Archive for the ‘حسبنا الله ونعم الوكيل’ Category

محمد عادل مخطوف وبكرة رايحين للنائب العام

November 22, 2008

محمد عادل ما راحش البيت ولا اخد حاجات زي ما اشيع، النهارده ابوه راح للنائب العام، وبكرة رايحين تاني للنائب العام وعايزين اكبر عدد، لانه مش مقبوض عليه، اتخطف يوم الخميس والامن راح فتش بيته وما سالش عليه ولحد دلوقت مش عارفين هو فين، انا مش فاهمة بيعملوا كده ليه؟ يعني لما يقبضوا عليه ح نحوشه منهم؟ ما يعرفونا هو فين بدل ما ابوه يجرا له حاجة، انا ان شاء الله رايحة بكرة الساعة حداشر معاهم للنائب العام وياريت تيجوا وما تكسفونيش زي ندوة لا للحصار لا للتطبيع، انتوا احرجتوني قوي يوميها

ياللا، المهم ان اللي بيحصل لمحمد ممكن يحصل لاي حد فينا، حط نفسك مكانه وحط اهلك مكان اهله، اكيد محتاجين حد يقف جنبهم دلوقت، واحنا مش رايحين نتخانق احنا رايحين نشتكي للنائب العام زي اي انسان عنده شوية من الاحمر

نجيب عبد الفتاح اسماعيل اتنقل الوادي الجديد

November 14, 2008
نجيب عبد الفتاح اسماعيل من كفر البطيخ بقاله خمستاشر سنة محبوس من غير تهمة، خمستاشر سنة ياخد افراج من النيابة ويعاد اعتقاله، ساب عياله التمانية اطفال ودلوقت البنات عرايس والشباب متخرجين
نجيب ابن عبد الفتاح اسماعيل .المدة اللي مفروض يقضيها المتهم اللي برأته النيابة عشرميت مرة لدرجة انها مستعدة تحلف على مصحف هي: الى ما شاء الله مع الشغل والنفاذ
نجيب، امه اكتر من مرة تقول له اكتب اعتذار، وهو يقول اعتذار عن ايه؟ اذا النيابة مبرآني، اعتذر عن برائتي؟
مافيش سجن ما راحهوش نجيب، بما فيها سجون الصعيد! ومافيش مرة اتنقل فيها الا وامه ومراته وعياله واخواته بيروحوا يزوروه هناك، مراته واخواته قضوا شبابهم في مشاوير السجن، وامه قضت كهولتها وشيخوختها شايلة على قلبها الزيارات، كل ليالي مرضها كانت على الطريق من السجن لسواحل كفر البطيخ ومن سواحل كفر البطيخ للسجن. وبعد سنين تكدير وبهدلة، وبعد سنين كانت امه تروح شايلة الاكل على قلبها فيرموا لها الاكل على الارض ويقولوا لها مافيش زيارة امشي، اخيرا ادارة السجون شافت ان نجيب عبد الفتاح اسماعيل هو نزيل دائم، وعليه فنقلوه الى سجن وادي النطرون 2 حيث ان المسافة قريبة لدمياط، بلد اهله، وفيه بقى حمامات افرنجي، بيتهم بقى.
فجأتن قرروا ينقلوه سجن الوادي الجديد.
نجيب عبد الفتاح اسماعيل اللي النيابة ادته عدد لا يحصى ولا يعد من البراءات مالوش احلام انه يخرج، كان قاعد في وادي النطرون 2 وراضي، مدام امه ومراته وعياله واخواته بيعرفوا يشوفوه، ويزوروه، وخلاص بقى، كأنه في اعارة مثلا، والمرتب متحوش له عند ربنا اللي عينه لا تغفل ولا تنام ولا بيسيب حق مظلوم يضيع ابدا
سنانه وقعت، وشعره ودقنه كلهم بقوا بفتة بيضا، دخل السجن عنده اربعين سنة، ودلوقت عنده 55 سنة. كان زمان بيحلم انه ياخد عيل من عياله وينام في حضنه، بس خلاص العيال كبرت، وهو بطل يحلم احلام مستحيلة
بس الوادي الجديد؟ امه اللي عندها اربعة وسبعين سنة تروح ازاي في طريق الوادي الجديد؟

