Archive for the ‘ودي مش وسية الناس سواسية’ Category

امراض الطبقة المتوسطة لا تمثل الشعب المصري

November 18, 2008
عاجل:
مدونتي مش بتنزل البوستات الجديدة ولما اعمل سيف للبوست يقول لي
form errors
الفورم ايرورز دي تيجي منين؟ المهم اني لما باعمل ايديت بيتعمل ايديت، كمان مدونة شهروزة اتوقفت وكمان وقفوا لها حساب الايميل بتاعها
لا بقى
كده محتاجين تصييح جامد يا شباب، اكتبوا على مدوناتكوا لجوجل جوابات لان كده شهروزة الاول وبعدين انا بعدها بتاني يوم، والموضوع مش موضوع شكاوى بقى معلش، جوجل مليانة حاجات خارجة عن القانون بما فيها جنس الاطفال المحرم دوليا واللي بينزله على الكمبيوتر بتاعه بيتحبس

الطبقة المتوسطة تحترم نفسيتها بقى وتتلم، هم اصلا 15 في المية وماسكين كل حاجة ونازلين عمايل زي الناس في دماغنا

انا مستاءة جدا من حلقة العاشرة مساء النهاردة
الموضوع وما فيه ان مجلس الوزرا عمل استطلاع رأي على عينة من المصريين وطلعت النتيجة كالآتي:
هل انت سعيد في حياتك؟
الحمد لله (80%)
طب راضي عن وضعك الاقتصادي؟
بصراحة لا (75%)
هل انت فخور انك مصري؟
اه طبعا فخور قوي اني مصري (80%)
مستعد لو قامت حرب تموت عشان مصر؟
طبعا (80%)
تحب تشتغل في القطاع العام وللا الخاص؟
الخاص
تحب نظام الخصخصة وللا القطاع العام؟
العام
طيب انا شايفة النتائج دي منطقية جدا والمفروض ان اي حد مصري بينزل الشارع وبيركب مواصلات وبيتكلم مع سواقين التاكسي (ومش لازم يشتغل في العشوائيات يعني) يبقى فاهم الكلام ده جاي منين
نفسي اعرف بقى ايه وجه السخرية والتريقة من الاستاذة منى الشاذلي والدكتور الرخاوي والاستاذ ايمن الصياد على المصريين
ومرة يتهموهم انهم فشارين وكدابين، ومرة يقولوا الكلام متناقض، ومعقولة يعني المصريين فخورين بمصريتهم اكتر من الالمان امال بيرموا نفسهم في البحر ليه؟
طيب هم بيرموا نفسهم في البحر وبيحبوا مصر، وهم هربانين من الفقر مش هربانين من مصر، واللي هم ما استكملوهوش في وصلة السخرية من المصريين ان فيه احصائية بتقول ان المصريين اقل الجنسيات المهاجرة تخلي عن جنسيتهم الاصلية، وانهم ما بيعملوش كده غير في الدول اللي بتجبرهم على انهم يبقى عندهم جنسية واحدة وبيبقى اختيارهم الاول انهم يرجعوا ولو ما ينفعش يرجعوا بيضطروا يتنازلوا عن الجنسية المصرية، ولما استطلعوا رأي موظفين السفارات قالوا المصريين اللي بتخلوا عن جنسيتهم بييجوا السفارة وهم بيعيطوا، ولما بيقطع الباسبور على الشط لما بيوصل ايطاليا مش بيقطع جنسيته المصرية ده بيقطع اي وسيلة ترجعه تاني للفقر، زي ما تقول كده بيرمي بلاه على البلد اللي رايحها
واللي كمان هم مش واخدين بالهم منه، ان المصريين مش بيهاجروا الى ابد الابدين، دايما بيرجعوا، ودايما بيبقوا مهتمين ان لما ربنا يفتح عليهم في الغربة يبقى عندهم بيت هنا في مصر، ولازم يبقى بيت ملك
انا اتضايقت جدا وعيطت
كون ان الطبقة المتوسطة ساخطة ومش بتحب مصر ومخنوقة منها ومحتقرة الشعب المصري وكل واحد شايف نفسه خسارة في البلد، دي امراضهم هم ياريت ماحدش يسقطها على الشعب المصري لانهم مش بيمثلوا الشعب المصري، دول حتى ليل نهار يقولوا احنا بنضمحل…ياللا في داهية
انا اشتغلت فترة في العشوائيات، والناس فعلا دي اجاباتها: الحمد لله احنا احسن من غيرنا كتير….يوووه ده الدنيا ياما فيها بلاوي ده احنا في نعمة…بس لابد من كل بد تركبوا لنا عداد النور….وتساعدونا عشان جوزي بيعمل غسيل كلوي ومش معايا تمن الدوا…لو ينفع الواد اخويا يسافر في اي حتة يجيب قرشين….بس بلاش الخليج عشان مش بيحبوا مصر….مصر ح تلعب النهاردة مع الكاميرون…مصر ام الدنيا
طب اقول لكوا حاجة
في الاول خالص مالص، زمااااااان اول ما اشتغلت هناك، ايام ما كان اسطبل عنتر ده ادغال، اهالي اسطبل عنتر ما كانوش بيرضوا يتصوروا (دلوقت اقتنعوا بجدوى التصوير ومش كلهم برضه، فيه لسة بيزعقوا لنا لو صورناهم) عارفين ليه ما كانوش بيرضوا يتصوروا؟:
انتوا عايزين تصوروا عفانتنا عشان تشوهوا سمعة مصر؟ مصر فيها حتت حلوة كتير…مش كل المصريين زينا…امشوا من هنا يا ولاد الكلب يا اسرائيليين
انا عايزة افهم ايه العجيب في ان المصريين بيقولوا احنا مستعدين نموت عشان مصر لو حرب قامت؟
اولا المصريين ما عندهمش اي مانع يموتوا لاتفه السبب، واللي مش مصدق يشوف الناس بتعدي الشارع ازاي، دول ناقص يحبوا على رجل اللي سايق عشان يموتهم، ونسبة الخوف من الموت عندنا طول عمرها قليلة، ثم بقى انا بالاقي كتير قوي، خصوصا من اللي الغلابة، نفسهم ومنى عينهم ان يحصل حرب! نوع من انواع الاكسايتمنت يعني، الحقيقة مافيش غير الطبقة المتوسطة هي اللي بتخاف من الحرب، واللي فوقيها طبعا، اللي فوقيها انا مش باعتبرهم مصريين اصلا، المهم، اللي خايف من الحرب خايف عشان عنده حاجة يخسرها، لكن اللي انا اشغلت معاهم (خصوصا العيال بتوع الاحداث) حاسين ان الحرب دي بقى ح تبقى لعبتهم، وفرصتهم الوحيدة عشان يبقوا ابطال والبلد كلها تتوقع في عرضهم، عاملين زي اللي امه بتضطهده وبتطلع عينه وبتفضل اخوه عليه، ونفسه ومنى عينه انها تعيا عشان يتبرع لها بكليته ويموت عشانها بس عشان تعرف قيمته وتحبه زي ما هو بيحبها
وهم محقين فعلا
مين اللي مشي على الالغام بالالاف وصد بجسمه فوهات المدافع في حرب تلاتة وسبعين؟ مش العساكر الفلاحين والصعايدة الغلابة؟
اما بخصوص انه عايز يشتغل في القطاع الخاص لكن عايز كل حاجة تبقى تبع القطاع العام
فده مفهوم، هو دلوقت حالا عايز يشتغل في القطاع الخاص عشان فلوسه اكتر، لكن يتمنى ان كل حاجة تبقى تبع القطاع العام لاني سبق وقلت لكوا المصريين شيوعيين بالسليقة، الثقافة الابوية بتخليهم عايزين كل حاجة تبقى في ايد الدولة عشان يبقى فيه عدالة
الحقيقة انا مش شايفة غرائبية في نتائج الاستطلاع، ولا شايفة تناقض اذا اتكلمنا عن السياق المصري وتصارع الشخصية المصرية وموروثها مع الواقع المفروض عليها، ايه ده؟ انا باقول ايه؟ ايه الجملة الاخرانية دي؟ المهم انتوا فاهميني يعني احنا عشرة
ولا شايفة اي داعي للتريقة على المصريين والسخرية منهم واتهامهم بالكدب وانهم هم اللي المشكلة فيهم مش المستطلعين
الحقيقة المشكلة مش فيهم ولا في المستطلعين، المشكلة في النظام اللي بيحطهم في صراع ما بين القيم اللي هم مؤمنين بيها وما بين الظروف الصعبة المفروضة عليهم
وايوة المصريين لسة بيحبوا مصر، ولسة فخورين بيها لدرجة انهم ساعات يستعروا من نفسهم عليها، يعني شايفين ان مصر مقامها اكبر منهم، وكتير بيعملوا زي اللي مش بيرضوا يتصوروا عشان مستعفنين نفسهم ومحرجين لمصر منهم، ودي تركيبة ما يفهمهاش اللي قاعد معزول عن الناس
والرضا بقضاء الله حاجة وزنقة الفلوس وصعوبة المعيشة حاجة تانية
وقرفهم من العيشة حاجة وحبهم لمصر واستعدادهم انهم يموتوا عشانها حاجة تانية
هم اصل المتحدثين تعليم خواجاتي شوية، عندهم التصور الخواجاتي بتاع ان الوطن هو اللي بيدي الواحد حقوق وبيوفر له حياة كريمة
واحنا من امتى في مصر كان عندنا التصور ده عن الوطن؟ اذا كنا لما بنهاجر بنعمل فول وطعمية وبنوسخ الاماكن اللي احنا عايشين فيها عشان تبقى شبه مصر، ونعمل قهاوي ونعمل تجمعات مصرية ونتخانق نفس الخناقات وننزل في الشارع نحتفل بفوزنا بكاس افريقيا، مش كل من هاجر بقى ما عندوش انتماء
ولا زهق من البلد ولا ده معناه ان ما يتمناش يموت عشانها
والناس لما بتقول مصر هي امي، هم حاسين انها امهم بجد، حتى لو ام رخمة وبترنهم علقة بالحزام، ويتخانقوا معاها ويطفشوا ويروحوا يباتوا عند واحد صاحبهم، بس امهم، حد ح يكره امه؟
انا مش طالبة منهم ينزلوا العشوائيات (مع مراعاة انهم يلبسوا لبس بسيط شوية عشان يحسسوا الناس انهم منهم) انا بس عايزاهم مرة كل ست شهور يركبوا المواصلات وللا حتى ياخدوا تاكسي عشان ما يبقوش قاعدين كده مندهشين من اختراع العجلة ومش دريانين بجوانيات اهلهم
ولما هم اللي ما يفهموش

