Archive for the ‘حريات’ Category

وقفة احتجاجية للتضامن مع الطبيبين المصري المجلود

November 10, 2008
مينا بعت لي على الجايكوا الاتي:

غدا الساعة 12 ظهرا وقفة أمام نقابة الأطباء تضامنا مع الطبيبين المحكوم عليهما بالحبس والجلد بالسعودية

اه وبعت لي الجايكوهاية دي كمان:
ويوم الأربعاء وقفة تانية قدام الصحفيين الساعة خمسة ومؤتمر تضامني برعاية لجنة الحريات في الصحفيين الساعة ستة… يا ريت حد يعمل إيفنت ع الفيسبوك ويبعت الدعوة للبشر لأني مشغول لشوشتي

وقبل ما حد يسألني ايه الجايكو، الجايكو اهو
الا انا سألت سؤال تبي والسادة الاتباء ما حدش فيهم رد عليا

هو فيه حاجة اسمها دكتور تخدير يدي جرعة زيادة قوم المريض يدمن المخدرات؟ الكلام ده عولمي؟
انا كنت فاكرة زمان وانا صغيرة ان البنج ده الجرعة الزيادة فيه بتموت مش بتعمل دماغ!
افيدونا يا اهل الذكر
——–
النهاردة بقى الساعة ستة وقفة احتجاجية في طلعت للتضامن مع حزب الغد
ثانية واحدة، عشان انا كمان بصراحة ما كنتش مقتنعة
لكن مالك مصطفى اقنعني ان الوقفة دي ضد بلطجة الامن، مش مع ولا ضد حزب الغد في حد ذاته، وانما ما ينفعش الامن يجند ناس ويسلطهم يحرقوا، ولو حتى يا سيدي مش مجندين من الامن، الامن كان واقف يتفرج ولم يحم المواطنين بل على العكس نزل لهم فرق كارتيه تضربهم
لو فرضنا ان اعضاء حزب الغد بيتخانقوا مع بعض وطرف فيهم بيحرق للتاني بدون تدخل الامن، الامن شغلته ايه غير انه يحمي المجني عليه مش يحمي الجاني، ولما يحمي الجاني يبقى احنا بندفع له مرتبات من ضرايبنا ليه؟
ده بالنوسبة لمالك انه اقنعني وانا بقى مش ح اتناقش معاه في حاجة عشان انا خايفة يقنعني بعد كده اني اتجوز زكريا عزمي وللا حاجة

