Archive for the ‘مصر حزينة’ Category

بالسلامة يا مصر…اهو ده اللي صار وادي اللي كان

November 17, 2008

الظاهر مصر ح يبقى مصيرها زي مصير المدونة، تختفي في ظروف غامضة وتظهر في شكل صكوك
يعني يا مصر كنت باقول واحشاني…تقومي ترجعي محافظ؟
طب محافظ جلد وللا قماش؟ اوعي يا بت تكوني بقيتي بوك

Advertisements

اتفرجوا يا بتوع السلام..يا ملوك الطوائف

October 17, 2008

نؤسف نؤسف نؤسف يا حضرات عسر هضمي
الامن المصري هو اللي قبض على العناصر بمساعدة استخبارات صديقة
لا مؤاخذت. وبكده بقت سينا رجعت قسم لينا ومصر اليوم، مصر اليوم مصر المخبر ابو جلابية وبالطو وجرنال مخروم. انا كنت فاهمة غلط والله

الصحف الاسرائيلية بتقول انها قبضت على ناس في سيناء بمساعدة اجهزة استخباراتية صديقة! وبتقول ان العناصر دي تنتمي الى حزب الله وكانت ناوية تعمل عمليات في سيناء!
بصرف النظر عن عدم منطقية التهمة، يعني حزب الله الاقرب يعمل عمليات في فلسطين ايه اللي يسفره سيناء عشان يعمل فيها عمليات؟
مش ده المهم ولا ده اللي ازعجني في الخبر
اللي ازعجني ان سينا اللي رجعت كاملة لينا ومصر اليووووووووووم تشك تشك تشك تشك مصر اليوم في عيد هياااااااا مصر اليوم في عيد ..الله…مصر اليوم في عييييييييييييييييييييييييييييييييييييييييييييييييييييييييييييييد
سينا دهين بقى بتتحرك فيها اجهزة استخبارات دول “صديقة” و”مجاورة” واسم الله على مقامها بتقبض على ناس وتعتقل ناس وتحقق مع ناس واحنا كومودينو في القعدة
يعني بفرض ان دي خلية ارهابية من حزب الله الارهابي الشيعي الشيوعي الشائعي الوحش
المفروض مين اللي يتعقبه ومين اللي يقبض عليه ومين اللي يحقق معاه؟
مش احنا برضه؟ مش دي ارضنا اللي رجعت لنا؟ مش المفروض انها رجعت لنا وبقت بتاعتنا؟ وللا دي منطقة محايدة اي حد يدخل فيها ويدور فيها ويقبض فيها على ناس؟
المواطنين اللي اتقبض عليهم دول ايه؟ مصريين؟ والمصريين اسرائيل تقبض عليهم ليه؟
لبنانيين؟ لبنانيين على ارض مصرية المفروض برضه مصر اللي تقبض عليهم اسرائيل تقبض عليهم ليه؟
فلسطينيين؟ مصر برضه اللي تقبض عليهم اسرائيل ايه دخلها تدخل ارضنا وتقبض على ناس؟ دول لو هم نفسهم اسرائيليين ايه دخل اسرائيل تقبض عليهم على ارضنا؟
ولا قالوا لنا مين دول، ولا جنسيتهم ايه، ولا كانوا ناويين يعملوا ايه، وايه طبيعة العمليات اللي عايزين يعملوها في سينا؟ هي دي مش بلدنا؟
وايه حكاية حزب الله عايز يعمل عملية في سيناء؟ وللا ده توطئة لحاجة معينة؟
يعني لما الفلسطينيين الجعانين زقوا الجدار ودخلوا من الجوع والحصار والمرض قلنا السيادة المصرية
امال عمل استخبارات في بلدنا ده ايه؟ طيب حتى لو الاستخبارات الاسرائيلية وصلت لنتائج المفروض تبلغنا واحنا اللي نقبض عليهم…مش احنا تبقى شغلتنا “استخبارات صديقة” على ارضنا
بقينا صديقة على ارضنا
اتفووووووووووووووو

