Archive for the ‘دولا القوة ودولا العز’ Category

يوم ميلادي كان اسمه الاثنين الاسود في اسرائيل

October 11, 2008
انا اتولدت الساعة اربعة فجر يوم الاتنين 8 اكتوبر، قبل ما اتولد بساعة كان مسئول عسكري امريكي وصل اسرائيل وفي اللحظة اللي كنت باتولد فيها كان اسيادي وتاج راسي بقيادة الفريق الشاذلي وفؤاد عزيز بيدوا القوات الاسرائيلية – ومنهم شارون – علقة معتبرة:



وانا في اللفة وباقول واااااااااااااااااء كانوا بيعملوا كده:






وانا مش فاهمة ليه ما سمونيش نوارة الفردان، او نوارة القنطرة شرق، او نوارة الفشل الاسرائيلي، او نوارة يوم اسرائيل الاسود؟ واضح ان ماما وهي بتولد ما كانتش بتقرا الجرايد ولا حتى كلفت نفسها تحط الراديو جنبها وهي في اودة العمليات 😦 ليه كده بقى؟ انا ح احاسبها على الموضوع ده، وبابا كمان على فكرة واضح انه ما كانش متابع المعركة كويس مش ح يفلتوا مني هم الاتنين
بس في نفس ذات الوقت اللي اسيادنا وتاج راسنا كانوا بيعملوا كده، كان السادات بيتصل بكسينجر كما هو وارد في مذكرات الجمسي وبيقول له: ليس لدى مصر اي نية لتعميق الهجوم او الاستمرار فيه حتى لا نضرب مصالح امريكا واليابان! (ضع في الاعتبار ان قواتنا المسلحة كانت حاطة الخطة لتعميق الهجوم يعني هو بيفتي من دماغه) والجمسي نفسه بيتساءل ببراءة: طب هو ليه الزمنا بحاجة زي دي وبيطمنهم اننا مش ح نضرب مصالحهم وهو عارف انهم مساندين اسرائيل؟
ده مجرد سؤال بريء يعني الجمسي كان راجل مؤدب وما كانش غاوي شكل زي الشاذلي.
في نفس ذات الوقت المسئول العسكري الامريكي قال لهم مدام هم مش ح يعمقوا الهجوم يبقى احنا اللي نعمق الهجوم! اه وربنا
دي شهادة اسياد الناس اللي كانوا بيموتوا على الجبهة، منهم ناس ربنا اداهم افراج على الجبهة زي فرقة الصاعقة اللي تصدت لشارون وادته علقة وخلته يتراجع بدمها، وصحيح راح شهدا كتير قوي، بس شارون تراجع والهدف من المعركة تحقق وده اسمه نصر، خصوصا عندنا هنا في مصر، موشى ديان بيقول في مذكراته كما هو وارد عند الجمسي ان المصريين ما بيرحموش وما بيخافوش من الموت قال واحنا اللي كنا فاكرينهم طيبين :)) ومافيش حاجة بتوقفهم ولا تخوفهم وبيرموا نفسهم على الدبابات وفوق القنابل وانا شكلي بقى وحش قوي وجولدا مائير عمالة تهزأني
كرررررررررررررر…طب سد سد يا سكمنس…ماهو جالك بعد كده اللي خلى شكلك حلو
في اليوم اللي اتولدت فيه برضه، كان فيه معركة من الفدائيين ضد القوات الاسرائيلية اللي هجمت على بورسعيد وبررررررررررضه ادوهم علقة وفتحوا الحصون
بيقولوا كل واحد بيبقى شبه اليوم اللي بيتولد فيه، وانا اقول ياربي مالي باكره الاسرائيليين كده كأنهم ضرتي؟ اتاريني اتولدت وهم بيندبحوا زي الخرفااااان هياع هياع هياااااااااااع باسم الله الله اكبر، اصل كمان في معركة الفردان الجيش المصري مسك السكاكين ونزل فيهم دبح عشان يطهر المنطقة
وبرضه طول عمري مشاكلي كلها نابعة من الطعنة في الظهر، دايما كده اتاخد على خوانة من الناس اللي اديهم امان ويبقوا اخر ناس اتخيل انهم يخونوني ويكلموا كسنجر من ورايا ويدوله معلومات عني
هع هع هع
دي شهادة الابطال هنا……وهنا
احسن بقى ما تقعدوا تدوا ودنكوا لكل صايع طالع في التلفزيون يلت ويعجن زي نسوان الشلت وللا كل نكرة ماحدش سمع عنه قبل كده يطلع تصريحات مدفوعة الاجر
الناس اللي ضحت هي الادرى، منهم من قضى نحبه، ومنهم من عاش بالقهرة بعد ما شاف تضحياته راحت في الوبا ومنهم من مات كمدا
رحمهم الله جميعا احياء واموات
ان شاء الله استأذن العقيد اسامة علي الصادق عشان احمل مذكراته على النت لانه كان مقاتل في ارض المعركة، حتى عشان تكتمل الصورة
Advertisements