ولما هم اللي ينعزلوا
يطلعوا ان الشعب هو اللي وحش وهو اللي كداب وهو اللي مش معقولة ابدا يبقى عنده انتماء واكيد نصاب
ويقعدونا قدامهم ساعة يبستفوا فينا هم ومتصلينهم اللي لاوئين ضبتهم
اما عاجيب والله
وتحية للدكتور ماجد عثمان
اه، نسيت اقول حاجة، الناس قالت احنا مستعدين نموت عشان مصر، تقوم الاستاذة منى في اخر الحلقة تقول، ياريت نقول الحقيقة عشان استطلاعات الرأي دي بتفيدنا يعني لما حد يقول لك مستعد تموت في حرب قول اللي جوة نفسك
يعني كأنه تحريض للمصريين على انهم ما يموتوش عشان بلدهم وتسفيه للناس واللي يقول انا اموت عشان بلدي يبقى كداب
امممممممممما عجااااااااااااايييييييييييييبببببببببببببببب فعلااااااااااااااا

Advertisements

بخصوص موضوع الاسهم

November 17, 2008
ما تقولوا كده من الاول، واحد بعت لي مسج على الموبايل ملخصة ومحترمة وفهمتها اخيرا: ح نشتري بلدنا اللي احنا اصلا دافعين فيها ضرايب
آآآآه، يعني البيت باسمي وانا ح اشتريه تاني عشان…عشان ايه بقى؟
يعني ده اعتراف ضمني من الدولة انها هي حاجة والشعب حاجة تانية، طيب، بياخدوا ضرايب ليه؟ الا انا شفت بلاد كتير وقليل، عرب وعجم، خواجات وولاد بلد، الا فرانكا والا تورك والا بيئة
ما شفتش ابدا شعب بيدفع في بلده كل الفلوس دي وما بياخدش منها ولا حتى صلاة النبي

لا…عيالنا يرجعوا لنا بقى

November 14, 2008
عااااااااجل: احد المعلقين دخل دلوقت وقال لي الفيديو ده قديم!!!!!!!!! طب ليه ينزل دلوقت؟
انا مش قلت قليل من نظرية المؤامرة يصلح المعدة؟ طبعا انا ما اقصدش ابدا ابناء مصر، دول عيالي وعيال جدعان وكل واحد وواحدة فيهم عشر رجالة في بعض، انا اقصد اكيد اتبعت لهم الفيديو ده وهم فاكرينه جديد، طيب ياريت نتحقق من كلام المعلق واذا كان فعلا فيديو قديم يبقى فيه حاجة مش مظبوطة بتحصل!

الفيديو ده من عند ابناء مصر، وكلهم لابسين جلاليب بيضا فالواحد مش عارف المصري من السعودي

بس سمعت واحد بيقول ربوا المصري ينعل دينه
لا عيالنا يرجعوا لنا بقى بلا بهدلة وشحططة ومرمطة، ارجعوا لنا بقى وتعالوا البلد فيها فلوس ايه اللي يخليكوا تسيبوها، ييجوا وانشالله يطلعوا بالمطاوي على رجال الاعمال الاوساخ اللي واكلين بلدنا وطاردينا منها
السفارات المصرية في كل انحاء العالم: قبح الله وجوهكم على رأي السعوديين
لو لنا سفارة ما كانش حد داس لنا على طرف في حتة، لكن هو احنا لنا بلد عشان يبقى لنا سفارة؟
انا مش قلت رجال الاعمال لازم يتنيلوا يتأمموا، فلوسنا وواكلينها وبيصرفوها على مطربات الفيديو كليب وعيالنا يروحوا يتبهدلوا عند الناس
بس هي ايه الحكاية؟
لا بجد
قليل من نظرية المؤامرة يصلح المعدة
اشمعنى اليومين دول موضوع السعودية والمصريين ده قايم؟ من فترة سعوديين ومصريين عملوا اغنيتين في منتهى الحقارة والسفالة بيشتموا بعض
وبعدين توالت الاحداث
ايون…ايه الحكاية بقى؟ ما احنا بنشتغل في السعودية من السبعينات
مين اللي مقوم الدنيا كده ما بينا؟ ولمصلحة مين؟ ثم اساسا اي حد يوعى من وشنا دلوقت احنا روحنا في مناخيرنا ومش طايقين نفسنا وما ح نصدق نطلع غلبنا كله في حد لما نمشيه يكلم نفسه
انا اللي شايفاه من المصريين، في الشارع حتى والمواصلات، انهم بيتلككوا عشان ما يصدقوا حد بس يحك لهم على مناخيرهم، ده انا مرة واحدة شتمتني في الشارع قلت لها فيه حاجة يامدام قالت لي هو كده! فما بال بقى ينضربوا في حتة، ما ح يصدقوا ما تغوروا من وشنا الساعة دي

