Archive for the ‘شيل رجلك من على رقبتي يا كابتن’ Category

"انا قلت الناس اتجننت"

November 4, 2008
اصل صاحبتي جات في اجازة من الصين، حكيت لها على كام حاجة حصلت في البلد راحت ضاحكة وقالت لي: انا قلت برضه ان الناس اتجننت
الامن بيقبض على العيال بتوع القلة المندسة ليه؟
على فكرة نصيحة تاني لوجه الله، طب والله العظيم انا مواطنة صالحة وعمالة انصح الحكومة لوجه الله تعالى، المهم نصيحة لوجه الله، ما ينفعش تجوع الناس وتنقطهم وتشلهم وتذلهم وفي نفس الوقت ما تسيبهومش يبعبعوا، لازم يقولوا اللي في نفسهم والا يطقوا في وشك
لازم تعمل توازن:هل انت من النوع القماص ومش عايز حد يتكلم ويجرح مشاعرك؟ يبقى تأكل الناس وتعلمهم وتعالجهم، قوم لما تكتم نفسهم يقولوا: مش مهم الحمد لله احنا برضه عايشين كويس
هل عينك ما يملاها الا التراب وعايز تاكل قوتي يا عبد الهادي وتكوم فلوس من شقا الناس؟ يبقى سيبهم يبعبعوا ويقولوا اللي في نفسهم عشان يقولوا: بس برضه الحمد لله احنا فين ايام ما كان اللي بيتكلم بيروح ورا الشمس
انما تجوع الناس وتقبض عليهم؟ يبقى اقابلك في العرض بقى….بلاش غباوة
دي نصيحة مخلصة والله العظيم، العيال دي ما عملوش حاجة دول بيقولوا: أي، دايس على رقبتهم سيبهم يقولوا اي.
او شيل رجل من على رقبتهم بقى
Advertisements

مين اللي بيحرق بقى؟

October 4, 2008
مصانع المحلة بتتحرق. انا لو حمارة ببردعة وبناهق وقدامي البرسيم لا ممكن اصدق ابدا ان كل ده صدفة.
ولا انه اهمال، ايه اهمال دي؟ هو احنا من امتى يعني ما كناش مهملين؟ عرفنا النظام سنة كام وعدى علينا في انهي شارع؟ وكان نازل في فندق ايه؟
ما طول عمرنا مهملين وربنا ساترها معانا، ده احنا لو نظمنا بيوتنا ح تتخرب.
مين اللي بيعمل كده؟
يعني هم لو جناح من الحكومة بيعمل فوضى خلاقة منسقة مع امريكا عشان يركب على السلطة لوحده يبقى ربنا يحرقهم بجاز وسخ

ولو هم حاجة كده يعني…اممممممم ممكن يعني جناح وطني جوة الحكومة قرفان من الفساد وعايز برضه يركب على السلطة من غير ما ينسق مع امريكا، اقصد يعني وطنيين بجد. يبقوا لو كويسين ربنا يوفقهم
عموما حرق البلد حاجة وحشة والخاطر الاول يقول ان مش ممكن حد يبقى كويس يعمل كده
بس مينا نبهني ان اللي بيحرق بيتعمد ان ما يبقاش المكان فيه ناس
يعني ده حد مش عايز يعمل خسائر في الارواح، حد خايف على الناس وعايز في نفس الوقت يهز الحكومة!
المهم يعني من الاخر كده الحكومة تدور جوة نفسها وتشوف مين فيهم اللي بيعمل كده، وما اعتقدش انها ح تدور لانها فعلا خافت
احنا عن نفسنا قاعدين على الحيطة مستنيين الزيطة وعلى رأي ابن إياس لما كان بينقل صورة الشارع المصري في اثناء صراع المماليك: ولم تنتطح في ذاك شاتان. احنا عن نفسنا ناس في حالنا
انا باتكلم عن الشيعب يعني
بالنوسبة للمعارضة نو نو نو…لا يستحيل يقدروا ولا يفكروا ولا يجيلهم في المنام انهم يعملوا حاجة زي دي
ببساطة عشان بيخافوا، دول جالهم هسهس وماشيين يبصوا وراهم
اللي بيعمل كده حد واصل ومش خايف، بس والنبي يا رب، وحياة حبيبك النبي يارب، ما يبقاش متسقط من امريكا على راسنا، والنبي يارب اجبر بخاطرنا ده احنا غلابة
ياللا ياخبر بفلوس بكرة يبقى ببلاش

waiting for bin ladeno

September 4, 2008
بس المسرحية دي بقى مش بتاعة بيكيت، دي بتاعة اوباما – ماكين براذرز
اوباما في خطابه يقول: والجمهوريين ما قبضوش على اسامة بن لادن، وماكين يقول: لو نجحت ح اقبض على اسامة بن لادن
طيب نجيب لهم اسامة بن لادن ويحلوا عنا عسكريا وسياسيا واقتصاديا يعني وللا ايه؟ يعني اصلا هو مستعد يسلم نفسه لو ح يرحمونا
لا وايه، المرة اللي مش عارفة تلم بنتها وكل شوية راجعة لها حامل بتقول ايه؟
بينما أكد المرشح الجمهوري جون ماكين أنه “يملك وصفة” القبض على زعيم تنظيم القاعدة أسامة بن لادن، اعتبرت مرشحته لمنصب نائب الرئيس سارة بالين، أن الحرب على العراق “تكليف من الرب”.
اللهم قوي ايمانك يا حاجة بالين، انت وجوزك اللي دفع رشوة، واختك اللي استغليتي سلطاتك عشان ترفدي طليقها من الشرطة

وقالت بالين في أحد مقاطع الفيديو لكلمة لها بثت على الإنترنت، أمس الأربعاء 3-9-2008: “صلوا من أجل جنودنا الذين ينشدون فعل ما هو صحيح لهذا البلد.. قيادتنا الوطنية أرسلتهم في تكليف من قبل الرب”.

ما تشغليش بالك انت يا اوختشي، صلي انت بس لبنتك ربنا ينتعها بالسلامة ويجبر خاطرها بواد ويستر على ولايانا، والواد اللي على كتفها ابنها او ابنك مش ح تفرق كتير، ولو اني يا اوختشي مش عارفة واحدة في سنك لسة ليها في الخلف؟
آآآآه معجزة الرب طبعا يا حاجة الياصبات
اللهم اجعلنا من بركاتك
—–
محروقة:
انا لو صرفت 21 قرش على صرصار مش ح يهون عليا ادوسه بالشبشب
صرف 21 مليون عليها وموتها؟
طب لما الحكاية سهلة كده امال سايبينا ليه؟
اخي رجل الاعمال، اختي رجلة الاعمالة
تبرعوا الى اخوتهم المواطنين بواحد وعشرين مليون جنيه ودبحة ينبكوا فيهم ثواب عشان تخلصوهم من عيشتهم قبل ما يكفروا واهو يموتوا شهدا ويدخلوا الجنة ولكم الاجر والثواب عند الله
وحدوووووووووووووووووووووووووووووووه