مصر: القائد الأعلى للقوات العربية

October 9, 2008

صورة من مذكرات الجمسي
مالحقناش احنا مصر في عزها ايام ما كانت القائد الأعلى للقوات العربية اللي شاركت في حرب اكتوبر على التلات جبهات: مصر – سوريا – الاردن
هي اللي حددت الجبهات دي
وهي اللي وزعت ادوار الدعم على الدول الاتية:
العراق/ السعودية/ الكويت/ ليبيا/ الجزائر/ المغرب/ السودان
وتقول يمين يبقى يمين وتقول شمال يبقى شمال وما حدش يقدر يفلفص
لحد كامب ديفيد
من ساعتها واحنا دلاديل
بنروح نزرع قطن في الكونغو هئ هئ هئ هئ
فين العز ده؟ ولا نحلم بيه دلوقت…وماحدش عايز يرحم عزيز قوم ذل

ملحوزة بس: طبعا ده كان الاتفاق لكن الجبهة الاردنية ما اتفتحتش للقتال
ههههههههههه طبعا يعني حسين بقى

تابع كل سنة وانتوا طيبين :)

October 7, 2008

اضغط على الصورة لتحميل مذكرات المشير محمد عبد الغني الجمسي رحمه الله
وطبعا كل دول غلطانين ومجانين ونافع هو اللي بيحبك نافع هو خطيبك
كل الناس عدوينك
الله يرحمه هو وابو غزالة ويطول في عمر سعد الشاذلي
عشان الناس دي على رأي المشير أحمد اسماعيل لما قال لهم:
لو انتصرنا ماحدش ح يفتكرنا ولو لا قدر الله انهزمنا ح يدوروا على كبش فدا
وح يبقى احنا واي تقصير ح يبقى من نصيبنا واي انجاز ح يبقى من نصيب حد تاني
ههههههههه هو مش عايز يفسر يعني بس مفهوم
صدق

كل ستة أكتوبر وانت طيبين

October 6, 2008

عايز تعرف مين الصانع الحقيقي لنصر اكتوبر
وكان ممكن نعمل ايه لو التزمنا بالخطة
ومين اللي اجهض تضحيات قواتنا المسلحة
اضغط على الصورة

