Archive for the ‘ما تغوروا في داهية بقى’ Category

وح يجرا ايه لو الاخوان جم؟

November 4, 2008
انا موضوع الاستنخابات الامريكاني ده كايدني قوي، انا وغيري مهتمين بيه كأننا بنتابع ماتش تنيس
طب واحنا؟ امتى ح ننزل نلعب الماتش بتاعنا؟ انا باقابل ناس من اللي بيقولوا على نفسهم معارضة بيقولوا لي انا في وشي، على رأي زكية زكريا، انا كأنثى بيقولوا لي في خبط لزق: لا برضه احنا مش مستعدين دلوقت لان لو فيه انتخابات الاخوان ح ييجوا؟
يا سبحان الله
طب ح يجرا ايه لما الاخوان ييجوا؟
ماهو لو الاخوان جم فيه احتمالين، الاحتمال الاول انهم يطلعوا كويسين يبقى خير وبركة احنا نكره؟ والاحتمال التاني انهم يطلعوا وحشين ويبقى الناس عرفتهم زي ما بيقولوا بالعنجليزي
once and for all
ومش ح ينتخبوهم تاني، صعبة دي؟
– لا ماهم لو مسكوا في السلاطة مش ح يسيبوها
آه..الكلام ده لو جايين بانقلاب، ماهو اللي بييجي بانقلاب بيفضل ماسك في الحكم 56 سنة وما فوقها وما يسيبهاش ولا على جثته، لانه قبل ما جثته تنزل القبر بيبقى سايب لنا جثة تانية خلفا ليه، وجثة تسلم جثة لما عفنا
لكن اللي بييجي باستنخابات يا الناس بتجيبه تاني يا مش بتجيبه تاني…عادي جدا زي شكة الدبوس
وحتى يمكن الحزب الوطني ينجح يا قناوي يابني وساعتها ما حدش يقدر يكلمكوا ولا ييجي ناحيتكوا وكدهون يعني
ليه يا قناوي يابني خايف من الناس ومصمصم تقول انا حزن الاغلبية ومناخيرك بقت سبعة متر من كتر الكدب؟
ما تجرب يمكن تنجح
وولاد التيت اللي بيقولوا على نفسهم معارضة وهم مش عايزين انتخابات عشان عارفين ان الناس ح تختار الاخوان دول يتقال عليهم ايه؟
وبعدين بقى انتوا ح تنجزوا في ليلتكوا وللا ح تستنوا لحد ما حد يعمل سبرنت على الكرسي وناخد لنا 56 سنة تانيين في وشنا؟
الا بيقولوا التاريخ بيعيد نفسه، طيب الاخ تاريخ ماسك في ام الحتة الوسخة دي وعمال يعيد فيها زي الاسطوانة المشروخة ليه؟ ما يقلب الشريط من فضلك اقلب الشريييييييييييط اقلب
انا داخلة اتخمد، لما زفت الطين ينجح ابقوا ابعتوا لي رسالة ع الموبايل
Advertisements

خاطر سريع بخصوص تبديل الزوجات

October 29, 2008
دلوقت حالا مصطفى باعت لي ع الجايكو بيقول لي ان الشرطة زقت على المتهم بتبادل الزوجات واحد مخبر وسجل له
!!!!!!!!!!!!!!!!!
ايه شغل كولومبو ده؟ من امتى يعني الشرطة بتاعتنا نوسة لوزة تختخ عاطف محب؟ ما اي قضية بيجيبوا اي واحد في سكتهم وينزلوا فيه ضرب لحد ما يعترف بكل الجرائم من اول قتل قابيل لهابيل، من امتى النباهة دي؟
خاطر سريع: المتهم عك مع مرات مين مهم او واصل؟
مش ح يعملوا له الفضايح دي وينزلوا صورته واسمه والخطط دي كلها الا اذا كان فيه سر، لسة امبارح عارفة من واحد صاحبي ان طريق المطار بيحصل فيه كللللللللللللللللل حاجة والشرطة بتشوف وتنطش ماهماش يعني حماة حمى الاخلاق ولا حاجة
يبقى الراجل ده عمل عملة مع مرات واحد ما ومتغاظ منه
———-
ما علينا
انا من امبارح بتجيلي كوابيس
نظيف بوزارته كلها لازم يستقيلوا
خلاص بلغ السيل الزبى…ما ينفعش…ما ينفعش ما توصلش لقتل العيال في المدارس
عايزين نشد حيلنا في الموضوع ده…نظيف بوزارته كللللللللللها لازم يغوروا

منى زكي كيك ومدحت العدل اجدع ناس

October 25, 2008
انا لو مكان المخرج والمؤلف اطين عيشة منى زكي دي؟ هي مالها تخرج عن النص وتستهبل وتفتي من دماغها؟
الاوبريت انا ما حضرتوش من الاول بس لقيت ماما بتنادي عليا وبتقول لي تعالي ده اوبريت غريب قوي الاول كنت متضايقة منهم وبعدين لقيتهم جايبين فرعون مصر وهو عمال يقول الشعب هو اللي له الفضل ولما واحدة تملقته زعق لها وقال لها الفضل للشعب فقلت تيجي تشوفي
المهم الاوبريت بيتكلم عن معارك مصر
طبعا وبما اننا بنحتفل ببونابارت فعدى على بونابارت بجملة سريعة انه حبيب الخونة!
المهم كل فقرة في الاوبريت فيها معنى معين عايز يوصله بذكاء شديد جدا، وكل فقرة بتحمل معنى ان الاولوية للشعب والحكم للشعب والجيش يبقى من الشعب

وراح داخل على ثورة 52 واتكلم عن العدالة الاجتماعية وعن الزراعة والصناعة وبرضه طول الاوبريت ما بيمجدش الزعيم بالعكس
ملحوظة سريعة: الجمهور من الجيش وكان بيصقف في مواضع ذات مغزى مما يطمئن الواحد وما حدش يغلط في الجيش انا باحبه
😦
ملحوسة تانية ماما سوزان كان متضايقة قوي قوي قويييييييييييييييي
وفيه حتت الناس كانت بتصقف فيها وهي كانت مش بتصقف وبتتلوي
المهم برضه لما اتكلم عن نصر 73 اتكلم عن ضغط الجبهة الداخلية وعن مظاهرات الطلبة وعن سنة الحسم وجاب السادات وهو بيقول الضباب هو السبب في تأجيل المعركة راح الجيش مصقف جامد قوي
🙂
وحسني ضحك…بس الشهادة لله برررررضه سوزان اتلوت مش عارفة ليه؟
المهم والاوبريت ماشي زي الفل وحاجة ميت فل وسبعتاشر وانا كنت مبسوطة بصراحة لدرجة ان ماما قالت لي دي عاملة زي مسرحية هاملت لما اعادوا تمثيل واحد بيقتل اخوه قدام الملك
واذ بينا نفوجأ بالست منى هانم زكي بتخرج عن النص وهي بتكلم كريم عبد العزيز بتقول له: انت كافحت كتير (المفروض ان كريم ده رمز للمواطن المصري)
وراحت ملفوتة وقالت: ومصر عمار بيك ياريس وبجد الكلام ده مش مكتوب بس والله مصر عمار بيك يا ريس
انت مالك انت يا ست منى ايش دخلك في اللي ما تفهميش فيه؟ انت واحدة شغلتك يحفظوكي كلمتين وتقوليهم وبس
نكدت عليا
والله انا لو من مدحت العدل ما اشغلها معايا تاني ابدا واسود عيشتها على العملة السودا دي
المهم بقى بقية الحوار اللي كاتبهولها مدحت العدل بيقول فيه احنا انتصرنا بس لسة عايزين حاجات كتير
وبيختم الاوبريت بـ: عايزين حريات اكتر مش هامش حريات، عايزين التعليم يبقى حق لكل الناس مش للاغنيا بس، عايزين نزرع اللي بناكله عيب علينا نستورد قمحنا (ملحوظة الغنوة فيها عيب علينا) عايزين واحد مننا يحس بمشاكلنا! وانتوا كمان يا رجال الاعمال شوفوا طلعت حرب عمل ايه للناس وزي ما البلد دي ادتكوا لها حقوق عليكوا
!!!!!!!!!!!!
وش كده
وفجأة حسني اتقلب…كان قاعد بيضحك ومبسوط لحد الكلمتين دول ما اتقالوا، طبعا هو المغزى وصل لماما سوزان اسرع مما وصل لحسني لانكوا عارفين يعني كل واحد على قد فهمه، هو كان قاعد في الاول حيران مش عارف يزعل وللا يفرح، سوزان زعلانة زعلانة حيث انها اسرع منه شوية، بس الشوية اللي في الاخر دول كان صعب يتجاوز عنهم
طيب ليه يا زفتة الطين تبوظي الطبخة على شوية ملح…اهو الناس سابوا كل حاجة ومسكوا في القرف اللي طرشتيه من بقك ومن دماغك انت مالك تتكلمي من دماغك
والنبي انا نفسي مدحت العدل يرفع عليها قضية

