هدية من الشعب الامريكي

November 24, 2008

حاجة بقت تقرف…ايه النجاسة دي؟ الواحد حاسس ان البلد بقت كلها كنيف وكل الناس متعاصة بالقرف، عبيط اللي يتوضى في البلد دي…هو الشعب الامريكي مش ح يرحمنا من هداياه بقى؟ هي مش دي ضرايبه اللي بيشتغل ليل نهار عشان يدفعها؟ ما يعمل بيها لنفسه التأمين الصحي اللي عمالين يعيطوا عليه وكل واحد يترشح في الانتخابات يجري ريقهم عليه، ما يعمل بيها مدارس حكومي بدل تعليمهم المعاتيهي اللي واخد السيط ولا الغنا، ما يلموا بيها الهومليس اللي عندهم قبل ما يلموا المتسولين اللي عندنا، متسولينا احنا اولى بيهم، ما يعملوا بيها شاندوشتات حلاوة بالقشطة….انما مستلمينا بدين ام المعونة النجسة بتاعتهم لما لطخوا لنا البلد كلها بهداياهم البرازية لما خللوا البلد كلها متسولين وكمان اللي يعترض على التسول يبقى مجنون ومؤمن بنظرية المؤامرة

اععععععععععععععع

Advertisements

عاجل وفاة شاب على ايدي الشرطة في اسطبل عنتر

November 24, 2008

احمد محمود شحاتة، السن 19 سنة، عامل رخام، ساكن في خارطة الشيخ مبارك بمصر القديمة ظابط شرطة وقفه واخده تحري وفضل يضرب فيه لحد ما مات، اهله ما سكتوش وقدموا بلاغ راح الظابط ضغط على عمه عشان يتنازل عن المحضر، الجنازة طالعة بكرة الصبح من مشرحة زينهم، واهل الولد واللي في المشرحة مستعدين يشهدوا بالواقعة، ده مش اول واحد ينضرب لحد ما يموت، بس ده اول واحد اهله مش عايزين يسكتوا بالرغم من ضغط القسم عليهم، بس محتاجين حد يقف جنبهم

عسكر عسكر عسكر ليه احنا في سجن وللا ايه؟

November 23, 2008

انا مش عارفة ليه الهتاف ده بالذات بيخليني اعيط؟ انا مش باحب الهتاف قوي، الحقيقة انا باكرهه موت، بس الجملة دي بالذات بتوجعني قوي.


على فكرة انا عرفت اني لو اتحبست ماحدش ح يقف لي غير مركز هشام مبارك وخمستاشر واحد، ده اذا كملوا خمستاشر اصلا، انا لا في حزب ولا في جماعة ولا ليا شلة ولا صييحة في وكالات الانباء العالمية ولا سايبة لي حبيب يبقى مين ح يقف لي؟ اذا كان محمد عادل اللي المفروض كنت متوقعة ان الدنيا تبقى امم امم فوق بعض مافيش غير كام واحد ما حصلوش عشرين نفر هم اللي جم حاجة تكسف بجد، وطبعا اللي كاتب المذكرة مركز هشام مبارك، والمحامي اللي طلع المذكرة للنائب العام هو احمد الجيزاوي. امال انا بقى اللي مقطعة وش تلات اربع البشرية وجايبة مصارينهم تلاتة متر قدامهم؟

ياريت بقى ماحدش يتهم المصريين بالسلبية، لما واحد مختطف، مش معتقل، وعدد اللي عبروه تيت، ومركز هشام مبارك ابانا الذي في حقوق الانسان، يبقى الناس لها حق ما تعملش حاجة ولا تطالب بحقوقها ولا تتحرك وتعيش عمرها تتسول ابسط حقوقها وتوطي على رجلين الامن (اللي بنشكر حضوره بكثافة مما ادى الى نجاح التحرك ولفت نظر السيد النائب العام للكام واحد اللي جم) ويقولوا لهم نحب على رجليكوا اضرب الشلوت يا بيه براحتك بس بلاش في مكان عملية الزايدة

طيب يا اخي افرض مركز هشام مبارك ده كلهم جالهم برد، سافروا مارينا، لا وهم ايه اللي ح يسفرهم مارينا، سافروا جمسة او راس البر، افرض يعني وحد اتقبض عليه؟ يولع بجاز وسخ؟ ثم ان محمد مش مقبوض عليه ده مخطوف

لو مقبوض عليه تبقى شغلانة المحامين، لكن يتخطف؟ احنا فين هنا؟ انا عمالة افكر واكل في نفسي، اللي حصل له ده ممكن يحصل لاي حد فينا، الحمد لله ان العاشرة مساء جات ويارب يذيعوا التقرير

عموما اللي جم ربنا طرح فيهم البركة، لان احمد الجيزاوي فضل ملطوع على باب النائب العام ومش عارف يدخل لحد ما العيال طلعوا على السلم وقعدوا يهتفوا (بصرف النظر عن مشاعري الشخصية تجاه الهتاف واللي هي شبه مشاعري تجاه السبانخ) الا ان لولا كده ما كانش احمد عرف يدخل للنائب العام

