Archive for the ‘يلعن ابو شكل العنصرية في الارض’ Category

الله يكرم اصلك ده بس من ذوقك والله

November 14, 2008

يخرب بيت السحنة شكلك اسمك آشير وتلاقيك اخنف اصلا

احنا عمال نظافة؟ يقصد يقول زبالين يعني، طيب يا سيدي…وماله، مالهم الزبالين؟ احسن ناس، على الاقل بيشيلوا وساختكوا، ده شيء يشرفنا، انتوا توسخوا العالم واحنا ننضفه مافيهاش حاجة دي
لا وايمانويل بيلبسنا العمة، يعني يا حاج اعتذرت وقلنا ماشي المسامح كريم، لكن تاخدك الجلالة وتقول: وأضاف إيمانويل أن هذه ليست القيم التى تؤمن بها عائلته أو التى تربى عليها.
طب ليه يا زكريا يا اخويا بتستغبانا؟ بتستغبانا ليه يا زكريا يا اخويا؟ يا اخويا ليه زكريا بتستغبانا؟ يعني ابوك كان ارهابي في العصابات الصهيونية، والراجل كبر وخرف وبيقول كل اللي في قلبه، وانت تربيته، وتقول لنا احنا ناس زي الفل ومش ده الكلام اللي احنا بنؤمن بيه عندنا في البيت ده احنا حتى كنا بنبعت طبق عاشورا لجيرانا العرب؟ ما تخليك وائعي كده وتقول لنا كلام نعقله يابن عمي
cousin
كل ما تسافر في حتة وتلاقي واحد شكله اسمه اشير يقول لك في وسط الشارع: هيللو كازين، حتى في انجلترا اللي الناس فيها هم الفيرجن الاوروبي للاردنيين
يو نيد اه هيلب كازين؟ هاف اه درينك كازين؟ ار يو لوست كازين؟ وسبحان الله يا اخي ييجوا عندنا يموتونا ويشوفونا في اورومبا والدول المتقدمة ماحدش يتلاطف معانا غيرهم ولا كأنه لسة مموتك من تلات دقايق
معلش برضه في الغربة الدم بيحن كازين، وانت بقى حايس، ح تعمل له ايه؟ واحد وسط ناس غلسة وبتبص لك على انك كائن فضائي (خصوصا واحدة محجبة) ومافيش غيره يقول لك تركب انهي مواصلة وتمشي من انهي شارع ويضحك في وشك، وما تعرفش هو ايه غير لما تسمع كازين. وابن اللئيمة ما يقولهاش غير في الاخر خالص بعد ما تكون ضحكت وارتاحت وتنزل عليك كازين كأن عقربة لدعتك: اوه..ثانك يو..ثانك يو…اكسيوز مي..
طب انا متأكدة ان الراجل بتاع عمال النضافة ده ياما قال: نايس سوت كازين…دونت ووري ال هيلب يو ثرو ايت كازين…ولما يطلع اللي في قلبه يقول عليك زبال
السؤال اللي بيطرح ويجمع ويضرب ويقسم نفسيته بقوة، طب احنا بيتقال علينا عمال نظافة (ده بالنوسبة للفقرا) او مفاجيع وبتوع نسوان وقمار (ده بالنوسبة للاغنيا) هلبت بقى احنا، كاحنا يعني، بنفك عقدنا على بعض ونجلد بعض ونضطهد بعض ونقلب على بعض ونمارس على بعض كل انواع العنصرية ليه؟ ليه عاملين زي الراجل اللي بياخد على قفاه من كل حتة ومش عامل راجل غير على مراته وعياله؟ وليه بنتبرى من بعض اذا كانت كل محاولات تبرؤنا من بعض تبوء بالفشل الذرييييييييييييييييييييييييييع، وفي الاخر بنتحط كلنا في سلة واحدة غصب عن بوزنا (خصوصا بقى ان اكتر ناس متعرفين في اذهان الكازينز انهم عرب هم اللي بيقولوا احنا فراعنة…احنا فينيقيين..احنا افارقة…يمكن اكتر من اللي لابسين عقال، لا والنكتة الجديدة بقى ان فيه ناس في الخليج دلوقت بتقول احنا مش عرب!)
يعني ايه اعتذر؟ ما الكلمة طلعت واتهزأنا في العالم وخلاص، واللي ما شافهوش وهو بيتكلم شاف ابنه وهو بيعتذر، يعني الاعتذار جزء من التهزيء (خصوصا ان رئيسة الجمعية العربية الامريكية ضد التمييز يهودية كمان!) وماحدش بقى طلب طرد السفير الامريكي من اي دولة عربية عشان احنا جزم ومش فالحين غير نتنطط على بعض وده يقول لده انا معايا فلوس وانت شحات، وده يقول لده ياما اكلناكوا وعلمناكوا انتوا فلوس مع تيوس، وده يقول لده انتوا اصلا خونة خلقة ربنا، وده يقول لده بطل الحنجوري انت اصلا غبي…طب ليه الغجرنة دي؟
اما زبالين صحيح