الانسان الانوي النادر

November 12, 2008
الراجل ده عنده كرامة،
هاه؟ هي حاجة كده بتبقى عند ناس معينة، بتخليهم يتصرفوا تصرفات غريبة شوية، ويقولوا كلام اغرب ويزعلوا من حاجات ما تزعلش ودمهم يتحرق من حاجات لطيفة موت وما يخافوش من حاجات تخوف ويفرحوا بحاجات رخمة كده ودمها تقيل…يعني نيموذج من البشريات، ربنا يشفي كل انسان ما يصحش نعايب على المرض

لا والمفاجئة بقى انه اتكلم كلام واحد فعلا عنده كرامة، تصوروا؟ يعني ثابتة عليه، وما انكرهاش على فكرة، بيبجح في وشنا كده، ده حتى جاب سيرتها، الكرامة يعني، ما انا نسيت اقول لكوا ان هي الناس دي بتبقى كده، يعني يقول لك مثلا ايه علاقة كيان عنصري بالاديان وحوار الاديان؟ واحد قاتل اطفال من سنتين بس، ده الحكاية مافتش عليها ميت سنة ولا حاجة، دول سنتين يا ناس، اديان ايه اللي رايحين تتحاوروا مع بيريز فيها؟ يعني احنا في المقاومة لو قلنا اننا عايزين نشارك في حوار الاديان امريكا ح ترضى؟ ما تخلوا عندكوا شوية كرامة بقى، مافيه يهود في الدنيا كلها ماهماش صهاينة…هي حبكت؟ وقعد يقول، حاجة شبه انتوا مالكوا شبطانين في ديل امريكا كده، دي موتت ناس كتير حتى، ومننا على فكرة، ده الحرب علينا كانت امريكا اللي اخدت قرارها وبتديرها، انتوا ماعندكوش كرامة ليه؟ وبعدين يعني واحد نجح في انتخابات مش بتاعتنا مالكوا فرحانين كده؟ انا مش باقول ازعلوا لا سمح الله بس ما تفرحوش يعني او حتى استنوا شوية شوفوا يمكن يطلع كويس يمكن يطلع وحش، وبعدين كويس وللا وحش انتوا مالكوا، هو ماله هو المفروض ان مصيركوا في ايدكوا يعني وكده، مش معقول قاعدين مستنيين متغيرات العالم عشان تحدد مصيركوا وانتوا مافيش فيكوا اي حركة يعني..ده الغرض بس انا ما اقصدش حاجة…
وكلام شبه كده، مش عارفة انا الناس امات كرامة دي بتجيب الكلام الغريب ده منين؟

سبحان الله، ويخلق مالا تعلمون
عموما هو انسان انوي نادر، يعني اتفرجوا عليه من باب حتى العلم بالكرامة، عشان تعرفوا ان الواحد في نعمة
قال كرامة قال…تف من بقك يا شيخ دي عالم حاقدة وفاضية وما ورهاش حاجة
تلاقيه نفسه من جوة قلبه ما يبقاش عنده كرامة وهي طالعة له غصب عنه ومحتاس فيها ومش عارف يعمل فيها ايه، وعمال يحقد علينا احنا بقى من جواه، يا ساتر على نفوس الناس، وعايز يفرض رأيه بقى علينا، يا نبقى عندنا كرامة زيه يا اما يقول لنا: يعني مش المفروض اننا عندنا كرامة؟
وانت ايه اللي مزعلك يا اخي اننا ما عندناش كرامة؟ ايه اللي يهمك في الموضوع ده يا حشري؟ ما تخليك في نفسك بقى وفي كرامتك اللي منكدة عليك عيشتك وخلتك تبعت ابنك عشان يموت، كل شوية يكلمنا عن الكرامة الكرامة الكرامة لما صدعنا

طاااااااااااااب ما عندناش انت شريكنا؟ يا باي…
اما راجل غريب قوي

على لطفي: الاجانب- غياب العدالة – تهرب الاغنياء من الضرائب هم السبب في الازمة

November 1, 2008
ده حوار مفيد مع الدكتور علي لطفي وهو مش شيوعي ولا اشتراكي ولا حاجة بالعكس ده رأسمالي على ابوه وهو صاحب فكرة الخصخصة والاقتصاد الحر بس قال ان:
اعتماد البورصة على الاستثمار الاجنبي (واللي سحب فلوسه فجأتن من بورصتنا لاحتياج امريكا واوربا لسيولة في الوقت الحالي مما ربطنا بالازمة العالمية غصب عن بوزنا)
وعدم عدالة توزيع الناتج القومي على الناس
وتهرب الاغنياء من الضرائب بسبب غياب الرقابة
وفرض ضرائب باهظة على الفقراء

هم سر الازمة الاقتصادية وما يبدو كأنه انهيار في البورصة…ده واحد كان وزير وبعدين رئيس وزراء وبعدين كان رئيس مجلس الشورى، يعني تبع الحكومة وبيدافع عن حسني مبارك وبيقول انه مش بيحمي رجال الاعمال ولا حاجة وبعض رجال الاعمال غلطانين عشان اذا راحت ست فيه الف غيرها
😀
طيب الاربع نقاط اللي فوق دول واللي هو اشار ليهم انهم سبب الازمة الاقتصادية دايما بيبقوا مصاحبين للنظم الرأسمالية، يمكن النقطة الاولى مش لازم تبقى مصاحبة طول الوقت اللي هي الاستثمار الاجنبي، بس بقية النقط ده العاتشي يعني في اي نظام رأسمالي
امممممممممم
اهو ده عيب الاكاديميين بقى، فاكرين ان الكلام المثالي اللي مكتوب في الكتب ح ينفع يطبق في الواقع