يا ضنايا يا ابني…انت متهرش؟ نهى رشدي مفترية بصحيح

October 24, 2008
صباح الخير، معلش انتوا عارفين بعد لفة ع الريدر بيبقى شكلي كدهو
المهم بعد اللفة لقيت ان المدونين اليومين دول اغلبهم مالهمش سيرة الا نهى رشدي، معظم الناس فرحانة بيها، وفيه كام مدون قرر انه يصعب عليه شريف اللي اخد تلات سنين ويوجد له اعذار ومبررات، وح نعتبرها مصادفة انهم رجالة
بادئ ذي بدء احب اوضح اني عارفة كويس اعذار ومبررات شريف والاسباب اللي دفعته وبتدفع غيره لجريمة التحرش او اسمها القانوني هتك العرض يا مصريين يا بتوع الشرف واحلى من الشرف مافيش يا آه يا آه
واعذاره لا ليها دعوة بالكبت الجنسي، ولا بلبس الستات
ثانيا انا فعلا صعبان عليا شريف وغير شريف بسبب اعذاره ومبرراته وعشان كده فرحانة له انه اتسجن
وانا مش شايفة ان نهى انتقمت منه انا شايفة انها بتعمل لمصلحته وبتربيه عشان تعمل منه راجل حيث ان امه ما عرفتش تعمل الحكاية دي
اما بخصوص رأي بعض المدونين في ان المسألة اتقسمت كأنها صراع ما بين ستات ورجالة فالحقيقة الكلام ده مثير للغثيان فعلا
يا جدعان هو احنا ما بقاش عندنا نخوة وللا ايه؟ ده حتى شرف البنت زي عود الكبريت
افففففففففف لا مش قادرة اتكلم بطريقة ح اجوزك هنومة يا قناوي يابني اكتر من كده
طيب
طول عمر الرجالة في حوض البحر المتوسط بيعاكسوا الستات، في سوريا بيبرموا شناباتهم، واغلب الظن ان الهدف ورا كل الشنبات اللي في سوريا دي انها تتبرم للستات بس، ماهو انا شخصيا لما رحت ما لقيتلهاش اي استعمالات تانية برغم انتشارها كالنار في الهشيم، في ليبيا والمغرب بيلعبوا حواجبهم، اه والله العظيم لسة في الزمن ده حد بيلعب حواجبه، في فرنسا يعدي جنبك ويقول: ماجنيفيك، في ايطاليا يعمل لك فضيحة في وسط الشارع ويفتح زوره: سنيورة بللاااااااااااااااااااااااااااااااااااااا، في لبنان هم سايحين على روحهم على طول اول ما يشوف واحدة ست انشالله قد جدته يتحول ويفضل يسمبس ويصوصو ويتنهد ويتنحنح ويسبل ويبربش، حتى لو لسة خارج من كنيسة وللا جامع هو بيعتبر ده واجب وطني ويمكن معتقد انه بياخد ثواب، وفي مصر كانوا…كانوا..بيحبوا يبتكروا ويقولوا جمل طويل ما تلحقيش تسمعي بقيتها: هو القمر نزل م السما امتى…وانا اقول ياربي القمر راح فـ….(خلاص انتي مشيتي وهو لسة بيتكلم) ولو سايقة عربية ييجي جنبك: العجلة يا انسة العجلة..انت: مالها؟ بتنقط ثكر وعثل.. الا انت بتمليها في انهي منحل وللا…(الاشارة فتحت وانت مشيتي وبرضه هو لسة بيتكلم) احنا شعب رغاي بطبعنا.
لكن لما واحد يمسك ست من صدرها ويسحلها على الارض ده اسمه معاكسة؟ ده له اي علاقة بالجنس من قريب او من بعيد وللا ده واحد عايز يذل واحدة؟
لما ميت واحد يجروا ورا واحدة ويهبشوا فيها لحد ما يقلعوها هدومها ويقعدوا يضحكوا ويسيبوها ويجروا ورا واحدة تانية
ده شبه ايه؟ ده شبه اي حاجة لها علاقة بالكبت الجنسي؟ وللا ده عامل زي الماتشات الرومانية ما بين الاسد والعبد؟ او شبه عملية سحل هيباتيا عالمة الرياضيات، ماحدش يقول لي ان الناس اللي سلخت جلد هيباتيا وسحلتها في شوارع اسكندرية كانت بتتحرش بيها، ولا حد شرح جسمها بالاصداف عشان هي مزة وانما عشان هي عالمة رياضيات وفلك وهم كانوا شايفينها ساحرة شريرة
لما واحدة تبقى ماشية، وراجل ماشي وراها يقول لها: يا شـ*** كـ*** أمك ويروح تافف عليها
ده له اي علاقة من قريب او بعيد بالجنس؟ معلش اسمحوا لي لو اي راجل في الدنيا دي فاهم ان ده الجنس فورا يتوجه إلى معالج نفسي عشان يحطه في اقرب مصحة يمكن يعرف يلحقه قبل ما يتجوز ويتورط في جريمة
اذن دي جريمة عنف، بس مش عنف عادي، ده عنف مصحوب بالرغبة في كسر العين والاذلال، بالظبط زي جريمة اسلام نبيه في حق عماد الكبير، ماحدش توقع ابدا ان اسلام نبيه كان معجب بعماد ومش طايله مثلا! ولا انه شاذ جنسيا، كلنا كنا عارفين ان اسلام نبيه كان بيقهر عماد وعايز يذله ويكسر نفسه
ليه بقى؟ دي قصة تانية بخصوص اسلام انا ما اعرفوش ولا اعرف تاريخه النفسي ولا اللي مر بيه في طفولته
لكن اللي اعرفه كويس، ان شريف، والشباب اللي زي شريف منين ما يمشوا بيتوقفوا في لجنة وبيتقال لهم من احقر امين شرطة: بطاقتك يالا…شمر وريني دراعاتك…انت بتبجح يا لا؟ بتبجح يا…امك يا ابن الـ… يا …..؟ (كل الالفاظ اللي هو بيقولها بدوره في عملية التحرش)
وزي ما تيجي تيجي بقى، شلوت…قفا…بونية (كلها حاجات شبه اللي هو بيعمله في التحرش الجنسي)
وشريف واللي زي شريف بيبقوا واقفين زي القطط السيامي، لا القطط السيامي شقية، ولا زي اي قطة في الدنيا القطة بتخربش، حتى الفار اهو بيقرقض، مش عارفة بيبقوا عاملين زي ايه؟ بيبقوا عاملين زي ولا حاجة، زي خرقة مالهاش كرامة ولا احساس
هو بيبقى واقف زي الخرقة، بس هو مش خرقة، هو انسان وله كرامة واحساس، والذل اللي بيشربه ليل نهار بيتغرس جواه ومش بيقدر يتعايش معاه لان الانسان كريم ولازم يفضل كريم عشان يعرف يعيش
طاقة الذل اللي بيشيلها فوق قدرته على الاحتمال
قوم بدل ما يقف زي الراجل، زي الراجل، ويقول للي بيذله ما تعملش معايا كده، مش ح اقول بقى يروح يشتكي ويعمل زي ما عماد الكبير عمل، لان الناس ح تقول لي ده راجل مستواه التعليمي ما يأهلوش انه يروح يشتكي، على اساس ان عماد الكبير معاه دكتوراه في الاقتصاد الدولي من اوكسفورد يعني. بس خلينا نتحدت بالصاعيدي. هو ماشي بروح امه بمطواة وللا جنزير، بدل ما يطلعهم على الغلابة في الشارع ما يطلعها على اي حد ينتهك كرامته والارزاق على الله
يعني هم راحوا فين الصعايدة اللي كانوا بيطخوا اي كلب يمد ايده على شنباته؟ احنا كنا فاكرين ان بعد قضية عماد الكبير الناس ح تتشجع انها تطالب بحقها في الكرامة احسن من كده، بس رجع ابوك عند اخوك والناس اتعاملت مع قضية عماد على انها حالة استثنائية مش عارفة ليه؟
اممممممممممممم معذور، اصله خايف، اصله بيجري على كوم لحم، اصل الامين ح يلبسه قضية
قووووووم يمشي من قدام الامين بعد ما يتذل كل الذل اللي خلقه ربنا في الدنيا ويستضعف له اي كائن ماشي في الشارع ويفرغ فيه الذل اللي هو شافه، اضعف كائن ماشي في الشارع بعد الاطفال هم الستات
اذا ربنا وفقه وعرف يعمل حاجة في عيل (نسبة التحرش واغتصاب الاطفال زادت في الفترة الاخيرة بشدة خاصة في الصعيد! دي تقارير المركز القومي للامومة والطفولة) يبقى خير وبركة، بس ده مش متاح قوي، مش متاح انك تتحرش بعيل في الشارع وتجري والناس تضحك، لان دي حاجة، لحد دلوقت، ما بتضحكش، وما بتصنفكش على انك دكر هايج، وماحدش لحد دلوقت لقى لها تبريرات، ولا حد يعرف يرمي اللوم على العيل بوصفه هو اللي اثارك، ثم ان هتك عرض الاطفال ح يعمل لك سمعة انك بتاع عيال، ودي سمعة وحشة، لكن هتك عرض الستات ح يعمل سمعة انك هايج، لا مؤاخذة، ودي سمعة يتمناها اي راجل مصري، خصوصا لو ما كانش هايج ولا حاجة
نصيحة لوجه الله: والنبي اللي بيرغي ويحاول يأكد في حاجة كتير بيبقى باين لاي عيلة عندها خمس سنين انها مش فيه فبلاش تخلي شكلك وحش يعني
اذن التحرش بالنساء في الشارع جريمة عنف تنفيسية مرتبطة بالقهر ومالهاش علاقة بالجنس
طيب موضوع اللبس عشان نخلص منه ولاخر مرة:
لو بنت مش لابسة حجاب (حتى لو لابسة جلابية بلدي) يتقال لها مش شايفة اللي انت لابساه؟
لو محجبة يتقال لها: ده حجاب ده؟ بس لمجرد انها لابسة الوان لايقة على بعض
لو منقبة تبقى حاجة من الاتنين: يا اما راجل متخفي وعايز يسرق كل الناس اللي ماشية في الشارع يا اما على رأي مينا: يقولوا عليها دي مشيها بطال ومتخفية ورا النقاب
وعليه فكل انواع الملابس مستحلة في الشارع المصري
لانه تااااااااااااااااااني الموضوع مالوش علاقة بالجنس خالص، هو بيحاول يلاقي مبرر، وبما ان الست دايما مدانة، ده اساسي يعني في كل حاجة، في بيتها: ماهو انت مقصرة في البيت عشان بتشتغلي، لو مش بتشتغل ما انت عمالة تتخني وجالك تخلف من القعدة في البيت
مع جوزها: ماهو بص برة عشان انت مش واخدة بالك من نفسك..أو..انت قاعدة ليل نهار قدام المراية وعند الكوافير؟ فين اهتمامك ببيتك وولادك يا هانم؟
في الشارع: ما تشوفي انت لابسة ايه ( في كل الاحوال احنا عايزينكوا والنبي تلفوا على دواليبنا وتقولوا لنا بالظبط انتوا عايزينا نلبس ايه عشان نخلص)
في الشغل: ماهو انت عشان البيت والعيال مقصرة في شغلك…انتوا مالكوا ومال الشغل
ولو شاطرة: ما انتوا السبب في بطالة الشباب عشان بتشتغلوا وواخدين مكانهم
المهم احنا غلطانين وخلاص
صح، احنا غلطانين فعلا، احنا غلطانين عشان مش بنعرف نربي رجالة يتحملوا المسئولية ويواجهوا بدل ما يستوطوا لهم حيطة عشان يميلوا عليها
اللي عنده مشكلة بطالة، يا اما هو مش عايز يشتغل (وده احتمال ضعيف) يا اما الحكومة مش عايزة تشغله وتبقى مشكلته مع الحكومة، لو راجل يواجه الحكومة او يتلط ويسكت
اللي بيتذل ويقبل الذل من غير ما يدور على حقه من اللي ظلمه ويتجدعن كده زي الشباب الجدعان (القليلين) اللي بيواجهوا الحكومة، واللي بالمناسبة برضه مش عارفين يتجوزوا، واللي بالمناسبة ولا واحد فيهم بيتحرش باي حد، واللي بالمناسبة هم اللي بيعملوا حملات ضد التحرش
اللي مش زيهم يروح يندفن بدل ما يفرغ غلبه في اعراض الناس في الشارع
مين قال ان نهى رشدي انتصرت للستات؟
بالعكس…دي احرجتنا كلنا، عشان هي الوحيدة اللي قامت بواجبها
اه، ماهو بما اننا كلنا غلطانين دايما، وبما ان بعض المدونين مصممين يصوروه على انه صراع بين الرجالة والستات ولا كأن دي اعراض ناس، ولا كأن ان اللي في الشارع دي لها اب وللا اخ وللا مالهاش ده كله لها رب، فبص يا كابتن انت وهو، احنا ربنا خلقنا في الدنيا دي عشان نربيكوا، مين اللي رباك يا بابا؟ ماما مش كده؟ طيب
اللي الست الوالدة عرفت تربيه وتطلعه راجل محترم، كتر خيرها كفتنا مجهود اننا نربيهولها
اللي تغلط فينا فعلينا اننا نصلح غلطتها ونربي لها ابنها اللي ناقص تربية، ونعلمه ازاي يبقى راجل
وسيبنا بقى من جمعية المرأة المتوحشة وخلينا في التراث المصري: ابنك على ما تربيه وجوزك على ما تعوديه والظاهر اننا مضطرين كمان نربي ونعود اللي ماشيين في الشارع حيث ان الستات هم اللي مقصرين في التربية
مش الستات دايما غلطانين والرجالة معذورين؟
مش الست شغلتها تربي العيال؟
ماشي يا قناوي يابني….يبقى احنا ربنا خلقنا عشان اللي امه ما علمتوش الصح من الغلط احنا نعلمهوله بما انه متبرمج على انه ما يتعلموش غير من واحدة ست، اذا ما كانتش امه يبقى اي واحدة بقى.
كخ..كخ يا بابا…عيب يا ولد
اذا كان فيه ناس معتبرين ان نهى رشدي قاسية، وناس تانية معتبرة انها: لولا انها متعلمة ومن فئة اجتماعية معينة ما كانتش عرفت تحبسه