يحرق…يلعن…يا ولاد…

November 9, 2008
نقابة التطبيقيين وقفت المعاشات لمن بلغوا السبعين، على اساس انه عاش عشر سنين بعد سن المعاش، ايه البواخة دي؟
طيب وبالنسبة للي بلغ التمانين ولسة ما طلعش معاش اصلا؟ ح يطلع معاش امتى؟ وبيبقبض مرتب بقى من ضرايبنا على اي اساس؟ وللا هم التطبيقيين تف عليهم الكلب؟ الخبر بيقول ان دي السابقة الاولى في العاااااااااااااااااااااااالممممممممممممممممممم
في العالم كله
ما حصلتش في اي حتة ان نقابة تقول لاعضائها: انتوا ايه اللي معيشكوا لحد دلوقت؟ طب مافيش فلوس بقى ده انتوا عالم لزقة صحيح
الا يا اخ نظيف انت نظفت الدنيا من كل مظاهر الحياة
يا اخ نظيف انت ما عندكش اب، ام، اخ كبير، ما انت مسيرك تخطي السبعين انت كمان وربنا يديك الصحة وتخطي التمانين والتسعين، احساسك ايه يا اخ نظيف لما يتقال لك ما انتاش واخد فلوس عشان عشت زيادة عن اللزوم؟ حتى لو الفلوس دي خمسين جنيه يا اخي؟
يا اخ نظيف انت ما عندكش اطفال؟ عيالك كبروا؟ طب لما كانوا صغيرين كنت تحب يموتوا في المدارس؟ احساسك ايه لو انت ابو الطفل ده؟ وللا ابو الطفل ده؟
يا اخ نظيف احساسك ايه لو اتوفرت من شغلك زي العمال؟ وللا انطردت من ارضك زي الفلاحين؟
يا اخ نظيف انت عندك احساس وللا لا؟
يا دكتور احمد نظيف اهدي اليك والى السيد رئيس الجمهورية هذه الاغنية