يا ضنايا يا ابني…انت متهرش؟ نهى رشدي مفترية بصحيح

October 24, 2008
صباح الخير، معلش انتوا عارفين بعد لفة ع الريدر بيبقى شكلي كدهو
المهم بعد اللفة لقيت ان المدونين اليومين دول اغلبهم مالهمش سيرة الا نهى رشدي، معظم الناس فرحانة بيها، وفيه كام مدون قرر انه يصعب عليه شريف اللي اخد تلات سنين ويوجد له اعذار ومبررات، وح نعتبرها مصادفة انهم رجالة
بادئ ذي بدء احب اوضح اني عارفة كويس اعذار ومبررات شريف والاسباب اللي دفعته وبتدفع غيره لجريمة التحرش او اسمها القانوني هتك العرض يا مصريين يا بتوع الشرف واحلى من الشرف مافيش يا آه يا آه
واعذاره لا ليها دعوة بالكبت الجنسي، ولا بلبس الستات
ثانيا انا فعلا صعبان عليا شريف وغير شريف بسبب اعذاره ومبرراته وعشان كده فرحانة له انه اتسجن
وانا مش شايفة ان نهى انتقمت منه انا شايفة انها بتعمل لمصلحته وبتربيه عشان تعمل منه راجل حيث ان امه ما عرفتش تعمل الحكاية دي
اما بخصوص رأي بعض المدونين في ان المسألة اتقسمت كأنها صراع ما بين ستات ورجالة فالحقيقة الكلام ده مثير للغثيان فعلا
يا جدعان هو احنا ما بقاش عندنا نخوة وللا ايه؟ ده حتى شرف البنت زي عود الكبريت
افففففففففف لا مش قادرة اتكلم بطريقة ح اجوزك هنومة يا قناوي يابني اكتر من كده
طيب
طول عمر الرجالة في حوض البحر المتوسط بيعاكسوا الستات، في سوريا بيبرموا شناباتهم، واغلب الظن ان الهدف ورا كل الشنبات اللي في سوريا دي انها تتبرم للستات بس، ماهو انا شخصيا لما رحت ما لقيتلهاش اي استعمالات تانية برغم انتشارها كالنار في الهشيم، في ليبيا والمغرب بيلعبوا حواجبهم، اه والله العظيم لسة في الزمن ده حد بيلعب حواجبه، في فرنسا يعدي جنبك ويقول: ماجنيفيك، في ايطاليا يعمل لك فضيحة في وسط الشارع ويفتح زوره: سنيورة بللاااااااااااااااااااااااااااااااااااااا، في لبنان هم سايحين على روحهم على طول اول ما يشوف واحدة ست انشالله قد جدته يتحول ويفضل يسمبس ويصوصو ويتنهد ويتنحنح ويسبل ويبربش، حتى لو لسة خارج من كنيسة وللا جامع هو بيعتبر ده واجب وطني ويمكن معتقد انه بياخد ثواب، وفي مصر كانوا…كانوا..بيحبوا يبتكروا ويقولوا جمل طويل ما تلحقيش تسمعي بقيتها: هو القمر نزل م السما امتى…وانا اقول ياربي القمر راح فـ….(خلاص انتي مشيتي وهو لسة بيتكلم) ولو سايقة عربية ييجي جنبك: العجلة يا انسة العجلة..انت: مالها؟ بتنقط ثكر وعثل.. الا انت بتمليها في انهي منحل وللا…(الاشارة فتحت وانت مشيتي وبرضه هو لسة بيتكلم) احنا شعب رغاي بطبعنا.
لكن لما واحد يمسك ست من صدرها ويسحلها على الارض ده اسمه معاكسة؟ ده له اي علاقة بالجنس من قريب او من بعيد وللا ده واحد عايز يذل واحدة؟
لما ميت واحد يجروا ورا واحدة ويهبشوا فيها لحد ما يقلعوها هدومها ويقعدوا يضحكوا ويسيبوها ويجروا ورا واحدة تانية
ده شبه ايه؟ ده شبه اي حاجة لها علاقة بالكبت الجنسي؟ وللا ده عامل زي الماتشات الرومانية ما بين الاسد والعبد؟ او شبه عملية سحل هيباتيا عالمة الرياضيات، ماحدش يقول لي ان الناس اللي سلخت جلد هيباتيا وسحلتها في شوارع اسكندرية كانت بتتحرش بيها، ولا حد شرح جسمها بالاصداف عشان هي مزة وانما عشان هي عالمة رياضيات وفلك وهم كانوا شايفينها ساحرة شريرة
لما واحدة تبقى ماشية، وراجل ماشي وراها يقول لها: يا شـ*** كـ*** أمك ويروح تافف عليها
ده له اي علاقة من قريب او بعيد بالجنس؟ معلش اسمحوا لي لو اي راجل في الدنيا دي فاهم ان ده الجنس فورا يتوجه إلى معالج نفسي عشان يحطه في اقرب مصحة يمكن يعرف يلحقه قبل ما يتجوز ويتورط في جريمة
اذن دي جريمة عنف، بس مش عنف عادي، ده عنف مصحوب بالرغبة في كسر العين والاذلال، بالظبط زي جريمة اسلام نبيه في حق عماد الكبير، ماحدش توقع ابدا ان اسلام نبيه كان معجب بعماد ومش طايله مثلا! ولا انه شاذ جنسيا، كلنا كنا عارفين ان اسلام نبيه كان بيقهر عماد وعايز يذله ويكسر نفسه
ليه بقى؟ دي قصة تانية بخصوص اسلام انا ما اعرفوش ولا اعرف تاريخه النفسي ولا اللي مر بيه في طفولته
لكن اللي اعرفه كويس، ان شريف، والشباب اللي زي شريف منين ما يمشوا بيتوقفوا في لجنة وبيتقال لهم من احقر امين شرطة: بطاقتك يالا…شمر وريني دراعاتك…انت بتبجح يا لا؟ بتبجح يا…امك يا ابن الـ… يا …..؟ (كل الالفاظ اللي هو بيقولها بدوره في عملية التحرش)
وزي ما تيجي تيجي بقى، شلوت…قفا…بونية (كلها حاجات شبه اللي هو بيعمله في التحرش الجنسي)
وشريف واللي زي شريف بيبقوا واقفين زي القطط السيامي، لا القطط السيامي شقية، ولا زي اي قطة في الدنيا القطة بتخربش، حتى الفار اهو بيقرقض، مش عارفة بيبقوا عاملين زي ايه؟ بيبقوا عاملين زي ولا حاجة، زي خرقة مالهاش كرامة ولا احساس
هو بيبقى واقف زي الخرقة، بس هو مش خرقة، هو انسان وله كرامة واحساس، والذل اللي بيشربه ليل نهار بيتغرس جواه ومش بيقدر يتعايش معاه لان الانسان كريم ولازم يفضل كريم عشان يعرف يعيش
طاقة الذل اللي بيشيلها فوق قدرته على الاحتمال
قوم بدل ما يقف زي الراجل، زي الراجل، ويقول للي بيذله ما تعملش معايا كده، مش ح اقول بقى يروح يشتكي ويعمل زي ما عماد الكبير عمل، لان الناس ح تقول لي ده راجل مستواه التعليمي ما يأهلوش انه يروح يشتكي، على اساس ان عماد الكبير معاه دكتوراه في الاقتصاد الدولي من اوكسفورد يعني. بس خلينا نتحدت بالصاعيدي. هو ماشي بروح امه بمطواة وللا جنزير، بدل ما يطلعهم على الغلابة في الشارع ما يطلعها على اي حد ينتهك كرامته والارزاق على الله
يعني هم راحوا فين الصعايدة اللي كانوا بيطخوا اي كلب يمد ايده على شنباته؟ احنا كنا فاكرين ان بعد قضية عماد الكبير الناس ح تتشجع انها تطالب بحقها في الكرامة احسن من كده، بس رجع ابوك عند اخوك والناس اتعاملت مع قضية عماد على انها حالة استثنائية مش عارفة ليه؟
اممممممممممممم معذور، اصله خايف، اصله بيجري على كوم لحم، اصل الامين ح يلبسه قضية
قووووووم يمشي من قدام الامين بعد ما يتذل كل الذل اللي خلقه ربنا في الدنيا ويستضعف له اي كائن ماشي في الشارع ويفرغ فيه الذل اللي هو شافه، اضعف كائن ماشي في الشارع بعد الاطفال هم الستات
اذا ربنا وفقه وعرف يعمل حاجة في عيل (نسبة التحرش واغتصاب الاطفال زادت في الفترة الاخيرة بشدة خاصة في الصعيد! دي تقارير المركز القومي للامومة والطفولة) يبقى خير وبركة، بس ده مش متاح قوي، مش متاح انك تتحرش بعيل في الشارع وتجري والناس تضحك، لان دي حاجة، لحد دلوقت، ما بتضحكش، وما بتصنفكش على انك دكر هايج، وماحدش لحد دلوقت لقى لها تبريرات، ولا حد يعرف يرمي اللوم على العيل بوصفه هو اللي اثارك، ثم ان هتك عرض الاطفال ح يعمل لك سمعة انك بتاع عيال، ودي سمعة وحشة، لكن هتك عرض الستات ح يعمل سمعة انك هايج، لا مؤاخذة، ودي سمعة يتمناها اي راجل مصري، خصوصا لو ما كانش هايج ولا حاجة
نصيحة لوجه الله: والنبي اللي بيرغي ويحاول يأكد في حاجة كتير بيبقى باين لاي عيلة عندها خمس سنين انها مش فيه فبلاش تخلي شكلك وحش يعني
اذن التحرش بالنساء في الشارع جريمة عنف تنفيسية مرتبطة بالقهر ومالهاش علاقة بالجنس
طيب موضوع اللبس عشان نخلص منه ولاخر مرة:
لو بنت مش لابسة حجاب (حتى لو لابسة جلابية بلدي) يتقال لها مش شايفة اللي انت لابساه؟
لو محجبة يتقال لها: ده حجاب ده؟ بس لمجرد انها لابسة الوان لايقة على بعض
لو منقبة تبقى حاجة من الاتنين: يا اما راجل متخفي وعايز يسرق كل الناس اللي ماشية في الشارع يا اما على رأي مينا: يقولوا عليها دي مشيها بطال ومتخفية ورا النقاب
وعليه فكل انواع الملابس مستحلة في الشارع المصري
لانه تااااااااااااااااااني الموضوع مالوش علاقة بالجنس خالص، هو بيحاول يلاقي مبرر، وبما ان الست دايما مدانة، ده اساسي يعني في كل حاجة، في بيتها: ماهو انت مقصرة في البيت عشان بتشتغلي، لو مش بتشتغل ما انت عمالة تتخني وجالك تخلف من القعدة في البيت
مع جوزها: ماهو بص برة عشان انت مش واخدة بالك من نفسك..أو..انت قاعدة ليل نهار قدام المراية وعند الكوافير؟ فين اهتمامك ببيتك وولادك يا هانم؟
في الشارع: ما تشوفي انت لابسة ايه ( في كل الاحوال احنا عايزينكوا والنبي تلفوا على دواليبنا وتقولوا لنا بالظبط انتوا عايزينا نلبس ايه عشان نخلص)
في الشغل: ماهو انت عشان البيت والعيال مقصرة في شغلك…انتوا مالكوا ومال الشغل
ولو شاطرة: ما انتوا السبب في بطالة الشباب عشان بتشتغلوا وواخدين مكانهم
المهم احنا غلطانين وخلاص
صح، احنا غلطانين فعلا، احنا غلطانين عشان مش بنعرف نربي رجالة يتحملوا المسئولية ويواجهوا بدل ما يستوطوا لهم حيطة عشان يميلوا عليها
اللي عنده مشكلة بطالة، يا اما هو مش عايز يشتغل (وده احتمال ضعيف) يا اما الحكومة مش عايزة تشغله وتبقى مشكلته مع الحكومة، لو راجل يواجه الحكومة او يتلط ويسكت
اللي بيتذل ويقبل الذل من غير ما يدور على حقه من اللي ظلمه ويتجدعن كده زي الشباب الجدعان (القليلين) اللي بيواجهوا الحكومة، واللي بالمناسبة برضه مش عارفين يتجوزوا، واللي بالمناسبة ولا واحد فيهم بيتحرش باي حد، واللي بالمناسبة هم اللي بيعملوا حملات ضد التحرش
اللي مش زيهم يروح يندفن بدل ما يفرغ غلبه في اعراض الناس في الشارع
مين قال ان نهى رشدي انتصرت للستات؟
بالعكس…دي احرجتنا كلنا، عشان هي الوحيدة اللي قامت بواجبها
اه، ماهو بما اننا كلنا غلطانين دايما، وبما ان بعض المدونين مصممين يصوروه على انه صراع بين الرجالة والستات ولا كأن دي اعراض ناس، ولا كأن ان اللي في الشارع دي لها اب وللا اخ وللا مالهاش ده كله لها رب، فبص يا كابتن انت وهو، احنا ربنا خلقنا في الدنيا دي عشان نربيكوا، مين اللي رباك يا بابا؟ ماما مش كده؟ طيب
اللي الست الوالدة عرفت تربيه وتطلعه راجل محترم، كتر خيرها كفتنا مجهود اننا نربيهولها
اللي تغلط فينا فعلينا اننا نصلح غلطتها ونربي لها ابنها اللي ناقص تربية، ونعلمه ازاي يبقى راجل
وسيبنا بقى من جمعية المرأة المتوحشة وخلينا في التراث المصري: ابنك على ما تربيه وجوزك على ما تعوديه والظاهر اننا مضطرين كمان نربي ونعود اللي ماشيين في الشارع حيث ان الستات هم اللي مقصرين في التربية
مش الستات دايما غلطانين والرجالة معذورين؟
مش الست شغلتها تربي العيال؟
ماشي يا قناوي يابني….يبقى احنا ربنا خلقنا عشان اللي امه ما علمتوش الصح من الغلط احنا نعلمهوله بما انه متبرمج على انه ما يتعلموش غير من واحدة ست، اذا ما كانتش امه يبقى اي واحدة بقى.
كخ..كخ يا بابا…عيب يا ولد
اذا كان فيه ناس معتبرين ان نهى رشدي قاسية، وناس تانية معتبرة انها: لولا انها متعلمة ومن فئة اجتماعية معينة ما كانتش عرفت تحبسه