طيب تعالوا بقى نشوف اللي مش متعلمة ومش من فئة اجتماعية معينة بتعمل ايه؟ واحدة اعرفها كانت راكبة اتوبيس (هي بنت بلد وتعليمها على قدها وبتشتغل وشقيانة)، راح واحد وقف وراها، الناس كانت شايفة وماحدش اتكلم على اساس انها اكيد مبسوطة مثلا! قامت البنت سابته يخلص عشان ما تضايقهوش (قلب الام بقى)، وبما انها محجبة ولابسة عباية، راحت بحركة سريعة شادة دبوس الطرحة من راسها في نفس الوقت اللي التفت له فيه وراحت….احم…شغل خيالك…بس خيال يكون شبه جلادياتور او بريف هارت او لقاء مع مصاص دماء.
المهم يعني دي كانت اخر مرة بالنوسبة لهذوها الصخص، وبما انه كان محروم من الجواز غصب عنه يا قلب امه، فهي قررت انه يبقى محروم من الجواز بخاطره عشان ما يحزنش على روحه تاني (قلب الام بقى)
الغريب ان البنت بتقول لي انه طول ما كان واقف وراها ماحدش اتدخل واول ما اعملت الدبوس اعمالا الاتوبيس كله اتدخل عشان يخلصه من ايدها، بس هم مين، البت تقريبا وزنها اربعين كيلو بس الغل اداها قوة خمسين حصان
ها؟
عموما هو معروف ان الامهات من بنات البلد تربيتهم بتبقى شديدة شوية عن تربية الامهات من البنات اللي من “طبقة معينة”
وبما ان نسبة لا بأس بها من الذكور في مصر لسة بيحملوا التكوين النفسي الطفولي: والله مش انا ده هو يا ميث…ماهو اللي زقني الاول يا ميث عشان كده خزقت له عينه….مش قثدي…عااااااا
اذن فما حدش بيكبر على امه بقى….والام اللي بتربي مش اللي بتخلف
لو تخيلنا طابور طويل كل واحد بيضرب اللي قدامه بالقفا، لو واحد في نص الطابور بدل ما يضرب اللي قدامه التفت وضرب اللي ضربه اتجاه الضرب ح يتغير
وللا ايه؟

ولا هو عايز يشوف خلقكوا

October 21, 2008
من جمالكوا يعني؟ ده حتى لو جه يبقى فيه خطر عليه..اذا كنا احنا صحاب البلد وعشان عايشين معاكوا فيه خطر علينا، ثم انتوا مين يا جرابيع عشان تنولوا الشرف ده والله لو عملتوها ولبى دعوتكوا ازعل منه
جتكوا القرف خليكوا انتوا مع السفاح والاراجوز خليهم ينفعوكوا