عاجل لملاك ارض وادي الملوك

November 9, 2008
التفاصيل هنا

تعذيب كريم عامر في السجن

November 6, 2008
البيان ناقلاه من مدونة كل العرب:
الي المدونيين الاحرار
الي منظمه العفو الدوليه
الي هيئات المجتمع المدني
انقذوا المدون المصري كريم عامرمن التعذيب في سجون مصر ودافعوا عن حريه الكلمه
رسالة من المدون المصري كريم عامر عن تعذيبه فى سجن برج العرب
تلقى إتحاد المدونين العرب رسالة من المدون المصري كريم عامر المعتقل في سجن برج العرب، وفيما يلي نصها:
اقصى ما يستطيع انسان ان يتحملة ,تعرضت لتعذيب بدنى وقهر نفسى واسىْ بشكل بالغ القسوة وها انا من اعماقى اطلق تلك الصرخة بعد انقضاء ابشع فصول هذه المحنة التى لا يزال اثارها العنيفة تطعن فى اعماق نفسى المجروحة ,عسى ان نجد اذنا تصغى اليها حركة يدا تمتد لتنتشلنى من هذا الجحيم 0
ففى يوم الاربعاء الرابع والعشرين من اكتوبر الماضى قام معاون مباحث السجن الضابط مدحت سمير بتحريض مسجون يعمل كنوبتجى للنظافة والغذاء بالعنبر الذى كنت اقيم فيه عنبر 22 وقام بالتعدى على بالضرب امام باقية المسجونين بمساعدة حارس العنبر واحد افراد المباحث وهو الامر الذى نتج عنه اصابتى بخدوش وكدمات فى انحاء متفرقة من جسدى كما تسبب ايضا فى خلع احد اسنانى الناب الايمن من الفك العلوى وبعدها تم نقلى للتاديب وهناك امر الضابط المذكور بتكبيلى من يدى وقدمى وفى وضع يطلقون علية البطة فطرحنى افراد المباحث ارضا بمساعدة نوبتجية التاديب ارضا وانهالوا على بالضرب وقاموا تقييد يدى من الخلف وكذلك قدمى واصلوا قيود القدم باليد ثم احضروا سجيننا اخر لا اعرفة ومزقوا ملابسة امامة حتى اصبح عاريا تماما كما ولدته امه واعتدوا علية بالضرب المبرح فى جميع انحاء جسدة ثم هددونى بتكرار ذلك معى وبعد ذلك حملونى داخل بطانية قذرة وانا مكبل على هذا الحال والقوا بى داخل احدى زنزانات التاديب وبعد مرور ما يقرب من ساعتين قاموا بحل قيودى وعمل محضر يتهمونى فيه بالتعدى بالضرب على المسجون والنوبنتجى الذى اعتدى على واحدث فى اصابات فى جسدة مستخرجا بة تقرير طبى , وهو امر لم يحدث منى على الاطلاق وردت بنفى هذه الاتهامات ورواية ما حدث معى بوضوح وطلبت اصدار تقرير طبى باصابتى
وفحصنى احد اطباء السجن واكتشف فى النهاية انه خضع لضغوط ضابط المباحث ولم يثبت فى التقرير الطبى الخاص بى كل الاصابات خاصة سقوط احدى اسنانى نتيجة للتعدى على وهو ما يعد عاهة مستديمة وعندما اتهمت الضابط مدحت سمير فى المحضر بما قام به ضدى قام باستبدال الورقة التى تحوى هذا الاتهام مع توقيعى بورقة اخرى نسبوا لى فيها بعض اقوالى وحذفوا الاقوال التى ليس على هواهم واثبتوا رفضى التوقيع على المحضر وبعد ذلك وقع على جزاء تادينى لمده اسبوع تحت بند المشاجرة واحداث اصابة ووضعونى داخل احدى زنازين الحبس الانفرادى لعشرة ايام متوالية بالرغم من ان الجزاء الموقع اسبوع فقط حرمت خلالها من كافة الحقوق التى ينبغى ان يتمتع بها المحبوس انفراديا طبقا للائحة السجون ,تم حرمانى بشكل شبة كامل من الطعام ولم يكون يقدم لنا سو رغيف خبز جاف وقطعة جبن بالغة الضئالة وزجاجة مياة 0
وفى صباح الجمعة الثانى من نوفمبر الجارى اخرجونى من التاديب واجبرونى على الانتقال من عنبر 22 الى عنبر 24 لاقيم بمفردى فى غرفة تنتمى الى قسم مخصص للمجرمين الميئوس من اصلاحهم والمرضى النفسيين المحبوسين انفراديا لعزلى تماما عن بقية السجناء حيث لا يسمح لاحد بالاقتراب منى او الحديث معى ويهدد كل من يحاول ذلك الذهاب الى التاديب ,الجدير بالذكر انهم وبينما وضعونى فى التاديب لمدة 10 ايام قاموا زرا للرماد فى العيون بوضع المسجون الاخر الذى دفعوه للتعدى على بالضرب لمده ثلاث ايام فقط بالتاديب وبعدة اخرجوه وكافئوه على ما فعلة معى باعادته الى عمله مرة اخرى على خلاف ما يحدث فى العادة مما يؤكد تواطؤهم معة وتحريضهم له على القيام بذلك
اننى هنا اشعر بمعاناه لا حصرلها نتيجة هذا الاضطهاد المنظم ضدى فادارة السجن تتعامل معى بقسوة بالغة من اللجظة التى وطئت قدمى فيها هذا المكان ويتعمد ضباط السجن اضطهادى والتمييز ضدى على خلفية الاتهامات الموجهة لى ولاعلانى تمسكى بموقفى وثباتى على مبادىء رغم كل ما حدث ويحدث معى وقد ازاددت يقينا من ذالك من حديثى مع مامور السجن فى اوائل ايامى عندما قالى لى انه سيضعنى فى الحبس الانفرادى حتى اتخلى عن افكارى, قالها هاكذا بشكل فج ,كما ان معاملتهم لى تزاد سوءا يوما بعد يوم فهم يحاولون بشتى السبل مضايقتى وارهاقى نفسيا ولا يدعونى استقر فى مكان واحد ,فخلال خمسة اشهر فقط اجبرونى على التنقل بين اربعة عنابر مختلفة دون اسباب واضحة او مقنعة حتى كدت افقد توازنى واستقرارى كما انهم يرفضون تماما نقلى للعنبر المخصص للمصنفين سياسيا ويتعمدون وضعى داخل العنابر الخاصة بالجنائيين فى الوقت الذى اصنف فيه لديهم تحت بند سياسى محكوم عليه 0