يا ضنايا يا ابني…انت متهرش؟ نهى رشدي مفترية بصحيح

October 24, 2008
صباح الخير، معلش انتوا عارفين بعد لفة ع الريدر بيبقى شكلي كدهو
المهم بعد اللفة لقيت ان المدونين اليومين دول اغلبهم مالهمش سيرة الا نهى رشدي، معظم الناس فرحانة بيها، وفيه كام مدون قرر انه يصعب عليه شريف اللي اخد تلات سنين ويوجد له اعذار ومبررات، وح نعتبرها مصادفة انهم رجالة
بادئ ذي بدء احب اوضح اني عارفة كويس اعذار ومبررات شريف والاسباب اللي دفعته وبتدفع غيره لجريمة التحرش او اسمها القانوني هتك العرض يا مصريين يا بتوع الشرف واحلى من الشرف مافيش يا آه يا آه
واعذاره لا ليها دعوة بالكبت الجنسي، ولا بلبس الستات
ثانيا انا فعلا صعبان عليا شريف وغير شريف بسبب اعذاره ومبرراته وعشان كده فرحانة له انه اتسجن
وانا مش شايفة ان نهى انتقمت منه انا شايفة انها بتعمل لمصلحته وبتربيه عشان تعمل منه راجل حيث ان امه ما عرفتش تعمل الحكاية دي
اما بخصوص رأي بعض المدونين في ان المسألة اتقسمت كأنها صراع ما بين ستات ورجالة فالحقيقة الكلام ده مثير للغثيان فعلا
يا جدعان هو احنا ما بقاش عندنا نخوة وللا ايه؟ ده حتى شرف البنت زي عود الكبريت
افففففففففف لا مش قادرة اتكلم بطريقة ح اجوزك هنومة يا قناوي يابني اكتر من كده
طيب
طول عمر الرجالة في حوض البحر المتوسط بيعاكسوا الستات، في سوريا بيبرموا شناباتهم، واغلب الظن ان الهدف ورا كل الشنبات اللي في سوريا دي انها تتبرم للستات بس، ماهو انا شخصيا لما رحت ما لقيتلهاش اي استعمالات تانية برغم انتشارها كالنار في الهشيم، في ليبيا والمغرب بيلعبوا حواجبهم، اه والله العظيم لسة في الزمن ده حد بيلعب حواجبه، في فرنسا يعدي جنبك ويقول: ماجنيفيك، في ايطاليا يعمل لك فضيحة في وسط الشارع ويفتح زوره: سنيورة بللاااااااااااااااااااااااااااااااااااااا، في لبنان هم سايحين على روحهم على طول اول ما يشوف واحدة ست انشالله قد جدته يتحول ويفضل يسمبس ويصوصو ويتنهد ويتنحنح ويسبل ويبربش، حتى لو لسة خارج من كنيسة وللا جامع هو بيعتبر ده واجب وطني ويمكن معتقد انه بياخد ثواب، وفي مصر كانوا…كانوا..بيحبوا يبتكروا ويقولوا جمل طويل ما تلحقيش تسمعي بقيتها: هو القمر نزل م السما امتى…وانا اقول ياربي القمر راح فـ….(خلاص انتي مشيتي وهو لسة بيتكلم) ولو سايقة عربية ييجي جنبك: العجلة يا انسة العجلة..انت: مالها؟ بتنقط ثكر وعثل.. الا انت بتمليها في انهي منحل وللا…(الاشارة فتحت وانت مشيتي وبرضه هو لسة بيتكلم) احنا شعب رغاي بطبعنا.
لكن لما واحد يمسك ست من صدرها ويسحلها على الارض ده اسمه معاكسة؟ ده له اي علاقة بالجنس من قريب او من بعيد وللا ده واحد عايز يذل واحدة؟
لما ميت واحد يجروا ورا واحدة ويهبشوا فيها لحد ما يقلعوها هدومها ويقعدوا يضحكوا ويسيبوها ويجروا ورا واحدة تانية
ده شبه ايه؟ ده شبه اي حاجة لها علاقة بالكبت الجنسي؟ وللا ده عامل زي الماتشات الرومانية ما بين الاسد والعبد؟ او شبه عملية سحل هيباتيا عالمة الرياضيات، ماحدش يقول لي ان الناس اللي سلخت جلد هيباتيا وسحلتها في شوارع اسكندرية كانت بتتحرش بيها، ولا حد شرح جسمها بالاصداف عشان هي مزة وانما عشان هي عالمة رياضيات وفلك وهم كانوا شايفينها ساحرة شريرة
لما واحدة تبقى ماشية، وراجل ماشي وراها يقول لها: يا شـ*** كـ*** أمك ويروح تافف عليها
ده له اي علاقة من قريب او بعيد بالجنس؟ معلش اسمحوا لي لو اي راجل في الدنيا دي فاهم ان ده الجنس فورا يتوجه إلى معالج نفسي عشان يحطه في اقرب مصحة يمكن يعرف يلحقه قبل ما يتجوز ويتورط في جريمة
اذن دي جريمة عنف، بس مش عنف عادي، ده عنف مصحوب بالرغبة في كسر العين والاذلال، بالظبط زي جريمة اسلام نبيه في حق عماد الكبير، ماحدش توقع ابدا ان اسلام نبيه كان معجب بعماد ومش طايله مثلا! ولا انه شاذ جنسيا، كلنا كنا عارفين ان اسلام نبيه كان بيقهر عماد وعايز يذله ويكسر نفسه
ليه بقى؟ دي قصة تانية بخصوص اسلام انا ما اعرفوش ولا اعرف تاريخه النفسي ولا اللي مر بيه في طفولته
لكن اللي اعرفه كويس، ان شريف، والشباب اللي زي شريف منين ما يمشوا بيتوقفوا في لجنة وبيتقال لهم من احقر امين شرطة: بطاقتك يالا…شمر وريني دراعاتك…انت بتبجح يا لا؟ بتبجح يا…امك يا ابن الـ… يا …..؟ (كل الالفاظ اللي هو بيقولها بدوره في عملية التحرش)
وزي ما تيجي تيجي بقى، شلوت…قفا…بونية (كلها حاجات شبه اللي هو بيعمله في التحرش الجنسي)
وشريف واللي زي شريف بيبقوا واقفين زي القطط السيامي، لا القطط السيامي شقية، ولا زي اي قطة في الدنيا القطة بتخربش، حتى الفار اهو بيقرقض، مش عارفة بيبقوا عاملين زي ايه؟ بيبقوا عاملين زي ولا حاجة، زي خرقة مالهاش كرامة ولا احساس
هو بيبقى واقف زي الخرقة، بس هو مش خرقة، هو انسان وله كرامة واحساس، والذل اللي بيشربه ليل نهار بيتغرس جواه ومش بيقدر يتعايش معاه لان الانسان كريم ولازم يفضل كريم عشان يعرف يعيش
طاقة الذل اللي بيشيلها فوق قدرته على الاحتمال
قوم بدل ما يقف زي الراجل، زي الراجل، ويقول للي بيذله ما تعملش معايا كده، مش ح اقول بقى يروح يشتكي ويعمل زي ما عماد الكبير عمل، لان الناس ح تقول لي ده راجل مستواه التعليمي ما يأهلوش انه يروح يشتكي، على اساس ان عماد الكبير معاه دكتوراه في الاقتصاد الدولي من اوكسفورد يعني. بس خلينا نتحدت بالصاعيدي. هو ماشي بروح امه بمطواة وللا جنزير، بدل ما يطلعهم على الغلابة في الشارع ما يطلعها على اي حد ينتهك كرامته والارزاق على الله