آخر كلام بخصوص عبد الناصر والسادات عشان ما تاكلوش دماغي تاني

October 15, 2008
وكل شوية حد يبعت لي ع الميل وحد يدخل يعمل لي فيها فرويد ويقرفني في عيشتي خلينا الاول نتفق على بعض الحقائق الغير قابلة للتشكيك ووحياة النبي ماحد يدخل يقول لي غير قابلة للتشكيك ازاي انت فاكرة نفسك بتملكي الحقيقة المطلقة؟ طب انا باشكك بقى:
1- عبد الناصر والسادات ماتوا
حد يقدر يشكك في الموضوع ده؟ متهيالي لا…يعني ايه؟ يعني عبد الناصر والسادات بشخوصهم ذات نفسيتها ماتوا، وهم لا يعنوني كأشخاص دلوقت.
هل عبد الناصر كان صناعة امريكية زي ما الناس اللي بتكرهه بتقول؟ هل ضحكوا عليه وعملوه بطل من ورق وهو عبيط وكان فاكر انه بيضحك عليهم وقبل ما تقوم الثورة كان منسق معاهم عشان ينط ع الكرسي وبعدين استفادوا من وجوده وخلوه يتهزم؟
ده كلام ما ينفعش يتوجه لواحد ميت…لانه ميت، لا هيكل ولا منى ولا خالد يقدروا يردوا على الكلام ده، جمال عبد الناصر هو الوحيد اللي يقدر يرد على الكلام ده وهو مش موجود، مات، بشخصه الله يرحمه ويرحم اموات الناس جميعا.
هل السادات كان جاسوس امريكي مخترق للضباط الاحرار ونقل على الامريكان بعد هزيمة الالمان اللي هو كان عميل ليهم؟ هل صحيح كان بيسرب لامريكا كل الاخبار السرية لمصر؟ هل صحيح تعمد انه يقول الاسرار الحربية في الخطب بتاعته (ملحوظة من المؤكد تاريخيا انه قال اسرار حربية في الخطب بس ليه هي دي اللي مختلف عليها) لانه كان جاسوس وعميل بيقبض؟
لا رقية ولا كاميليا ولا طلعت ولا انيس منصور يعرفوا يردوا على الكلام ده، انور السادات الوحيد اللي من حقه يرد على الاتهامات دي بالنفي او الايجاب ولو بالنفي من حقه يفندها، وهو مات، الله يرحمه بشخصه..تاني بشخصه ويرحم اموات الناس جميعا.
في هذا الشأن تبقى حقيقة واحدة، ان التهم دي كانت مطروحة في حياة كل من الرئيسين، وان الناس ما قدرتش تقول التهم دي في حياة اي حد فيهم لانهم الاتنين كانوا بيحبسوا الناس.
ييجي واحد يقول لي طب ما حسني مبارك بيحبس الناس. آه حسني مبارك بيحبس الناس صحيح، وبيحبس الناس كمان من غير احكام، يعني مش مختشي زي عبد الناصر والسادات اللي كانوا برضه الخشا بيخليهم يفبركوا قضايا عشان يبرروا هم حابسين الناس ليه. لكن ده بيحبس بموجب قانون الطوارئ
لكن، برضه احنا نقدر نقول لحسني اللي عمرنا ما كنا نقدر نقوله لعبد الناصر ولا السادات. وده يمكن له علاقة بطبيعة الشخصية، يمكن عشان عبد الناصر والسادات كانوا برج الجدي وخلقهم ضيق ومش عايزين دوشة ولا رغي كتير، عايزين هم بس اللي يتكلموا. بينما حسني برج الثور يعني اعصابه هادية وما بيهموش الرغي واستفزازه صعب وهو نفسه مش عايز يتكلم يعني ولا يقول حاجة لحد ولما بيحبس بيبقى مش عشان هو زعلان على روحه ومقموص زي عبد الناصر والسادات، هو بيحبس لانه عارف هو بيعمل ايه، مش بيفقد اعصابه يعني، عشان كده سايبنا نقول كل الاتهامات، زي الاتهامات الخاصة باول طلعة جوية واسباب اختيار السادات له بينما تجاهل صناع النصر الحقيقيين وكل الكلام ده
مش بيرد؟ طيب دي استراتيجية تانية هو مش بيرد، كل برج التور مش بيردوا على اي كلام مش بيعجبهم على فكرة، ومش بيزعل. ولما بيزعل بيتصرف بطريقة تانية خالص غير طريقة ناصر والسادات.
يعني مثلا لو تخيلنا ان مشهد الدوس على الصورة اللي في المحلة ده حصل في ايام ناصر كان عبد الناصر بعد ما يقبض على كل الناس في المحلة ح يطلع بصوته الحنين اللي شبه صوت عمر الشريف ده ويقول:
فليدس عملاء الاستعمار والرجعية والاقطاع على صورتي، فليدوسوا على صورتي وليمزقوها فان ذلك شرف لي، ان جمال عبد الناصر ليس صورة فوتوغرافية، ايها الاخوة المواطنون ان جمال عبد الناصر خادم مصر وحارسها الامين، خادمها ضد الرجعية وحارسها ضد الاستعمار، انهم يدوسون على قوميتنا العربية ونهضتنا الاشتراكية فليدوسوا عليها فان نهضتنا لن تموت لن تموت لن تموت حتى وان مات جمال عبد الناصر
هييييييييييييييييييييييييييييييييييييييييييييييه تشك تشك تشك تصفيق حاد
وبلف الناس وحطهم في جيبه
وخلا حتى المقبوض عليهم ومرميين في السجن بيتعذبوا يهتفوا: يعيش جمال عبد الناصر
لو السادات اللي انداس على صورته في المحلة كان برضه قبض على كل المحلة والقرية اللي جنب المحلة وبرضه احتياطي على سمالوط والبلينة في قنا وقال كده:
الاولاد اللي داسوا على صورتي انا شخصيا…اإأآ دول ولادي…اإأآ عشان كده انا لازم اعلمهم الادب، اإأآعيب، عيب لما الولد يدوس على صورة ابوه مهما كان، اإأآ مش دي اخلاقنا، اإأآ
ولا دي قيمنا، اإأآ ولا ده اللي اتعلمناه، اإأآ احنا فلاحين، انا كنت اقدر افرمهم اإأآ ادوس عليهم زي الصراصير تحت رجلي، اإأآ بس انا اكتفيت باني اشد ودنهم، اإأآ وده واجبي، اإأآ كأب وكبير العيلة، اإأآ انما القلة المندسة اللي حرضت ولادي (ح يخبط على المنصة وبعدين يشاور بصباعه محذرا) انا لن ارحمهم دي قلة حيا..وانا ما احبش قلة الحيا…اإأآ انا عارفهم واحد واحد بالاسم اإأآ وعارف مين اللي وراهم اإأآ وما انا بظلام للعباد (ملحوظة: في احدى خطبه قال الجملة الاخير نصا)
بوممممممممممممممم تبليم حاد في المجلس هاهاهااااااااا عععععععععع هاع هاع وضحك حاد في البيوت
لكن ايه اللي حصل في عهد مبارك؟ زي اي واحد برج الثور سكت خالص، وبعدين ابتسم لنا ابتسامة واسعة وقال: العلاوة تلاتين في المية
وراح عامل فينا العملة اياها.
وبعد عمر طويل – معلش يا ريس كل ابن ادم الى زوال – ح ييجي ناس تحب مبارك، زي ما فيه ناس بتحب فاروق والسادات دلوقت نظرا لطبيعة الشعب المصري الطيبة وقبل ماحد يقول لي واشمعنى ما جبتيش سيرة ناصر اقول له عشان ناصر كان الناس بتحبه وهو عايش فطبيعي يحبوه بعد ما يموت انما الانجاز ان الملك والسادات كانوا مكروهين وهم عايشين وبقت تذكر محاسنهم بعد ما ماتوا كعادة اي مواطن مصري اصيل – المهم الناس بقى اللي ح تحب مبارك ح تقول ان الاتهامات اياها اتقالت في زمن الريس وهو ما ردش لانه ترفع عن صغائر الامور واللي ح ييجوا يكرهوه ح يقولوا ماردش لان ما عندوش ردود لكن يبقى ان الاتهامات دي اتوجهت له في حياة عينه على عكس ناصر والسادات.
طيب اذن الحقيقة النهائية اللي توصلنا لها من كل الرغي بتاعي ده ان ناصر والسادات كأشخاص ما يعنونيش في حاجة ولست بصدد اتهامهم كأشخاص او الدفاع عنهم كأشخاص لانهم كأشخاص كانوا احياء وما ادوش فرصة لنفسهم يردوا على الاتهامات وبعد كده ربنا ما ادناش فرصة اننا نسمع ردهم بعد ما اخدهم.
2- السادات وعبد الناصر كانوا صحاب وحبايب:
وكل مجلس قيادة الثورة، ما كانوش مجلس قيادة الثورة، دول كانوا شلة اصحاب واكلين شاربين مسافرين قاعدين قايمين مع بعض، كل واحد فيهم ما سماش ولاده على اسامي اخواته او على اسم ابوه، كل واحد فيهم سمى ولاده على اسماء صحابه. حتى الواقعة الشهيرة بتاعة عبد الحكيم لما دخل بعد الهزيمة وكانوا عاملين اجتماع وكل واحد فيهم هزأ عبد الحكيم واول ما السادات اتكلم راح عبد الحكيم بص لناصر وقال له: ايه ده يا جمال؟ ما بقاش الا الرقاص الاراجوز ابن الـ…. الـ….. ده اللي يكلمني(ملحوظة انا كاتبة نقط لانها مكتوبة في الكتب نقط لو كنت اعرف الالفاظ كنت كتبتها عادي انتوا عارفيني)، راح ناصر بص للسادات وقال له بنبرة هادية: طب استنى يا انور شوية. راح انور استنى شوية. الحوار ده ما يعنيش ان السادات كان فيه عداوة بينه وبين ناصر وحكيم ابدا، على العكس تماما، ده حوار اصحاب واخوات بينهم عشم يسمح لواحد فيهم انه وهو قرفان يفش غله في التاني والتاني يستحمله والتالت يخلص ما بينهم وييجي على واحد عشان خاطر التاني متوتر والواحد ده يتفهم. ييجي واحد يقول لي امال قتلوا حكيم ليه، وتبتدي الخناقة ما بين الناصريين والساداتيين: على فكرة السادات هو اللي قتل حكيم، هوالمسئول عن قتله. ماشي ماشي
طيب السادات ده مسئول عن حاجات كتير بشهادة التاريخ: مسئول انه قطع تذكرة سينما وجمال سالم في الاجتماع اللي عملوه كان ح يقوم يضربه، وكمان بشهادة التاريخ ناصر حاش عنه ودافع عنه.
وبشهادة التاريخ جمال وصلاح سالم اكتر من مرة يقولوا لناصر انت مخلي الاراجوز ده ليه وبشهادة التاريخ ناصر اكتر من مرة يدافع عنه (ملحوظة: هم كانوا مسمينه الاراجوز لما بيتخانقوا معاه بس، وده لانه كان بيهزر ويغني ويقلد الممثلين واصوات الحيوانات، لما كانت النفوس بتبقى صافية ما كانوش بيقولوا اراجوز كانوا بيضحكوا ويبقوا مبسوطين).
بشهادة التاريخ حكيم اتقتل، مين المسئول ناصر بشكل مباشر؟ وللا السادات وناصر طنش عليه؟
ما نعرفش بس حكيم صاحبهم اللي ناصر سمى ابنه على اسمه اتقتل. ممكن الصحاب يقتلوا بعض. ممكن.
بس في النهاية هم صحاب. صحاب زي الاخوات. والخناقات اللي كانت بينهم كانت زي خناقات: انت اخدت القميص بتاعي؟ فين الشراب انت لابسه؟ بووووووم ويروحوا ضاربين بعض.
احنا ذنبنا ايه؟ اهو نصيبنا بقى
الحب بيبان من الافعال، اسباب الحب هي اللي ما يعرفهاش غير ربنا. عبد الناصر اكيد كان بيحب السادات، ليه؟ الله اعلم، التفسيرات بتاعة اصله كان بيضحكه، اصله كان بيقلد له الممثلين، اصله كان بيغني وصوته حلو، اصله كان دحلاب…..كل ده لا يعلمه الا الله، هو وارد، انا باحب اصحاب كتير اندال معايا عشان دمهم خفيف دي حقيقة. مش عارفة لو لا قدر الله مسكت البلد ممكن اديهم مناصب قيادية لها علاقة بالذمة زي الاصلاح الزراعي وللا لا؟ بس ربنا ما يكتبها علي ولا يحكمني على حد ولا يحكم حد عليا.
بس الثابت والمؤكد برضه تاريخيا ان السادات ما كانش له وزن سياسي في مجلس قيادة الثورة. وانه لما عبد الناصر اختاره نائب اصاب الجميع الذهول: السادات؟
كتاب عبد الناصر والحزب الطليعي السري بيؤكد مرة اخرى الحقيقة التاريخية اللي بتقول ان الحزب الطليعي السري هو اللي فضل يزن على عبد الناصر (اللي كان واضح قوي انه بيحب السادات او على الاقل بيستخف دمه او بيثق فيه او مش مدي له خوانة) عشان يجيبه نائب.
عبد الناصر اتقتل؟ الله اعلم
السادات له يد في قتل عبد الناصر؟ برضه دي تهم ما ينفعش توجه لانسان ميت
عبد الناصر كان بيموت في السادات ومخليه على قلب بتوع مجلس قيادة الثورة اللي كانوا بيحبوه كصاحب لكن شايفينه مالوش لازمة؟ ده اكيد…كل الشواهد بتقول كده
السادات بعد ما عبد الناصر مات شاط الناس اللي زنت على دماغ عبد الناصر عشان يجيبه رئيس؟ دي حقيقة
له حق وللا مالوش حق؟ دي مختلف عليها
السادات شجع في اتجاه الهجوم على عبد الناصر عشان له سياسة مختلفة عنه؟ ده اكيد
دي ندالة ما تليقش بصاحب وللا دي سياسة راجل ذكي؟ دي مختلف عليها
تبقى حقيقة تاريخية واحدة: ماحدش جاب السادات غير عبد الناصر وماحدش جاب حسني غير السادات.
الاسباب مختلف عليها.
————-
الخلاصة:
أ- ناصر والسادات كأشخاص وبيني ادمين صحاب، والسادات سمى ابنه على اسم صاحبه واعتقد ان لو ناصر كان خلف ولد كمان يمكن كان سماه انور.
ب- ناصر والسادات كأشخاص ماتوا.
ج- الناصر والسادات لم يبق منهم كأشخاص الا التراب
النتيجة: ناصر والسادات لا يعنونا في شيء دلوقت خالص
امال ايه؟
امال بقى من ناصر والسادات حاجة واحدة: ناصر الرمز والسادات الرمز
بمعنى انهم بقوا اسماء لها روابط زي ما تقول مثلا: كوباية: كوباية يعني ازاز…يعني بيتحط فيها حاجة ساقعة او حاجة سخنة يعني ممكن تتكسر…يعني احيانا تبقى بلاستيك..إلخ
دلوقت لما بتقول ناصر (سواء بتحبه او بتكرهه):
يعني الاشتراكية، يعني القومية العربية، يعني الحكم الشمولي، يعني العداء لاسرائيل وامريكا، وبرضه يعني سجن وتعذيب بس السجن والتعذيب انتهوا بانتهاء عصر عبد الناصر. وبقى الاربع حاجات الاولانية
دلوقت لما بتقول السادات (برضه سواء بتحبه او بتكرهه):
اول حاجة يعني اتفاقية كامب ديفيد، يعني اقتصاديات السوق، يعني السلام مع اسرائيل والموالاة لامريكا، يعني انتهاء ما يسمى بالقومية العربية او الوحدة العربية او اي حاجة لها علاقة بالعربية، وبرضه يعني سجن وقمع ورغي مجانيني في خطب ما لهاش لازمة انتهت برضه بانتهاء عصر السادات وبقى الاربع حاجات الاولانية
ماحدش يقول لي الهزيمة والنصر لان الهزيمة والنصر مسئولية القوات المسلحة
ولا الاولاني كان مهتم بالقوات المسلحة لحد ما حصلت الهزيمة، ولا التاني كان بيستر في اي معلومة كان بيقولها له الجيش لدرجة انهم بطلوا يقولوا له حاجة ولا اصلا محبوب من الجيش برغم كل اللي عمله عشانهم. قيادات الجيش مسئولة مسئولية كاملة عن الهزيمة وعن النصر لان رئيس الاركان كان له سلطات موازية لسلطات رئيس الجمهورية، ده حتى كان فيه حزب سري في الجيش موازي للحزب الطليعي السري في الحياة السياسية المدنية، ولا عمر حد – لا عبد الناصر ولا السادات ولا غيرهم – يتجرأ انه يمارس قمع او سلطة على الجيش عشان ما يخبطش في الحلل، الجيش ما بيهزرش وماحدش يهزر مع الاسد.
طبعا باحب الجيش بتاعنا وباقدسه كمان، والجيش على راسي من فوق. وغصب عن اي قيادة سياسية بتيجي مصر، الجيش على راسهم ما يقدروش يفتحوا بقهم معاه هم بس اخرهم يضمنوا ولاءه، يا اما بالكلام الحلو زي ناصر، يا اما بالفراتين والتوقيع زي السادات. ما اعرفش حسني بيعمل ايه عشان يضمن ولاءهم بس هم عندهم ولاء له.
حد يقول لي القرار اقول له لو سمحت بمنتهى الادب تتنيل على عينك: قرار 67 ما اخدهوش عبد الناصر، حرب الاستنزاف ضرورة حتمية فرضها الجيش على عبد الناصر، الاعداد للجيش في التلات سنين قبل ما يموت غصب عن بوزه ما يقدرش يعمل حاجة تانية.
