Archive for the ‘مصر بتولع بينا’ Category

كريم البحيري ينقل لكم تفاصيل حريق فندق النيل بلازا

November 8, 2008
ده تاني فندق مملوك لمجموعة طلعت مصطفى يتحرق في اسبوع واحد
كريم البحيري نقل كل حاجة، مع ملحوظة انه اتصل بالنجدة عشان الحريق قام النجدة قالوا له: اتكلم ارضي يابن بلدي
اه والله العظيم انطح هنا
المهم ان كريم اتصل بيا وقعد ينقل لي تفاصيل اللي بيحصل قدامه وفين وفييييييييييييين لما قال لي انه محال للتحقيق!
يابني مش تقول من الاول؟ لا طبعا…مدام الحريق فيه عمال يبقى مش مهم التحقيق معاه المهم العمال 🙂 وكيل العمال في جمهورية مصر العربية متحول للتحقيق هنا..يستاهل ماهو فقري
الواحد يبقى وكيل رقاصة وكيل منولوجيست وكيل مطربة فيديو كليب وده رايح للعمال
Advertisements

على رأي جلال امين: ماذا حدث للمصريين

October 16, 2008
ما الازمة الاقتصادية على كل الناس زي ماهي علينا يعني، واحنا احسن من غيرنا كتير بموجب الحكمة الشهيرة اللي قالها الشاعر الشعبي: الفقر حشمة
وعادة يعني اللي في القاع مش ممكن يقع
ايه ده بقى؟ يعني ده مش اول مجنون يعمل حركات هيستيرية بالطريقة دي
قبل كده واحد رمى نفسه في النيل عشان مش عارف يجيب لبس المدرسة لعياله، واحد تاني طبخ مكرونة لعياله بالسم واكلها معاهم عشان يموتوا ويرتاحوا من الفقر، طب يا عم ما انت لاقي مكرونة احمد ربنا فيه ناس بتاكل من الزبالة، واحد تاني قتل عياله قدام مراته عشان مش لاقي يأكلهم، واحد انتحر عشان خسر فلوسه في البورصة
وده بقى اللي ولع في الاسرة كلها
ايه اللي حصل لنا احنا اتجننا وللا ايه؟ يعني ده احنا مشهورين بحمد ربنا وشكره على اي حاجة والحمد لله الذي لا يحمد على مكروه سواه وكده يعني. ايه اللي حصل لنا؟ ليه كترت ما بينا ردود الافعال الهيستيرية كده، وليه كلها منصبة في تدمير الذات بس…بس.
من كام يوم واحد صاحبي بيقول لي: احنا مجتمع يغلب عليه الشر. زعلت بصراحة ما باحبش حد يتكلم علينا كده، ثم انا شايفة الناس طيبة يعني ماحدش وحش ولا حاجة، يعني اوحش ناس في الدنيا قابلتهم في حياتي غلابة برضه، انا قابلت ناس وحشة بالتصنيف المصري بس بالتصنيف العالمي وفي السياق اللي هم فيه ماهماش ناس وحشة ولا حاجة دول غلابة، قمت كلمت مالك وقلت له احنا ناس وحشة يا مالك؟
قال لي احنا مش ناس وحشة احنا ناس طيبة بس اللي حوالينا بيخلينا ناس وحشة، قلت له بس انا مش شايفة ناس وحشة قال لي عشان ما تعاملتيش في الفلوس واكل العيش، الحاجات دي بتطلع من الناس الحاجات الوحشة غصب عنهم بس هم مش وحشين.
طب الفلوس واكل العيش تخليك تدمر اللي حواليك عشان انت تكسب، لكن ايه الاتجاه الانتحاري اللي بقى عندنا ده؟ تمشي في الشارع الناس ترمي نفسها قدام العربية، انا والله باعدي الناس في كل فرصة باقصى ما استطيع عشان من وانا صغيرة ماما قالت لي اللي ماشي على رجليه اهم من اللي راكب العربية والراجل اللي علمني السواقة قال لي لو ح تختاري انت اللي تموتي وللا اللي ماشي في الشارع موتي انت عشان تخشي الجنة احسن ما تقتلي واحد وتخشي النار :)، لا بالصلاة ع النبي انا ربنا بيوعدني بشوية ناس يعني زي الفل، ويقولوا المصريين اشرار؟ بس ان اللي واقف على الرصيف يتعمد انه يستناك لحد ما تمشي وتدوس بنزين وبعدين يروح رامي نفسه قدامك قال يعني بيعدي يبقى ده اسمه ايه؟
واحد خسر فلوس، او مش لاقي فلوس يدخل عياله مدرسة، او مش لاقي يا كل يا اخي اعمل مقلب في حد، اسرق حد، رفع حد بمطواة، انشل في الاتوبيس، اسرق، اسرررررررررق، انشالله تسرق بنك يا اخي، انشالله تقتل الراجل الغني وتاخد فلوسه، انشالله تسرق صندوق فلوس الجامع، متهيالي دي الحاجات اللي بتخطر على بال واحد ح يموت على الفلوس، مش عايز تبقى مجرم، او خايب ومش عارف تبقى مجرم، ارضى باللي قسمه ربنا زي ما احنا متعودين بقالنا سبعتلاف سنة، بلاش انصب على حد وبيع شقتك لاكتر من مالك مثلا وسافر برة البلد، انشالله تشحت في الشارع، استلف من حد واهرب بالفلوس، اقول لك، اتكل على الله واشتغل رقاصة، اقول لك ايه؟ يا اخي انشالله تتجار بمراتك يا اخي، انما تموت نفسك وعيالك ليه؟ وليه دي بقت اول حاجة تخطر على بال الناس؟

يوه! هي الحالة ايه؟ اشتغلت؟

October 15, 2008
فجأتن طلعت السادات طلع بالتصريح ده
طب واحنا نعرف منين ان نظيف عنده شقة بعشرة مليون جنيه يا سيادة النائب؟ ما تقول لنا احنا معاك يعني كلمنا زي ما بنكلمك انت بتكلم الموجليس الموأر تعمل بيه ايه؟
يحلوه؟
طب يحلوه بس الفلوس بتاعته ح تروح فين يعني؟
“اصبح التلطيش سيد الموقف”
طيب برضه كلمنا زي ما بنكلمك مالكش دعوة بيهم دول
ايه؟ هم ح يسجنوك تاني وللا ايه؟ طب قبل ما يسجنوك يا شيخ نبوس ايدك تقول لنا مين اللي بيحرق البلد امبارح مستشفى المطرية اتحرقت وبرضه مافيش خسائر في الارواح والحمد لله
ايوة يعني مين اللي بيعمل كده؟ ما تقدم لنا استجواب

حرائق حرائق حرائق

October 5, 2008
في مصنع خشب، وفي مصنع دوريتوس (مش ح تاكلوا دوريتس بالجبنة تاني) وفي مصنع ورق في اسكندرية وفي برج خطاب في المعادي وفي مصناع بلاستيك
خلاص بقى خدوا على الموضوع ده وما تركزوش قال وانا الطيبة المتفائلة اللي كنت باقول كلها اسبوع اتنين تلاتة بالكتير
تاني يوم على طول كده
هم شغالين حرايق في مصانع دوقت، طب ليه مصانع؟