يعني هم راحوا فين الصعايدة اللي كانوا بيطخوا اي كلب يمد ايده على شنباته؟ احنا كنا فاكرين ان بعد قضية عماد الكبير الناس ح تتشجع انها تطالب بحقها في الكرامة احسن من كده، بس رجع ابوك عند اخوك والناس اتعاملت مع قضية عماد على انها حالة استثنائية مش عارفة ليه؟
اممممممممممممم معذور، اصله خايف، اصله بيجري على كوم لحم، اصل الامين ح يلبسه قضية
قووووووم يمشي من قدام الامين بعد ما يتذل كل الذل اللي خلقه ربنا في الدنيا ويستضعف له اي كائن ماشي في الشارع ويفرغ فيه الذل اللي هو شافه، اضعف كائن ماشي في الشارع بعد الاطفال هم الستات
اذا ربنا وفقه وعرف يعمل حاجة في عيل (نسبة التحرش واغتصاب الاطفال زادت في الفترة الاخيرة بشدة خاصة في الصعيد! دي تقارير المركز القومي للامومة والطفولة) يبقى خير وبركة، بس ده مش متاح قوي، مش متاح انك تتحرش بعيل في الشارع وتجري والناس تضحك، لان دي حاجة، لحد دلوقت، ما بتضحكش، وما بتصنفكش على انك دكر هايج، وماحدش لحد دلوقت لقى لها تبريرات، ولا حد يعرف يرمي اللوم على العيل بوصفه هو اللي اثارك، ثم ان هتك عرض الاطفال ح يعمل لك سمعة انك بتاع عيال، ودي سمعة وحشة، لكن هتك عرض الستات ح يعمل سمعة انك هايج، لا مؤاخذة، ودي سمعة يتمناها اي راجل مصري، خصوصا لو ما كانش هايج ولا حاجة
نصيحة لوجه الله: والنبي اللي بيرغي ويحاول يأكد في حاجة كتير بيبقى باين لاي عيلة عندها خمس سنين انها مش فيه فبلاش تخلي شكلك وحش يعني
اذن التحرش بالنساء في الشارع جريمة عنف تنفيسية مرتبطة بالقهر ومالهاش علاقة بالجنس
طيب موضوع اللبس عشان نخلص منه ولاخر مرة:
لو بنت مش لابسة حجاب (حتى لو لابسة جلابية بلدي) يتقال لها مش شايفة اللي انت لابساه؟
لو محجبة يتقال لها: ده حجاب ده؟ بس لمجرد انها لابسة الوان لايقة على بعض
لو منقبة تبقى حاجة من الاتنين: يا اما راجل متخفي وعايز يسرق كل الناس اللي ماشية في الشارع يا اما على رأي مينا: يقولوا عليها دي مشيها بطال ومتخفية ورا النقاب
وعليه فكل انواع الملابس مستحلة في الشارع المصري
لانه تااااااااااااااااااني الموضوع مالوش علاقة بالجنس خالص، هو بيحاول يلاقي مبرر، وبما ان الست دايما مدانة، ده اساسي يعني في كل حاجة، في بيتها: ماهو انت مقصرة في البيت عشان بتشتغلي، لو مش بتشتغل ما انت عمالة تتخني وجالك تخلف من القعدة في البيت
مع جوزها: ماهو بص برة عشان انت مش واخدة بالك من نفسك..أو..انت قاعدة ليل نهار قدام المراية وعند الكوافير؟ فين اهتمامك ببيتك وولادك يا هانم؟
في الشارع: ما تشوفي انت لابسة ايه ( في كل الاحوال احنا عايزينكوا والنبي تلفوا على دواليبنا وتقولوا لنا بالظبط انتوا عايزينا نلبس ايه عشان نخلص)
في الشغل: ماهو انت عشان البيت والعيال مقصرة في شغلك…انتوا مالكوا ومال الشغل
ولو شاطرة: ما انتوا السبب في بطالة الشباب عشان بتشتغلوا وواخدين مكانهم
المهم احنا غلطانين وخلاص
صح، احنا غلطانين فعلا، احنا غلطانين عشان مش بنعرف نربي رجالة يتحملوا المسئولية ويواجهوا بدل ما يستوطوا لهم حيطة عشان يميلوا عليها
اللي عنده مشكلة بطالة، يا اما هو مش عايز يشتغل (وده احتمال ضعيف) يا اما الحكومة مش عايزة تشغله وتبقى مشكلته مع الحكومة، لو راجل يواجه الحكومة او يتلط ويسكت
اللي بيتذل ويقبل الذل من غير ما يدور على حقه من اللي ظلمه ويتجدعن كده زي الشباب الجدعان (القليلين) اللي بيواجهوا الحكومة، واللي بالمناسبة برضه مش عارفين يتجوزوا، واللي بالمناسبة ولا واحد فيهم بيتحرش باي حد، واللي بالمناسبة هم اللي بيعملوا حملات ضد التحرش
اللي مش زيهم يروح يندفن بدل ما يفرغ غلبه في اعراض الناس في الشارع
مين قال ان نهى رشدي انتصرت للستات؟
بالعكس…دي احرجتنا كلنا، عشان هي الوحيدة اللي قامت بواجبها
اه، ماهو بما اننا كلنا غلطانين دايما، وبما ان بعض المدونين مصممين يصوروه على انه صراع بين الرجالة والستات ولا كأن دي اعراض ناس، ولا كأن ان اللي في الشارع دي لها اب وللا اخ وللا مالهاش ده كله لها رب، فبص يا كابتن انت وهو، احنا ربنا خلقنا في الدنيا دي عشان نربيكوا، مين اللي رباك يا بابا؟ ماما مش كده؟ طيب
اللي الست الوالدة عرفت تربيه وتطلعه راجل محترم، كتر خيرها كفتنا مجهود اننا نربيهولها
اللي تغلط فينا فعلينا اننا نصلح غلطتها ونربي لها ابنها اللي ناقص تربية، ونعلمه ازاي يبقى راجل
وسيبنا بقى من جمعية المرأة المتوحشة وخلينا في التراث المصري: ابنك على ما تربيه وجوزك على ما تعوديه والظاهر اننا مضطرين كمان نربي ونعود اللي ماشيين في الشارع حيث ان الستات هم اللي مقصرين في التربية
مش الستات دايما غلطانين والرجالة معذورين؟
مش الست شغلتها تربي العيال؟
ماشي يا قناوي يابني….يبقى احنا ربنا خلقنا عشان اللي امه ما علمتوش الصح من الغلط احنا نعلمهوله بما انه متبرمج على انه ما يتعلموش غير من واحدة ست، اذا ما كانتش امه يبقى اي واحدة بقى.
كخ..كخ يا بابا…عيب يا ولد
اذا كان فيه ناس معتبرين ان نهى رشدي قاسية، وناس تانية معتبرة انها: لولا انها متعلمة ومن فئة اجتماعية معينة ما كانتش عرفت تحبسه