طيب تعالوا بقى نشوف اللي مش متعلمة ومش من فئة اجتماعية معينة بتعمل ايه؟ واحدة اعرفها كانت راكبة اتوبيس (هي بنت بلد وتعليمها على قدها وبتشتغل وشقيانة)، راح واحد وقف وراها، الناس كانت شايفة وماحدش اتكلم على اساس انها اكيد مبسوطة مثلا! قامت البنت سابته يخلص عشان ما تضايقهوش (قلب الام بقى)، وبما انها محجبة ولابسة عباية، راحت بحركة سريعة شادة دبوس الطرحة من راسها في نفس الوقت اللي التفت له فيه وراحت….احم…شغل خيالك…بس خيال يكون شبه جلادياتور او بريف هارت او لقاء مع مصاص دماء.
المهم يعني دي كانت اخر مرة بالنوسبة لهذوها الصخص، وبما انه كان محروم من الجواز غصب عنه يا قلب امه، فهي قررت انه يبقى محروم من الجواز بخاطره عشان ما يحزنش على روحه تاني (قلب الام بقى)
الغريب ان البنت بتقول لي انه طول ما كان واقف وراها ماحدش اتدخل واول ما اعملت الدبوس اعمالا الاتوبيس كله اتدخل عشان يخلصه من ايدها، بس هم مين، البت تقريبا وزنها اربعين كيلو بس الغل اداها قوة خمسين حصان
ها؟
عموما هو معروف ان الامهات من بنات البلد تربيتهم بتبقى شديدة شوية عن تربية الامهات من البنات اللي من “طبقة معينة”
وبما ان نسبة لا بأس بها من الذكور في مصر لسة بيحملوا التكوين النفسي الطفولي: والله مش انا ده هو يا ميث…ماهو اللي زقني الاول يا ميث عشان كده خزقت له عينه….مش قثدي…عااااااا
اذن فما حدش بيكبر على امه بقى….والام اللي بتربي مش اللي بتخلف
لو تخيلنا طابور طويل كل واحد بيضرب اللي قدامه بالقفا، لو واحد في نص الطابور بدل ما يضرب اللي قدامه التفت وضرب اللي ضربه اتجاه الضرب ح يتغير
وللا ايه؟