واحنا واقفين برة مستنيين قابلت واحدة وشكلها كده كانت جاية تشتكي للنائب العام من داهية سودا، وفعلا طلعت نظرتي في محلها

الاستاذة حنان عرام المحامية جاية تشتكي النيابة العامة للسيد نائب العام، لانها اصبحت غير امينة على حقوق المواطن المصري انا مش ح اتكلم على كلامها

اسمعوها هنا

وهنا

وبعدين
احمد الجيزاوي خرج وقال لنا رقم البلاغ وان السيد النائب العام تعهد بانه يرد علينا في خلال اربعة وعشرين ساعة وطلب من المعتصمين انهم ينزلوا تحت

سبتهم عشان اجي انقل لكوا الفيديوهات وهم دلوقت قدام النيابة العامة ومش متعتعين قبل ما يعرفوا ايه اللي حصل لمحمد

اذا ما كانش عشان هو صاحبهم (وبالمناسبة هو مش صاحبي وما شفتوش في حياتي كلها غير يمكن مرة واحدة) يبقى عشان له اب وام واهل عايزين يعرفوا هو فين ولو كل دول مش مهمين يبقى احنا من حقنا نعرف احنا فين؟ احنا في مصر وللا في شيكاغو؟ اللي خطف محمد الامن وللا عصابات المافيا؟

محمد عادل مخطوف وبكرة رايحين للنائب العام

November 22, 2008

محمد عادل ما راحش البيت ولا اخد حاجات زي ما اشيع، النهارده ابوه راح للنائب العام، وبكرة رايحين تاني للنائب العام وعايزين اكبر عدد، لانه مش مقبوض عليه، اتخطف يوم الخميس والامن راح فتش بيته وما سالش عليه ولحد دلوقت مش عارفين هو فين، انا مش فاهمة بيعملوا كده ليه؟ يعني لما يقبضوا عليه ح نحوشه منهم؟ ما يعرفونا هو فين بدل ما ابوه يجرا له حاجة، انا ان شاء الله رايحة بكرة الساعة حداشر معاهم للنائب العام وياريت تيجوا وما تكسفونيش زي ندوة لا للحصار لا للتطبيع، انتوا احرجتوني قوي يوميها

ياللا، المهم ان اللي بيحصل لمحمد ممكن يحصل لاي حد فينا، حط نفسك مكانه وحط اهلك مكان اهله، اكيد محتاجين حد يقف جنبهم دلوقت، واحنا مش رايحين نتخانق احنا رايحين نشتكي للنائب العام زي اي انسان عنده شوية من الاحمر

اختطاف محمد عادل

November 22, 2008

محمد عادل صاحب مدونة ميت اختطف يوم الخميس ومش عارفين هو فين لحد دلوقت، ده الخبر اللي شفته على الجايكو، اخدت اجازة يوم عشان اكل عيشي ارجع الاقي الواد مخطوف، منين فين امتى، ماحدش يسألني ح اعرف واقول لكوا

اختفاء مدونة حبشتكنات فلسفية

November 22, 2008

مدونة حبشتكنات فلسفية اختفت، دي رابع مدونة تختفي من جوجل وتالت مدونة في ظرف اسبوع

فيه ايه على البلوج سبوت، على فكرة انا بعت لهم رسالة بوصفي مالكة لدومين دوت اورج وهم ما ردوش عليا وعمالة ابعت لهم جوابات ومش بيردوا ولا كأني باطاردهم عشان يتجوزوني

ايه القرف ده

احنا لازم نعمل حملة على جوجل

———-

على فكرة انا اللاب توب بتاعي اتحرق

حاليا دوقت انا عندي شغل

November 21, 2008

ومعلمي ح يرفدني لو ما قعدتش اشتغل، الشغل قد يخلص في اسبوع قد يخلص في شهر

على حسب دعواتكوا، اما نشوف بقى ابقاقكوا طاهرة قد ايه؟ بس انا قدامي شوية كده وارجع لكوا كعودة الندل

حد يعرف بقى ازاي لما تخش على حاجة تطلع من حاجة؟

November 20, 2008

ثانية واحدة، انا عارفة طبعا ان ميستوى اللغة بتاعي مرتفع وامثالكوا مش ح يفهموه

يعني حد يعرف ازاي اللي يفتح تهييس دوت اورج قوم يروح على هنا في الوورد برس؟ ياللا بقى قولوا، حاجة كمان، فين ام البتاعة اللي بتكبر الخط انا اتحولت

اللاب توب بتاعي ما بيفتحش

November 20, 2008

ودلوقت باكتب من جهاز تاني
صاحب العقل يديني عقله بقى
ملحوحة: انا دماغي هي الاقدم في صناعة الجزم
بمعنى: اخر بوست ح اكتبه هو قبل موتي بثانية انشالله ادور على اجهزة مصر كلها

انا انتقلت الى رحمة الله

November 20, 2008

على الوورد برس هنا
وانا من هذا المزنق بادعو كل السادة المدونين لترك هاذوها الميكان الميشبوه ونروح على الوورد والنهاردة الخيميس شكبة وكتك كتات وربنا يسامحنا ع الجيريمة اللي احنا ح نعملها