طيب تعالوا بقى نشوف اللي مش متعلمة ومش من فئة اجتماعية معينة بتعمل ايه؟ واحدة اعرفها كانت راكبة اتوبيس (هي بنت بلد وتعليمها على قدها وبتشتغل وشقيانة)، راح واحد وقف وراها، الناس كانت شايفة وماحدش اتكلم على اساس انها اكيد مبسوطة مثلا! قامت البنت سابته يخلص عشان ما تضايقهوش (قلب الام بقى)، وبما انها محجبة ولابسة عباية، راحت بحركة سريعة شادة دبوس الطرحة من راسها في نفس الوقت اللي التفت له فيه وراحت….احم…شغل خيالك…بس خيال يكون شبه جلادياتور او بريف هارت او لقاء مع مصاص دماء.
المهم يعني دي كانت اخر مرة بالنوسبة لهذوها الصخص، وبما انه كان محروم من الجواز غصب عنه يا قلب امه، فهي قررت انه يبقى محروم من الجواز بخاطره عشان ما يحزنش على روحه تاني (قلب الام بقى)
الغريب ان البنت بتقول لي انه طول ما كان واقف وراها ماحدش اتدخل واول ما اعملت الدبوس اعمالا الاتوبيس كله اتدخل عشان يخلصه من ايدها، بس هم مين، البت تقريبا وزنها اربعين كيلو بس الغل اداها قوة خمسين حصان
ها؟
عموما هو معروف ان الامهات من بنات البلد تربيتهم بتبقى شديدة شوية عن تربية الامهات من البنات اللي من “طبقة معينة”
وبما ان نسبة لا بأس بها من الذكور في مصر لسة بيحملوا التكوين النفسي الطفولي: والله مش انا ده هو يا ميث…ماهو اللي زقني الاول يا ميث عشان كده خزقت له عينه….مش قثدي…عااااااا
اذن فما حدش بيكبر على امه بقى….والام اللي بتربي مش اللي بتخلف
لو تخيلنا طابور طويل كل واحد بيضرب اللي قدامه بالقفا، لو واحد في نص الطابور بدل ما يضرب اللي قدامه التفت وضرب اللي ضربه اتجاه الضرب ح يتغير
وللا ايه؟