على رأي جلال امين: ماذا حدث للمصريين

October 16, 2008
ما الازمة الاقتصادية على كل الناس زي ماهي علينا يعني، واحنا احسن من غيرنا كتير بموجب الحكمة الشهيرة اللي قالها الشاعر الشعبي: الفقر حشمة
وعادة يعني اللي في القاع مش ممكن يقع
ايه ده بقى؟ يعني ده مش اول مجنون يعمل حركات هيستيرية بالطريقة دي
قبل كده واحد رمى نفسه في النيل عشان مش عارف يجيب لبس المدرسة لعياله، واحد تاني طبخ مكرونة لعياله بالسم واكلها معاهم عشان يموتوا ويرتاحوا من الفقر، طب يا عم ما انت لاقي مكرونة احمد ربنا فيه ناس بتاكل من الزبالة، واحد تاني قتل عياله قدام مراته عشان مش لاقي يأكلهم، واحد انتحر عشان خسر فلوسه في البورصة
وده بقى اللي ولع في الاسرة كلها
ايه اللي حصل لنا احنا اتجننا وللا ايه؟ يعني ده احنا مشهورين بحمد ربنا وشكره على اي حاجة والحمد لله الذي لا يحمد على مكروه سواه وكده يعني. ايه اللي حصل لنا؟ ليه كترت ما بينا ردود الافعال الهيستيرية كده، وليه كلها منصبة في تدمير الذات بس…بس.
من كام يوم واحد صاحبي بيقول لي: احنا مجتمع يغلب عليه الشر. زعلت بصراحة ما باحبش حد يتكلم علينا كده، ثم انا شايفة الناس طيبة يعني ماحدش وحش ولا حاجة، يعني اوحش ناس في الدنيا قابلتهم في حياتي غلابة برضه، انا قابلت ناس وحشة بالتصنيف المصري بس بالتصنيف العالمي وفي السياق اللي هم فيه ماهماش ناس وحشة ولا حاجة دول غلابة، قمت كلمت مالك وقلت له احنا ناس وحشة يا مالك؟
قال لي احنا مش ناس وحشة احنا ناس طيبة بس اللي حوالينا بيخلينا ناس وحشة، قلت له بس انا مش شايفة ناس وحشة قال لي عشان ما تعاملتيش في الفلوس واكل العيش، الحاجات دي بتطلع من الناس الحاجات الوحشة غصب عنهم بس هم مش وحشين.
طب الفلوس واكل العيش تخليك تدمر اللي حواليك عشان انت تكسب، لكن ايه الاتجاه الانتحاري اللي بقى عندنا ده؟ تمشي في الشارع الناس ترمي نفسها قدام العربية، انا والله باعدي الناس في كل فرصة باقصى ما استطيع عشان من وانا صغيرة ماما قالت لي اللي ماشي على رجليه اهم من اللي راكب العربية والراجل اللي علمني السواقة قال لي لو ح تختاري انت اللي تموتي وللا اللي ماشي في الشارع موتي انت عشان تخشي الجنة احسن ما تقتلي واحد وتخشي النار :)، لا بالصلاة ع النبي انا ربنا بيوعدني بشوية ناس يعني زي الفل، ويقولوا المصريين اشرار؟ بس ان اللي واقف على الرصيف يتعمد انه يستناك لحد ما تمشي وتدوس بنزين وبعدين يروح رامي نفسه قدامك قال يعني بيعدي يبقى ده اسمه ايه؟
واحد خسر فلوس، او مش لاقي فلوس يدخل عياله مدرسة، او مش لاقي يا كل يا اخي اعمل مقلب في حد، اسرق حد، رفع حد بمطواة، انشل في الاتوبيس، اسرق، اسرررررررررق، انشالله تسرق بنك يا اخي، انشالله تقتل الراجل الغني وتاخد فلوسه، انشالله تسرق صندوق فلوس الجامع، متهيالي دي الحاجات اللي بتخطر على بال واحد ح يموت على الفلوس، مش عايز تبقى مجرم، او خايب ومش عارف تبقى مجرم، ارضى باللي قسمه ربنا زي ما احنا متعودين بقالنا سبعتلاف سنة، بلاش انصب على حد وبيع شقتك لاكتر من مالك مثلا وسافر برة البلد، انشالله تشحت في الشارع، استلف من حد واهرب بالفلوس، اقول لك، اتكل على الله واشتغل رقاصة، اقول لك ايه؟ يا اخي انشالله تتجار بمراتك يا اخي، انما تموت نفسك وعيالك ليه؟ وليه دي بقت اول حاجة تخطر على بال الناس؟