كارثة التأمين الصحي: اللي ماعهوش ما يعيشوش

October 21, 2008
ليه؟ ليه؟ ايه اللي صحاني بدري؟ ما كنت مخمودة، ايه اللي بيصحيني اصلا؟
اتفضلوا الخبر ده بتاع التأمين الصحي
يعني واحد مرة دخل لي وقال لي انت متشائمة ليه انت مش شايفة حاجة حلوة في البلد؟ انت بتيأسي الناس
طب الناس اللي عشرة تدوين معايا مش عارفين ان لما بيبقى فيه خبر حلو باقوله؟ مش مفروض ان قضية التأمين الصحي دي كسبناها؟ وقلت لكوا وفرحنا؟
طب اتفضلوا بقى
ده قانوني؟ ينفع يعني كده
؟ امال القضية كانت مرفوعة ليه؟ وكسبوها ليه؟
طب انا اعمل لكوا ايه؟ هي دي بلدكوا اعمل ايه انا اخترع لكوا بلد من دماغي؟ حاضر حاضر
احنا يا اولاد بلدنا جميلة ومليانة عدل وخير، تقدر تروح تتعالج بالمجان في اي مستشفى استثماري
اول ما بتتخرج بتلاقي شغل بتلاتلاف جنيه في الشهر اول مرتب، والحكومة بتساعدك في اسكان الشباب وتجيب لك شقة، لاحظ ان مافيش وسايط ابدا عندنا الحمد لله، احنا زي ايام سيدنا عمر كده اول ما تتولد يتصرف لك فلوس، وتتحوش لك لحد ما تكبر، وطبعا ده بسبب اننا بلد زراعي وصناعي وبنستثمر مواردنا احسن استثمار فالخير عم وفاض وزاد، ولما تتجوز بنت الحلال في الشقة الجميلة اللي مدياهالك الحكومة بتخلف عيال حلوة، بيتعالجوا على حساب الدولة، ويتعلموا على حساب الدولة من الضرايب اللي انت بتدفعها
بس فيه مشكلة صغيرة، للاسف من كتر الفلوس المصريين بيفطرو ا لحمة ويتغدوا لحمة ويتعشوا لحمة فانتشر مرض النقرص ما بينهم
يا ريت يا شباب تخلوا بالكوا من نفسكوا

ترحيل 9 مشجعين زملكاوية للسجن الحربى بعد أحداث مباراة الجيش

October 20, 2008


جيمي بعت لي الميل ده:

منذ بداية الدورى العام المصرى أبدى الجميع تخوفهم من وجود فرق الشرطة و الجيش فى جدول الدورى نظرا لحساسية المؤسسات التابع لها تلك الفرق و تخوف الجميع من الصدام بين جماهير كرة القدم العادية التى تتعامل مع الامور على إنها فقط لعبة كرة قدم و ليست جهات سيادية و نظامية .
مباراة الزمالك و طلائع الجيش التى اقيمت على استاد الكلية الحريبة بتاريخ 17 – 10 و التى انتهت بفوز طلائع الجيش بهدف نظيف ، و التى أفسدها حكم المباراة بعد قراراته الظالمة و عدم احتساب العديد من ضربات الجزاء لصالح فريق الزمالك الامر الذى أدى الى احتجاج الجماهير على تلك الممارسات الظالمة التى مارسها فهيم عمر حكم اللقاء معترضين على فوز طلائع الجيش بتحيز حكم اللقاء لثاني مرة على التوالى بعد اهداهم الفوز ضد الزمالك ايضا فى الموسم الماضى.
الامر الذى ادى لتعالى الهتافات من الجماهير البيضاء ضد حكم اللقاء و ضد اتحاد كرة القدم منظم البطولة و الذى قابله الامن بالقمع و تفريق الجماهير الغاضبة لخارج الاستاد بعد ان أطلقوا الكلاب البوليسية على الجماهير ، كل هذا وارد حدوثه فى مباريات كرة القدم فى جميع استادات مصر و العالم .
تبع ذلك القاء القبض عشوائيا على 11 فرد من جماهير نادى الزمالك و الذى أجمع الكل على وجودهم خارج أبواب الاستاد أثناء القبض عليهم بعد أن صدرت الاوامر بوجوب إلقاء القبض على بعض من المشجعين و تم ترحيلهم للسجن الحربى بزى السجن بعد حلق شعرهم و تقييد أيديهم و أرجلهم و تم توجيه التهم التالية اليهم
– سب وزير
– إتلاف ممتلكات حربية عن عمد
– التعدى على عساكر حربية أثناء تأدية عملهم

المشجعين التسعة ( بعد ان تم الافراج عن إثنين منهم لأسباب السن ) ينتظرون الان العرض على النيابة العسكرية يوم الثلاثاء القادم ، و تناشد أهالى المشجعين المسئولين بالافراج عن أبنائهم لإرتباطهم بدراسة خاصة و ان جميعهم طلبة جامعيين .

انا ماليش في الكورة، بس المدونة دي نصيرة المضطهدين بما فيهم الزمالكاوية، الا الواحد لما يبقى زملكاوي يترحل للسجن الحربي ليه؟ تخيل بقى لو فيهم زمالكاوية ست ومسيحية وعضوة في الاخوان المسلمين….وعندها جرب

طيب يا ليلى ارحمي نفسك عشان غيرك يرحمك

October 20, 2008
كلنا ليلى فتحت تالت سنة
امممممممممم
طيب يا ليلى انا عمري ما شفت حد بيقرف ليلى غير ليلى نفسها
😦
كلنا بنقول كلام حلو، بس ساعة الجد اللي اتزرع في..استني، امسي راسك من ورا كده، ايوة فوق القفا على طول، اللي مزروع هنا مش بيتغير بسهولة
ساعة الجد بتقبلي على نفسك حاجات مش لازم تقبليها، وبتحكمي على الليلات غيرك احكام ظالمة وبتنحازي مع المجتمع ضدها ومش بتفكري لو كان اللي في الموقف ده عويس مش ليلى كنت قلتي نفس الكلام وحكمت نفس الاحكام وللا لا؟
بجد يا ليلى انت فخورة انك ليلى وللا لا؟ طيب عارفة ليلى دي يعني ايه وللا لا؟
عارفة ان لك مخ ومشاعر زيك زي اي انسان ولك كرامة وللا لا؟
قبل ما تنامي وانت لسة بتروحي في النوم افضلي قولي عشر مرات: انا انسان ليا كرامة..انا انسان ليا كرامة..انا انسان ليا كرامة
لحد ما عينك تروح في النوم
عشان تعاملي نفسك كإنسان له كرامة يقوم المجمتع كله يعاملك على انك انسان وعنده كرامة
كنت اتكلمت مع لست أدري بخصوص ليلى، بس قلت لها اني ما عنديش حكاوي ليلى انا عندي حكاوي الست ام ليلى، وبعدين بصراحة طنشت لان كلامي مش ح يعجب حد، خصوصا ان حكاوي الست ام ليلى حكاوي تحزن ومقرفة
كمان ليلى نفسها ما عندهاش استعداد تسمع الكلام اللي ح اقوله
ملحوقة: انا مش مبسوطة من نغمة التريقة اللي عند بعض الاخوة الرجالة من المدونين اللي مش ناقص غير يقولوا: الحق الحق الحق الفرخة اتكلمت
بس اللي مضايقني اكتر رد الفعل للناس اللي بتدافع عن ليلى…مالكوا فيه ايه هم مش ماسكين ذلة عليكوا يعني دي ناس متخلفة اصلا
———
تحديث:

ده استطلاع رأي للاناث
وده استطلاع راي للذكور
ياريت تجاوبوا عليه انا جاوبت…على استطلاع الاناث طبعا 🙂

أيوة غضب من ربنا

October 19, 2008
أنا بجد مش عارفة ايه الحساسية اللي بقت عند الناس من سيرة ربنا دي؟ لو كانت عند ملحدين كنت قلت اوك..شغال، حقهم يعني، حتى لو انا ما عنديش حساسية من الالحاد زي حساسية الالحاد من الايمان، فده طبيعي ان الملحد يحس انه في موقف ضعيف وبيدافع بشراسة عن نفسه، انا مش بازعل منهم خصوصا ان معظم الملحدين اللي عرفتهم بيبقى عنده اسباب ما بيبقاش ملحد غلاسة كده، فيه ملحدين غلاسة بس مش كتير، ما علينا ده مش بوست عن الالحاد
الغريب بقى ان كتير من المؤمنين بربنا اتريقوا على بعض الناس اللي قالت ان الانهيار الاقتصادي غضب من ربنا! وعوجوا ضبتهم وقالوا: بطلوا التفسيرات الغيبية فيه تفسير علمي للظاهرة. اه ماكل حاجة ينفع تتأصل علميا حتى ربنا نفسه. وانا مش شايفة اي تناقض ما بين التفسير العلمي واننا نقول ده غضب من ربنا. دي حاجة تانية غير تفسير ان الفقرا بيموتوا في الدويقة عشان ربنا غضبان عليهم، لانه كلام مش منطقي، كل الناس بتموت، ودول ماتوا شهداء ان شاء الله، كمان التفسير ده مالوش اصل علمي ولا فقهي
لكن ان فيه ناس بتقول ربنا غضبان على النظام الاقتصادي وعشان كده انهار ده لا يتناقض مع التفسير العلمي للانهيار الاقتصادي بالعكس ده مرتبط بيه ارتباط وثيق.
الناس المؤمنة بربنا، لا مؤاخذة يعني احنا اسفين والله مش عارفين نعتذر عن الخطأ الجسيم ده ازاي؟ بس نصيبنا بقى معلش، الناس الوحشين العيانين اللي زينا كده مؤمنين ان ربنا حاطط نظام للانسان وللكون، وانه ادانا ارشادات عشان النظام ده يمشي بشكل صحي وسليم. وان المحرمات دي مش عشان ربنا عايز يضايقنا بس عشان دي حاجات بتخل بالنظام وبالتالي تصيبه بالامراض وتودي به الى المهالك.
يعني مثلا في التراث بتاعنا، الديني والشعبي، نعرف الامثال اللي بتقول: لكل ظالم يوم، وفيه مثل تاني مش عارفة ليه انقرض بس المفروض انه مثل صعيدي قديم: قاتل النفس ما يموتش بخير، ومثل تاني: قاتل النفس فاضح نفسه.
وده كله مستمد من العقائد الايمانية ان ربنا ما يسيبش الظالم ولا قاتل النفس ابدا.
طيب فيه تفسير علمي لكل ده، الانسان بتكوينه السوي المفروض انه مش من الطبيعي انه يظلم، ولا من الطبيعي انه يقتل، وفعلا في علم النفس، القتل بالذات بيشكل عبء نفسي على البني ادم كبير قوي، وبيأثر على أحلامه وسلوكياته وتصرفاته في كل حاجة. البني ادم لما بيضغط على طبيعته الانسانية وبيحملها ظلم او قتل، هو بيحملها فوق طاقتها، وهي لازم بتعمل رد فعل للحمل ده، باي حاجة، ممكن بانه يفضح نفسه زي المثل ما بيقول، بمعنى انه يسيب دليل يدل عليه، اللا وعي بيخليه يرشد عن نفسه وهو مش حاسس ومش قاصد وعقله الواعي اكيد مش عايزه يرشد عن نفسه، وممكن بانه لو فلت يعيش طول حياته بيحاول يتخطى فكرة انه قاتل او ظالم، وعليه بيتصرف تصرفات هيستيريه قد تودي به الى المهالك لانه بيبقى عامل زي اللي بيهرب من عفريت، يمعن في السكر مثلا، يمعن في الظلم، المهم انه في رحلة هروبه بيبقى فيه صراع ما بين اللا وعي الرافض لفكرة القتل او الظلم والوعي اللي بيحاول يخنق الذكرى وتأنيب الضمير، الخناقة دي لازم بيبقى فيها خسائر نفسية وجسمانية غصب عنه، وعشان كده مش بيموت بخير. مهما عقله الواعي حاول يمنطق الظلم بيفضل عقله اللا واعي يطلع له زي العفريت. طبعا الكلام ده مش تحليلي يعني انا ايش فهمني في الكلام ده انا بنت الشيعب 🙂 ده من الكتب.
وكل حاجة في الدنيا كده، كل حاجة تخل بالنظام الكوني اللي في اساسه مبني على انه يبقى خير وكويس بتدمر نفسها بنفسها. طيب النظام المصرفي قائم في اساسه على النصب. احنا منصوب علينا.
احنا في ايدينا ورق مالوش غطاء دهب وبنتصارع عليه وبنموت بعض عليه وهو ورق…ورق مالوش قيمة، ولع فيه يا عم ده ورق. والنظام المصرفي ده القائم على النصب، قائم كمان على الظلم، فكرته في الاساس قائمة على ان اللي معاه كتير يزداد كترة، واللي مش معاه يزداد فقر، وده بالظبط فكرة الجلا جلا اللي موجودة في الرابط اللي انا حاطاه. بتاع الكوتشينة اللي بيقول لك فين السنيورة بيعمل ايه؟ بيخليك تحط رهان، هي فلوسك اصلا، وبيقول لك فين السنيورة، لو ما عرفتش هو اخد الفلوس، ولو عرفت انت ما اخدتش حاجة لان دي فلوسك اساسا، وانت تضحك وتنبسط ويتهيالك انك كسبت، انت يا حمار ما كسبتش حاجة الفلوس دي كانت في جيبك اصلا.
طيب بتاع الكوتشينة ده اسمه ايه؟ اسمه حرامي، اسمه نصاب، اسمه ظالم. اسمه فلوسه الحرام ربنا مش ح يبارك له فيها، ازاي؟ فيه تفسير علمي، نفسي واقتصادي، يخليه برضه يطلع من اللعبة في الاخر خالص خسران. بس كون ان فيه تفسير علمي نفسي واقتصادي لانهيار حياة بتاع الكوتشينة ده ما ينفيش الايمان بالغضب الالهي بالعكس ده يؤكده، يؤكد ان ربنا، واضع النظام، لما قال اعملوا كذا كذا عشان النظام يمشي صح، ولو عملتوا كذا كذا النظام ح ينهار، كان معاه حق. (معلش اللي ح يزعلوا من كلمة كان معاه حق دي خلوها عليا انا مش باكلمكوا انتوا انا باكلم ناس تانية)
وعليه فاختصار التحليل الاقتصادي الطويل في انه غضب ربنا هو مجرد تلخيص للتحليل العلمي مش تناقض معاه.
آه، انا سامعة جملة غبية اهي….جاية من هناك اهي: ايوة، يعني الناس بقى تسيب الاقتصاد ينهار ويولع بجاز وتبطل تفكر في حلول وتروح تصلي نقوم نصحى الصبح نلاقي الاقتصاد اتصلح.
….