قرار حرب تلاتة وسبعين، غصب عن بوز بوزه ما يقدرش يبمبك فيها، اصلا اصلا ده قعد طول سنة 71 يقول سنة الحسم، لدرجة ان الجيش شخط فيه: حسم ايه احنا مش مستعدين للحرب. يعني حتى قرار الحرب اللي بيحدده الجيش اولا، والضغط السياسي الداخلي ثانيا.
طيب من حيث القمع انا ضد القمع في كل اشكاله وعليه فانا ضد كل اللي حكموا مصر من ايام محمد علي. بما فيهم عباس حلمي التاني يعني.
لكن من حيث الرمزية
انا لا باحب الرأسمالية ولا اقتصاديات السوق، ولا باحب ثقافة الشحاتة المصحابة للرأسمالية ولو حد قال لي ايه اقتراحات بالنسبة للاقتصاد المصري اقول له تصحى الصبح تأمم كل رجال الاعمال وكل اللي انت خصخصته
دي وجهة نظري وانا حرة
ولا باحب الشره الرأسمالي واللي مش ح يعمل فلوس في عهدي عمره ما ح يعمل فلوس وفكرة تحفيز المواطنين انهم “يعملوا” فلوس!! وباكره الثراء والفقر اللي بتخلقهم الرأسمالية
وبالطبع، تحت اي بند وتحت اي ظرف انا ضد اي نوع من انواع التطبيع او السلام مع كيان عنصري مستعمر غاصب والموت عندي اهون ومش ح اغير رأيي ده مهما استجد في العالم من مستجدات ودماغي جزمة قديمة في الموضوع ده
ودي وجهة نظري وانا حرة
انا مؤمنة ان الثقل السياسي لاي دولة هو اللي بيعمل لها اعتبار ثقافي واقتصادي في العالم وهو ضروري بنفس قدر ضرورة وجود الدولة ذاتها. ومؤمنة ان مصر من ساعة ما انعزلت عن العالم العربي فقدت ثقلها السياسي واللي استتبعه فقدان لهيبة الدولة والاهمية الاقتصادية والتاريخية والثقافية ودي حقيقة واقعة ماحدش يقدر ينكرها، مصر مالهاش اي دور في العالم العربي دلوقت. مصر في يوم من الايام كان اسمها “القائد الاعلى للقوات العربية” واااااااااااااو عنوان يخليك تتخن لحد ما العمارة تنفجر بيك. فقدان مصر لدورها في العالم العربي بعد ما كانت تقول يمين العالم العربي وراها كورس يقول: يمييييييييييييييين تقول شمال العالم العربي وراها: شمااااااااااااااااال، فقدانها للدور ده خلاها مهمشة في العالم، ماحدش بيعمل لها حساب وبالتالي مالهاش سيادة، يعني مصر لو خبطت راسها في الحيط، لو مسكناها نسلنا عليها الشبشب ومسحنا بيها بلاط كل القارات وغسلناها في المحيط الهادي وعصرناها ونشرناها في استراليا اخرها ح تعمل ايه يعني؟ ح تقفل قناة السويس؟ طب خليها تجرب كده عشان نعجنها. عشان كده مصر تحت رحمة البنك الدولي وبيتقتل لها ناس على الحدود وما بتفتحش بقها واي حد له وزن حتى الكونغو غيرها وعشان كده بتحتفل بذكرى الاحتلال الفرنسي عليها. وبقت عاملة زي اللي بيلمع العربيات في الاشارات: كل سنة وانت طيب يا باشا. لكن في وقت ما كانت مصر القائد الاعلى للقوات العربية انجلترا بجلالة قدرها رفضت ان الجسر الجوي اللي عملته امريكا عشان تمد اسرائيل بالاسلحة يمر من عندها خوفا من زعل مصر، اللي كان يعني زعل العالم العربي، اللي كان يعني زعل دول افريقيا، اللي كان يعني قطع عيش وخراب بيت مستعجل.
وده رأيي وانا حرة فيه
بعد كل الرصة الطويلة دي اللي انا مقدما شاكرة موت لكل اللي عطل نفسه عشان يقراها
بالله عليكوا واحدة مؤمنة بان العالم العربي هو الامتداد الطبيعي لمصر، وبتكره الرأسمالية، وبتكره اي تعاون مع اي كيان عنصري او حتى الوقوف موقف محايد من هذا الكيان، مش بس اسرائيل، اي كيان عنصري على الاطلاق ومش عايزين نفسر اكتر من كده، وبتكره الولايات المتحدة الامريكية اللي هي رمز للرأسمالية، والداعم الاول للكيان العنصري، والهادم الاول للوحدة العربية
واحدة بهاذوها المواصفات تحب انور السادات وللا تشوف فيه اي ميزة على اي اساس؟
انور السادات كان صوته حلو وبيغني، وبينام بالشراب الصوف، وبيبعت اطباق كحك وغريبة وعاشورا للجيران، وافرج عن كتب كانت ممنوعة في الستينات، وحصل نصر القوات المسلحة في عهده (تاني النصر ده انجاز القوات المسلحة زي ما الهزيمة خطأ القوات المسلحة هو ماله رئيس الدولة؟ في اي حتة في العالم هو ماله؟) ودمه خفيف وبيقلد الممثلين
كل ده ما يهمنيش لانه مات، اللي يهمني ما يرمز اليه انور السادات
الناس المؤمنة بالرأسمالية وباقتصاديات السوق، وبالسلام مع اسرائيل، وبان العرب جرب وان “تبعية مصر لامريكا القوة الاولى في العالم افضل الف مرة من قيادتها للعالم العربي المتخلف” زي ما انيس منصور بيقول، وفيها ايه لما نعمل فلوس ربنا قال خلقناكم طبقات (مع انه ما قالش كده لكن هم مصممين انه قال) وخلينا واقعيين ونرضى بالامر الواقع – بالرغم من الصهاينة ما رضيوش بامر واقع عمره خمستلاف سنة ومطلوب مننا نرضى بامر واقع عمره ستين سنة ما اعرفش ازاي – وخلينا في نفسنا والشأن الداخلي
واللي انا باعتبره ندالة ووطيان – زي التخلي عن العالم العربي اللي ساعدنا وطرد الخبراء الروس اللي ساعدونا – هم بيعتبروه سياسة وذكاء ونباهة، وده اختلاف في وجهة النظر على راسي
بس طبيعي انهم يحبوا السادات
اللي مش طبيعي انهم بيكرهوا مبارك
!!!!!!!!!!!!!!!
انا ما اقدرش اكره عبد الناصر لما يرمز اليه، الى جانب اني ما اقدرش اكره واحد علم ملايين من ابناء الفقرا وادا ملايين من العمال والفلاحين حقوق ما كانتش على بالهم
صحيح ان ضميري الانساني لا يسمح لي اني اقول بارتياح اني باحب عبد الناصر اللي برضه بيرمز للحكم الشمولي وقمع المعارضين وانشاء تنظيم سري يتجسس ع الشعب
هههههههههههه يعني طول عمرنا نعرف ان الشعب هو اللي بيعمل تنظيمات سرية من ورا الحكومة
اول مرة الحكومة تعمل تنظيم سري من ورا الشعب
بس اذا كنت ما اقدرش احبه لهذه الاسباب اللي هي جوهرية بالنسبة لي القمع مالوش اي مبرر في اعتقادي ولا يغتفر تحت اي عذر
بس كمان ما اقدرش، بعد ما مات بتمانية وتلاتين سنة اكرهه او على الاقل اشتمه لما يرمز اليه من تأميم وعدالة اجتماعية ووحدة عربية والالتزام باللاءات الثلاثة فيما يخص اسرائيل
مش ح ابقى ناصرية عمري عمري عمري ابداااااااااااااااااااااااااا بس على الاقل اقدر استهبل او اتمرقع في انتقادي لعبد الناصر وانا ضميري مرتاح
لكن تحت اي بند مافيش حاجة تشفع لانور السادات اللي انا باعتبره زعيم الحرامية لاني شايفة ان الرأسماليين كلهم حرامية من الاخر كده ولان واحد قبل انه يحط ايده في ايد واحد عنصري تحت اي ظرف انشالله يكونوا ماسكين عليه صور مخلة بالاداب انا مش براجماتية ومش ميكيافيللية وما باحترمش الفكر ده ولا باجد له مبرر، لكن هو في الاخر فكر وفيه ناس مقتنعة بيه
ومن حقي اني اروج للفكر اللي انا مقتنعة بيه بكل الطرق والكباري بالكلام وبضرب امثلة تاريخية وبالاستشهاد المنطقي وبتقديم اولويات على اخرى، زي اني شايفة ان مش من اولوياتي الهجوم على مثال عبد الناصر كمثال تاريخي بينما من اولوياتي دلوقت اني اضرب مثال بفشل التجربة الرأسمالية التطبيعية بتفنيد منهج السادات
زي ما من حق اصحاب الفكر المغاير انهم يروجوا لافكارهم بنفس الطريقة