لا اخترناه ولا بايعناه نجح ازاي؟ سبحان الله

October 14, 2008
عرفت من الجايكو النهاردة ان النهاردة عيد ميلاد حكم مبارك الـ27 كل سنة وانتوا طيبين
طب وربنا احنا ناس زي الفل
ناس زي الفل
طب وربنا ما باهرج
على راي مالكوم اكس الشعوب زي الافراد، تخيل فرد كان عايش عيشة ضنك وفضل يجاهد ويعافر عشان يخرج منها، وبعدين حصلت له حاجة حسسته انه الحمد لله ربنا فرجها عليه وخرج من الغلب والنكد والضنك: حتة الارض اللي كانت مسروقة منه المحكمة رجعتها له واستلف عشان يبني البيت وجاب احسن مقاول يبني البيت، والمقاول بيبني على اقل من مهله، وصاحب البيت فضل يا قلب امه عنده امل، ويستحمل وعنده امل، وصابر وعنده امل، ورابط الحزام وعنده امل، واذ فجأتن البيت اتهد على راسه، بعد ما كان قعد يبني فيه مدة طويلة، لا والمقاول عمال يوعده ان البيت ده متين متين…ماتين ولا عنب زيه. بعد ما البيت اتهد على راسه ولسة جاي يقول: بقى هو ده اللي ماتين ولا عنب زيه؟ راحوا شاخطين فيه: شششش لا وقت للدموع…انت ح تقعد تعيط؟ قوم يا راجل قوم البيت اتهد نبنيه تاني، وفضل يا قلب امه يشتغل ويحط كل فلوسه في بنى البيت كله وهو اللي يبنيه، يعني يشتغل الصبح عشان يكلف بنى البيت ويشتغل بعد الضهر عشان يبني البيت بنفسه، يوفر يعني فلوس الصنايعية ويضمن انه يبني بنفسه البيت عشان ما يتهدش تاني وهو عمال يبني يبني، واول ما علي بالدور الاولاني اذ بيه يفوجأ ان البيت اتباع من وراه لعيلة الدهاشنة عدوينه اللي كانوا عمالين يقولوا له جتك خيبة مش ح تعرف تبني البيت، واساسا سارقين منه بيت تاني. وبعدين بعد ما بنى البيت بفلوسه وجهده قعد فيه بالايجار وبيدفع الايجار لعيلة الدهاشنة وعمالين يذلوا فيه ويقولوا له احمد ربنا اننا طلع عندنا اصل وسايبينك قاعد فيه، لا والبجح اللي باع البيت من وراه يقول له مش انا اتوسطت لك عشان تقعد فيه بالايجار؟ ده بدل ما تشكرني؟ وكل سنة الدهاشنة يعلوا الايجار، ويضحكوا عليه، ويقولوا له يا عبيط ده في مصلحتك، شوية كده ونرجع الملكية تاني…يعني ح ترجع يا عويس؟ ح ترجع امال…وانا برضه ابيعك؟ وبعدين قاعد يا قلب امه يشتغل صبح وبعد الضهر عشان كل يوم الايجار يزيد، وفوق البيعة لقى المية مقطوعة والمجاري طافحة، والسقف بيخر، وكل حتة في البيت عمالة تتهد حتة حتة، مع انه كان بانيه بنفسه يعني عشان يتأكد انه ما يقعش زي المرة اللي فاتت
كلللللللللللللللللللللل ده وهو مصمصم يفضل قاعد في البيت، وما يسيبهوش، ولما ييجي عيل من عياله يزهق ويقول له طب انا بقى اروح اشوف لي سكنة في حتة تانية وهو بيعدي الشارع عربية تطسه ويطلع الحق على ابنه ويدفع كمان هو غرامة، ابوه طبعا العيل المات.
تصوروا الراجل ده لسة قاعد في البيت، وبيضحك، وبيشتغل وبيصلي وبيصوم رمضان مع ان اودة النوم وقعت على مراته في رمضان اللي فات والمطبخ ولع بالتلاجة اللي هو لسة جايبها جديد، اه ماهو لسة بيجيب جديد بعد كل اللي حصل له ده، والصالة ولعت بكل العفش اللي سابهوله المرحوم جده وهو لسة بيرمضن وبيعيد وبيضحك وبيشتغل وبيصلي وبيصوم
يبقى الراجل ده ايه؟
يبقى الراجل ده البعيد ما عندوش دم