العنصرية والطائفية مرض القهر والاضطهاد

October 17, 2008
سبقنا اليها اليهود اللي فضلوا قرون يضطهدوا ويساء الى سمعتهم ويتقال لهم يا بخلا يا مرابين ياللي بتقطعوا لحم الناس يا شايلوك
النتيجة: الصهيونية
والافرو امريكان اللي مات منهم 150 مليون في البحر وهم في الاغلال مساقين الى العبودية
النتيجة: بقوا يقولوا ربنا اسود والشيطان ابيض
اليهود والافارقة في امريكا عانوا من الفتن بينهم وبين بعض بس عرفوا يتجاوزوها مؤخرا
الافرو امريكان بقوا
integrated
وبقى بعض…بعض منهم يزاول امراض القهر والاضطهاد على ناس تانية: زي العنصرية ضد العرب مثلا!!!!!
على اساس انهم بقى من العالم المتحضر
واليهود بقوا اسرائيل، مش محتاجة شرح
احنا لسة في طور الطائفية والفتن الى جانب العنصرية اللي ابتدت تتنامى
ربنا يوفقنا كده وشوية وح نبقى زي الصهاينة، ان شاء الله نتجاوز الفتن، بس بقى ح نعمل ايه؟ ح ننزل قتل في مخاليق ربنا عشان احنا احسن من كل الناس وكل اللي غيرنا حيوانات غير عاقلة؟
المقهور والمضطهد لمدد طويلة قوي، قرون مثلا، بيكتسب صفة جديدة وهي الوضاعة، مش بيبقى عنده الشجاعة انه يواجه اللي بيقهره ويضطهده، ما تقدرش تلومه لانه فعلا عيان،
وفي نفس الوقت فوق طاقته انه يتحمل التحقير والتنكيل وهدر الكرامة طول الوقت لان ربنا خلق الانسان كريم
الانسان اللي طول الوقت بيتقال له يا حقير يا زبالة بيبقى عايز يصرخ ويقول انا مش حقير انا مش زبالة انا انسان، وبعد شوية لما الموضوع بيطول ويزيد بيبقى عايز يقول: انا احسن منكوا كلكوا انا احسن واحد في الدنيا
من حقه يصرخ في وش اللي ظلمه وقهره ويقول له كده لانه هو احسن منه فعلا
بس هو مش بيقدر، بيخاف، مش بس بيخاف، هو بيقتنع فعلا انه اقل من اللي بيقهره
فبيمارس القهر والظلم والعنصرية اللي بتمارس عليه ضد نفسه وضد اللي اضعف منه، وكل اللي اتعمل معاه بيعمله في غيره
بس له علاج قبل ما الحالة تتفاقم، انه يفهم ان اللي بيقهره ده مش هيركليز ولا حاجة، وانه مش احسن منه، لو ما لحقناهوش يبقى خلاص تحول
وهكذا كانت اسرائيل، في الاول كان اليهود بيضطهدوا بعض وطائفيين ضد بعض بجنون، عاملين زي العرب كده دلوقت، وبعدين ربنا وفقهم وانتقلوا من مرحلة الطائفية الى مرحلة العنصرية
واحنا ماشيين على نفس الطريق بوصفنا اجدد في مجال الاضطهاد منهم يعني هم مضطهدين من ايام الاستاذ خشبة، احنا اول مرة نتهزأ كده الحقيقة في القرنين اللي فاتوا دول بس، ووصلنا دلوقت لمرحلة عظيمة، ودي حاجة جديدة الحقيقة احنا طول عمرنا مدلعين، اقصد مدلعين في الاطار ده ماحدش كان بيضطهدنا بشكل عنصري، والحقيقة ولا احنا كان خاطر في بالنا موضوع العنصرية دي، بس على رأي اطاطا مافيش حاجة بتفضل على حالها، وادي في ماشيين في السكة
لحد ما ربنا يوفقنا ونبقى كيان عنصري دموي حقير زي اسرائيل
حاجة من الاتنين: يا اما نعذرهم ونتفهم الحالة المرضية اللي هم وصلوا لها
يا اما نفوق لنفسنا ونتعلم من غيرنا ونفهم اننا لو ما شربناش اللبن ح نبقى زي عمو الجرسون
المظلوم مسكين، المضطهد يستحق التعاطف
لحد ما يتحول زي مصاص الدماء ويبقى هو الظالم وهو العنصري، مهما كانت اعذاره
العنصري مالوش علاج غير انه يفضل يتعامل كحشرة لحد ما يبطل يتعامل مع الناس كأنهم حشرات ويعرف ان الله حق وان كل البشر سواسية
لا ينفع يتعمل معاه سلام ولا وئام ولا ينفع يبقى استخبارات صديقة
الطائفي اللي فاكر نفسه هو الوحيد اللي ربنا بيحبه وبيكره كل الناس، مالوش حل غير انه يحس انه مكروه من كل الناس لحد ما يتأدب ويعرف ان ربنا خلق الناس زي ما خلقه وانه بيحبهم زي ما بيحبه
لا ينفع حد يقرب معاه ولا يتكلم معاه اصلا