كل هذا وقعنى لان اصرخ باعلى صوتى ,مستنجدا بكل انسان حر فى هذا العالم ,يرى ان هذا ليس بمكانى واننى لا استحق ما يحدث معى ,املا فى ان اجد يدا تمتد لتساعدنى على الخروج من هذا الجحيم ,فان لم تكن هناك فرصة او املا فى اطلاق سراحة قريبا فليتم نقلى الى سجن اخر اجد فية قليلا من الراحة واقضى به ما تبقى لى من سنوات فحالتى ستزداد سوءا ان استمر وجودى فى هذا المكان ذو اليت السىء ورائحة الظلم الكريهة 0
ولا املك فى النهاية سوى ان اعير عن عميق شكرى وامتنانى لكل من ساندنى بكلمة او خطاب , فلا شىء يبعث فى قلبى البهجة والفرح سوى الرسائل البريدية التى اتلقاها من كافة انحاء المعمورة لاناس يعبرون عن تضامنهم معى وايمانهم بان هذا ليس مكانى مترجمين ذلك الى رسائل موجهة للرئيس مبارك مطالبينة باطلاق سراحى دون اى شروط ملتمسا منهم العذر لعدم مقدرتى الرد على رسائلهم متمنيا ات تصلنى المزيد من الخطابات التى تيسر لى شعور من خلالها بان الدنيا لاتزال بخير رغم كل ما اعانية فى هذا الجحيم

عبد الكريم نبيل سليمان
سجن برج العرب الاحتياطى عنبر 24 غرفة 10
مساء الثلاثاء 6\\11\\200

تفاصيل جديدة في قضية الطفلة خديجة

November 6, 2008
عم الطفلة اتكلم مع منى الشاذلي واكد ان البنت ما ماتتش من الخوف…ده قضاء وقدر بس على تداعيات حادثة اسلام الناس اتخضت
طب الكلام ده لو صحيح يبقى البلد دي نحس