وعشان كده انا ضد مبارك…..اللي بيحبوا السادات بقى ضد مبارك ليييييييييييييييه؟

يعني هي الحملة العربية بس اللي تف عليها الكلب يا كابتن روقا؟

October 13, 2008
ايه يا قطة؟ رايحة في وفد تحتفلي انت وساركوزي بالحملة الفرنسية على مصر؟ وتقول ان دي ارهاصات النهضة؟
واحد دخل عمل لنا مذبحة وثرنا عليه مرتين وخرج مذءوما مدحورا المخفي اسمه اللي اسمه بونابرت او بونابارته على رأي الجبرتي اللي لاعن ابوه على السبحة في عجائب الاخبار، ونزل تدبيح في الناس ودخل على الازهر بالخيل تروح لحفيده السفاح ساركوزي عشان تحتفل معاه بانهم جم دبحونا ومشيوا؟ واحنا اللي يعني بنرحب باي حد ما استحملناهوش تلات سنين على بعض وطردناه؟
ما كانتش مطبعة اللي طلعتوا تلاتينا بيها
يعني الملكة كيلو بطة البطليموسية ملكة مصر العظيمة
والحملة الفرنسية من ارهاقات النهضة
وهو بس الفتح العربي اللي تف عليه الكلب وبقى غزو وبقوا عرب اجلاف وبقوا محتلين؟
فيه دولة في الدنيا عندها تفة كرامة تحتفل بغزو عسكري عليها قعد تلات سنين والشعب فضل يقاومه لحد ما طرده بالجزم القديمة، لا وشعب ايه؟ شعب صبووووور صبوووووووووووور صبوووووووووووور وبيستحمل
تخيل لما احنا ما نستحملش الفرنسيس تلات سنين يبقوا دول كانوا عاملين ازاي؟ ومن غير ما تتخيل
اقرا تاريخ الجزائر والمغرب العربي عشان تعرف ان احقر واقذر وازبل احتلال (اذا كان فيه مفاضلة يعني ما بين الاحتلال في انه يبقى زبالة وازبل واقل زبالة) في تاريخ الانسانية هو الاحتلال الفرنسي
ومافيش في التاريخ احتلال كان اكثر عنصرية ودموية منهم
– طبعا الاحتلال الامريكي دخل المنافسة وربنا يوفقه بيحقق نتايج كويسة لحد دلوقت –
وانهم اقذر حتى من الاحتلال الروماني
وسعادته رايح يفتتح متحف هناك…طب ما احتفلتش بالاحتلال الانجليزي ليه؟ دول حتى عملوا لنا سكة حديد حديد حديد، والاحتلال الروماني كويس برضه دخل لنا القتل بالصلب، وكنا على ايامه بنزرع قمح…آه..هو احنا لاقينه دلوقت؟ كتر خيرهم، وبرضه على فكرة ليبيا كانت احتلتنا بالمناسبة يعني
وبالمرة ياريت تدور لنا على الهكسوس او الهيك صوصو وتشوفهوملنا هم فين بعد ما احمس طردهم ونحتفل برضه انهم انقذوا مصر من المجاعة في السبع العجاف بتوع يوسف، ومن انجازاتهم الحضارية انهم ادخلوا لمصر الكارتة، والله كانوا ناس امرا، واحمس ده على فكرة واد قليل الاصل، يعني يتعلم منهم الكارتة وبعدين يطردهم بيها؟ لا واطي واطي يعني، على فكرة احمس ده طلع كدبة وخدعة هو راخر زي ما طلعتوا لنا ان صلاح الدين الايوبي كدبة وخدعة، اه احمس ده واد واطي ولا كان بيحب مصر ولا حاجة ده كان طمعان في السلطة وكان انفصالي، والهكسوس كانوا كويسين والحيثيين كمان
كلهم ناس كويسة والله ولهم انجازات…مافيش حد ابن كلب غير العرب ده معروف يعني