كيفية السيطرة على العبيد

October 12, 2008
عارفين اللي كاتب التدوينة دي عنده كام سنة؟ يا عييييييييييييب الشووووووووووووووووووووم
اقروها يمكن تنفعكوا…انا شخصيا نفعتني خصوصا الجواب اللي هو ناقله عن ويلي ويلش

أشوف فيك يوم يا لطفي

October 10, 2008
دلوقت كل شوية البي بي سي تطلع لنا باستطلاع رأي تقول لنا ان الناس في اوروبا وامريكا بعد الازمة الاقتصادية حاسين ان اليهود هم السبب في الازمة الاقتصادية مما رفع معدلات مشاعر العداء لليهود والمسلمين! والنبي يعني المسلمين دول في ديل اي مصيبة؟ طب اليهود هم اللي عاملين النظام الاقتصادي المنيل ده وهم المسئولين عن اقتصاد العالم ونظام القروض المقزز اللي تسبب في الانهيار الاقتصادي، المسلمين بقى ايه وضعهم؟ بيفكروني بسنبل اللي كانت كل ما تحصل له مصيبة حتى لو اتنشل في الاتوبيس يقول: اشوف فيك يوم يا لطفي! طب لطفي ماله؟ طب ده حتى الشوية اللي كان معاهم فلوس بورصتهم وقعت، ومخضوضين. ياللا بصراحة في داهية مال الكنزي للنزهي وبدل ما نقعد نقول ح نحصل امريكا ازي ح نحصل اوروبا ازاي الخليج معاهم فلوس ومش بيعبرونا….اهم كلهم ح يحصلونا واحنا قاعدين في مكانا وضربوا الاعور على عينه، يعني بتوع الدويقة ح يتأثروا بانهيار البورصة ازاي يعني؟ الزبالة اللي كانوا بيدوروا فيها ح يقل مستواها؟ على الله تخرب في الدنيا كلها
بس انا مش عارفة ليه قلبي حاسس انها مش ح تخرب على دماغ البعدا ولا حاجة، وانها برضه يوم ما تخرب ح تخرب على دماغ لطفي بس، ولطفي بس هو اللي ح ينضرب بالجزم ويدفع من جيبه وكمان يتشتم وكالعادة ياخد على قفاه: انت مش لابس الطاقية ليه؟
وبرضه قلبي حاسس ان الازمة دي مصنوعة ومقصودة مش غصب عنهم ولا حاجة، واللي دايما كانوا كسبانين ح يطلعوا منها برضه كسبانين وماحدش ح يخسر غير الغلابة زي كل مرة. ده مجرد احساس ماعنديش عليه دليل
بس عادة هو الشر اللي بينتصر في الاخر واللي معاه مليارات عمره ما بيسيب ملياراته تروح ده ممكن يولع في الكون عشان يفضل ماسك في فلوسه، انا شخصيا عمري ما شفت ملياردير افتقر…حد فيكوا شافه؟
الا صحيح ح يعملوا افراج صحي لهشام طلعت عشان عنده ضغط وقلب وسكر؟ اللهم صلي على حضرة النبي كل النسوان دي وعيان؟ امال لو كان بصحته كان عمل ايه؟ ادي غلطة ايمن نور…انه متجوز واحدة بس لو كان رافع راسنا في الامة العربية كان اخد افراج صحي.