مصر: القائد الأعلى للقوات العربية

October 9, 2008

صورة من مذكرات الجمسي
مالحقناش احنا مصر في عزها ايام ما كانت القائد الأعلى للقوات العربية اللي شاركت في حرب اكتوبر على التلات جبهات: مصر – سوريا – الاردن
هي اللي حددت الجبهات دي
وهي اللي وزعت ادوار الدعم على الدول الاتية:
العراق/ السعودية/ الكويت/ ليبيا/ الجزائر/ المغرب/ السودان
وتقول يمين يبقى يمين وتقول شمال يبقى شمال وما حدش يقدر يفلفص
لحد كامب ديفيد
من ساعتها واحنا دلاديل
بنروح نزرع قطن في الكونغو هئ هئ هئ هئ
فين العز ده؟ ولا نحلم بيه دلوقت…وماحدش عايز يرحم عزيز قوم ذل

ملحوزة بس: طبعا ده كان الاتفاق لكن الجبهة الاردنية ما اتفتحتش للقتال
ههههههههههه طبعا يعني حسين بقى

مصر وحشتني

October 7, 2008
هي مصر راحت فين؟ وح ترجع امتى؟ ما قالتش؟ طب ماحدش سأل عليها؟ يمكن تكون تاهت في السكة، او راحت عليها نومة، او عجبتها القعدة بعيد عنا..لا مش معقول اكيد وحشناها
وهي كمان وحشتني قوي…
قوي
مين اللي خدها مني؟

الذل

October 1, 2008
بتذلونا ليه؟ السؤال ده بيطرح نفسه ارضا، سألته في بوست 5 مايو ايام العلاوة ومصطفى سأله في تعليقه على موضوع اسطبل عنتر وناس كتير بتسأله
بتذلونا ليه؟
الذل هو اللي بيكسر نفسك ويخليك ترضى بقليلك
الذل هو اللي بيخليك جبان وخايف حتى من نفسك
الذل هو اللي بيخليك تتوقع الأسوأ من بكرة دايما عشان كده مش عايز النهاردة يخلص ابدا
الذل هو اللي بيخليك ندل وسلبي ومش قادر تاخد خطوة تصلح بيها امورك
الذل هو اللي بيكسر مناخيرك ويحسسك انك حشرة وتتصرف على انك حشرة
الذل هو اللي بيخليك كلب تلحس رجلين سيدك اللي بيذلك مهما يعمل فيك
الذل هو اللي بيخليك اول ما تقدر على واحد اضعف منك ما ترحموش حتى لو كان ابنك عشان نفسك تتقمص شخصية اللي بيذلك بس على حد ضعيف
الذل هو اللي بيخليك تكره نفسك وتحتقرها ولو كرهت نفسك يبقى كرهت كل البشر وتكره اكتر اهلك وناسك وما تحبش غير اللي بيذلك ونفسك يرضى عنك عشان يرحمك
الذل لما بيطول بيك بيحسسك انك انت السبب في اللي بيحصل لك وانك ما تستاهلش احسن من كده
الذل بيخليك تكسر مقاديف اي حد يحاول يشيل عنك الذل لانه بيفكرك بانك مقصر وانت مش مقصر ولا حاجة انت تعبان…انت مذلول
الذل بيخليك قاسي
الذل بيخليك غلاوي ومتلاعب وما تقدرش تواجه
الذل بيخليك وضيع
الذل بيخليك دون
الذل بيخليك واطي
الذل بيخليك تقول ياللا نفسي
خصوصا لما تبقى مش عارف انت بتتذل ليه؟
خصوصا لما اللي بيذلك هو اللي مفروض عليه يعزك
لما الاحتلال بيذل المواطنين الاصليين بيبقوا فاهمين هم بيتعمل فيهم كده ليه وده اللي بيخليهم يتحدوا المحتل بكرامتهم
لكن لما تتذل من ناسك…من حكومتك…ومن غير سبب، وانت ما عملتش حاجة
بتبقى حيران: ياترى الغلط فيا؟ اكيد الغلط فيا…طب هو انا عملت ايه؟ هو ربنا غضبان عليا؟ طب ليه؟ ويمكن تكفر ويمكن تكفر غيرك وفي الحالتين انت كافر
الذل كافر
وعلى طول تبقى حاسس بانك عملت ذنب مش قادر تحط ايدك عليه
الذل هو اللي بيخليك عدواني
الذل بيخليك حاسس انك ضعيف وان اللي بيذلك قوي…مع انه انسان زيه زيك وفيه من ضعفك بس انت ما جربتش تواجهه لانك خايف منه
مش ممكن الذل يجتمع من الانسانية
يا اما انسان يا اما ذليل ما ينفعش الاتنين مع بعض
انا انسان وانت انسان وماحدش بيموت ناقص عمر والارزاق على الله
الحياة بالذل مالهاش اي طعم الموت اهون
الموت احلى
الموت اكرم
موت بانابيب الغاز وما تتذلش
موت زي ما تموت…بس تبقى واقف على رجليك
ما تتذلش يعني: ما تستقواش على الضعيف اللي زيك…وما تسكتش على مذلة الاقوى منك
انت انسان حر
“إن فرعون علا في الأرض وجعل أهلها شيعا يستضعف طائفة منهم يذبح أبناءهم ويستحيي نساءهم، إنه كان من المفسدين. ونريد أن نمن على الذين استضعفوا في الأرض ونجعلهم أئمة ونجعلهم الوارثين. ونمكن لهم في الأرض ونري فرعون وهامان وجنودهما منهم ما كانوا يحذرون.”
المستضعفون هم من اختارهم الله…فكن مع المختارين

