطلع قانون ضد اللي تلبس لبس يساعد التحرش!
طيب البنت اللي غاسلة وشها بالمية والصابون وغاسلة شعرها بالشامبو وحتى مش حاطة فيه كريم ولاماه ولابسة بلوزة واسعة وكم طويل دي ايه القانون اللي ح يطبق ضدها؟ وايه مسوغاته؟
ان ربنا خلقها حلوة؟ طب دي خلقة ربنا يعني تعمل ايه طيب؟ ترمي على وشها مية نار؟ وللا تستحمى مرة كل شهر مثلا؟
يا شباب انتوا مش غرب …. دي حتى مش عاملة حواجبها
طب ما يلبّس المحامية اللي قاعدة قدامه
انا قرفانة قوي على فكرة، قرفانة والله العظيم تلاتة نفسي غامة عليا والله بطني قالبة وحاسة اني فعلا عايزة ارجع مش مجازا
على فكرة الولية المهفوفة دي في المجلس القومي للامومة والطفولة..يعني تبع ماما سوزان
ادي جيجي يا طنط سعاد..ادي طنط سعاد يا جيجي
والكدابة…الكدااااابةةةة…
الكدااااااااااااااااااااااااااااااابببببببببببببببببببببببببببببةةةةةةةةةةةةة تقول ان نهى قالت لها ح ارفع قضية تعويض
ومحامي نهى طلع في العاشرة مساء تقول انها مش عايزة تعويض مادي وكفاية عليها ان حقها المعنوي رجع لها
هي الولية دي مش مكسوفة من نفسها؟ مش محرجة؟ مناخيرها ح تبقى تلاتة متر من كتر الكدب
ثم ثغرات ايه اللي هي سدتها في القضية البلوة اللي اتحدفت علينا دي؟ ده القاضي قعد يقول لها: يا استاذة ادخلي في الموضوع..يا استاذة اتكلمي قانوني
على فكرة انا مش قادرة…والله العظيم حاسة اني عايزة ارجع ما اعرفش ايه ده اللي حصل لي؟ ضغط عالي وللا ايه؟
خلاص عرفنا ان الولية دي واخدة اوامر عليا عشان تعمل في نهى كده
السر بقى؟ عايزة اعرف السر…هل التحرش سياسة عليا والدولة عايزة تحافظ عليه؟ طب ليه؟ وللا في كارثة ح تحصل وهم بيلهونا بالموضوع ده وهم متأكدين انهم ح يخسروا القضية بس تكون الحكاية اتمررت؟ طب حكاية ايه؟ انهي حكاية؟ قضية هشام طلعت؟ ح ياخد براءة مثلا؟ بس دي قضية ديتها ماتش اهلي وزمالك وخلصنا، مش محتاجة يعني كل التشويه ده للبنت والمصاريف دي كلها، وللا حاجة لها علاقة باسرائيل وحديث الريس الجامد مع سمدار الجامدة بخصوص ليفني الجامدة؟ وللا حاجة احنا مش عارفينها لسة؟ وللا تنكيل بنهى عشان مافيش واحدة تتجرأ تعمل كده تاني؟
انا دماغي لفت على فكرة
تصبحوا على خير

القبض على المدون محمد خيري فجرا من منزله

October 22, 2008
تحديث:
هو احنا اتجننا؟ اتجننا وللا ايه؟ اتجننا صح؟ محمد بيتعرض مع خمسة تانيين بتهمة المشاركة في قافلة لغزة
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
هو النهاردة يوم علامات التعجب؟
احنا اتجننا؟ يعني سعد الحريري ما استعناش ييجي بنفسه مصر وباعت الوكلا بتوعه يقابلوا الرئيس بتاعنا، لا وهو يقابلهم، بنفسه يقابلهم يعني كأن ده محل خردوات مش بلد، يادي الكسفة ياربي، يا مشرفنا، يا رافع رايتنا في الداخل والخارج طب اهو..الراجل بيقول لك اهو لو فرنسا وامريكا معبرينهم ما كانوش عبروك
هي بقت كده؟ الله يخرب بيت اللي كان السبب….الله يخرب بيته مطرح ما راح