ولا الستات وحياتك

September 14, 2008
دي دراسة بتقول ان الرجالة في بريطانية مش راضيين عن شكل اجسادهم وبيعانوا من اضطرابات غذائية
طبعا مراكز التجميل تشهد ان ولا الستات في العالم راضيين كمان عن شكلهم مش بس الجسم ولا المناخير ولا البق ولا العينين ولا اي حاجة
يعني الستات وقلنا مجانين وباصين في المراية على طول…كمان الرجالة ح يتجننوا هم كمان؟
طيب سؤال: لو ما كانش الانسان اتحول لسلعة بتستغل في الدعاية والاعلان وعرض الازياء وخلافه كانت الناس كرهت نفسها بالطريقة دي؟ لو ما كانش الغذاء نفسه تحول الى سلعة رأسمالية من حق اللي يدفع وبس كانت الناس فضلت تاكل وتتخن وناس تانية بقت عبارة عن خمس نبابيت ملزقة في بعضها؟
يعني ام العولمة دي بتتاجر في الاكل وفي المية وفي الموارد الاساسية للبني ادم، وكمان بتتاجر في البني ادم، ووصل الامر انها تسببت في عقد نفسية للانسان، والانسان اصلا عشان يعرف يحب الناس ويحب الدنيا ويبقى طيب وخير لازم يبقى راضي عن نفسه وقال على راي المثل بتاع ايليا ابو ماضي: كن جميلا ترى الوجود جميلا. يقوموا يسودوا عيشة الناس ويحسسوا كل راجل انه لازم يبقى طوله كذا وعضلاته شكلها كذا وعرضه كذا وكتافه عرضها مية وخمسين متر ووسطه محيطه خمسين ميلي ويقعد يا قلب امه يعمل بودي بلدينج مش عشان يدافع عن بلده لا سمح الله ولا حتى عشان يسد في خناقة لا قدر الله بس عشان يعجب الستات ويثبت لهم انه احلى من مهند وان الست لازم تبقى طولها 170 سم ووزنها 50 كيلو ومحيط اللامؤاخذة الصدر 200 سم وكذلك محيط الارداف ومحيط الوسط 30 سم…يعني عطيات للا لالالي…ما شاء الله ايه ده كله ايه ده كله..انت لسة شوفت حاجة…قريت اهي فردة نامت…وبعدين لازم تبقى شلاضيمها طالعة ومناخيرها خرمين في وشها والمسافة ما بين عينيها وحواجبها سبعة اذرع واستك..عطيات عطيات يعني والله محمد صبحي ده مكشوف عنه الحجاب
يا كده يا الناس تكره شكلها وتكره نفسها ونتيجة طبيعية انها تكره الدنيا والناس والعيشة واللي عايشينها
وفوق العنصرية اللي ضد السود والعرب بقى فيه عنصرية ضد التخان والقصيرين والستات اللي من غير شلاضيم والرجالة اللي مش شبه فتوات بولاق، وياريتهم مساعدين الناس اللي معاها فلوس تبطل اكل، الا عمالين يعملوا اعلانات: كل كل كل….اشرب اشرب اشرب..اطفح اطفح اطفح..البس البس البس، وبعد ما يعلفوهم يقولوا لهم يا تخان يا دبب، وبعد ما ياخدوا نصيب الفقرا يقولوا لهم يا بيئة يا واطيين
يعني مش كفاية حطموا حياة الناس..وكمان بيحطموا نفسياتهم
والبني ادم لو كره نفسه ح يمشي يدبح في مخاليق ربنا في الشارع
وطبعا ده في المصلحة عشان ح يضطر يشتري سلاح وتجارة السلاح ح تنتعش والعبي يا مدرسة الالعاب
انا نفسي افهم بقى…ح يعملوا ايه بالفلوس اللي بتولد دي كلها؟

بالنوسبة للمحرم في المكتبة

September 11, 2008
حيوا تحرير المرأة في الدمام حيث سمح لها بزيارة المكتبة بدون محرم
محرم في المكتبة؟ مافيش محرم في الحمام عشان السيفون مذكر وما يصحش تنفرد بيه لوحدها؟
طيب الرسول لما قال المحرم في السفر كان عشان الستات بتسافر في الصحرا وفيه قطاع طرق وهي مهما كانت عفية برضه لما يطلع عليها خمسة في الصحرا مش ح تعرف تتصرف قوي لازم يبقى معاها حد تعتمد على قوته البدنية عشان تعرف تمشي في الصحرا، حتى من غير ما يطلع عليها خمسة، افرض طلع عليها اسد، مش ح اقول تعبان وعقربة لان البدويات بيضربوا التعابين والعقارب زي ما انت بتضرب الناموس كده، وبعدين التخيير ما بين محرم او صحبة نساء لا يقلوا عن خمسة، عشان لو حصل حاجة يعرفوا يتكاتروا وينقذوا نفسهم
لكن محرم في مكتبة؟ على اساس انه ح يحصل لها ايه في المكتبة؟ مين الاسد اللي نايم في رف المكتبة اللي في الاودة الجوانية؟ مين اللي ح يغتصبها وسط هذا العدد من البشريات وامام الكاميرات، والناس؟ ح يقفوا يسقفوا ويشجعوا وللا ايه؟ ثم محرم ايه دلوقت معلش؟
يعني انا امبارح في الشغل المدير مفروض يقعد لاخر الشيفت ويمضينا انصراف ويمشي هو وياخد معاه الدفتر لان الدفتر ده مسئوليته هو، قام المدير مشي وساب الدفتر مع واحد زميلنا وزميلنا، هو طيب ومؤدب ومتدين وكويس جدااااااااااا انا باحبه قوي، هو صحيح عنده تصور انه اتقى واكثر تدينا من كل الناس بس مش مهم تصوره عن نفسه هو حر فيه بس هو طيب وكويس فعلا وخير، المهم جيت امضي قال لي انا مش ح امضيكوا غير في المعاد لان الاستاذ فلان (المدير) استأمني، كل اللي واقفين كانوا اسم الله عليهم محارم، مناديل يعني، قعدوا يتملقوه ويتحايلوا عليه مش عارفة ليه، قلت له يا فلان من حيث المبدأ اللي انت عملته ده، بما انك مهتم بالحرام والحلال، حرام لانك ساعدته على التزوير هو بنفسه، الدفتر ده مسئوليته هو والمفروض انه قدام الادارة مسئول عن الدفتر فانه يسيبه في عهدتك ويمشي هو ده تزوير، المفروض يا يمشي في معاد ما احنا بنمشي يا يمشينا في المعاد اللي هو ماشي فيه ويتحمل هو المسئولية لكن كان مفروض تقول له انا ماليش دعوة بالمسئولية دي، لانها مش شغلتي، قوم يقول لي ايه؟ تصوروا يقول لي ايه؟: انا ما عنديش الشجاعة اني اقول له كده….لو انت عندك الشجاعة ووحش بنت سبع كلميه
قلت لهم طيب ادوني نمرته حد معاه نمرة الاستاذ فلان؟ اللي يقول لي اهدي، مع اني والله ما كنت متعصبة ولا حاجة، واللي يقول لي كلها ربع ساعة ما تعمليش مشكلة، مع اني ما كنتش ناوية اكلم الراجل واقول له ابوك لابو ابوك ولا حاجة، وفي الاخر واحد قال لي: يعني انت اللي شجاعة؟ طيب انا معايا نمرته وريني ح تكلميه ازاي
شجاعة؟ شجاعة؟ ده مدير ادارة، مش رئيس قناة ولا رئيس القطاع ولا رئيس مراجيح مولد النبي، ايه الشجاعة في اني اكلم واحد فرق السن بيني وبينه تمن سنين والفرق الوظيفي بيني وبينه درجة، ثم انه غلطان، والغلط بيضعف البني ادم مهما كان منصبه يعني، هو ما يقدرش يفتح فيا لانه غلطان، وانا كنت اقدر اقدم فيه مذكرة لو عايزة والقانون في صفي والقانون يحميني، اتصلت بيه وقلت له: يا استاذ فلان، حضرتك اللي مسئول عن الامضا مش فلان الفلاني، يا اما تقعد لحد المعاد يا اما تمضينا قبل ما تمشي انما ما ينفعش تسيب الامضا مع زميل مش مسئوليته وتعمل له مشاكل مع زملائه، دي مسئوليتك انت، عايزنا نمشي حداشر ونص يبقى انت اول واحد تقعد لحد حداشر ونص وتمضي الناس بنفسك، مش دي مسئوليتك برضه؟
فيها حاجة دي؟ دي فيها اي شجاعة؟ دي فيها اي تجاوز وللا مشاكل وللا حتى جدعنة؟ مش تصرف عادي ده؟
طيب السادة الزملا اللي في الاول ما كانوش مصدقين اني اعمل كده وبعد ما عملت كده انبهروا كأني حررت فلسطين، واللي يقول لي: ليه بس عملتي مشكلة! واللي يقول لي والله جدعة! جدعة؟ جدعة في ايه؟ انا واحدة غبية ومخي على قدي، ممكن حد يشرح لي ايه وجه الجدعنة في الكلمتين الخايبين دول؟ بكرة لما تقول صباح الخير يقول لك: اما والله واد عترة
بالذمة دول امشي بيهم في الصحرا ازاي؟
مش عارفين يكلموا مدير ادارة اكبر منهم بتمن سنين، ح يكلموا اسد؟