نشرة الاخبار الصباحية

November 7, 2008

اعتقال ضياء الصاويالتفاصيل
هنا

ام وبنتها كانوا بيتكلموا قامت الام قتلت بنتها….الله، ايه العثل ده؟ هي البشريات مالهم كده، قال البت اصابتها نوبة هياج وعضت ابوها قامت امها عشان تهديها خنقتها…ماهو في مغاغة بقى..حيث بيسلكوا سنانهم ببارودتين
—-
اوباما اتصل بتسع رؤساء و”تجاهل العرب” يعني ايه تجاهل العرب؟ هو اساسا ما اهتمش بيهم احنا بالنسبة له شبهة وتهمة..وبما انه كتكوت ومقطقط فاكيد الناس برضه ح تلتمس له عذر: معلش اصله بيعمل تموين بس قدام الامريكا ولاد التيت….هو يستغنى عننا برضه؟
طب والله لما كنت في الجامعة كان معايا بنت مصممة ان س بيحبها والواد بيعاملها معاملة الكلاب الضالة لدرجة اني انا اخدت بالي – وانا كنت بقى متخلفة اكتر من دلوقت كمان – واقول لها: يابنتي ده باين انه مش بيحبك خالص ما تعيشيش في الوهم …ده تقريبا بيكرهك كمان
تقول لي: لا لا..هو بس بيحاول يهرب من مواجهة نفسه
اممممممم طبعا اكيد برضه اوباما بيهرب من مواجهة نفسه
—–
بيقولوا ح يزرعوا قمح عضوي في الصعيد!!!
too good to be true
———-
ده حوار مع سعيد اللاوندي بخصوص امالنا العالية في اوباما اللي بيهرب من مواجهة نفسه
على فكرة البيني ادم هو اللي بيفرض احترامه على الناس، يعني مش معقول قاعدين حاطين ايدنا على خدنا ومستنيين ربنا يخلف علينا بالرئيس الصالح
وده عالم البقاء فيه للاقوى في كل حاجة
——–
مسعد ابو فجر تعبان قوي يا ناس…انا شخصيا مقصرة معاه، بس مش عارفة اعمل ايه؟
———–
ملحوظة: كلمة اسود دي كلمة بقت عيب، ما بقاش حد بيقول امريكي اسود دي
قولوا امريكي افريقي او افرو امريكان يعني لو بالعنجليزي ثم احنا في مصر طول عمرنا بنقول اسمر او اسمراني ولما بيبقى واحد غامق شوية بنقول سمارة، ايه حكاية اسود دي اللي كل الناس بقت تقولها؟
—–
بيقول لك دكتور التخدير اداها جرعة زيادة قامت ادمنت! والنبي انا مش دكتورة حد دكتور يشرح لي الموضوع ده، انا اعرف ان البنج الزيادة بيموت مش بيدمن، هو ينفع ده؟ وبعدين غلط واداها جرعة زيادة يفضل يتجلد عشر سنين؟ مش عارفة محكوم عليه بالف وخمسميت جلدة! طب ده عبد الرحمن يوسف، والعهدة عليه هو خريج شريعة، قال لي الجلد عادة كان في ايام الرسول بيتم بالجريد وعلى الهدوم، ثم ايه الف وخمسميت جلدة دي؟ نزلت في انهي سورة؟ لو هو فعلا غلط يبقى يدفع تعويض، يتحبس مش عيب ان واحد لما يغلط في بلد يتحبس يعني ما احنا بنروح نتحبس في اوروبا والدول المتغدمة وماحدش بيفتح بقه بس ايه الجلد ده يا حنظلة؟ خسئت وثكلتك امك يابن حلزة، طب ما يحطوا له حجر على صدره ويدلقوا مية جنبه وهم بيضحكوا ويقولوا له: عد الى دين آبائك
السؤال بقى: لو دكتور المخدرات ده كان خواجة كان اتعمل فيه كده؟
—–
يا عم اقعد بقى الله يهدك…انت عامل زي الراجل اللي عاش حياته نازل تف ع الناس وهو بيطلع في الروح وريقه ناشف يقول لهم ادلقوا لي مية في بقي عشان اتف ع الدكتور
—-
الباب العالي بيدي اوامر
——-
حسن مين؟ انا كنت فاكرة حسن نصر الله، الا كلنا بنكره الحكم العسكري، بس ايه رأيكوا في الحكم الكروي؟
———
على الله بوش لا يحذو حذو كلبه…انا عندي معلومة من مصادر غير موثوق بيها انه بيعتبر كلبه مثله الاعلى
—-
ههههههههههه تستاهل، مسلم واسود، هم عندهم زمالك في امريكا؟
——–
كفاية عليكوا كده النهاردة…ياللا ذاكروا ح امتحنكوا في المواد دي واللي مش ح يجاوب صح ح اديله شلوت في قلبه اكسر له قفصه الصدري ويبقى شهيد الواجب المدرسي

عاجل: الافراج عن محمد خيري وزملائه

November 4, 2008
لسة وصلني حالا الخبر بالافراج عن محمد خيري وزملائه
حمد الله ع السلامة يا محمد

اعتقال المدون عبد التواب محمود و3 طلاب من جامعة الفيوم

October 27, 2008
تم اعتقال المدون عبد التواب محمود وتلاتة من طلبة جامعة الفيوم النهاردة

تشريد طالب بكلية الإعلام و حرمانه من الإقامة في المدينة الجامعية بسبب مدونته!

October 25, 2008
بيان الشبكة العربية لحقوق الانسان

تشريد طالب بكلية الإعلام و حرمانه من الإقامة في المدينة الجامعية
بسبب مدونته!