زوار الفجر وكدهون يعني…محمد صاحب مدونة جر شكل..التفاصيل عند ميت
وبعدين يا شباب شوية تعاون….ماحدش لقى البت؟ البت المسيحية الشيعية الاخوانية الصعيدية المحلاوية الايرانية الافغانية اللي من الدويقة؟ دي خيطير على الإيمن…الجايزة شارة الحزب الوثني شدوا حيلكوا
هم مش المفروض كانوا قالوا لنا انهم بطلوا زيارات الفجر دي وبدل كده بقوا ياخدوا الناس من الشارع او يوم الجمعة بعد الصلاة؟ رجعوا تاني للعمايل دي؟

افرجوا عن محمود الطويل

October 16, 2008
الف مبروك قرار النيابة طلع بالافراج عن محمود الطويل واللي معاه لما يوصل البيت ح اطمنكوا

كل زملاءه خرجوا وهو اتعرض على النيابة النهاردة واجلوا القرار لبكرة الصبح
قصته كاملة كاتباها اخته هنا

جمال مبارك فوق الجميع

October 9, 2008

الصور دي التقطها طفاطيفو
طبعا هي واضحة، اللي فوق ده جمال مبارك واللي تحت دول شباشب
اللي هو احنا يعني
وهو فوقينا
تقدروا تتابعوا بقية الصور المعبرة هنا

اهالي الدويقة واسطبل عنتر بيقطعوا بسرعة

October 2, 2008
عارف اما اللبن يقطع بسرعة، ما يبقاش فيه مواد حافظة وتبقى حاطة في التلاجة وفجأة يتغابى عليك ويروح قاطع، اهم اهالي الدويقة واسطبل عنتر كده، بصراحة بقى بيتلككوا عشان يموتوا ويرموا بلاهم على الحكومة الرشيدة، تروح الحكومة تخليهم، يموتوا وهم بيتخلوا، تسكنهم في خيم يموتوا وهم بيتسكنوا، تسحلهم عادي يعني بالراحة وتجرجرهم بشويش برة البيوت بالشوم…بسيطة يعني بس كده نغزة وللا حاجة يطبوا ميتين تسكنهم في شقق ماما سوزان يموتوا
ماحدش بقى يقول لي ان الحكومة بقى هي اللي غلطانة، الله جرا ايه يا اخوانا ايه الدلع ده هم بسكوت يعني؟ مش عارفين يستحملوا كام شومة على كام جرجرة على كام سحلة على كام زقة على كام تكويمة، دي عالم بتستهبل فعلا، اصلا اصلا دي عالم مجرمة وبترمي بلاها ع الناس، عارفين زمان الصايع اللي يبطح نفسه عليك، دلوقت الصياعة تطورت بقى يموت نفسه عليك
الست اللي ماتت دي هدوا لها بيتها اللي كلفته كتير وما اخدتش تعويض، ييجي واحد يقول لي ماهم بانيين من غير ترخيص، على فكرة فيه برضه في اسطبل عنتر بانيين من غير ترخيص وزعلانين على الفلوس اللي صرفوها ولما اتقال لهم انتوا مالكوش حق انتوا بانيين من غير ترخيص سألوا سؤال لوذعي احرج كل وزراء خارجية جامعة الدول العربية: لما احنا بانيين من غير ترخيص كنتوا بتدونا ليه عداد كهربا ما فيه بيوت تانية سارقين كهربا واحنا قدمنا على عداد وانتوا عارفين انه مخالف…طب ادتونا عداد ليه؟
اممممممممممممممم
احراج ده
آه آه ماهو انت اصلك ما تعرفش تتكلم مع الاشكال دي زي ما كان الاخ مصطفى بتاع المصري اليوم بيقول، ماهم مجرمين وصيع وما تعرفش تاخد منهم حق ولا باطل، وقمة اجرامهم في انهم كل شوية يطبوا ميتين عشان يلوثوا سمعة الناس الشرفا

المولعين بجاز

October 1, 2008
طبعا انتوا قريتوا الخبر ده اللي فيه ان الناس في اسطبل عنتر ح يولعوا في نفسهم
بس قريتوا تعليقات الناس؟
بصوا واحد كاتب ايه؟