خديجة ماتت من الخوف

November 3, 2008
انشالله ما عملتي الواجب يا خديجة، انشالله ما نجحتي اصلا، لو سقطتي سنة وللا اتنين ح يجرى ايه المواصلات ح تقف؟ الدويقة ح تتهد تاني؟ عبارة تانية ح تغرق؟ قطر عاشر في الصعيد ح يعمل حادثة؟ يا خديجة ما نظيف نجح يا خديجة، نجح وطلع الاول وكان شاطر في الرياضيات واكيد عمل الواجب ودخل هندسة ومن ساعة ما حل علينا والكوارث مصاحباه. وامبارح كان بيقول: والارقام ما بتكدبش، ومدام نظيفة دايما تقول: القطنة ما بتكدبش…اذن الارقام قطنة….يعني مش مهم واجب الحساب، ده قطنة
خديجة، عندها عشر سنين، مدرس النيلة الحساب قال مين اللي ما عملش الواجب، وقفت وبعدين داخت وطبت ميتة
طبت ميتة من الخوف
فيه ايه؟ ايه لازمة ام الواجب اصلا، ينعل ابو التعليم على ابو اللي المدارس على ابو الواجب على ابو اللي بدع الواجب
تاني، ايه لازمة الواجب اصلا؟ امال العيال طول اليوم بيعملوا ايه في المدارس؟ ماحدش بيعمل واجب في الدنيا غير في عالمنا العربي، يعني ايه طفل عنده كل يوم واجب؟
ده امريكا اللي اخترعت ابو غريب وجوانتانموا بيدوهم واجب مرة في الاسبوع وما بيبقاش واجب تعذيبي زي اللي عندنا دي بتبقى حاجة اقرب للابحاث، ومش بيبقى عندهم عشر سنين
عشر سنين ده المفروض يلعب
يعني ايه نفسية الطفل يتزرع فيها الخوف لدرجة انها لما ما تعملش الواجب تطب ميتة
واجب ايه ده يعني؟ ح يعمل منها اينشتاين؟
ايه الهلع ده؟ طب اطفال قانا كانوا بيدفعوا امانهم تمن تحرير وانتصار
احنا اطفالنا بيقعوا منا ليه؟
لو حكمت اقفلوا المدارس، والله اقفلوا المدارس يروحوا ورشة، على الاقل لما الميكانيكي ينفخهم ويموتهم يبقى مفهوم، اهو ميكانيكي جاهل…مش مربي اجيال
او بدل ما تهزأوا المدرسين في كادر المعلم وتمتحنوهم (انا مش فاهمة بيمتحنوهم في ايه؟ مدرس ابتدائي يعني المفروض يبقى معاه دكتوراه؟) ما تعملوا لهم اختبارات نفسية
صحيح المدرس ما ضربهاش، وصحيح ممكن البنت تكون خايفة عشان سمعت عن اسلام اللي امي عاملة لي عليه مناحة وحاطة صورته في برواز ومعلقاها وانا رايحة جاية اشوف وشه لما ح اموت انا من القهرة
بس ده معناه ان البنت مش عارفة المدرس ممكن يعمل فيها ايه؟ مش واثقة فيه، كونها تخاف انه ممكن يعمل فيها كده ده معناه انها مش حاسة بامان من ناحيته
فين المدرسين بتوعي، انا ح اروح المدرسة وادور عليهم ولو طلعوا من التدريس ح اخد عناوينهم من المدرسة…بس عشان ابوس ايديهم
فين المدرسين اللي كنا بنحس انهم اقرب الناس لينا؟
اطفاااااااااااااااال يا نااااااااااااااااااااااس اطفاااااااااااااااااااااااااااااااااااااااااااااااااااااااااااال
اطفاااااااااااااااااااااااااااااااااااال

بمناسبة الحزق الوثني: اقيلوا وزير التعليم

November 1, 2008

لا بيحترم مدرس ولا بيرحم عيل
والنتيجة….عيالنا بيموتوا

اللي بيتذل وهو صغير بيذل وهو كبير

October 29, 2008

ام زينب دايما تقول: العيل ع الحنية
التربية عمرها ما كانت ضرب
اللي بيتذل وهو طفل بيذل غيره وهو كبير وبيعيش عمره مذلول وقابل الذل
انا باسأل بالامهات بالذات، الامهات بالذات: تتعبي تسع شهور وتتعبي في الولادة وتهلكي ويطلع عينك وانت بتكبريه وتربيه وييجي واحد بعد الشقا ده كله يضربهولك ويذله ويكسر نفسه..كنتي جايباه ليه بقى؟
وللاباء: انت اكيد عايز ابنك يبقى احسن منك وللا عايز تطلع اللي طلع فيك؟
ولكل الناس: احنا حالنا مش ح ينصلح طول مافيه طفل بيتذل ويتربى على الاهانة
وبعدين بجد بقى الاباء والامهات لازم يبقوا ايجابيين ويروحوا المدرسة ويفهموا المرضى اللي بيدوا العيال واجب جنوني ان دي مش طريقة تعليم دي
كده ح يجيبوا للعيال هطل
انا فيه طفل اعرفه عنده ست سنين وفي مدرسة انترناشونال يعني فيه اكتر من كده؟ بيعلموه بطريقة الكتاب
الواد يتهجى الكلمة ويكتبها صح وبعدين يقول: طب انا مش فاهم انا كاتب الكلمة صح اهو…مث المهم اني اتعلمها؟ اكتبها عثرين مرة ليه؟ انا مث ح اعمل الواجب ده..الواجب ده مث مشوق مث مشوق!
يعني لما عيل عنده ست سنين يبقى بيفهم احسن من المدرسين ومن نظام التعليم ويسأل سؤال ماحدش يعرف يرد عليه: انا كتبت الكلمة صح، اكتبها عشرين مرة ليه؟ ماهو ده سؤال بيطرح نفسه، هو تعذيب؟
طريقة الواجب دي ممكن تخاطر بالعيل النبيه ده وتجيب له استبحس في دماغه
وفيه عيال كتير بيفشلوا في الدراسة بسبب انهم اذكى من طريقة التعليم المتخلفة بتاعتنا