كولومبوس ليس اول مكتشف للامريكتين لكنه اول مستعمر لها

September 10, 2008
وفي عام 1920 أشار الأمريكي ليو فينر للمرة الاولى الى ان اقوام الماندينغو من غرب افريقيا ربما يكونون قد وصلوا بقيادة ملاحين عرب الى امريكا الوسطى. وكان كتابه الضخم بمجلداته الثلاثة بعنوان افريقيا واكتشاف امريكا يعتمد على ادلة تاريخية ولغوية وزراعية وسوسيولوجية مسهبة. لكن الكتاب، باستثناءات قليلة لم يلق قبولا لدى الباحثين الغربيين الاخرين، لا عن طريق تقديم ما يناقضه، بل ربما بسبب نوع من التجاهل القائم على راي اوروبي التوجه. وكان من اقوى اتباعه في الغرب ثيودور مونود الذي كان يكتب عام 1944 وم.د.و. جيفريز الذي كان يكتب في الاعوام 1953/54. وفي عام 1958، قدم محمد حميد الله ادلة اضافية من مصادر عربية قديمة، لكن جهوده لقيت الاهمال نفسه وبعد ذلك بعامين نشر ريمون موني ملخصا مركزا للجدل باكمله. واقتطف هنا من ابحاث حميد الله ليس بالضرورة لاني اتفق مع استنتاجاته، بل اعترافا باستعماله المصادر الاولية.
يقتطف حميد الله تقريرين من كتاب الجغرافي العربي الشهير الادريسي المتوفي عام 1166، والذي كان في رعاية بلاط ملك صقلية النورماني روجر الثاني الذي حكم 1954. ويذكر احد هذين التقريرين ان السلطان المرابطي علي بن يوسف بن تاشفين الذي حكم بين عامي 1105 الى 1142، ارسل حملة اسكتشافية الى الاطلسي بقيادة ملاح اسمه رقش الاعز، لكنه هلك في البحر. ويذكر التقرير الثاني ان بعض المغامرين قد استغلوا الريح الشرقية المواتية فاقلعوا برحلة استكشافية من لشبونة الى بحر الظلمات ليجدوا ما كان فيه واين ينتهي. وقد كانوا في الواقع ثمانية اشخاص جميعهم ابناء عمومة، فابحروا غربا لاحد عشر يوما ثم توجهوا جنوبا لاثني عشر يوما اخرى حتى وصلوا الى جزيرة الماعز ثم:
“بعد ان ابحروا اثني عشر يوما اخرى، راوا جزيرة يبدو انها مسكونة وفيها حقول مزروعة. فتوجهوا نحوها ليروا ما فيها. وسرعان ما احاطت بهم قوارب، فاخذوا اسرى ونقلوا الى جزيرة فقيرة تقع على الساحل. فنزلوا هناك. ووجد البحارة هناك قوما “شقر الجلود” على اجسامهم قليل من الشعر وعلى رؤسهم شعور مسدلة. وكانوا طوال القامة ونساؤهم بالغات الحسن. ثم اخذ البحارة الى جزيرة اخرى حيث سجنوا لثلاثة ايام. وفي اليوم الرابع جاءهم رجل يتكلم العربية، يترجم كلام رئيس ذلك المكان ثم جهز اهل الجزيرة قاربا وعصبوا عيون البحارة واقلعوا معهم لايام ثلاثة حتى بلغوا احد السواحل”
ويبدو انهم قد عادوا الى صافي الواقعة في المغرب. ويضيف الادريسي ان في لشبونة شارعا اسمه “درب المغامرين”.
يعتقد حميد الله ان المكان الذي وصل اليه اولئك البحارة هو جزر الكناري؛ ويتحمل انها كانت جزر الماديرا او الازورس. ومن المدهش ان يجد البحارة هناك قوما حمر الجلود. ايحتمل ان تكون تلك الجزر قد بلغها بعض سكان امريكا الاصليين من الجهة الاخرى من المحيط؟ ثم ان وجود المترجم العربي يوحي بوجود بحث سابق عن هذه الجزر من جانب العرب.
(فيه واقعة تاريخية عربية في الامريكتين برضه ح ابقى اكتبهم في البوست اللي جاي ان شاء الله)
الدكتور عباس حمداني/ استاذ متخصص في الدراسات الفاطمية والتاريخ الثقافي والاجتماعي للاسلام في العصر الوسيط. حاضر في جامعة كراتشي والجامعة الامريكية في القاهرة وجامعة ويسكنسن – ميلووكي.
من كتاب الحضارة العربية الاسلامة في الاندلس
تحقيق سلمى خضراء الجيوسي
صفحات 415 – 416 – 417
ملحوظة اخرى: انتوا شايفين طبعا العرب بيوصفوا السكان الاصليين ازاي
كولومبوس لما راح قال: كلب واحد افضل من عشرة هنود حمر