يجمعون أنابيب البوتاجاز و مية النار لمواجهة الشرطة
تعليق مصطفى تـاريخ

٢٨/٩/٢٠٠٨ ٢٨:١٤

ما شاء الله على الخلق !! من الواضح اننا نتعامل مع مجموعة من المجرمين !! أنا لا اعلم حتى كيف احصل على مية نار !! لو الحكومة اعطتهم مكان صغير فى 6 اكتوبر لا .. يريدون مكان واسع فى منطقة عمار لانهم متعودين على هذه الرفاهية !! و لو الحكومة سابتهم للإنهيارات، تطلع لنا منظمة مثل كفاية لترفع قضية جنائية ضد رئيس الوزراء !! ماذا تريدون ؟؟ كان الله فى عونك يا مصر. فليتفضل احد المعلقين الافاضل بالتوضيح لى ما هية المطلوب من الحكومة لإعادة تسكين اكثر من مليون شخص (الذين لا اعلم من اين اتو)و من سوف يدفع تكلفة إعادة التسكين هذه ؟؟

وفيه تعليقات استفزازية كتير بس ده اكتر تعليق شلني: أيا كيسكيليا…سوفاج …مش جانتيي خالص دول… بيهددوا بالمية النارات والمتاويات واساسا هم جم منين الناس البيئة دي؟ دي ناس وهشة وهشة وهشة موت موت موت…امشوا من هنا يا جرابيع يا كلبين انتوا.
انا مش عارفة الاخ مصطفى لو حد جه بالامن المركزي والشوم يضربه ويشده من البيت بالعافية ويهد البيت على العفش بتاعه ح يبقى رد فعله ازاي؟ وازاي يصدق ان اللي بيعمل فيه كده وبيضربه وبيهد البيت على دماغه وعفشه بيعمل كده عشان مصلحته؟ وعشان خايف عليه ليموت؟ وعشان ح يوديه حتة احسن من اللي هو ساكن فيها؟
انا عايزة افهم ايه دخل الامن المركزي في اخلاء بيوت ايلة للسقوط او قائمة على منطقة خطر؟
يعني المجلس القومي لحقوق النسوان بتاع ماما سوزي ما نزلش جمعيتين يكلموا الناس كلمتين ليه بدل ما يرعبوهم ويفزعوهم بالطريقة دي؟ لو نيتهم سليمة ما نزلوش لهم ليه الناس اللي بتنزل كل مرة في انتخابات الوطني عشان تكلم الناس؟ ماهم غلابة وبيصدقوا اي حد يكلمهم كلمتين حلوين وعلى عكس كل المصريين بيستجيبوا وبيسمعوا الكلام بسرعة بس بالعقل
بالعقل مش بالرعب
يا اخوانا حد يحط نفسه مكانهم ويتخيل ان الامن جاي يجرجره ان شالله برة زريبة مين ح يصدق انه بيعمل كده عشان يسكني في حتة احسن؟
اه
وهم بيتغابوا وبيقولوا بعيد عن اشغالنا، ماهم معظمهم سريحة ح يسرح فين في ستة اكتوبر؟ اساسا ايجار الشقة اللي ح يدوهاله ح يدفعه منين اذا ما سرحش في الاشارات بفل وللا كلينكس وللا بخور
ماهي دي معظم اشغالهم قليل جدا لما تلاقي صنايعي هناك وبيبقى بيتعامل في حتة كأنه الدكتور اللي جاي من المانيا حدانا في البلد
يعني الناس اللي سايبين التعليقات دي بيعملوا كده ليه؟ ماحدش طلب منهم مساعدة بس ينقطونا بسكاتهم، وللا البني ادم لما بيحس انه مقصر بيحاول يبرر لنفسه ويطلع ان ضحيته هو اللي غلطان وللا ايه؟

القبض على 22 مواطن من الدويقة

September 29, 2008
الشرطة قبضت على 22 مواطن من الدويقة واتنين اصيبوا ودلوقت المحامين رايحين ومحتاجين اعلام كاميرات يصورهم لمزيد من التفاصيل رجاء الاتصال باحمد عزت 0103978913

ديجافو

September 28, 2008


من عند ميييين؟ ايوة اسم الله عليكوا

يحيا العدل يحيا العدل…سكنوا اسرتين

September 24, 2008
هم طردوا 120 اسرة في اسطبل عنتر، واستجابة لنداء الجماهير فقد تفضل جلالته ووافق على تسكين اسرتين في شقة 34 متر فيها حمام ومطبخ وكتر خيرهم على كده، باقي ال118 اسرة ان شاء الله ح يسكنوا
بس لما امشي في الجزمة الاول