على فكرة للحظة وانا باكتب البوست فكرت في اني اقول: طب انا مش باحب ارد على الغباوة حد يرد مكاني.
وبعدين رجعت في كلامي انا ورايا ايه؟
اولا غضب ربنا على الظلم يستوجب العقوبة، العقوبة عمرها ما تترفع بمليون ركعة يصليها مليار بني ادم، عقوبة الظلم لا ترفع الا برفع الظلم.
اذا كان النظام الاقتصادي – الرأسمالي الوسخ – قايم على الظلم والنصب، على تتخين الكروش اللي هي اصلا تخينة وتجويع البطون اللي اصلا جعانة والتجارة في كل حاجة، كل حاجة حتى المية والمعلومات اللي من حق الانسان، وتصنيع ورق والضحك بيه على الناس وهو مالوش غطاء. يبقى ولا مليون صلاة، ولا مليار دولار يطلعوا زكاة للفقرا ح يجبروا الظلم ده، ولا النظام الاقتصادي ح يتصلح، لان اصلا المليار دولار دول نصب نصب، ده ورق….انت تضحك على الناس بس مش ح تضحك على ربنا. اول حاجة نعملها اننا نبطل نصب من اساسه، وبعدين نوجد حلول انسانية تخف الدهون من الكروش وتملا البطون الخاوية
عموما انا شخصيا شايفة ان فات الوقت على الحلول، ولو لقوا حلول ح تبقى مجرد حلول لتأجل الكارثة لكن هي واقعة واقعة، وان شاء الله اكون مت شهيدة قبل ما العالم يرجع لنظام المقايضة تاني، بس هو راجع يعني. ان ما كانش في العشر سنين اللي جاية تبقى كمان عشرين تلاتين خمسين ميت سنة
ايه ميت سنة في عمر الانسانية؟ بس راجع…عشان الانسان افترا قوي، احنا مفروض موجودين مع بعض عشان نساعد بعض على العيشة مش عشان نتاجر في بعض ونعيش على جثث بعض.
كلنا ايدنا في النظام ده، كلنا بناكل لحم بعض، انا بعربيتي ام قسط 400 جنيه والكام ورقة اللي في شنطتي مشاركة في النصباية دي، انا باكل لان غيري جعان، انا عايشة لان غيري ميت.
انا عارفة الكلام الغبي ح يكتر: يعني الغلابة اللي بيوتهم اتخربت بالانهيار الاقتصادي، الغلبان اللي راح اتذل في الخليج ورجع فلوسه راحت في البورصة ومات من الحسرة ربنا غضبان عليه؟
لا ربنا ما بيغضبش على غلابة، انا قلت فوق اهو: ربنا غضبان على السيستم لانه غير انساني، لانه سيستم خلا الغلبان ده يقبل الذل على نفسه في الخليج، ولو كان سيستم رحيم ما كانش اضطره للغربة والبهدلة والذل، هو مات من الحسرة، ما كلنا ح نموت، من لم يمت بالبورصة مات بغيرها. العمارة المبنية باسمنت مغشوش بتقع فوق الغلابة، الغلابة مش هم المذنبين، واهم ماتوا وارتاحوا، المقاول هو المذنب وح ياخد جزاءه.
ثم احنا من حقنا نجيب سيرة ربنا يعني، وللا هو ممنوع؟
اه…هو غالبا ممنوع، عشان الناس كده شكلها زعلانة من ربنا. طيب ربنا مش هو اللي قال للمشايخ تحلل البنوك والبورصة بدل ما تقول ده نظام ظالم، مش ربنا اللي قال للمشايخ تلوي عنق الدين وتبرر للظلم ولتجويع الناس او حتى انهم يفتوا في اللي ما يعرفوش فيه. مش ربنا اللي قال للدعاة خليكوا مع الاغنيا وريحوا ضميرهم كمان. ثم اخيرا مش هو اللي قال لنا ننصب على بعض، ولا هو اللي قال لنا كل ما تتزنق وعايز تبرر لنفسك حاجة انت عارف من جواك انها حرام تروح تسأل شيخ عشان يريحك ويشيل الوزر عنك، انت عارف انها غلط امال بتسأل فيها ليه يا روح خالتك؟ لو عارف انها صح ما كنتش سألت
نعمل البلاوي ونرميها على ربنا وفي الاخر نزعل منه، واللقمة اساسا نازلة لنا بالسم الهاري وحوالينا الجوع ده كله، وانا اولكم، طب مش كتر خيره انها مش بتنزل بسم حقيقي؟
سيدنا الامام علي قال: اينما ذهب الفقر قال له الكفر خذني معك
وكلام كتير على لسان الامام علي: لو كان الفقر رجلا لقتلته
بس بقى ماحدش فاكر ابدا ان سيدنا محمد صلى الله عليه وسلم تعوذ من الغنى
سيدنا محمد تعوذ من الغنى قبل ما يتعوذ من الفقر
عشان الغنى اوحش من الفقر
———–
استدراك:
للتوضيح بس، بالنسبة للرابط بتاع اسلام اون لاين ده
انا مش حاطة الرابط عشان موافقة على تحليل كاتب المقال، وانما حاطة الرابط عشان المقتطفات اللي محطوطة في المقال من بعض الكتاب اللي بيوجهوا اللوم للمؤسسات الدينية اللي سابتهم يتعاملوا في الربا من غير ما تعلن موقفها الواضح من لا اخلاقية النظام الاقتصادي
لكن انا مختلفة تماما مع النتيجة اللي وصلها كاتب المقال من ان البنوك الاسلامية هي الحل، لان واقع الامر ان كل البنوك الاسلامية الموجودة هي داخل نفس المنظومة وماشية بنفس السيستم ونفس المعاملات، نفس النقد، نفس الفايدة: ياللا يا شاطر، مش انت مش عايز الفايدة؟ طب هاتها احنا ح ناخدها، خد انت الفلوس الحلال احنا عاجبنا الحرام. يعني البنوك الاسلامية بشكلها الحالي مشاركة في السيستم الظالم زي اي بنك تاني
وعليه فهي مش مشكلة بنك اسلامي وبنك مش اسلامي، هي مشكلة نظام اقتصادي كامل كله مبني على النصب، مافيش نصب اسلامي ونصب لا اسلامي
ده زي الراجل بتاع للاخوة العرب الزواج من مصريات على سنة الله ورسوله

ملحوظة تانية:
الله هو العدل وربنا بينتصر لمقيم العدل ايا كان دينه…ولو حتى مالوش دين
وبينتقم من الظالم حتى لو ما بيفارقش سجادة الصلاة
وربنا موجود، ومن حقي مدام مؤمنة بربنا اني اجيب سيرته، ورضا ربنا وغضبه شغلي الشاغل بوصفي مؤمنة بيه، والمفروض يبقى شغل اي مؤمن الشاغل
والمفروض المؤمن يبقى مؤمن ان ايمانه يتسق مع المنطق ما ينقاضوش
ولو هو مؤمن ان الايمان حاجة والمنطق حاجة تانية يبقى هو مؤمن ليه؟ غاوي جنان وتخريف يعني؟ اه..ماهي الحاجة اللي مالهاش علاقة بالمنطق تبقى جنان وتخريف
والمفروض المؤمن يبقى عارف ان رضا ربنا في العدل لانه هو العدل وغضبه في الظلم، والمكان اللي فيه ظلم ربنا لا ينظر اليه، والعالم بقى كله ظلم