ما جراش حاجة اما ابقى غبية يعني

September 5, 2008
انا مخي على قدي مافيهاش حاجة، خريجة خامسة ابتدائي، حد يفهمني ايه الحكاية بقى؟ انا عايزة افهم ايه قصة سيدنا محمد معاهم؟ هم بيحبوه وللا ايه؟
اه والله عاملين زي الراجل اللي بيحب واحدة وهي مطنشاه ويقعد يشتم فيها بس عشان يجيب سيرتها كتير وعشان يطفش منها بقية الرجالة
ايه بقى رواية قصة حب سيدنا محمد مع السيدة عائشة؟ وايه موضوع انه اتجوز دي اصلا، مشغولين بحياته الخاصة مع مراتاته ليه؟ جرا ايه هم عندهم مشاكل وللا حاجة؟ طب ما يكلفوا نفسهم ويشتروا فياجرا ويسيبوا النبي بتاعنا يعني وللا خايفين من ازمة قلبية وللا مش جايبة معاهم نتيجة وللا ايه الحكاية بالظبط؟
بجد والله العظيم انا عايزة افهم سر التركيز الشديد مع شخص سيدنا محمد عليه الصلاة والسلام بالطريقة دي؟ يعني اكيد اللي عايشين دلوقت ما يعرفهوش ولا عمرهم شافوه ولا فيه بينه وبينهم اي حزازات ولا مشاكل
هي المشاكل معانا احنا طيب ما يكلمونا زي ما بنكلمهم يعني، هو عشان سيدنا محمد نبي الاسلام؟ طيب ما جورج واشنطن مؤسس الولايات المتحدة، ومارتن لوثر مؤسس البروتستانتية، يعني مش بنجيب سيرتهم ولا مهتمين نفكر فيهم اصلا احنا موحولين في اللي احنا فيه
ثم ان ده اتجاه عنصري فظيع ومش سامعين الهيومان رايتس ووتش بتتكلم، هم ما يعرفوش سيدنا محمد هم قصدهم يضايقونا احنا، مش دي عنصرية برضه يعني وللا انا باخرف؟
يعملوا رواية عن قصة حب سيدنا محمد مع السيدة عائشة؟ طيب يعني كام في المية من المسلمين نفسهم قاريين سيرة الرسول عند ابن هشام وللا حتى في الرحيق المختوم اللي هو بتاع المبتدئين؟
ده فيه ملايين من المسلمين كل معلوماتهم عن سيدنا محمد من فيلم الشيماء لقد نجا لقد نجا
ايه الحكاية؟ وايه كم الابداعات الفنية اللي بيأججها فيهم الرسول عليه الصلاة والسلام دي
روايات ورسومات وتي شيرتات
مالهم عاملين زي الولية الشرشوحة اللي غيرانة من جارتها كده؟ هم عايزين مننا ايه اكتر من اللي احنا فيه؟
عجايب والله