وليه العيال يعملوا واجب اصلا

October 28, 2008
تحديث:
الحلقة كاملة مصطفى رفعها هنا
ما قلنا قانون الطفل لازم يتطبق باسرع وقت ممكن قالوا لنا انتوا عايزين تبوظوا العيال على اهاليهم ومدرسيهم لازم عيل يموت؟

النيلة البرنامج اهو انا مش عارفة اتلم على نفسي

مصطفى رفعه مكالمة الاب مع منى الشاذلي في العاشرة مساء، وانا والله ما عارفة قول ايه؟ والله ما عارفة اقول ايه؟ منى الشاذلي بتقول انا لو مكانك – ابوه – كنت اتجننت. والله العظيم ده لو لا قدر الله ابني والله العظيم تلاتة وباحلف بالله العظيم كمان مرة ما كان يكفيني اني امسك المدرس اقطعه بايدي وضوافري هو والناظرة ووزير التعليم

الاب بيحمل الوزارة كلها المسئولية، وبيقول ان ابنه صحته زي الفل، يعني ايه طفل ينضرب الشلوت لحد ما يموت، ايه نوع الشلوت اللي يموت بني ادم؟ الناظرة ادت الفصل اجازة وغيرت الطلبة
ومنى الشاذلي راخرة بتسأله سؤال عصبني قوي: طيب اسلام كان شقي عنيف ممكن يغيظ المدرس؟
يعني احنا بندافع عن العيال بتوع الاحداث اللي هم اصلا متاخدين في سرقة وللا تشرد وفي بقهم بشلة وبنقول ما ينفعش يتعلقوا من رجليهم
ايه اللي ممكن اي طفل في الدنيا عنده 11 سنة يعمله عشان يغيظ بني ادم كبير وعاقل؟ مين المتخلف الحيوان البهيم الحلوف اللي يتغاظ من طفل اصلا، ده طفل..طفل
ثم ليه الطفل يعمل واجب اصلا؟ ليه طفل عنده حداشر سنة يصحى من بدري يقعد في المدرسة من تمانية لتلاتة في دراسة وقرف ومدرسين مخاليل او على الاقل قرفانين من حياتهم وبعدين يروح يقعد تلات اربع ساعات برضه يعمل الواجب؟ امال كان بيعمل ايه طول النهار في المدرسة؟ امال ح يلعب امتى؟ ح يتفرج على كارتون امتى؟ ح يمارس هواياته في رياضة وللا موسيقى وللا رسم امتى؟ ح يعيش سنه امتى؟ ده طفل مش مفروض يبقى قاعد طول النهار والليل يذاكر واللعب بيعلم العيال وبينمي ذكاءهم اكتر من الواجب والدراسة
اصلا اصلا الواجب ده انتهاك لحقوق الاطفال، العيل يكتب الدرس عشر مرات؟ ليه؟ عليه ذنب؟
بنقرفه وهو لسة طفل ودي احلى سنين حياته ليه؟ مستعجلين على ايه ما بكرة يتنيل يكبر والدنيا يعني لو رحمت غيره تبقى ترحمه وح يشوف ايام سودا ودي احلى سنين عمره مش ح يشوف بعدها سنين عدلة ابدا في حياته…كان غيره شاف
مع السلامة يا اسلام يا حبيبي…ربنا انقذك، والله العظيم ربنا انقذك ده اللي يخلف في الزمن ده يبقى مخلول رسمي نظمي فهمي
الله يصبر ابوك وامك واخواتك وينتقم من الظلمة، من اول وزير التعليم واللي فوق وزير التعليم مرورا بالناظرة ولحد المدرس
احنا ايه اللي جرا لنا؟ ايه الظلم ده؟ لا راحمين ست ولا ضعيف ولا فقير ولا حتى عيل؟
يارب اديني افراج بقى والنبي وحياة حبيبك النبي يارب تديني افراج حسن سير وسلوك انا تعبت