وهو اللي ليس فوق رأسه ريشة بيبقى عنده موبايل في الزنزانة؟

September 14, 2008
ما خلاص بقى…عرفنا انه ح ياخد براءة ما تاكلوش دماغنا دي شغلانة ايه دي؟ احنا فاضيين للعب رجال الاعمال ده؟

قانونيون حول قضية مقتل سوزان تميم: موقف هشام طلعت ليس سيئا… وسؤال برلماني حول ثروته

في جديد قضية مقتل المطربة اللبنانية سوزان تميم، أفادت مصادر قانونية مصرية، أن الإنابات التي أرسلتها النيابة العامة المصرية إلى دبي وبيروت لاستيفاء المعلومات حول القضية، تحاول الوصول إلى تفاصيل جديدة حول ما تردد عن تلقي المطربة المغدورة تهديدات سابقة بالقتل.

المصادر قالت: إن النيابة العامة المصرية لم تتلق حتى الآن نتائج التحقيقات حول هذه التهديدات، مشيرة إلى أنه على الرغم من إحالة القضية على المحكمة إلا أنها لاتزال مفتوحة.
في السياق ذاته – قالت مصادر حكومية مصرية – رفضت الإفصاح عن هويتها – إن صراعات بين عدد من كبار رجال الأعمال وراء القضية وتوريط هشام طلعت فيها.
وأكدت – أن أزمة هشام طلعت اقتصادية، وتحولت إلى أزمة سياسية، بسبب ما تسببه تطلعاته الاقتصادية من ضرر لرجال أعمال آخرين.
ونوهت إلى أن أزمة «النائب» تعقدت بدخول عدد من رجال الأعمال الإماراتيين البارزين لتحجيم أعماله التي شهدت توسعات واضحة بدول الخليج خصوصا الإمارات خلال الفترة الأخيرة.
المصادر توقعت براءة هشام طلعت من تهمة التحريض على قتل سوزان تميم.. استنادا إلى أدلة وقرائن قوية قالت إنها ستظهر في الوقت المناسب.

وأفادت أن هشام طلعت تلقى مكالمة هاتفية من أحد رجال الأعمال المعروفين في مصر قال له فيها: «أتمنى لك حياة سعيدة في مكانك إلى الأبد».
وبرلمانيا تقدم النائب الاخواني سعد الحسيني بسؤال لرئيس الحكومة المصرية الدكتور أحمد نظيف ووزير الإسكان أحمد المغربي حول مصادر ثروة هشام طلعت، لافتا إلى أنه يتردد أنها تزيد على 15 مليار جنيه.

وتساءل عن الكيفية التي حصل بها رجل الأعمال البارز على تخفيض سعر 53 مليون متر مربع لمشروعات «مدينتي» و«الرحاب- 1 و2»، ومن الذي سهل له الحصول على هذه الأراضي في وقت لا يستطيع فيه الملايين من المصريين الحصول على أمتار عدة أو مقبرة في ظل الارتفاع الفاحش في أسعار الأراضي ومواد البناء؟
وأوضح الحسيني، ان الحكومة المصرية أنفقت مبالغ باهظة لمد المرافق إلى بعض هذه المشروعات في وقت تعاني فيه العديد من القرى والمدن من الاهمال وعدم الاهتمام (لا كحك بقى..مش كفاية الاسهم والقروض؟ الضرايب: مصلحة رجال الاعمال اولا…ورجال اعمال جرابيع كمان)
من جهة أخرى، قال المحامي المصري بهاء الدين أبوشقة – الذي انسحب من هيئة الدفاع عن هشام طلعت- إن الأيام المقبلة ستثبت أنه كان محقا في اعتذاره عن عدم قبول هذه القضية، مضيفا – في تصريحات صحافية: أنا «قضايا» القتل لعبتي لكن في هذه القضية تحديدا حسيت ان الكرة ستكون خارج ملعبي وأنها ستخصم من رصيدي، ولن تضيف لي، وخبرتي هي التي تؤهلني إلى التنبؤ بهذه النتيجة.

لكنه أكد أن موقف هشام طلعت في القضية «غير سيئ» إذ تشعر أن الاتهامات والأدلة «متفصلة» علشانه هو بس، والبراءة فيها تحتاج إلى مجهود ولكنها سهلة.
في سياق ذي صلة، قال مصدر أمني مسؤول في مصلحة السجون في مصر، أن هشام طلعت سجين ليس فوق رأسه ريشة، نافيا في تصريح صحافي أن يكون قد تم تركيب جهاز تكييف في زنزانته أو تخصيص غرفة لسكرتيره الخاص أو السماح له باستخدام هاتف نقال.
(آه..امال التليفون اللي جاله ده كان على محمول مأمور السجن يعني؟ وللا البقال اللي جنب السجن؟)

ثقافة الاستقالة

September 9, 2008
هو عدم وجود ثقافة الاستقالة والاقالة دي مصدرها ايه؟ هل مثلا بترجع الى ان 75 في المية من المصريين صعايدة وتبجى عيبة كابيرة جوي لمن الرادل يردع في حديته؟ ويبجى داب العار لعشيرته لمن يشيل كفنه على يده ويديب الحج عليه؟ ومن هنا ما يصحش ان المسئول اللي يتسبب في مصيبة يستقيل لانه اكده ع يطمع الصوغار فيه ويديب العار لاهله وتبجى شنباته على مرة
لحديت اليوم ومافيش مسئول واصل داب الحج على نفسه وشال استقالته (الموازية لكفنه حدانا في الصاعيد الدواني) على يده واتحمل مسئولية غلطه بخصوص اللي حصل في الدويقة
لحدت النهاردة السيد حسني مبارك وولده اللي رافع راية العيلة وشايل طاجن سته ما اقالوش اي حد
ييجي واحد يقول لي وجمال ماله يقيل ليه؟ اقول له لو سمحت بالادب كده اتلهي على عينك
ما اقالوش حد ليه؟ لان الكابير كابير والحديت الماصخ عن اقالة كبرات البلد ما يتبلاعش واصل
دي تبجى عيبة يعايرنا بيها اهل الناحية كلاتهم وده حاديت يخلي رجبتنا كيه السمسة واسط الناس يا ولد

يا عيني يا عيني يا عيني ع الولد
البلد اللي حيلتنا باظت
باااااااااااااظت
باااااااااااااااااظت
البلد اللي حيلتنا باظت
باااااااااااااظت
بااااااااااااااااااااااااظت

الله اكبر ربنا نصف الحكومة عليكوا يا كلاب

September 9, 2008
اهو، الصين مات فيها ناس في انهيارات صخرية، عشان لما اوسني دكتوري دكتوري اوسني يقول لكوا احنا مقبلين على ايام سودا، ومش احنا بس، كل الناس تصدقوه
الا ايه الموضوع ده صحيح؟
ايه حكاية كل ما نقول له حاجة يقول لنا مش احنا بس؟ يعني ايه الدروس المستفادة دلوقت من ان مشاكلنا موجودة في حتت تانية؟
نقول لهم فيه تعذيب يقولوا: مش احنا بس، دي امريكا بتعذب
نقول لهم فقر يقولوا: مش احنا بس ما افريقيا فيها فقر
نقول لهم كوارث يقولوا لنا مش احنا بس فيه تسونامي
طيب امريكا فيها تعذيب…وبس، افريقيا فيها فقر….وبس، اسيا فيها كوارث…وبس
احنا بقى ازاي عرفنا نلم كل ده عندنا في بلد واحدة لا سحر ولا شعوذة
اسم الله علينا الفرعون المصري جرادة عرف يجمع الفخر من اطرافه