أدانت الشبكة العربية لمعلومات حقوق الإنسان اليوم استبعاد الطالب والمدون أحمد عبد القوي من قوائم السكن بالمدينة الجامعية رغم استيفاءه للشروط ، بسبب تعبيره عن أرائه على مدونته.

والمدون احمد عبد القوى صاحب مدونة ” أكيد فى مصر http://akeedinegypt.blogspot.com” من مواليد الفيوم و طالب بالفرقة الثالثة كلية الإعلام جامعة القاهرة – قسم الصحافة ، وقد حصل على تقدير جيد جدا فى الفرقة الأولى والثانية ، وقضى العام الدراسي الماضى بالمدينة الجامعية ، حيث انه طالب مغترب و محل إقامته بمحافظة الفيوم التي تبعد 100 كيلومتراً عن القاهرة حيث تقع الكلية التي يدرس بها.

و مع بداية العام الدراسى الحالي ، تقدم احمد للالتحاق بالمدينة الجامعية ، حيث انه يستوفى كافة الشروط المطلوبة للالتحاق بها ، إلا انه لم يجد اسمه ضمن قائمة المقبولين للسكن بالمدينة الجامعية التابعة لجامعة القاهرة عقابا له على تدويناته الناقدة ، حيث كان من المفترض أن يكون عبد القوي مقيما في المدينة الجامعية منذ 14 أكتوبر الجاري، ولكنه ما زال مشرداً.

وقالت وحدة الدعم القانوني لحرية التعبير بالشبكة العربية لمعلومات حقوق الإنسان “يجب ألا يحول نشاط المدون والطالب أحمد عبدالقوي المدني والحقوقي على الانترنت بينه وبين الإقامة بالمدينة الجامعية، فلكل مواطن الحق في التعبير عن آراءه وأفكاره، وهو الشيء الذي كفله الدستور المصري والمواثيق الدولية”.

والشبكة العربية لمعلومات حقوق الإنسان وهي تشجب بشدة هذا الإجراء غير القانوني للجامعة ، والتدخل السافر لأجهزة الأمن في شئون الجامعة ،، فهي تهيب بمسئولي الجامعة الحفاظ على استقلالية المؤسسات الأكاديمية وعدم التواطؤ مع أجهزة الأمن على حساب حقوق الطلاب المشروعة، وتطالب بعودة الطالب إلى سكنه بالمدينة الجامعة إعمالا للقانون و إحتراما لحقوق الطلاب وحقهم في التعبير عن أرائهم. القاهرة في 25أكتوبر 2008

القبض على المدون محمد خيري فجرا من منزله

October 22, 2008
تحديث:
هو احنا اتجننا؟ اتجننا وللا ايه؟ اتجننا صح؟ محمد بيتعرض مع خمسة تانيين بتهمة المشاركة في قافلة لغزة
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
هو النهاردة يوم علامات التعجب؟
احنا اتجننا؟ يعني سعد الحريري ما استعناش ييجي بنفسه مصر وباعت الوكلا بتوعه يقابلوا الرئيس بتاعنا، لا وهو يقابلهم، بنفسه يقابلهم يعني كأن ده محل خردوات مش بلد، يادي الكسفة ياربي، يا مشرفنا، يا رافع رايتنا في الداخل والخارج طب اهو..الراجل بيقول لك اهو لو فرنسا وامريكا معبرينهم ما كانوش عبروك
هي بقت كده؟ الله يخرب بيت اللي كان السبب….الله يخرب بيته مطرح ما راح

زوار الفجر وكدهون يعني…محمد صاحب مدونة جر شكل..التفاصيل عند ميت
وبعدين يا شباب شوية تعاون….ماحدش لقى البت؟ البت المسيحية الشيعية الاخوانية الصعيدية المحلاوية الايرانية الافغانية اللي من الدويقة؟ دي خيطير على الإيمن…الجايزة شارة الحزب الوثني شدوا حيلكوا
هم مش المفروض كانوا قالوا لنا انهم بطلوا زيارات الفجر دي وبدل كده بقوا ياخدوا الناس من الشارع او يوم الجمعة بعد الصلاة؟ رجعوا تاني للعمايل دي؟