عيدكم مبارك غصب عن عين ابوكوا

September 29, 2008
بمناسبة حلول عيد الفطر الماسي، تعلن كتائب الشهيد ماس كهربائي، الجناح العسكري لحركة مصر بتولع بينا المحزوءة عن تقديم هدايا علبة كحك وجركن جاز وسخ لكل مواطن
عيدكم مبارك غصب عن عين ابوكوا

هو احنا مش ح نعمل حاجة

September 27, 2008
اي حاجة انشالله اضراب تاني وللا اي حاجة، بس ما ييجيش واحد يقول نعمل اضراب اول يوم العيد
احنا قبل كده عملنا حاجات كويسة، مالنا؟ مالنا كده عاملين زي الملاكم اللي اخد بونيات كتير ورا بعض في وشه وعمال يطوح

اما ناس هايفة صحيح

September 14, 2008
بقى عشان اربعة ماتوا بوش يعلن تكساس منطقة كوارث؟ طب ده احنا بالصلاة ع النبي مات لنا الف في البحر الاحمر، وزي الفل لا منطقة كوارث ولا حاجة، مات لنا تقريبا قدهم في الدويقة، وبسم الله ما شاء الله كل حاجة ماشية تمام التمام، لا منطقة كوارث ولا حاجة، اتقلب لنا كام قطر مات فيهم اعداد بسيطة كده ميايتين تلاتة كده وللا حاجة، وبرضه عادي، انا ما احبش الناس اللي تيجي ع الهايفة وتتصدر، هم بقى كل اعصار ح يعملوا لنا الوش ده؟ وبعدين حرام عليهم هم كده بيخضوا الناس، ليه بقى؟ لان الاحتياطات الزيادة دي بتوهم الواحد، انما لو اتعاملت عادي، الصخور تتهد عادي، الناس تحت الانقاض عادي، يتصلوا يصوتوا من تحت عادي، يموتوا تحت عادي، فيه تهديد بصخور تانية ح تتهد عادي، كده انت بتهدي الناس وبتحسسهم انهم عادي مافيش حاجة، انما توهم الناس وتقول لهم منطقة كوارث وتحزنهم على نفسهم؟ دول ممكن ما يزعلوش من الحادثة ويحزنوا على نفسهم من الرغي والندب الكتير…طب ليه كده طه؟
ناس قليل العقل صحيح
احنا الحمد لله…عندنا قيادات رشيدة